གླེང་གཞི།
གཏམ་རྒྱུད་དང་ངག་རྒྱུན་ལས་འདའ་བ་མེད་པའི་སྒྲུང་ནི་བོད་ལ་སྤུ་དེ་གུང་རྒྱལ་དུས་སུ་མ་སངས་ཀྱི་སྒྲུང་དང་མཆིལ་བའི་སྒྲུང་།རོ་ལངས་གསེར་སྒྲུབ་ཀྱི་སྒྲུང་སོགས་བྱུང་བ་དང་། རྗེས་སུ་དེ་དག་གི་བྱེད་ནུས་ལ་ངེས་ཤེས་ཟབ་མོ་རྙེད་དེ་ལོ་རྒྱུས་དེབ་ཐེར་དག་ཏུ། རྒྱལ་རབས་ཉེར་བདུན་ལ་ཆབ་སྲིད་སྒྲུང་ལྡེའུ་བོན་གསུམ་གྱིས་བསྐྱངས་ཞེས་རླུང་ལྟར་གྲགས་པ་དེ་ནི་བོད་མི་རྣམས་ཀྱིས་སྒྲུང་གི་ཁྲོད་ནས་སློབ་གསོའི་ལེགས་ལམ་རྙེད་ནས་སྲིད་སྐྱོང་ལ་རམ་འདེགས་ཀྱི་ནུས་པ་ལྡན་པར་ཤེས་པ་རེད།འདི་ནི་སྒྲུང་གི་བྱེད་ནུས་ལ་ངེས་ཤེས་ཀྱི་རིམ་པ་དང་བོ་ལྟ་བུ་རེད།སྒྲུང་གི་བྱེད་ནུས་ལ་ངེས་ཤེས་ཀྱི་རིམ་པ་དང་པོ་ལྟ་བུ་རེད།སྒྲུང་གིས་ཆབ་སྲིད་བསྐྱངས་ཞེས་པའི་དོན་ནི་དུང་དཀར་བློ་བཟང་འཕྲིན་ལས་མཆོག་གིས་ཁྲིམས་ལུགས་དང་ཀུན་སྤྱོད་ལེགས་ཉེས་སོགས་ཀྱི་དགེ་སྐྱོན་རྣམས་སྒྲུང་གི་ནང་གསལ་བའི་དྲང་ཕྱོགས་དང་ལྡོག་ཕྱོགས་ཀྱི་དཔེ་མཚོན་མི་སྣའི་གཟུགས་སུ་བཀོད་པའི་བྱ་ཐབས་སྤྱད་དེ་སྤྱི་ཚོགས་ཐོག་གི་མི་ཚང་མར་ཁྲིམས་ལུགས་དང་ཀུན་སྤྱོད།ཤེས་རིག་བཅས་ཀྱི་སློབ་གསོ་བྱེད་པའི་བྱ་ཐབས་སྤྱད་པ་དེར་ཟེར།དེང་སྐབས་ཡང་གོ་སྐོན་སློབ་གསོའི་ནུས་པ་ཆེ་བའི་སྒྲུང་ཐུང་སྣ་ཚོགས་བྲིས་པ་དེས་སྤྱི་ཚོགས་ཐོག་ལ་ཕན་འབྲས་ཧ་ཅང་ཆེན་པོ་ཐོན་པ་སྟེ།ཁྲིམས་ཁང་གི་ཁྲིམས་ལུགས་ལས་ཀྱང་ལེགས་པོ་ཡོད་ཅེས་གྲགས་པ་བཞིན།ཡི་གེའི་གཟུགས་རིས་མེད་པའི་དུས་སྐབས་སུ་ངག་རྒྱུན་གྱི་སྐད་ཆ་བབ་ཆགས་ཤིང་སྲོལ་རྒྱུན་ལས་མ་འདས་པས་བྱིས་པ་དང་རྒན་པ་གང་གིས་ཀྱང་མགོ་མཇུག་ལེགས་པར་རྟོགས་ནུས་པས་གོ་བ་སེམས་རྒྱུད་ལ་འཇོག་པར་ཐུ་མོང་མ་ཡིན་པའི་ཁྱད་ཆོས་ཡོད། །ཡི་གེའི་གཟུགས་རིས་ཡོད་པའི་ལོ་རྒྱུས་ཀྱི་དུས་སྐབས་ཤིག་ནས་ཡང་བསྐྱར་སྒྲུང་གི་བྱེད་ནུས་ལ་ངེས་རྟོགས་ཀྱི་རིམ་པ་གཏིང་ཟབ་ཏུ་སོང་ནས་ལུང་གི་ཆོས་གོ་བར་བྱ་བའི་ཕྱིར་སྒྲུང་བསྟན་ཞེས་བརྗོད།དེ་ནི་ཆོས་ལུགས་ཀྱི་སྟེང་གི་བཀོད་པའི་ཁྱབ་ཁོངས་ངེས་ཅན་ཞིག་ཏུ་གྱུར་བའི་རྨང་གཞིའི་རྐང་སྟེགས་ལྟ་བུར་གྱུར་ཡོད་པར་མ་ཟད།དེ་དུས་ཀྱི་གཉུག་གཤིས་ལས་མ་འདས་ཤིང་རྩུབ་ཤེད་ཀྱིས་ཁྱེར་བའི་མི་རྣམས་ལ་བསམ་བློ་བཅོས་བསྒྱུར་རང་སེམས་རྒྱུད་འདུལ་བའི་དུས་སྐབས་ཤིག་བྱུང་བ་ཡིན།སྙིང་རྗེ་པདྨ་དཀར་པོའི་མདོ་ལས།རྣམ་པར་འཕེལ་བ་དང་ཡོངས་སུ་མི་ཉམས་པ་དང་།ཀུན་དགའ་བོ་དེ་བཞིན་གཤེགས་པས་གསུངས་པའི་ཆོས་འདུལ་བ་འདི་རྣམ་པར་འཕེལ་བ་དང་ཡོངས་སུ་མི་ཉམས་པ་དང་།ཀུན་ཏུ་སྲུང་ཞིང་སྦ་བ་དང་།ཆུད་མི་བཟའ་པར་བྱ་བའི་ཕྱིར་ཁྱེད་ལ་དཔེ་བསྟན་པར་བྱ་སྟེ་འདི་ལ་སྐྱེས་བུ་ཁ་ཅིག་དཔེས་སྨྲས་པའི་ཤེས་པར་འགྱུར་རོ། ། ཞེས་གསུངས་པ་ལྟར། སྐྱེས་རབས་དང་རྟོགས་བརྗོད། རྣམ་ཐར་སོགས་གཏམ་རྒྱུད་ལ་སྦྱར་ཏེ་དཔེ་ཡི་སྒོ་ནས་ཆོས་ཀྱི་དགོངས་དོན་སླ་མོ་སྟོན་པ་ཡིན།དེ་ཡང་ལོ་རྒྱུས་ཁྲོད་ཀྱི་རིག་གནས་འཕེལ་བའི་དུས་སྐབས་ངེས་ཅན་ཞིག་ལ་སྒྲུང་དེ་ཆོས་ལུགས་སྤེལ་བའི་དུས་སྐབས་ངེས་ཅན་ཞིག་ལ་སྒྲུང་དེ་ཆོས་ལུགས་སྤེལ་བའི་ལག་ཆ་རུ་གྱུར་བའི་རྣམ་པ་ཙམ་ཡིན་པ་འདི་ནི་སྒྲུང་གི་བྱེད་ནུས་ལ་ངེས་རྟོགས་ཀྱི་རིམ་པ་གཉིས་པ་ལྟ་བུ་ཡིན།
   སྤྱིར་ན་གཏམ་རྒྱུད་ངག་རྒྱུན་དུ་གྲུབ་ཅིང་། ངག་རྒྱུན་ཡང་གཏམ་རྒྱུད་དུ་སོང་སྟེ་ཕན་ཚུན་དབྱེར་མེད་ལྟ་བུ་ཞིག་ཏུ་སོང་མོད། ཞིབ་ཏུ་ཕྱེ་ན་གཏམ་རྒྱུད་དང་འབྲེལ་བའི་དུས་ཚོད།མི་སྣ་བཅས་ལ་ངོས་འཛིན་ཟབ་མོ་མེད།ངག་རྒྱུན་ལ་དངོས་ཡོད་ལོ་རྒྱུས་ཀྱི་རང་བཞིན་ཤུགས་དྲག་པ།གཏམ་རྒྱུད་ཀྱིས་མི་དམངས་ཀྱི་འཞོ་བའི་འདུན་པ་སོགས་མཚོན་གྱི་ཡོད་པས་གསར་བཞེངས་བྱས་པའི་མི་སྣ་རྣམས་ཀྱང་བཟང་པོ་རྣམས་ངན་པ་ལས་རྒྱལ་དགོས་པའི་སྒྲིག་གཞི་སྤྱི་མཐུན་པ་ཞིག་ཡོད།ངག་རྒྱུན་ནི་དེ་ལྟར་མ་ཡིན་པར་མི་རིགས་དང་ས་ཁུལ་གྱི་ཁྱད་ཆོས་དང་ལོ་རྒྱུས་ཀྱི་བདེན་དངོས་ངེས་ཅན་ཡོད། འདི་དག་ཀྱང་སྒྲུང་གི་གྲུབ་ཆ་ཡིན་ངེས་སོ། །

དང་པོ།   བསམ་བློའི་བཙན་རྫོང་།

སྒྲུང་ལ་ཅི་རིགས་ཤིག་ཡོད་ཀྱང་།མི་རོ་རྩེ་སྒྲུང་ལ་གོང་གསལ་གྱི་སྒྲུང་གི་བྱེད་ནུས་གཉིས་དང་ལྡན་ཏེ།ཆབ་སྲིད་སློབ་གསོའི་བྱེད་ནུས་དང་ལུང་གི་ཆོས་གོ་བའི་བྱེད་ནུས་གཉིས་དང་ལྡན་པའི་ཁྱད་ཆོས་ཡོད་ཀྱང་།འདིར་ལུང་གི་ཆོས་གོ་བྱ་སྟེ་སྐབས་དེར་མགོན་པོ་ཀླུ་སྒྲུབ་ཀྱིས་ཆོས་ལུགས་སྤེལ་བའི་བསམ་བློ་དེའི་ཐབས་སམ་འདི་འདེམས་པར་སྐབས་བབ་ཀྱི་རིག་གནས་འཕེལ་བ་དང་མི་རྣམས་རྟོགས་སད་ཀྱི་ཆུ་ཚད་དང་འཚམས་པའི་དགོངས་གཞི་དཀྱིལ་སྙིང་དུ་བཟུང་ནས་བརྗོད་འདོད།
   གཅིག མི་རོ་རྩེ་སྒྲུང་ནི་བོད་སྤྱི་ཚོགས་ཁྲོད་རྒན་པ་དང་བྱིས་པའི་བསམ་བློར་སྤྲོ་བ་བསྐྱེད་བྱེད་ཅིག་ལས་མ་འདས། སྐབས་དེའི་སྤྱི་ཚོགས་ཀྱི་རྣམ་པ་ནི་རིག་གནས་ངོས་ཐད་ནས་སྲོལ་རྒྱུན་གྱིས་བཅིངས་པ་ཤས་ཆེ་ཞིང་དེའི་གོམས་སྲོལ་གྱིས་མིའི་བསམ་བློ་བཅིངས་པས་མི་རྣམས་ལ་རྒྱུན་དུ་འདུ་ཤེས་ཀྱི་གཏིང་རིམ་ན་བག་ལ་ཉལ་བའི་དྲགས་རེངས་ཀྱི་ནད་རྙིང་བཅོས་ཡོད་ངེས།དེ་སེལ་ཐབས་སུ་མི་རྣམས་བྱ་དངོས་གསར་བར་འདང་རྩིས་ཆེ་བ་ཞིག་ཡིན་པས་བོད་མི་ཨ་གསར་ལ་ཡང་དགའ་སོང་བ་ཞིག་ཏུ་གདའ།དེ་ལྟ་བུའི་ཁོར་ཡུག་གི་སེམས་ཁམས་ཅན་ལ་མི་རོ་རྩེ་སྒྲུང་ལྟ་བུ་བྱུང་བ་ནི་བསམ་བློའི་མཁོ་རྫས་ཤིག་དང་སྐྱིད་སྣང་གི་ལོངས་སྤྱོད་ཅིག་ཅིག་མ་ཡིན།མི་རོ་རྩེ་སྒྲུང་གི་ནང་དོན་ནི་སྐབས་དེའི་ཁོར་ཡུག་གི་བོད་འབངས་རྣམས་ལ་སེམས་གསོའི་ཚུལ་དུ་འདུགམི་ནི་འཇིག་རྟེན་ཆོས་བརྒྱད་ཀྱི་དབང་དུ་སོང་བ་ཞིག་ཡིན་པས་བསྟོད་པ་བྱས་ན་མི་དགའ་མཁན་མེད།མི་རོ་རྩེ་སྒྲུང་ནམ་བྱུང་ལ་ལོ་རྒྱུས་ཀྱི་ཞིབ་ཆ་མེད་ན་ཡང་མགོན་པོ་ཀླུ་སྒྲུབ་ཀྱི་སྐབས་སུ་བྱུང་བ་ཤ་སྟག་རེད།སྐབས་དེའི་སྲོལ་རྒྱུན་གྱིས་བཅིངས་པའི་མི་རྣམས་ཀྱི་སེམས་ཁམས་ཀྱི་དྲེགས་རེངས་ནད་རྙིང་དེ་སེལ་ཐབས་སུ་འཆར་ཡན་དང་རྟོག་བཏགས་ལ་བརྟེན་ནས་མི་རྣམས་ཀྱི་སེམས་ཀྱི་འདུན་པ་སྒོར་ཕྱུང་ཡོད་པ་མ་ཟད། གཏམ་རྒྱུད་ཀྱི་སྒྲིག་གཞི་ཡང་སྤྱི་ཁྱབ་ནས་བལྟས་ན་བདེ་སྐྱིད་བཟང་བོ་མི་བཟང་དབུལ་པོ་ཞིག་ཡིན་པ། མི་འདོད་བཞིན་དུ་སྒྱུ་མ་མཁན་སྤུན་བདུན་བསད་པས་མགོན་པོ་ཀླུ་སྒྲུབ་ཀྱི་བཀའ་བཞིན་སྡིག་པ་བཤགས་ཕྱིར་དགེ་བའི་ལས་ལ་བརྩོན་པ་དང་མཐར་མི་བཟང་དབུལ་བོ་དེས་ལས་འབྲས་བརྩི་ཕྱིར་རྒྱབ་བ་ཞིག་ཡིན།དེའི་ཕྱིར་མི་དམངས་རྣམས་ཤིན་ཏུ་ནས་ཀྱང་མི་རོ་རྩེ་སྒྲུང་ལ་མོས་ཏེ་བྱིས་པ་ཡན་ཆད་ནས་རྒན་པ་མན་ཆད་ཀྱིས་བཤད་ཤེས་པ་བྱུང་།ཆ་རྐྱེན་འདི་ལྟ་བུ་འཛོམས་པས་དམངས་ཁྲོད་དུ་ཤུགས་ཆེ་དར་ཞིང་།འདི་ནི་སྐབས་དེའི་བོད་དམངས་ཁྲོད་ཀྱིས་མི་རོ་རྩེ་སྒྲུང་ལ་བཟུང་བའི་ལྟ་སྟངས་དང་མི་རོ་རྩེ་སྒྲུང་གི་བོད་ཀྱི་སྤྱི་ཚོགས་གནས་བབ་ཀྱང་རེད།
 གཉིས། མགོན་པོ་ཀླུ་སྒྲུབ་ཀྱི་དགོངས་པ་ཤ་སྟག་ནི་མི་རོ་རྩེ་སྒྲུང་བརྒྱུད་དེ་མང་ཚོགས་ལ་ཆོས་ལུགས་རྒྱ་ཆེ་ཞིང་གཏིང་ཟབ་པའི་སྒོ་ནས་སྤེལ་བ། ཀླུ་སྒྲུབ་དང་ཐོགས་མེད་ནི་ཐེག་ཆེན་གྱི་དགོངས་པ་སྤེལ་མཁན་གཙོ་བོ་ཡིན་པ་དེས་ཀླུ་སྒྲུབ་ཁོང་ཆོས་ལུགས་པ་རྣམ་དག་ཅིག་ཡིན་པ་གསལ་བས་ཆབ་སྲིད་སོགས་ཀྱི་ཇུས་གཞི་མེད་སྙམ།དེ་ལ་ཡང་ཁོང་གི་དགོངས་པར་ཆོས་ཆོས་སུ་མ་བྱས་པར་རྩེད་སྤྱད་ལྟར་སེམས་ཅན་ལ་ངན་གཡོ་དང་མགོ་སྐོར་བྱས་ན་མི་བཟང་བ་མ་ཟད་ལས་འབྲས་ཚུལ་བཞིན་སྲུང་དགོས་ཚུལ་མོ་སྟོན་ཕག་མགོ་ལས་ཀྱང་གསལ་བོར་བསྟན་ཡོད།དེར་མ་ཟད་བཤེས་སྤྲིངས་སོགས་ལས་ཅུང་གཏིང་ཟབ་པའི་སྒོ་ནས་ཆོས་ཀྱི་གནས་ལུགས་གསལ་བོར་བརྗོད་ཡོད།ད་དུང་རོ་སྒྲུང་གི་མཇུག་གི་བསྔོ་སྨོན་ལ། བསྟན་འདིར་སྟོན་པ་གཉིས་པར་གྲགས་པ་ཡི། ། འགྲོ་བའི་མགོན་པོ་ཀླུ་སྒྲུབ་སྙིང་བོ་དེས། ། རྒྱུ་འབྲས་ཡིད་ཆེས་བླང་དོར་བྱ་བ་དང་།།མི་ཆོས་ཕྱི་ཐག་གཞུང་བསྲིངས་བྱ་བའི་ཕྱིར།།འབྲས་བུ་དགེ་འབྱུང་བསམ་པ་གྲུབ་པ་ཡིས། །ངོ་མཚར་དགེ་འབྱུང་བསྟན་བཅོས་འཕྲེང་བ་མཛད།།འདི་མཐོང་ཀློག་པ་ཐུན་མོང་དངོས་གྲུབ་ནི།།སྣ་རེ་འབྱུང་ཞེས་མཁས་པའི་ངག་ལས་འབྱུང་།རྟེན་འབྲེལ་བཟང་པོ་དགའ་སྟོན་ཆེན་པོ་ཡིས།།སྐྱེ་དགུ་ཚིམས་ཤིང་ཡངས་པའི་རྒྱས་ཁམས་འདིར།།ཤིན་ཏུ་དགེ་ཞིང་བདེ་སྐྱིད་འབྱུང་གྱུར་ཅིག།ཅེས་པ་ལས་སྟོན་པ་གཉིས་པར་གྲགས་པ་དེས་ཀྱང་ཆོས་ལུགས་པ་རྣལ་མ་ཞིག་ཡིན་པར་བསྟན་ཡོད་ལ།ད་དུང་འདི་མཐོང་ཀློག་པ་ཐུན་མོང་དངོས་གྲུབ་ནི།།སྣ་རེ་འབྱུང་ཞེས་མཁས་པའི་ངག་ལས་འབྱུང་།ཞེས་པར་ཆོས་ལུགས་སྤེལ་བའི་བསམ་བློའི་དགངོས་གཞི་ཤུགས་ཆེར་མངོན།ཀློག་པ་པོ་འགུགས་པའི་བསམ་བློ་ཡོ་བྱད་དེ་ཐུན་མོང་དངོས་གྲུབ་སྣ་རེ་འབྱུང་ཞེས་པར་གསང་སྟོབས་རང་བཞིན་གྱིས་གསུངས་ཡོད།དེ་ལྟར་ཆོས་ལུགས་སྤེལ་བའི་དམིགས་ཡུལ་ལྡན་པས་ཀླུ་སྒྲུབ་ཁོང་གིས་དམངས་ཁྲོད་ལ་ཤུགས་བརྒྱབ་ཡོད་ཅིང་། དེ་ཡང་ཆོས་ལུགས་སྤེལ་བའི་དམིགས་ཡུལ་ལྡན་པས་ཀླུ་སྒྲུབ་ཁོང་གིས་དམངས་ཁྲོད་ལ་ཤུགས་བརྒྱབ་ཡོད་ཅིང་།དེ་ཡང་ཆོས་ལུགས་རང་ལུགས་ལ་རྒྱལ་ཁབ་དང་མི་རིགས།ས་ཁུལ་གྱི་ཕྱོགས་རིས་མེད་པར་སེམས་ཅན་ཐམས་ཅད་ལ་དམིགས་པ་ཞིག་ཡིན་པ་དེ་ཤེས་ཡོད་པས་ཡིན།སྤྱིར་ན་བོད་ལ་སངས་རྒྱས་ཆོས་ལུགས་ནི་གྲལ་རིམ་ལྟར་ན་གོང་རིམ་ཕོ་བྲང་ནས་བཟུང་འོག་རིམ་དམངས་ཁྲོད་དུ་དར་བ་ཞིག་རེད།འདི་ལྟར་སྤེལ་ན་སྤྱིར་བཏང་གི་རིག་གནས་སྤེལ་བ་དང་མི་འདྲ་བར་མི་དམངས་ཀྱི་དད་པའི་སྟོབས་ཀྱིས་རིག་གནས་གསར་བ་དེ་དང་ལེན་བྱ་དཀའ།དེའི་ཕྱིར་གནད་དོན་འདིར་དམིགས་ནས་བབ་ཆགས་ཀྱི་ཚིག་རིས་ལ་བརྟེན་ཞིང་གོ་སླ་བའི་གཏམ་རྒྱུད་ལ་སྦྱར་ནས་དམངས་ཁྲོད་དུ་ཤུགས་བཀོལ་ཡོད་པ་ཞིག་ཏུ་སྣང་།འདི་ནི་ཐོག་མའི་བོད་དམངས་ཁྲོད་ཀྱི་དད་པ་སྟོབས་ཆེན་དེ་སྒུལ་བྱེད་དུ་ཐབས་བཀོལ་བ་ལྟ་བུ་ཞིག་རེད་སྙམ། །
 གཉིས་པ། སྒྱུ་རྩལ་གྱི་ཐབས་འཕྲུལ།
གཅིག  ས་ཁུལ་དང་མི་རིགས་གང་གི་གཏམ་རྒྱུད་ཀྱིས་ས་དེའི་མི་རྣམས་ཀྱི་འཚོ་བའི་འདུན་པ་རང་ཆས་སུ་མཚོན་གྱི་ཡོད་ཕྱིར། མི་རྣམས་ཀྱི་མཛེས་རྟོགས་གི་འདུ་ཤེས་དེ་ཡང་མངོན་སུམ་དུ་མཚོན་ཡོད།དེ་བཞིན་གཏམ་རྒྱུད་འདི་ལའང་ཆོས་ལུགས་ཕྱོགས་ཀྱི་བྱམས་དང་སྙིང་རྗེ་སོགས་ཀྱི་མཚོན་པའི་ཡིད་འཕྲོག་གི་ནུས་པ་མི་དམན་པ་མངའ་སྟེ། དབུལ་བོ་དེ་ཕྱུག་པོ་ལས་རྒྱལ་དགོས་པ་དང་། བཟང་པོ་དེ་ངན་པ་ལས་རྣམ་པར་རྒྱལ་དགོས་པ་ནི་ལས་འབྲས་ལས་བྱུང་བ་དང་།བདེན་པ་དེ་རྒྱལ་དགོས་པ་རྫུན་མ་དེས་ཉེས་པ་བསགས་པས་ཕམ་དགོས་པའི་ངག་རྒྱུན་ལས་འདས་པའི་གཏམ་རྒྱུད་ཀྱི་སྒྲིག་གཞིའི་ཐབས་འཕྲུལ་དེ་སྤྱི་མཚན་དུ་ལྡན་ཡང་།སྐབས་དེའི་གཞུང་རྒྱུད་དྲང་བའི་མི་རྣམས་ཀྱི་བསམ་པ་དང་འཚོ་བའི་འདུན་པར་མི་རོ་རྩེ་སྒྲུང་གི་གཏམ་རྒྱུད་ཀྱི་ནང་དོན་རྣམས་ནི་ཧ་ཅང་འཚམས་ཤིང་མཛེས་རྟོག་གི་ཉམས་སྣང་སྟེར་ཐུབ་ལ།དེ་ཡང་གཏམ་རྒྱུད་བྱུང་རིམ་ལ་དངོས་ཡོད་དང་རྟོག་བཏགས་ཟུང་འབྲེལ་དུ་ཡོད་པས་ཀུན་ནས་ཡིད་འཕྲོག་པར་འགྱུར།གཏམ་རྒྱུད་དང་ངག་རྒྱུན་ནི་འཚོ་བ་དང་འབྲལ་ཐབས་མེད་པའི་ཕྱིར་ན།འཆར་ཡན་དང་རྟོག་བཏགས་དེས་ཀྱང་མི་རྣམས་ཀྱི་འདོད་འདུན་ཟབ་མོ་རྣམས་གཏིང་ནས་བག་ལ་ཉལ་དུ་མ་བཅུག་པར་ཕྱིར་ཕྱུང་བའམ་མངོན་པའི་མཚོན་རྟགས་ལྟ་བུར་གྱུར་སོང་།དེར་ཡང་བོད་ཀྱི་དམངས་ཁྲོད་རྩོམ་རིག་སྤྱི་བཤད་བློ་གསར་འདྲེན་པའི་སྐྱ་རེངས་ཞེས་བྱ་བ་ལས་དངོས་ཡོད་ཀྱི་འཚོ་བ་དེ་ཡང་གཏམ་རྒྱུད་ཀྱི་བརྗོད་བྱའི་ནང་དོན་གྲུབ་བའི་རྒྱུ་རྐྱེན་གལ་ཆེན་ཞིག་ཏུ་གྱུར་བ་རེད།ཡིན་ནའང་།གཏམ་རྒྱུད་ཀྱིས་མཚོན་པར་བྱས་པའི་འཚོ་བ་ནི་མེ་ལོང་ནང་ལ་གཟུགས་བརྙན་ཤར་བ་ལྟར་ཕྱི་རོལ་ཡུལ་གྱི་དངོས་པོ་ཐམས་ཅད་འདྲ་བཤུས་བྱས་པ་ཞིག་མ་ཡིན་པར།མི་དམངས་ཀྱི་ཀླད་པའི་རྩོལ་བབ་ལ་བརྟེན་ནས་ལས་སྣོན་བྱེད་དགོས།རྒྱུ་མཚན་དེའི་དབང་གིས་ངལ་རྩོལ་མི་དམངས་ཀྱིས་རང་གི་ལྟ་ཚུལ་དང་བསམ་ཚུལ་གྱི་འཁྱེར་སོ་གཞིར་བཞག་སྟེ་འཚོ་བ་ལ་དབྱེ་ཞིབ་དང་།གསལ་བཤད།གདེང་འཇོག་བཅས་བྱེད་དགོས་པ་དང་།འཚོ་བའི་ནང་གི་སྣང་ཚུལ་གང་དག་ལེགས་པ་དང་བཟང་བར་དགའ་ཞེན་བྱེད་དགོས་ལ།གང་དག་མི་ལེགས་པ་དང་མི་བཟང་བར་སྡང་སེམས་འཛིན་པ་སོགས་ལེགས་ཉེས་སྤང་བླང་གི་ཆ་དེ་སྟོན་གྱི་ཡོད་པས་དེའི་ནང་དུ་འུད་དང་རབ་བཏགས།རྟོག་བཏགས་དང་འཕྲུལ་སྣང་སོགས་རང་སྣང་གི་བསམ་པའི་བརྩེ་དུང་འདྲེས་ཡོད་པ་རེད།རྒྱུ་མཚན་དེའི་དབང་གིས་གཏམ་རྒྱུད་ཀྱི་བརྗོད་བྱའི་ནང་དོན་ལ་ཕྱི་རོལ་ཡུལ་གྱི་དངོས་ཡོད་འཚོ་བ་འདུས་ཡོད་པ་མ་ཟད།འཆར་ཡན་རིང་ལུགས་ཀྱི་འཚོ་བའི་ལྟ་ཚུལ་དང་འཚོ་བ་དེར་བཅངས་པའི་བརྩེ་དུང་ཡང་འདུས་ཡོད་པས་དངོས་ཡོད་དང་རྟོག་བཏགས་གཉིས་ཟུང་དུ་འབྲེལ་ནས་བྱུང་བ་ཞིག་རེད།ཅེས་པ་བཞིན་དུ་གཏམ་རྒྱུད་ཀྱི་དོན་དག་ནི་དངོས་ཡོད་དུ་མི་སྣང་མོད་དགའ་སྐྱོ་ཆགས་སྡང་གི་བརྩེ་དུང་གི་རྣལ་མ་ཡིན་ངེས། །
གཉིས།
བབ་ཆགས་ཤིང་སྤྱི་མཐུན་གྱིས་བཀོལ་བའི་ཚིག་གི་སྒྱུ་རྩལ་ལ་བརྟེན་པ་ནི་ཡོངས་ཁྱབ་རང་བཞིན་ལྡན་པའི་ཡིད་འཕྲོག་ནུས་པ་ཁྱད་པར་ཅན་ཞིག་ཡིན་ཏེ།སྤྱིར་ན་ཆོས་ལུགས་སྤེལ་བྱེད་ཀྱི་ཐོག་མའི་རྨང་གཞི་ལག་ཆ་ཡིན་པས་རྒན་པ་ནས་བྱིས་པའི་བར་གྱི་མི་ཚང་མས་གོ་བ་ལོན་འོས་པ་ཞིག་ཡིན་དགོས།སངས་རྒྱས་ཆོས་ལུགས་དར་རྗེས་བོད་ལ་རྣམ་ཐར་དང་རྟོགས་བརྗོད་སོགས་རྩོམ་རིགས་བརྩམས་ཆོས་རྣ་ས་ལ་བསྟོད་པའི་ཤན་ཞུགས་ནས་ཐོག་མར་སྐུ་དང་དེ་ནས་གསུངས།དེ་ནས་ཐུགས་སོགས་རིམ་བཞིན་དཔེ་དང་དཔེ་ཅན་ལ་འགྱུར་བ་མེད་པའི་སྤྱི་མཐུན་གྱི་འགྲོས་ཤིག་སྒེར་ཚུགས་སུ་གདའ།སངས་རྒྱས་ཆོས་ལུགས་ནི་བོད་ལ་མ་གཏོགས་ཕྱི་རྒྱལ་ལ་དར་ཡོད་མོད་དེ་ལྟ་བུའི་སྣང་ཚུལ་མེད་པ་རེད།འདི་ནི་དད་པའི་སྟོབས་དང་དགེ་རྒན་བསྟེན་ཚུལ་གྱི་གནད་དོན་ཞིག་ལས་མཁས་པ་གོང་མ་དང་རང་གི་སློབ་དཔོན་གྱི་གསུངས་ལ་དོགས་སློང་མ་བྱས་པར་ལད་འབྲི་བྱས་པས་རིམ་བཞིན་རྒྱུན་ཆགས་པར་སྙམ།ཡིན་ནའང་།གཏམ་རྒྱུད་འདི་ལ་འདི་ལྟབུའི་སྣང་ཚུལ་མེད་པ་ནི་གཏམ་རྒྱུད་དང་ངག་རྒྱུན་གྱི་མང་ཚོགས་རང་བཞིན་གྱི་འབུར་ཚུགས་སུ་ཐོན་པའི་ཁྱད་ཆོས་ཤིག་ཏུ་འདོད།།དཔལ་མགོན་སློབ་དཔོན་ཀླུ་སྒྲུབ་ཀྱིས་མཛད་པའི་རོ་ལངས་གསེར་འགྱུར་གྱི་ཆོས་སྒྲུང་ཉེར་གཅིག་རྒྱས་པར་ཕྱེ་བ་བཞུགས་སོ་ཞེས་པར་གཞིགས་ན་ད་ལྟ་ང་ཚོའི་ཉེ་འཁོར་ན་རླུང་ལྟར་འཁུར་བའི་མི་རོ་རྩེ་སྒྲུང་གི་གཏམ་རྒྱུད་དག་ནིདེ་ལས་རིམ་བཞིན་འཆད་ཉན་ལ་བརྟེན་ནས་མང་ཚོགས་ཀྱི་ཁྲོད་ཁྱབ་བརྡལ་དུ་སོང་ནས་མཐར་མང་ཚོགས་ཀྱིས་ཁ་གསབ་རགས་རིམ་བྱས་པ་དེ་ལ་མི་རོ་རྩེ་སྒྲུང་ཞེས་བཏགས་པ་ཞིག་ལས་ཁུངས་ནི་ཀླུ་སྒྲུབ་ཀྱི་ཆོས་སྒྲུང་ཉེར་གཅིག་ཡིན་པར་ཐག་ཆོད།འདི་ནི་མགོན་པོ་ཀླུ་སྒྲུབ་ཀྱི་ཆེད་དུ་དམིགས་ཀྱི་ལག་ཆ་ཞིག་ཡིན་ཡང་སྲིད།ངས་འདིར་ལག་ཆ་ཁྱད་པར་ཅན་ཟེར་བ་ནི་སྐབས་དེའི་སྤྱི་ཚོགས་ཀྱི་གནས་བབས་ལ་གཞིགས་ན་སྲོལ་རྒྱུན་གྱི་གོམས་སྲོལ་གྱིས་ཀུན་ནས་བཅིངས་ཡོད་ཕྱིར།རྒན་པ་རྣམས་ཀྱི་བསམ་བློ་བཅོས་བསྒྱུར་བྱེད་པ་དཀྱིལ་སྙིང་དུ་མ་བཟུང་བར་བྱིས་པ་རྣམས་ཏེ་མི་རབས་གཅིག་གི་འདུ་ཤེས་ཀྱི་རྨང་སློག་ན་ད་གཟོད་རིན་ཐང་ལྟ་བ་དང་མཛེས་རྟོག་ལྟ་ཚུལ་སོགས་འགྱུར་ནས་དམིགས་ཡུལ་ལེགས་འགྲུབ་ཡོང་ཐུབ།དེའི་ཕྱིར་ཁྱད་པར་མཁོ་བའི་སྒྱུ་རྩལ་གྱི་ལག་ཆ་ཞིག་ཀྱང་རེད།ཐུན་མོང་མ་ཡིན་པའི་ཡིད་འགུགས་ཀྱི་ཁྱད་ཆོས་ཤིག་ཡོད་པ་ནི་གཏམ་རྒྱུད་ཀྱི་མགོ་ནས་མཇུག་བར་རང་ཤུགས་ཀྱིས་མཉམ་འཇོག་བྱས་ཏེ་བློ་རིག་གྲུང་བོས་རང་ཤུགས་ཀྱིས་ཀློག་པ་ཡིན་ཏེ།ང་ཚོས་གཏམ་རྒྱུད་ཅིག་གི་མགོ་ནས་མར་ལྟ་དུས་ཟླ་བ་བཟང་པོས་ཐུན་བཏང་སྟེ་ངག་ཤོར་འགྲོ་སྙམ་པའི་ཚོར་བ་ཞིག་གིས་ཀུན་ནས་གཅུན་ཡོང་།ཐུན་ཤོར་ན་ཡང་བསྐྱར་ཕྱིར་བསྐྱོད་དགོས་པས་བར་གླགས་རེར་ཀློག་པ་པོར་ཆད་སྣང་དང་ཞེ་སྡང་ཀྱང་སྟེར་སྲིད། བློ་རིག་བསྒྲིམས་དགོས་པ་གཙོ་བྱས་ནས་དགའ་སྐྱོ་ཆགས་སྡང་གི་ཚོར་བ་དེས་གཏམ་རྒྱུད་དེ་ཐེངས་གཅིག་ཞིབ་མོར་ཀློག་ངེས། འདི་ཡང་ཡིད་འཕྲོག་གི་ཁྱད་ཆོས་མངོན་སུམ་ཞིག་ཡིན་པ་བཀླགས་ཟིན་པ་རྣམས་ལ་གསལ་ཆཡོད།དེ་བཞིན་ཀུན་གྱིས་གླེང་གཞིན་པའི་སྒྲུང་གཏམ་རིང་བ་གཅིག་གི་ནང་དུ་སྒྲུང་ཐུང་འགའ་ཙམ་མུ་ཏིག་བསྟར་ལ་བརྒྱུས་འདྲར་བསྒྲིགས་ཏེ་རྒྱུན་ལྡན་གྱི་འཚོ་བའི་ནང་འདྲེས་ཆེ་བའི་གཏམ་དཔེ་བཀོད་པའི་ཁྱད་ཆོས་ཀྱང་ལྡན།
གསུམ་པ། སྤྱི་ཚོགས་ཀྱི་གནད་འབྱིན།
གཅིག མི་རོ་རྩེ་སྒྲུང་ནི་བོད་ཀྱི་རིག་གནས་ཀྱི་ངོ་བོར་གྱུར་ཡོད།དེ་ཡང་ས་ཆ་གང་ཞིག་གི་གཏམ་རྒྱུད་སོགས་ཀྱིས་ཆ་དེའི་མཛེས་རྟོག་གི་འཚོ་བ་བརྒྱུད་དེ་ས་ཆ་དེ་གའི་སྤྱི་ཚོགས་འཚོ་བ་དང་མི་རྣམས་ཀྱི་དགའ་སྐྱོ་ཆགས་སྡང་སོགས་རེ་འདུན་རྣམས་མཚོན་གྱི་ཡོད་པ་དང་།ཤར་ཕྱོགས་པ་ལ་ཤར་ཕྱོགས་པའི་རིག་གནས་ངོ་བོ་དང་གཞུང་ལུགས་མ་ལག་དང་།ནུབ་ཕྱོགས་པ་ལ་ནུབ་ཕྱོགས་པའི་རིག་གནས་ཀྱི་ངོ་བོ་དང་གཞུང་ལུགས་ཡོད་པ་མ་ཟད་དེ་དག་གི་བྱེད་ནུས་ལ་ཡང་དུས་སྐབས་རང་བཞིན་དང་ས་ཁུལ་རང་བཞིན་ལྡན།དེའི་ཕྱིར་མི་རོ་རྩེ་སྒྲུང་གི་རིག་གནས་རྒྱབ་ལྗོངས་གཏིང་ཟབ་རྒྱུས་ལོན་བྱ་རྒྱུ་གལ་ཆེན་རེད།ཀླུ་སྒྲུབ་ཁོང་ནི་རྒྱ་གར་གྱི་མི་ཡིན་པ་མ་ཟད་རྒྱ་གར་ནས་སངས་རྒྱས་ཆོས་ལུགས་ལ་སློབ་སྦྱོང་བྱས་ཏེ་ཐེག་ཆེན་གྱི་སྲོལ་གཏོད་པས།སྟོན་པ་གཉིས་པ་ཞེས་ཡོངས་སུ་གྲགས།ལ་ལས་གཏམ་རྒྱུད་འདི་བོད་ཀྱི་དམངས་ཁྲོད་གཏམ་རྒྱུད་ཡིན་ཞེས་པ་དང་ལ་ལས་ནུབ་ཕྱོགས་ཁ་ཆེའི་ཡུལ་གྱི་མཚན་ཞག་སྟོང་གི་གཏམ་རྒྱུད་ཅེས་གྲགས་པའི་སྒྲུང་གཏམ་དེ་དང་ཁྱད་པར་མེད་པས་དེའི་ཕྱོགས་སུ་འདོད་པ་དང་།ལ་ལས་རྒྱ་གར་བའི་རོ་ལངས་འདྲེའི་གཏམ་རྒྱུད་ཉི་ཤུ་རྩ་ལྔ་བ་ཞེས་པའི་བྱང་རིམ་དང་སྒྲིག་གཞི་སོགས་དང་མཐུན་པར་བྱས་ཏེ་གཏམ་རྒྱུད་ཆེན་པོ་གཅིག་གི་སྟེང་གཏམ་རྒྱུད་ཆུང་བ་མང་པོ་འབྲེལ་ཏེ་གྲུབ་པ་ཞིག་ཡིན་ཟེར།དེའི་ཕྱིར་ཁུངས་རྒྱ་གར་ལ་གཏུགས་པ་སོགས་མང་ཡང་དེ་དག་ལ་མི་འཐད་པར་མ་ཟད།སློབ་དཔོན་ཀླུ་སྒྲུབ་ཀྱི་རོ་ལངས་གསེར་འགྱུར་གྱི་ཆོས་སྒྲུང་ཉེར་གཅིག་ཡིན་པར་ཐེ་ཚོམ་མེད།བོད་ལ་ཡི་གེའི་རི་མོ་བཟོས་པའི་རྗེས་སུ་ལོ་པཎ་རྣམས་ཀྱིས་རོ་ལངས་གསེར་སྒྲུབ་ཀྱི་ཆོས་སྒྲུང་ཉེར་གཅིག་ཚུར་བོད་རང་གི་སྐད་དུ་བསྒྱུར་བ་དང་།རིམ་བཞིན་དགོན་པའི་གྲྭ་པ་རྣམས་ཀྱིས་ཁྱིམ་ཚང་གི་རིམ་གྲོ་སྒྲུབ་པ་སོགས་ཀྱི་གོ་སྐབས་ལ་བརྟེན་ཁོམ་སྐབས་བྱུང་དུས་མི་དམངས་ལ་ཆོས་སྒྲུང་བཤད་དེ་རིམ་བཞིན་རྒྱ་ཇེ་ཆེར་དར་བ་དང་དེ་ནས་མང་ཚོགས་རྣམས་ཀྱིས་བྱིས་སྒྲུང་དང་ཆོས་སྒྲུང་གི་རྣམ་འགྱུར་བཟུང་ནས་ཕན་ཚུན་གྱིས་ཤེས་ཤིང་རྗེས་སུ་བོད་རང་གི་ངག་རྒྱུན་ལ་བརྟེན་ཡོད་པའི་སྟབས་ཀྱིས་རིམ་བཞིན་ཁ་གསབ་དང་གསར་བཟོ་བྱས་ཏེ་ད་ལྟ་གཞི་ནས་བོད་རང་གི་རིག་གནས་ཀྱི་ངོ་བོར་གྱུར་བའི་མི་རོ་རྩེ་སྒྲུང་བྱུང་།དེ་ཡང་ལྷ་ས་དང་ཨ་མདོ་སོགས་ནས་དཔར་བའི་སྒྲུང་གི་བྱུང་རིམ་ཐད་མི་མཐུན་པ་མང་ཞིང་།ཆོས་སྒྲུང་གི་ཁ་གྲངས་ལ་ཡང་ཉེར་གཅིག་དང་ཉེར་བཞི་སོགས་མང་ཉུང་ཡོད།འདི་དག་ཀྱང་དམངས་ཁྲོད་ནས་བྱུང་བའི་ཁ་གསབ་ཀྱི་རང་བཞིན་ཐོན་པ་རེད།དེང་རབས་བོད་ཀྱི་གློག་བརྙན་མོ་སྟོན་ཕག་མགོའི་འཁྲབ་གཞུང་གི་བྱུང་རིམ་དེ་སྒྲུང་དཔེ་སོ་སོར་མི་མཐུན་པའི་ཕྱོགས་མང་པོ་ཞིག་ཡོད་པ་དེ་དཞིན་བོད་རང་གི་སྤྱི་ཚོགས་འཚོ་བའི་རིག་གནས་ཀྱི་ཁྱད་ཆོས་དང་མཐུན་ས་མང་སྟེ།བྱང་ཤར་བོད་ཀྱི་གནའ་བོའི་གཏམ་རྒྱུད་དང་མི་རོ་རྩེ་སྒྲུང་གི་གཏམ་རྒྱུད་ཀྱི་བྱུང་རིམ་དང་སྐད་ཆ།མི་སྣ་བཀོད་སྒྲིགསྒྲིག་གཞིའི་ཐད་བཅས་ལ་འདྲ་ས་མང་བར་མ་ཟད།བོད་རང་གི་ཁྱད་ཆོས་ལྡན་པའི་གཏམ་དཔེ་སོགས་མང་པོ་ཞིག་སྤྱད་ཡོད་པ་དང་།གཞན་ཡང་ཤ་མར་རྩམ་གསུམ་དང་གངས་རི་སོགས་བོད་རང་གི་སའི་གནས་བབས་ཀྱི་ཐ་སྙད་དང་ཡོངས་སུ་མཐུན་པ་རེད་ཅེས་བརྗོད་ཡོད་པ་དག་ལ་གཞིགས་ན།གཏམ་རྒྱུད་འདིར་བོད་རང་གི་རིག་གནས་ཀྱི་ཁྱད་ཆོས་མངོན་གསལ་དུ་གྲུབ་ཡོད།དེའི་ཕྱིར་སྐབས་དེའི་བོད་ཀྱི་སྤྱི་ཚོགས་ཀྱི་གནད་དོན་མི་ཉུང་བ་ཞིག་ཤེས་ཐུབ།
  གཉིས། གཏམ་རྒྱུད་ནི་སྒྱུ་རྩལ་གྱི་ཁོངས་སུ་གཏོགས་ཀྱང་སྒྱུ་རྩལ་གྱིས་མཛེས་རྟོག་གི་མྱོང་སྣང་བརྒྱུད་དེ་མིའི་བག་འཁུམས་ཀྱི་འདོད་འདུན་དེ་ཕྱིར་ཕྱུང་བཞིན་ཡོད་པས་གཏམ་རྒྱུད་ཀྱིས་སྐབས་དེའི་སྤྱི་ཚོགས་ཀྱི་གནས་བབ་དང་རིག་གནས་ཀྱི་ཚད་ཐིག་མཚོན་གྱི་ཡོད། དཔེར་ན། སྤུན་ཟླ་དྲུག་ཅེས་པར་སྐབས་དེའི་ལོག་སྤྱོད་དབང་སྒྱུར་བ་རྒྱལ་པོ་དེའི་འདོད་རྔམ་ནི་སུས་ཀྱང་བཟློག་མི་ནུས་ལ།རྔོན་པའི་བུ་དང་གཞོན་ནུ་མ་གཉིས་ཀྱི་བརྩེ་དུངས་ཧ་ཅང་ཟབ་པའི་གནས་ཚུལ་བྲིས་ཏེ་སྐབས་དེའི་སྤྱི་ཚོགས་ཀྱི་གནས་བབ་མཚོན།སྤྱིར་ན་གཏམ་རྒྱུད་དེ་རྒྱལ་པོས་གཞོན་ནུ་མ་དབང་དུ་བསྡུ་བ་དང་རྔོན་པའི་བུ་བསད་རྗེས་མཇུག་གྲིལ་ན་ལོ་རྒྱུས་དངོས་དང་འཕྲོད་མོད།རྔོན་པའི་བུའི་བརྩེ་དུང་གི་སྟོབས་ཤུགས་དང་མི་དམངས་ཀྱི་རེ་སྙེག་སོགས་མཚོན་ཆེན་རྟོག་བཏགས་དང་འཆར་ཡན་གྱི་ཐབས་ལ་བརྟེན་ནས་རྔོན་པའི་བུ་ཤིང་གི་བྱ་ཁྱུང་འཕྲུལ་དང་ལྡན་པ་ཞིག་ལ་བསྡད་ནས་སྡུག་བསྔལ་ལ་ལྷུང་བའི་རང་གི་སྙིང་ཉེ་སྐྱོབ་པ་ལྟ་བུ་ནི་སྐབས་དེའི་ཐུན་མོང་གི་སྤྱི་དམངས་ཀྱི་རེ་སྨོན་རེད།ཀླུ་སྒྲུབ་ནི་ལྷ་ཆོས་མི་ཆོས་བསྟན་བཅོས་རྣམས།རྩོམ་གྱིན་བཞུགས་པའི་དུས་ཞེས་པའི་གཏམ་རྒྱུད་ཀྱིས་སྤྱི་ཚོགས་རྙིང་བའི་དཔོན་ངན་གྱི་བྱ་སྤྱོད་ངན་པ་ཐེར་འདོན་བྱས་ཡོད་དེ།རྒྱལ་པོའི་མིང་ལ་དྲན་གསལ་ཞེས་པས་ས་ཆ་དེའི་མངའ་འབངས་སུ་དྲན་གསལ་ཞེས་པའི་མིང་ཡོད་མི་ཆོག་ལ། ཡོད་ཀྱང་དེ་རང་དགར་མི་འཇོག་པར་ཐབས་ཅི་རིགས་འཐེན་ནས་གསོད་པ་མ་ཟད། རྒྱལ་པོའི་བླ་གཡུ་བརྐུས་ནས་བཀའ་བཞིན་བསྒྲུབས་ཟིན་ན་ཡང་།རྒྱལ་པོ་ཁ་དན་ཚིག་ལ་མི་གནས་པ་རང་གི་བཀའ་དང་འགལ་ནས་འབངས་མི་དྲན་གསལ་གྱི་སྐེ་ཆོད་གསུངས་པ་རེད།སྤྱིར་ན་གཏམ་རྒྱུད་མཚམས་འདི་ནས་མཇུག་རྫོགས་ན་དངོས་ཡོད་སྤྱི་ཚོགས་ཀྱི་རྒྱབ་ལྗོངས་དང་མཐུན་པ་ཞིག་ཡིན་མོད།གཅིག་ན་གཏམ་རྒྱུད་ཀྱི་བྱུང་རིམ་གྱི་དགོས་མཁོ་སྟེ།ཉེན་ཁ་དང་འཇིགས་སྔངས་ཀྱི་མཚམས་འདི་ལས་གློ་བུར་བའི་དོན་ཞིག་བྱུང་བ་སྟེ།རྒྱལ་པོའི་བླ་གཡུ་ས་ལ་བརྡབས་ནས་སིལ་བུར་བཏང་ནས་རྒྱལ་པོ་བསད་ན་བདེ་སྤྱོད་བཟང་བོའི་ཐུན་ཤོར་ངེས།གཉིས་ནས་སྐབས་དེའི་ལོག་སྤྱོད་དང་དབང་སྒྱུར་འོག་གི་མི་དམངས་ཀྱི་རེ་སྙེགས་མཚོན་པར་བྱས་པས་དེ་ལས་ལྷག་པའི་ཤུགས་དྲག་གི་སྤྱི་ཚོགས་གནད་དོན་ཞིག་ཤུགས་སུ་མངོན།འདི་ལྟར་གཏམ་རྒྱུད་རེ་རེ་ཡིས་རང་མཚན་པའི་དོན་དག་རེ་བསྟན་ཡོད། གསེར་མོ་མཚོ་དང་དངུལ་མོ་མཚོ་ཞེས་པས་ི་ངན་ལ་ཟུར་ཟ་དང་སེམས་ངན་པ་ལ་ལམ་ཡང་ངན་ཕྱིར་དྲང་བདེན་བདེན་སྐྱོང་དགོས་པ་དང་།རྡོའི་སེང་གེས་ཁ་གདངས་པ་ཞེས་པས་འཇིག་རྟེན་ཕུན་ཚོགས་ཀྱི་རྒྱུ་ནོར་ལ་ཆོག་ཤེས་ཡོད་དགོས་པ་དང་དེའི་དོན་དུ་རང་ཉིད་ཀྱི་གཅེས་སྲོག་འཆོར་མི་རུང་བའི་གནས་ལུགས་བསྟན་པ་སོགས་མང་ཡང་འདིར་གཏམ་རྒྱུད་རེ་རེ་བཞིན་དབྱེ་ཞིབ་བྱ་བའི་ཚིག་ཚོགས་བསྡུས་ནས་རེ་ཞིག་འཐུས་པར་བྱའོ། །
མདོར་ན།མི་རོ་རྩེ་སྒྲུང་ལྷ་ཆོས་དང་མི་ཆོས་གཉིས་ཀྱི་སློབ་གསོའི་དགོངས་གཞི་རྒྱ་ཆེ་བ་མ་ཟད།ཡུན་རིང་བའི་མི་རབས་ཤིག་གི་འདུ་ཤེས་བཅོས་བསྒྱུར་ལ་གཏིང་ཟབ་པའི་བག་ཆགས་འཇོག་པའི་བྱ་ཐབས་ལ་བརྟེན་ནས།སངས་རྒྱས་ཆོས་ལུགས་ལ་དད་པའི་སྟོབས་ཤུགས་དེ་ད་གཟོད་བོད་མིའི་འདུ་ཤེས་ཀྱི་གཏིང་རིམ་ནས་གནས་ཐུབ་པར་གྱུར་བས་བོད་བརྒྱུད་ནང་བསྟན་ཡང་གངས་ཅན་གྱི་ལྗོངས་འདིར་དར་ཞིང་རྒྱས་པ་རེད།དེ་ཡང་ཐུན་མོང་མ་ཡིན་པའི་རྩེད་མཚར་རང་བཞིན་གྱི་ཆོས་སྒྲུང་ལ་སྦྱར་བ་དེས་མིའི་བག་ཆགས་ཀྱི་ཟབ་ཚད་བརློག་ནས་འདུ་ཤེས་འཛིན་སྟངས་ལ་བསྒྱུར་བཅོས་བྱ་ཐུབ་པའི་ཐུན་མིན་གཡི་སློབ་གསོ་བྱ་ཐབས་ཤིག་ཀྱང་ཡིན་ནོ། ། （རྩོམ་སྒྲིག་འགན་ཁུར་བ་ཨོ་རྒྱན་དོན་གྲུབ།）