བྲན། 2021-04-30
མི་ཚེ་དར་དཀར་ཡུག་གཅིག་གི།
བྱ་བྱེད་ཆུ་ཡི་གཉེར་མ་བཞིན།།
འཆི་བའི་ཉེན་བརྡ་ནམ་འབྱོར་མིན།།
རྟོགས་པར་དཀའ་བ་ཐུགས་ལ་ཞོག།
འབྱོར་ན་དགྲ་ཡང་གྲོགས་སུ་སླེབས།།
རྒུད་ན་གཉེན་ཡང་རྒྱང་ལ་བཀྱེད།།
དར་རྒུད་ལས་ཀྱི་འཇིག་རྟེན་ནས།།
དགྲ་གཉེན་སུ་ལ་བློ་རེ་གཏོད།།
དབྱིངས་ཀྱི་ཟླ་བ་ཁེར་འགྲོ་མའི།།
ཟུར་མིག་རྣོ་བའི་འཛུམ་ཞལ་ལ།།
བསིལ་བའི་དཔལ་དང་ལྡན་ནའང་།།
པདྨོ་འཆི་བའི་བརྡ་ཡིག་བབས།།
དོགས་པའི་ཞེ་ལ་འཁོར་བ་ཡི།།
འཆིང་བྱེད་ཕྲ་རྒྱས་དུག་གི་ཇ།།
མ་རྟོགས་སྲོག་གི་གཤེད་མ་རུ།།
སྡང་ལ་སྐྲག་མཁན་ཉུང་འདི་ཅི།།
སྟོན་དང་བསྟན་པའི་དེ་ཉིད་གང་།།
མཁྱེན་པར་རློམས་པའི་རྟོག་གེ་བ།།
གླང་ཆེན་གསོད་པའི་གྲོག་མའི་ཟླར།།
བཞེངས་པའི་ངང་ཚུལ་བག་རེ་བྲོ།།
འགའ་ཞིག་དམ་པའི་ཡོན་ཏན་དྲི།།
ལེན་པར་རྐང་བ་དྲུག་པ་བཞིན།།
ཁ་ཅིག་སྤྲེའུའི་རྣམ་འགྱུར་འཛིན།།
མདོར་ན་ཕལ་དང་དམ་པའི་ཁྱད།།
སྣང་དང་མ་སྣང་ཚད་ཡིན་ན།།
དཔྱད་གསུམ་ཚད་མས་ཅི་བྱ་ཞེས།།
བདེན་པའི་མཐའ་ལ་དཔྱད་པ་ན།།
རང་ཉིད་རང་གི་ཚད་འགྱུར་གྲང་།།
འདི་ལྟར་བསམ་གཞིག་ཉི་མའི་ཟེར།།
ཕྱོགས་ཙམ་འཕྲོས་པའི་བློ་མིག་ལས།།
རང་ཉིད་མཐོང་བའི་ཆེད་དུ་སྦྱར།།
རང་སྐྱོན་མཐོང་བར་བྱིན་གྱིས་རློབས།།
རྩོམ་གསར། 10