ལུག་རྫི། 2020-07-13
ཨ་ཧོ་དེ་འདྲའི་མཛེས་པའི་ཁྱུང་མགོན་སྤོར།།
ཨ་ཆུ་དེ་རིང་ནམ་ཟླ་འཁྱགས་པོ་ལ།།
ཧའོ་སྨི་ལྔ་ཡི་གངས་རྡུལ་རྩིག་པ་བརྩིགས།།
ཧ་ཅང་མཐུག་པའི་དགུན་ལྭས་ལུས་མ་དྲོད།།
ས་སྟེང་རྩི་ཏོག་ཚོམ་བུར་བཀྲ་ན་ཡང་།།
ཤ་ཁྲག་ལུས་ཕུང་ནང་དུའང་གྲང་སྙམ་བྱུང་།།
ལ་ལུང་ཕལ་ཆེར་ཁ་བ་སྐྱ་ཁྲོམ་མེར།།
ར་སྐོར་ཁང་མཐའ་མ་ལུས་བརླན་གྱིས་བཟུང་།།
ཡ་སྦུག་གནས་ཚང་ཁང་བ་ཐོག་གཅིག་མར།།
འ་འུར་སྒྲ་དང་བཅས་པའི་མེ་བཏང་ནས།།
ཟ་བཏུང་ཅི་འདོད་རང་སྣང་གང་དྲན་ལས།།
ཞྭ་ལྟར་བཀུར་བའམ་ངོ་སྲུང་མ་དགོས་སྐྱིད།།
ཝ་ཡེ་ཟེར་ནས་འགྲམ་བཅར་སྲུན་འབྱིན་དང་།།
ཛ་དྲག་ལས་ལ་དུས་ཚོད་གཏོང་དགོས་མེད།།
ཚ་སོབ་སོབ་ཀྱི་མལ་དུ་ཁ་བུག་ནས།།
རྩ་ཆེན་བསྟན་བཅོས་མཇལ་བས་སྣང་བ་སྤྲོ།།
མ་བྱན་མེད་ཀྱང་ཟ་ཆོག་འཐུང་ཆོག་འདི།།
བ་བྱུང་འོ་མའི་མདངས་ཀྱིས་རྒྱུད་ཕྱུག་པའི།།
ཕ་མ་མ་ལགས་བུ་ལྟར་ཐུགས་བརྩེ་བའི།།
པ་ཕའི་ལོ་ཚད་མཉམ་པའི་དགེ་རྒན་དྲིན།།
ན་ཚས་མ་ཟིན་བདེ་ཅག་ཁྱུག་པའི་ལུས།།
ད་དུང་འཚོ་བའི་ཡུན་ཚད་སུས་བཤད་ནུས།།
ཐ་མལ་འཇིགས་པའི་གནས་ལ་ལྷུང་བའི་ཚེ།།
ཏཱ་རེ་མཚན་ཅན་སྐྱབས་མཆོག་དམ་པས་སྐྱོབས།།
ཉ་མོ་ཁྱུག་ཁྱུག་ཤེས་བྱའི་མཚོ་གཏིང་ལ།།
ཇ་དྭངས་འཐུང་ཞོར་ཐོས་པའི་ནོར་འཚོལ་ཕྱིར།།
ཆ་རྐྱེན་མེད་པར་རེ་བའི་སེམས་བཞིན་དུ།།
ཅ་ལག་མཁོ་རྒུ་སྩོལ་བའི་གཉེན་གྲོགས་ཚོར།།
ང་ཡི་གཙུག་ནོར་རྒྱུན་དུ་མཆོད་པའི་ཡུལ།།
ག་དུས་ཡིན་ཡང་བསྟན་འགྲོའི་དོན་མཛད་པའི།།
ཁ་མིན་སེམས་ཀྱི་དད་ཡུལ་སྙིང་རྗེའི་ལྷས།།
ཀ་དག་ཆོས་ཀྱི་བྱིན་རླབས་ཆར་དུ་ཕོབས།།
རྩོམ་གསར། 10