གཞི་ཚང་ཟླ་བ་གྲགས་པ། 2021-01-08
ཐོལ་བྱུང་རླུང་བུ་དགུན་ཁའི་ཙག་དང་འདྲེས།།
སྙིང་གི་ཟུངས་ཁྲག་དག་ཀྱང་འཁྱག་པར་བྱེད།།
མི་བཟོད་ཟུག་ཚོར་ཁོག་ཏུ་མཆེད་པའི་དུས།།
ལྷིང་འཇཊ་གནས་གཞི་གང་ནི་འཐབ་ར་ཡིན།།
ཞལ་གྱིས་བཞེས་པའི་ཨ་ཆེན་ཁ་བའི་ཚོགས།།
གཟུ་ལམ་ཉི་མས་རྨེག་མེད་བཏང་བའི་ཤུལ།།
བྱ་བྱེའུ་མང་ཙམ་དགའ་བའི་ཚུལ་སྣང་ཡང་།།
ནན་གྱིས་བརྟགས་ན་འདི་ཡང་ཕམ་ཁ་ཞིག།
འཕུར་ལྡིང་རྩེན་ཚུལ་ཞན་པའི་བྱ་ཁྱུ་དག།
སྐྱེད་མོའི་ཚལ་ན་བ་གླང་ཡིན་ཞེས་བརྗོད།།
རིག་པའི་གསོས་ཟས་འཕྲོག་པའི་ཚུལ་དྲན་ན།།
བཤད་པའི་གདམས་ངག་རྣ་བའི་བུ་རམ་ཡིན།།
དུས་རབས་འདི་ལས་ཕྱིར་སྣུར་བྱོས་ཤིག་ཅེས།།
དངོས་སུ་མེད་ཀྱང་ཤུགས་ལས་འཇལ་བའི་དུས།།
སྤྲིན་དཀར་ལུས་ལ་བགོས་པའི་རི་བོ་གན།།
སྙིང་ཁམས་ས་རྡུལ་ཡིན་ནམ་འཕྱང་མོ་ཉུག།
བཅོ་བརྒྱད་དམག་དཔུང་ལྷོ་ནས་ཤར་དུ་ཡོང་།།
ཤར་གྱི་རྐང་དམག་ད་དུང་གྲག་འགུལ་མེད།།
དགག་སྒྲུབ་བོའུ་རྡེའུ་མྱུར་པའི་གཡུལ་ས་ནས།།
འུ་ཅག་དཔྲལ་བར་ཁེལ་ན་ཚར་བ་ཡིན།།
བདག་གིས་ཞིང་ལ་བཏབ་པའི་ནས་ཀྱི་སོན།།
སྨྱུ་གུ་སྐྱེ་དབང་མེད་པར་རུལ་ནས་སོང་།།
མ་འོངས་དགུན་ཟླའི་ལྟོ་བ་འགྲང་དཀའ་བས།།
འཕྲལ་གྱི་བར་ཆད་རེད་ཅེས་སེམས་གསོ་བྱས།།
རྩོམ་གསར། 10