ལི་སྨད་ཉི་གཞོན། 2017-08-28
དྲོད་ཀྱི་འཇམ་ཤ།
བཅུད་ཀྱི་དྭངས་མ།
བརྩེ་བའི་ཉིང་ཁུ།
བདག་གི་སྒོ་གསུམ་སྐྱབས་ཡུལ།
བྱམས་ལྡན་གྱི་ཨ་མ།
དགའ་སྐྱོ་ཆགས་སྡང་གི་གྲུབ་པའི་མི་ཡུལ་ནས།
ངས་ཁྱེད་རང་ལྟ་བུའི་སྙན་ངག་ཅིག་འབྲི་ན་འདོད།
འོན་ཀྱང་། སྙན་ངག་ལས་ཁྱེད་ཀྱི་བྱམས་པ་དང་བརྩེ་བ།
དུངས་བ། ཞེན་པ་སོགས་ཡོད་ཚད་མཚོན་ཐབས་བྲལ་ལ།
ཟླ་བའི་བསིལ་ཟེར་ལས་འཇམ་ཞིང་།
ཉི་མའི་འོད་ཐིག་ལས་དྲོ་བའི་སེམས་ཀྱི་མ་མ།
ཡོད་ཚད་བརྩེ་བས་ཕྱུག་པའི་ལྷ་གསོན་པོ་ཞིག
ལ་ལས་ཨ་མ་ཁྱེད་ཉིད་སྲིད་པའི་ཉི་མ་ཡིན་ཟེར།
བྱམས་དང་བརྩེ་བས་ཕྱུག་པའི་འོད་ཀྱི་ཟེགས་མ་རེ་རེར།
ཨ་གསར་དང་ཕྱོགས་ལྷུང་མེད་པར་སྐྱེ་འགྲོའི་ཆེད་དུ་ཤར་ཡོད་ཟེར།
ལ་ལས་ཨ་མ་ཁྱེད་ནི་དགོས་འདོད་ཀྱི་ནོར་བུ་ཞིག་ཡིན་ཟེར།
རྙེད་པར་དཀའ་བའི་མི་ལུས་ཀྱི་གཟུགས་པོ་འདི་གྲུབ་པ་ནས་བཟུང་།
ཕྱི་ནང་གསང་གསུམ་གྱི་མི་ཚེའི་བསླབ་བྱ་རེ་རེའི།
ང་ཚོའི་བསམ་པའི་རྒྱགས་ཕྱེ་རུ་གྱུར་ལ།
ནོར་བུ་དགོས་འདོད་ལས་ཀྱང་རིན་ཐང་ཆེ།
དགོང་སྔོན་པོ་མ་རྒས་ལ།
ས་དོག་མོ་མ་རྒས་པའི་དུས་དེར།
བུ་ཕྲུག་དང་བཟའ་ཚང་གི་འཚོ་བས་ཁྱེད་རང་རྒས་སུ་བཅུག་སོང་།
རྫ་སྒང་ན་རྐང་རྗེས་དཔར་ཅིང་།
རི་ལུང་ལ་གྲིབ་མ་འབྱར་བའི་མ་མ།
མི་ཡུལ་འདི་སྐྱིད་སྐྱིད་འདྲ་ཡང་།
འཚོ་བ་འདི་སྡུག་སྡུག་ངང་བསྐྱལ་བའི་བདག་གི་ཡུམ་ཆེན།
ཨ་མ་ལགས། ཁྱེད་ནི་ཁྱིམ་ཚང་གི་འོང་སྣང་།
ཁྱེད་ནི་ཉིན་མཚན་གྱི་མེལ་ཚེ།
ཁྱེད་ནི་མཐོ་སྒང་གི་བདག་མོ།
མདོར་ན་སྐྱེ་བ་ནས་འགག་པའི་བར་ཏུ།
ཁྱེད་ཀྱི་ལྷག་བསམ་དང་བྱམས་བརྩེས་འུ་ཅག་བསྐྱངས་ལ།
སྐྲ་ལོ་དཀར་པོར་གྱུར།
ལུས་ཀྱི་ཟུངས་བཅུད་ཉམས།
དབང་ལྔའི་ནུས་པ་ཤོར་ཡང་།
ད་དུང་། སེམས་པ་བུ་ཕྲུག་གི་འཚོ་གནས་ལ་འཁོར་ཡོད།
མ་ཡུམ་ལགས། བྱམས་པ་ཆེན་པོ་ཅན།།
རྩོམ་གསར། 10