སེམས་ངོགས་ཀྱི་རི་མོ་གཡས་འཁྱིལ།

དབུ་འཇིགས་མེད།        2020-07-06

སེམས་པའི་གསེབ་ན་དུངས་བའི་སྐད་ཆ་ཡོད།།

ཟླ་བའི་དྲི་མེད་ཡངས་པའི་དཀྱིལ་འཁོར་ནས།།

གཉོམ་དུངས་ཚིག་གི་བདུད་རྩི་ཁྱེད་ཉིད་འདྲེན།།

ལོ་ཟླའི་བསིལ་རླུང་འཇམ་པོ་ཁྱེད་ཉིད་ཕྱོགས།།

དམིགས་མེད་བརྩེ་བའི་རྫ་ཆུ་དྭངས་མ་བཞུར།།

དུངས་བའི་མཚོ་མོ་ཡིད་གཞུང་དཀྱིལ་དུ་འཁྱིལ།།

དབྱར་ལྗོངས་ཧྲིལ་པོ་བརྩེ་བའི་བཅུད་ལ་རོལ།།

སྨོན་ལམ་ཡག་པོ་བཏབ་པའི་འབྲས་བཟང་རྙེད།།

མུ་མཐའ་བྲལ་བའི་ཡངས་པའི་འཁོར་བ་ཞིག།

རྟག་བརྟན་བྲལ་བའི་ཆོས་ཉིད་གཤིས་ཀྱི་ངོར།།

གཉུག་མའི་སེམས་ཀྱི་སྣང་བའི་ཟློས་གར་ཞིག།

ཚིག་གི་ཆོ་འཕྲུལ་བཞེངས་བའི་ཕོ་བྲང་ཡོད།།

བར་ཐག་རི་ཆུ་སྟོང་གིས་བཅད་པའི་ལས།།

བསྐལ་བ་སྟོང་གིས་བསགས་པའི་རྒྱུ་ཉིད་ཡིན།།

བརྩེ་བའི་ལས་འཕྲོ་མུ་ཏིག་ཕྲེང་མཛེས་ཤིག།

བརྩེ་བ་གཙང་མའི་ས་གཞི་དྲོད་མོ་ཡིན།།

གཡུ་བྱུར་ལུས་ལ་རྒྱན་པའི་སྨིན་དྲུག་མ།།

ཚིག་དྲུག་སྙུག་མའི་ལང་ཚོ་འོད་ཟེར་འཕྲོས།།

ཡིད་དུ་ལྷུང་བའི་མེ་ཏོག་འཛུམ་པའི་གྲོལ།།

བརྩེ་བའི་གྲུ་ཆར་སེམས་སུ་འབབ་ཀྱིན་ཡོད།།

གཡང་དཀར་སྤང་ལ་དེད་པའི་རྫི་བོ་མ།།

ནོར་ནག་འཚོ་བའི་འབྲོག་མོ་དཀྱུས་མ་ཡིན།།

སྲོལ་རྒྱུན་བཟང་པོའི་གཞི་འཛིན་བདག་མོ་ཡིན།།

བོད་ཡུལ་ཆོས་ལ་དགའ་བའི་འབྲོག་ཕྲུག་མ།།

སྲིད་ངོགས་དཀར་ནག་གཉིས་ཀྱི་སོ་མཚམས་ན།།

ལས་དབང་ཁྲ་མོ་ཞིག་གི་བགྲོད་ལམ་ཡོད།།

སེམས་དབུས་གཙང་མ་ཞིག་གི་ཡིད་གཞུང་ན།།

འདང་ཆེན་དབྱར་གྱི་མེ་ཏོག་སེར་ཆེན་འཁྲུངས།།

སྙན་ཚིག་མགུར་མ་སྣང་སྟོང་དབྱིངས་སུ་གྱེར།།

དྲན་པ་བརྒྱ་སྟོང་ཚོར་བའི་དབྱངས་སུ་ལྷུང་།།

བརྩེ་བའི་དབྱངས་ཅན་ལྷ་མོ་འབོད་བཞིན་དུ།།

ངག་རིག་སྨྲ་བའི་རང་བཞིན་འཚོལ་གྱིན་འདུག།



  • ལེ་ཚན་སྔོན་མ།:བདག་གི་རེ་སྨོན།
  • ལེ་ཚན་རྗེས་མ།:ལོ་ཟླ་བཞུར་བའི་རླབས་སྒྲ།