སེམས་ཁྲལ་ལ་ཐོགས་པའི་རྟའུ།
འཇུ་སྐལ་བཟང་གིས་བརྩམས།
ཛ་དྲག་ཆེ་བའི་ཐ་སྙད་མང་པོ་ཞིག་འཚང་ཀ་རྒྱག་གིནལག་འཕྲིན་གྱི་འཆར་ཤེལ་ངོས་སུ་ཤུད་ཀྱིན་འདུག་མོདཆུ་ཚོད་ཉེར་བཞིའི་ཁོངས་སུ་རྒྱུ་བའི་སེམས་ཁྲལ་ཆེ་ཤོས་དེརྟའུ་ཞེས་པའི་ཐ་སྙད་དེ་རུ་ཐོགས་ཏེ་ཡོདདེ་རིང་གི་གྲངས་ཀ་སྔ་ཉིན་ལས་འཕར་བ་མཐོང་ཚེམཆིལ་མ་ཞིག་མགྲིན་པར་ཐོན་པ་ཁྲོག་གེར་མིད་བཞིནཡར་ལངས་དགོས་སམ་མར་སྡོད་དགོས་པ་ཧ་མི་གོར་བར་འདུགབསམ་ཚོད་ལ གདེང་ཚོད་ཅིག་གིས་ཕམ་ཁ་ཁུར་བའམབྱིས་བློ་གཙང་མ་ཞིག་ལ་བརྙས་བཅོས་ཤོར་བ་ལྟ་བུ་ཞིག་གིསམིག་མཐའ་ལ་སྐྱུར་ཞིག་ལངས་ཏེ་བྱུངརྟའུ། ཁྱོད་ཤར་མཐའི་ཕྱོགས་ཀྱིབོད་ཀྱི་རི་ལུང་ཟབ་ས་ཞིག་ན་ཡོད་སྐདརྟའུ། སྔར་མདུང་རིང་འཕྱར་ནས་སྔོན་དུ་སྐྱོད་སྐབསརྟའུ་ཁྱོད་མདུན་གྲས་ཤིག་ན་ཡོད་ཟེརད་ལྟའི་ཨ་རིའི་བཤམས་མཛོད་ཁང་གི་བོད་ཀྱི་རྟ་ཁྲབ་ཡག་པོ་དེབོད་བཙན་པོའི་མདུན་ཅོག་སྟེང་གིདམ་བཅའི་རིལ་བུ་བགོ་བཤའ་བྱེད་ཉིནཁྱོད་ཀྱི་ཁོང་དུ་ཁས་ལེན་མི་ཆུང་བ་ཞིག་མིད་ཡོད་ངེས།གཅོང་རོང་ཟབ་ས་དེར་བཙན་ས་འཛིན་ཉིནཁྱོད་ཁོང་གི་ཐུགས་ཀྱི་ཟབ་ས་ཞིག་ན་ཡོདགླིང་གེ་སར་རྒྱལ་པོས་དམག་རྩིས་བྱེད་ཉིནརྟའུ་མི་ཚོ་དམར་པོ་ཁྱོད་རང་ཡིན་ནཁྱོད་ཀུན་གྱི་སེམས་ཀྱི་དམར་ས་ཞིག་ན་ཡོདརྟའུ། དེང་དུས་སྲོག་འཚོའི་ཐབས་རྩལ་གྱིས་ཁྱོད་རང་སྤང་མེད་ལབོད་པའི་སྨོན་ལམ་ཡོད་ཚད་ཁྱོད་ལ་ངེས་པར་ཐེབས་ངེས་ཡིནརྟའུ། མི་ཤི་རྟ་འགྱེལ་དུ་མའི་ཁྲོད་ཁྱོད་ལ་བྲེད་ཤ་ལངས་མ་མྱོང་ནའཕྲལ་རྐྱེན་འདི་ཙམ་གྱིས་ཁྱོད་ལ་དངངས་འཚབ་སློབ་བར་ག་ལ་ནུསཐུགས་གཟབ་གནངས་དགོས རྟའུ་ལགསཐུགས་གཟབ་ཅི་ནས་གནང་རོགས རྟའུ་ལགས
རྟའུ་ཕྱོགས་ལ་སྤྲིངས་བའི་སེམས་འཕྲིན།
ལྕངས་ཞབས་འགྱུར་མེད་ཚེ་དབང་།
སེམས་པ་རླུང་གིས་སྤུར་ནས། ཉིན་རེ་བཞིན།གསར་འགྱུར་ལ་རེ་སྒུག་བྱེད་བཞིན་ཡོད་དུས། ནས་གཏེར་ཕྱུག་མོའི་མདུན་གྱི། རྟའུ་པདྨ་ཅན་གྱི་ཞིང་གི།ནད་ཡམས་མང་ཉུང་གི་འགྱུར་བས། རེ་སྐྱིད་རེ་སྡུག་གི་རྟོག་རླབས་རྒོད་པས།སྙིང་དུམ་བུ་འདི། སྒང་ལ་འབུད་ཅིང་ལུང་ལ་འབབ།འཕྲིན་སྐྱེལ་སྐྱ་དཀར་ཕྲ་མོ། འཕྲིན་བཟང་ཁུར་ནས་ཕེབས་ཤོག།བཙན་པོའི་དཔུང་གི་ལོ་རྒྱུས་ཡོད་མྱོང་ས་དེ་ན།ཡོངས་ལ་གྲགས་པའི་རུ་སྙིང་རྫོང་མཁར་དེ་ན།རང་ཚུགས་ཅན་གྱི་གནའ་མྱི་ཡོད།ལམ་གྱི་རེའུ་མིག་མདུན་རྒྱབ་རྣམས་སུ།བསམ་ཤེས་ཅན་གྱི་ཚོང་པ་ཡོད།སྙིང་གི་འཕར་རྩ་མཐོ་བྱུང་།སྡེ་བ་གྲུ་བཞི་ཁྲ་མོའི་ནང་ན།ལས་ལ་བརྩོན་པའི་དམངས་ཚོགས་ཡོད།སྡེ་ཕྱོགས་དེ་ཡི་ངེས་མེད་རྣམས་སུ།སྙིང་དང་འདྲ་བའི་སློབ་མ་མང་།ད་དུང་ངང་རྒྱུད་རིང་བའི་གྲོགས་པོ།ཡིད་ཀྱི་སྡོང་ལོ་ས་ལ་འཐོར་སོང་།མ་གཞིར་སི་བོད་ཚང་གི་ཕ་ས་བྱས་མྱོང་ལ།ལོ་རྒྱུས་ཀྱི་རྡོ་རིང་བཞེངས་མྱོང་།དེ་ཡང་ལོ་ནས་ལོ་མཐུད། ཟླ་བ་ནས་ཟླ་བ་མཐུད།མི་ལོ་བཅུ་གཅིག་གི་ཕ་ས་ཡིན།སྲིད་པ་ཆགས་པའི་གངས་རྒན་བྱས་མྱོང་།ཁྱེད་ཚོ་མ་བདེ་ན་ང་ཚོ་ཅི་ལ་བདེ།ཁྱེད་ཚོ་ལུས་གཟེར་ན་ང་ཚོ་སེམས་ན།སེམས་ཀྱི་སྡུག་བསྔལ་ཞི་བའི།ལུས་ཟུང་བཅུད་ཀྱིས་རྒྱས་པ།དཔུང་དང་རོགས་སྐྱོར་བཟང་པོ།ལུས་བདེ་སེམས་སྐྱིད་ངང་ནས།མྱུར་དུ་ལྷན་འཛོམས་བྱས་ཏེ།རོལ་བའི་སྨོན་ལམ་འདེབས་སོ།།
རྟའུ་པ།
སྨིན་དབུས་པོ།
ལག་འཕྲིན་གྱི་ཁ་ཕྱེས་ཐེངས་རེར། རྟའུ་པ་ཞེས། རྒྱུས་ཡོད་མེད་མང་པོས་ལུང་པ་འུར་གྱིས་བཀང་ཡང་། ང་དང་ཤ་འདྲེས་ཁྲག་འདྲེས་སུ་གྱུར་པའི་རྟའུ་མི་ཚོ་དམར་པོ་ནི། ནམ་ཡང་སེམས་ཤུགས་ཀྱི་བདག་པོ་ཡིན། དཔའ་བརྟུལ་རྒྱལ་མཚན་ཆོས་གྲགས་ཀྱིས་ཀི་སྒྲ་རི་ལ་མཆེད་བཞིན། ཁྲབ་དཀར་མོར་སྟག་གི་མཐའ་ཤམ་སྤྲད་ཅིང་། རྟ་རྒོད་པོས་རྨིག་པས་རྡུལ་དམར་གཙུབ་ཉིན་ནས། རྟའུ་པ་ནི། ངའི་སྟོབས་ཀྱི་དཔུང་པ་དང་། སེམས་ཀྱི་ཁེན་ཡ་ཡིན་པས། ངས་རྟའུ་པ་ནམ་ཡང་རྟའུ་པ་ཡིན་པར་སྨོན་ལམ་བཏབ་པ་ཡིན། རྟའུ་པ།
སེམས་ཀྱི་རུམ་ཁ་ན་སྐྲ་ལོ་རླུང་གིས་གཡོ་བའི་རྟའུ་པ། ང་ནམ་ཡང་ཁྱེད་དང་འབྲལ་མ་མྱོང་། རིམ་ཡམས་ལ་བཤད་ཡམས་བསྣན་པའི་རླུང་དམར་ཤེད་ཀྱིས་སྤུར་ཚེ། ངས་ཁྱེད་ཉིད་ལྷག་ཏུ་དྲན་ཡོད། བཞིན་རས་ལ་བཙན་པོའི་སྨུག་རྩི་འཁྲིགས་ཤིང་། ངག་སྒོར་བརྡ་རྙིང་གི་གཞས་གདངས་འཁྱིལ་བའི་རྣམ་པ་དམིགས་བསལ་བ་རེ་རེ། ཡ་ཆུང་སྙིང་གི་གཏིང་རུམ་ལ་འཛུལ་ཐེངས་རེར། ངས་སེམས་ཀྱི་གཤོག་པ་ཤེད་ཀྱིས་བརྐྱངས་ཏེ། སྐུ་བླ་དང་བཞག་བྲ་བརྒལ་ནས་ཡར་ལ་འཕུར། སྙི་ཆུ་དང་གཤིས་ཆུ་རྒྱུད་དེ་མར་ལ་མཆོངས། རབ་སྒང་དམུ་རྫེ་ཉག་ནས་རྒྱལ་སྲས་ལ་ཐོག་བར། ཉིན་གྲངས་མཛུབ་མོར་བགྲང་བཞིན། དུང་བ་རུམ་ལ་བཅུག། ཞེ་འདང་སྙིང་ལ་གླན། རྟའུ་དང་རིག་སྔགས་མཉམ་དུ་ཟློ་བཞིན། སེམས་ཀྱིས་ཁུར་ཏེ། ཡིད་ཀྱིས་སྲུང་ནས་ཡོད། རྟའུ་པ།
རྟའུ་པ།རིམས་ཡམས་ནི་ལས་དང་རྐྱེན་གྱིས་བབས་འོང་བ་ལས། བཙན་དང་སྟོབས་ཀྱིས་སྦྱར་ཡོང་བ་ཞིག་མ་ཡིན་ཕྱིར།སེམས་དཔང་དམའ་དགོས་དོན་མེད་ལ། དམའ་ཡང་མི་སྲིད། དེ་བས་མུ་ནས་མུ་རུ། སྤོབས་སེམས་ཀྱི་རྒོལ་སྟོབས་ནི་རྒྱལ་ཁའི་རྩ་བར་འཛིན་རོགས། མདོར་ན་ང་ཡི་རྟའུ་པས་མེས་པོའི་རུས་རྐང་དང་ལས་འབྲས་སྙིང་ལ་མནན་ཏེ། ཆེད་མཁས་དང་ལྷ་རྗེ་ཚོའི་ལག་ལེན་དང་དུ་ལེན་བཞིན། ནམ་ལོ་གསར་བར་སྔར་ལྟར་དྭངས་གཙང་གི་མཁའ་དབུགས་རྔུབ་བཞིན། སྔར་ལས་ཀྱང་མཛེས་པའི་སེམས་དྲོད་ཀྱི་ཁོར་ཡུག་ཡངས་ས་ནས། འུ་ཚོ་འཕྲལ་རྐྱེན་ལས་རྒྱལ་བའི་དགའ་སྣང་དང་ལག་འཇུ་སྦྲེལ། སེམས་གཏམ་མང་པོ་ཞིག་གང་དྲན་དུ་གློད་ཐུབ་པའི་ཉི་མར་ཡིད་སྨོན་དང་ཡིད་ཆེས་བྱས་ཡོད། རྟའུ།
རྟའུ།
རོང་བོ་དགེ་འདུན་ལྷུན་གྲུབ།
རྟའུ་ལགས། ངས་ཅི་ཞིག་འབྲི་དགོས་པ་རེད།སྙན་ངག་པ་ཚོས། ཁྱེད་ཀྱི་ནམ་མཁའ་བྲིས་ཟིན།ནམ་མཁའ་སྔོན་པོ་རེད། སྤྲིན་པ་དཀར་པོ་རེད་ཟེར།སྙན་ངག་པ་ཚོས། ཁྱེད་ཀྱི་ས་གཞི་བྲིས་ཟིན།ས་གཞི་གཙང་མ་རེད། ཆུ་བོ་དྭངས་མོ་རེད་ཟེར།སྙན་ངག་པ་ཚོས། ཁྱེད་ཀྱི་ཁོག་པ་དང་གློ་བ་བྲིས་ཟིན།ཁྱེད་ཀྱི་ཁོག་པ་ཡངས་མོ་རེད། གློ་བ་དཀར་པོ་རེད་ཟེར།སྙན་ངག་པ་ཚོས། སོ་སོའི་མིག་མདངས་དང་དབུགས་ཀྱི་འབྱིན་རྔུབ་བྲིས་ཟིན།མིག་མདངས་སྐྱ་བོ་རེད། དབུགས་རྒྱུན་འཁྱག་པ་རེད་ཟེར།སྙན་ངག་པ་ཚོས།སྡེ་འདབས་ཀྱི་མཆོད་རྟེན་དང་མ་ཎི་འཁོར་ལོ་རེ་རེ་བྲིས་ཟིན།མཆོད་རྟེན་གྱི་དབུ་རྩེ་དུབ་ཅིང་མ་ཎི་འཁོར་ལོ་དག་ལ་སྐྱོ་ཡུས་འདུག་ཟེར།ད་རུང་སྙན་ངག་པ་ཚོས།ཁྱེད་ཀྱི་ཀྱག་ཀྱོག་གི་ལམ་དང་ཆུ་བོའི་ཕར་ཚུར་བྲིས་ཟིན།ཁྱེད་ཀྱི་སྒོ་དང་སྒེའུ་ཁུང་དང་དེ་ཡི་འགྲམ་གྱི་མེ་ཏོག་བུམ་པ་སོགས་བྲིས་ཟིན།སྙན་ངག་པ་ཚོས་ཁྱེད་ཀྱི་ཡོད་ཚད་བྲིས་ཟིན།རྟའུ་ལགས། ང་ལ་ཅི་ཡང་ལྷག་མི་འདུགང་ཉིན་འགའི་རྗེས་སུ་ལུས་པས་ངོ་ཚ་ཡི་འདུགང་ཉིན་འགའི་རྗེས་སུ་ལུས་པས།ངས་ད་ལྟ་སྙན་ངག་བྲིས་ན་དེ་ཙམ་གྱི་རྒྱུ་འབྲས་ཤིག་མ་རེད་འདོད།རྟའུ་ལགས། ང་ནི་མིའུ་ཆུང་ཞིག་ཡིན།གློ་ལུ་ཙམ་གྱིས་ཞེད་སྣང་བསླངས་ཏེ་ཉིན་འགར་རང་ཁྱིམ་དུ་བསྐུངས།ཚ་བའི་འཕེལ་རིམ་ཙམ་གྱིས་ལུས་སེམས་འདར་ཞིང་།མི་ཚོགས་དང་གྱེས་ཏེ་ཉིན་འགར་ཟུར་ཉལ་བྱས།ད་རུང་། དབུགས་རྒྱུན་གཅོད་ལ་ཉེ་ཡང་ཁ་ཐུམ་བརྒྱབ་ནས་བསྡད།རྟའུ་ལགས། དོན་དག་མང་པོ་ཞིག་གིས་ངའི་གཉའ་བ་བཅགས་ཏེ།ཁྱེད་ཕྱོགས་ཀྱི་གསར་འགྱུར་རེ་བཀླགས་ཏེ་བསྡད།ཉི་མ་རེ་རེར་གསར་འགྱུར་ངོས་ཀྱི་ཡི་གེ་ཤི་བོ་རེ་འགྲམ་པར་སྦྱར་ཏེ་བསྡད།ཉི་མ་རེ་རེར་གསར་འགྱུར་དེ་དག་གསར་འགྱུར་དངོས་མ་ཞིག་མིན་ན་སྙམ་མོད།འོན་ཀྱང་། གསར་འགྱུར་དེ་དག་བདེན་པ་རེད་ཟེར།ཁྱེད་ཅག་གི་ས་ཁྲ་འང་མེ་ལྟར་དམར་པོ་རེད་ཟེར།རྟའུ་ལགས།གལ་ཏེ་ངས་དོ་ནུབ་སྙན་ངག་གི་ནང་དུ་རྫུན་ཞིག་འབྲི་ཐུབ་ན།རྫུན་མང་པོ་ཞིག་འབྲི་འདོད།རྫུན་མང་པོ་མང་པོ་ཞིག་འབྲི་ན་འདོད།རྟའུ་ལགས། ད་ནི་ང་ལ་རྫུན་ཡང་འབྲི་རྒྱུ་ལྷག་མི་འདུགམིག་ཟུང་བཙུམས་ནས་བསམ་བློ་གཏོང་རྒྱུའང་མི་འདུགང་ནི་ཞེད་སྣང་དང་བཅས་ཏེ་ཨར་འདམ་གྱི་ཁང་ཆུང་ཞིག་ཏུ།རང་གི་གྲིབ་མ་འཁྱག་པའི་ནང་དུ་པུས་བཙུགས་ཀྱིས་བསྡད་ན་ཅུང་ཟད་བདེ་ཨང་།
བདག་གི་རྟའུ་ལུང་པ།
རྒྱལ་ལྡོང་ཨོ་རྒྱན་དོན་གྲུབ།
གཤིས་ཆུ་སྔོན་མོ་དྲག་ཏུ་འབབ་པའི་གཡས་གཡོན་ན།རྒྱང་ནས་ཉན་ན་མཐུན་སྒྲིལ་གྱི་ཨ་ལོང་དམ་པའི་ཡུལ་ཁམས་ཤིགཉེ་ནས་བལྟས་ན་ལྷུན་ཆགས་ངང་གཟི་བྱིན་གྱིས་འགྱིང་བའི་ཡུལ་གྲུ་ཞིགསྣོད་བཅུད་ཀྱི་དཔལ་གཡང་མ་ལུས་ཀུན་ནས་འཛོམས་པའི་ཞིང་ས་སྟེ།སོལ་དལ་གྱིས་འཚོ་བའི་ལུང་པ་ཁྱེད་ལ།ཤར་ནས་མཆེད་པའི་ནད་དུག་ཞིག་གིསཁྱེད་ཀྱི་ལྷིང་འཇགས་ཀུན་ནས་དཀྲོགས་སོང་ཟེར་བ་བདེན་ནམ།ནས་དེའུ་ཕྱུག་མོས་ཀླུ་ཡུལ་གྱི་ནོར་གཡང་མང་པོ་ཡུལ་འདིར་དྲངས་ཡོད་ཟེར།རྣམ་རྒྱལ་མཆོད་རྟེན་གྱིས་ས་བཅུད་ཀྱི་སྤར་ཁ་མ་ལུས་ཡུལ་འདིར་སྤུངས་ཡོད་ཟེར།རྨི་ལམ་གྱི་ཞིང་ནས་ཕུགས་འདུན་གྱི་ཉི་འོད་ཚེས་པའི་ཡུལ་གྲུ།ཁྱེད་ནི་ས་དཔྱད་ཀྱི་རི་མོ་ཡོངས་སུ་ཚང་བའི་ཞིང་ཁམས་དེ་ཡིན།སྣོད་བཅུད་ཀྱི་གཟི་བྱིན་འབར་བའི་ཞིང་ཁམས་ལགས།ད་ཐེངས་ཁྱེད་ཀྱི་བཞིན་རིས་འགྱུར་ཏེ།འགྲོ་ལམ་བཀག་ཅིང་ཁ་ཤུབས་གྱོན་ཡོད་ཟེར་བ་བདེན་ནམ།ས་འགུལ་གྱི་ལོ་རྒྱུས་དེ་དག་དྲན་ན་ད་ཐེངས་འདི་ཨེན་ཙམ་རེད།ས་ཆེན་གྱི་སེམས་དཔའ་དང་བྱང་སེམས་ཀྱི་བདག་ཉིད་ཅན་དག་གིསཁྱེད་ཀྱི་གཡས་ནས་སྐྱོར་ཞིང་གཡོན་ནས་སྐྱོབ་བཞིན་ཡོད་པས།ཁྱེད་ཀྱི་མཛེས་སྡུག་གི་བཞིན་མདངས་རེ་རེ་ལ།ཡིད་ཆད་ཀྱི་སྐྱོ་ཉམས་རེ་རེ་ཤོར་དོན་མེད་ཡ།ཕུགས་འདུན་འཚོལ་སྙེག་གི་གོམ་སྟབས་རེ་རེའང།མདུན་སྐྱོད་ལ་མཚམས་འཇོག་བྱེད་དགོས་དོན་ཡེ་ནས་མེད།རྟེན་འབྲེལ་གྱི་ཁ་གཡང་འགྲིག་པའི་སང་ཉིན་སྔ་མོར།ཁྱེད་ཀྱི་པང་ནས་ནད་དུག་མཐའ་དག་འཇའ་བཞིན་ཡལ་ཟིན་པས།ཁྱེད་ཀྱི་རི་ར་བ་ཁང་ཁྱིམ་སྔར་བཞིན་གཡང་དུ་འཁྱིལ་ཡོད།དེ་དུས་ཕྱི་མི་ནང་དུ་འོང་ཆོག་ལ།སྐབས་དེར་གོ་རེ་ཞིམ་པོ་རེ་ལ་ཙོང་གཙང་མ་རེ་སྤོད་བཞིན།ཕ་སྐད་ཕ་ཡིག་གི་ལམ་ནས་ཁ་བརྡ་རེ་བཤད་ཆོག་པར་ཞུ།རྩོམ་སྒྲིག་པ། མགར་རྒྱལ་སྲས།
དོ་སྣང་ཆེ་བའི་རྩོམ།
རྫ་སྨུག་མཁར་གྱི་མཛེས་དཔལ་ཉམས་སུ་མྱོང་།