བོད་ཀྱི་གནམ་གཤིས་རིག་པ།

ཕུར་བུ་དོན་གྲུབ། ཆོས་གྲོགས་དྲ་བ། 2012-05-02

   ༡ བོད་ཀྱི་གནམ་གཤིས་རིག་པའི་རྩ་བའི་ལྟ་བ།
      འདིར་བོད་ས་མཐོའི་གནམ་གཤིས་རིག་པའི་རྩ་བའི་ལྟ་བ་ཞེས་རྒྱུ་མཚན་འགའ་ཞིག་གི་ཐོག་ནས་འཆད་རྒྱུ་མཆིས་ཀྱང་། སྐབས་བབས་ཀྱི་བརྗོད་དོན་དུ་བོད་ཀྱི་གནམ་གཤིས་རིག་པ་འདི་ཐོག་མའི་སྐྱེས་གནས་ཀྱི་རྒྱུད་རིམ་མམ་ལྟ་ཚུལ་དང་གནས་བབ་གང་འདྲ་ཞིག་གིས་མངལ་ལས་གྲོལ་ཚུལ་རེད།    དེ་ཡང་གནམ་གཤིས་རིག་པ་ནི་གནམ་དཔྱད་རིག་པའི་ཁྱབ་ཁོངས་ལས་མ་འདས་ཤིང་། གནམ་གཤིས་ཀྱི་འགྱུར་བ་དང་སྣང་ཚུལ་ཅི་རིགས་འབྱུང་བའང་རེ་རེ་ནས་རྟོགས་དགོས་ན། རྩ་བའི་ལྟ་བ་ནི་གནམ་དཔྱད་འབའ་ཞིག་ཏུ་འདོད་དོ།
དེའི་ཚུལ་ནི་རང་ལུགས་ཀྱིས་གནམ་གཤིས་སྔོན་རྟགས་སུ་ཞིབ་དཔྱོད་བྱ་ཡུལ་ཀྱང་གནམ་གོ་ལའི་སྐར་ཁྱིམ་གྱི་གནས་སྟངས་དང་དེ་དག་གི་འབྱུང་ཁུངས་དང་། དེར་གནས་པའི་གཟའ་དགུའི་འགྲོས་ཀྱི་ཁྱད་པར་ལས། འབྱུང་ཁམས་ཀྱི་འགྱུར་སྟོབས་ཆེ་ཆུང་བཅས་ཡིན་པ་ལ་བརྟེན་ནས་གནམ་གཤིས་ཀྱི་འགྱུར་བ་དངོས་སུ་ཆར་ཞོད་དང་སད་སེར། བཙའ་ཐན་དང་ས་གཡོ། ཤྭ་འོད་དང་གྲང་ལྷག་སོགས་ཀྱི་སྣང་བ་འགོག་ཏུ་མེད་པར་རྟོགས་ནུས་པ་ནི་ཡུད་ཙམ་མི་གནས་པར་འཁོར་བགྲོད་བྱེད་པའི་སྐར་ཁྱིམ་གོ་ལའི་གཟའ་རྣམས་ཀྱི་ཁྱད་པར་ལས་འབྱུང་བའི་ཆོས་ཉིད་ཅིག་ལགས་ན།   གནམ་གཤིས་རིག་པ་ནི་གནམ་དཔྱད་རིག་པར་བརྟེན་དགོས་ཤིང་གནམ་དཔྱད་རིག་པ་དེ་ཡང་སྐར་ཁྱིམ་གོ་ལའི་གཟའ་བགྲོད་ཀྱི་རིག་པར་བརྟེན་དགོས་ལ། གཟའ་བགྲོད་ཁྱད་ལྡན་གྱི་རིག་པ་དེ་ཡང་འབྱུང་ཁམས་འགྱུར་སྟོབས་ཀྱི་རིག་པར་བརྟེན་ནས་མ་འོངས་སྔོན་རྟོགས་ཀྱིས་རང་བྱུང་ཁམས་འདིའི་བདེ་སྡུག་སྟོན་ནུས་པ་ནི་རྩ་བའི་ལྟ་བ་ཡིན།
      ༢ གནམ་གཤིས་རིག་པའི་རླབས་ཆེན་གྱི་འཕུར་མཆོང་།
      བོད་ཀྱི་གནམ་གཤིས་རིག་པའི་རླབས་ཆེན་གྱི་འཕུར་མཆོངས་ལ་བརྟེན་ནས་དེང་རབས་འཕྲུལ་ཆས་ཅན་གྱི་གནམ་གཤིས་རིག་པ་དང་འདྲ་བར་རྒྱ་ཆེའི་སྤྱི་ཚོགས་དང་མིའི་རིགས་ཀྱི་འཚོ་བའི་འགལ་རྐྱེན་སེལ་ཕྱིར། ཉིན་རེ་བཞིན་གྱི་གནམ་གཤིས་འགྱུར་བའི་སྣང་ཚུལ་གང་ཡོད་སྔོན་བརྡ་གསལ་སྟོན་ཐུབ་ཀྱི་ཡོད་པ།   འདི་ཡང་ནུབ་རིའི་ཕྲག་པར་བཞུད་ཟིན་པའི་བགྲང་བྱ་ཉིས་སྟོང་ལྷག་གི་སྔོན་ནས་བར་སྣང་གི་བྱ་དང་སྤྲིན་ལ་བརྟག་པའི་ཐབས་ལས་དབུ་བརྙེས་ཏེ།   མི་རབས་མང་པོར་རྒྱུན་མ་ཆད་པར་རང་བྱུང་གི་སྣང་ཚུལ་ཞིབ་འཇུག་གིས་རྒྱུན་འབད་ཉམས་མྱོང་གསོག་སྡུད་བྱེད་པའི་བརྒྱུད་རིམ་ནང་ཚེ་གང་དཀའ་བ་དང་ལེན་གྱིས་རིག་པ་སློབ་ལ་གཞོལ་བའི་ཡབ་མེས་བཀའ་དྲིན་ཅན་རྣམས་ཀྱིས་རང་བྱུང་ཁམས་ཀྱི་གསང་གནད་རྟོགས་ཏེ། རྒྱ་ཆེ་ལ་གཏིང་ཟབ་པའི་ད་ལྟའི་ཚན་རིག་གི་རིགས་གཞུང་འདི་དག་གཏན་ལ་ཕབ་པ་ནས་བཟུང་མི་རིགས་རང་ཉིད་ཀྱི་རྒྱ་ཆེའི་དཔལ་འབྱོར་དང་།   འཚོ་བར་ཞབས་འདེགས་ཞུ་འགོ་ཚུགས་པ་མ་ཟད་སྤུན་ཟླའི་མི་རིགས་གཞན་དག་ལའང་ལེགས་སྐྱེས་སུ་ཕུལ་ཡོད་པ་རེད། དེར་བརྟེན་ད་ལྟའི་གནས་ཚད་འདིར་མཚོན་ན་ལོ་ཟླ་ཞག་དུས་འདི་དང་འདིའི་ནང་ལ། གཟའ་ཆེན་འདི་དང་འདི་ཡི་འཁོར་བགྲོད་ཀྱི་ཁྱད་པར་ལས། སྐར་ཁྱིམ་འདི་དང་འདིའི་སྟེང་དུ་སྤྱོད་པའི་རིང་ལ། གནམ་གཤིས་འགྱུར་ལྡོག་གིས་ས་གཞིར་བདེ་དོགས་འདི་དང་འདི་ལྟ་བུ་འབྱུང་ངོ་ཞེས།   ལོ་རེ་བཞིན་དུ་ས་རིས་ལམ་ནས་བསྟན་ཐུབ་ཀྱི་ཡོད་སྟབས་ངོ་གནོང་མི་དགོས་པའི་ཚད་མཐོའི་ཚན་རིག་ཅིག་ཡིན་པ་མ་ཟད་རླབས་ཆེན་གྱི་འཕུར་མཆོངས་ཤིག་ཀྱང་ཡིན་པས་ཁོ་བོས་དེ་ལྟར་བརྗོད་པ་ཡིན་ནོ། །
སྨྲས་པ།
ཅོལ་ཆུང་རྨོངས་བློའི་ཡིད་དང་ངག་སྒོ་ལས། །
དེ་ལྟར་བརྗོད་པའི་སྤོབས་པ་མ་མཆིས་ཀྱང་། །
མཁྱེན་ལྡན་སློབ་དཔོན་དུ་མའི་བཀའ་དྲིན་ལས། །
ཅུང་ཟད་ཐོས་རྣམས་ལྷག་བསམ་བཟང་པོས་བྲིས། །

བོད་ཀྱི་གནམ་གཤིས་རིག་པ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10