མི་སེམས་ཀྱི་སྦྲེལ་ཐག

ལུག་རྫི།        2020-07-24

ཁ་ཉིན་ཕྱི་ནས་མཐོང་བ་དེ།

ཁ་སང་ནང་ནས་ཕྲད་བྱུང་།

ཉིན་ལྟར་མཐོང་རེས་ཡོད་པ་དེ།

དགོང་ལྟར་དྲན་རེས་ཡོད་ན།

རྨ་ཆུའི་ཕར་ཚུར་དུ་ལུས་པ་བཞིན།

ཚིག་གི་གཙང་བོས་ཆོད་འདུག

ཡང་མིན་ན།

ངས་རྐྱལ་རྩལ་ངོམ་ཞིང་ཕར་འོང་།

ཡང་མིན་ན།

ཁྱོད་ཀོ་གྲུ་བཏང་ནས་ཚུར་ཤོག

ཕྱི་ཚུལ་གྱི་ལག་འཇུ་ལ་ཆོ་ཞེ་དྲག་མི་འདུག

གཙོ་བོ་མི་སེམས་ཀྱི་སྦྲེལ་ཐག་བསྟུད་དགོས།

སྐད་ཆའི་ཚོགས་པར་ངོ་ཚ་སྨིན་ཤོས་དེ།

ཁྲོམ་དུ་དབྱུང་མི་རུང་བའི་གསང་ཚིག་དེ།

སྙིང་ནས་ཐོན་ནས་མིད་པར་གབ་པ་དེ།

སུ་བྱུང་བྱུང་ལ་མཉན་རྒྱུའི་སྐལ་བ་མེད་པ་དེ།

ང་ཡི་དེ་ཁྱོད་ལ་དབང་ན།

ཁྱོད་ཀྱི་དེ་སུ་ལ་དབང་ངམ།


  • ལེ་ཚན་སྔོན་མ།:ལམ་ཐུག་ལྷ་མོ་ལ།
  • ལེ་ཚན་རྗེས་མ།:གངས་དཀར་རི་བོའི་རང་མདངས་ལ་བསྔགས་པ།