གཤིས་ཆུ་སྔོན་མོ་དྲག་ཏུ་འབབ་པའི་གཡས་གཡོན་ན།

རྒྱང་ནས་ཉན་ན་མཐུན་སྒྲིལ་གྱི་ཨ་ལོང་དམ་པའི་ཡུལ་ཁམས་ཤིག

ཉེ་ནས་བལྟས་ན་ལྷུན་ཆགས་ངང་གཟི་བྱིན་གྱིས་འགྱིང་བའི་ཡུལ་གྲུ་ཞིག

སྣོད་བཅུད་ཀྱི་དཔལ་གཡང་མ་ལུས་ཀུན་ནས་འཛོམས་པའི་ཞིང་ས་སྟེ།

སོལ་དལ་གྱིས་འཚོ་བའི་ལུང་པ་ཁྱེད་ལ།

ཤར་ནས་མཆེད་པའི་ནད་ངན་གྱི་དུག་འབུ་དེས།

ཁྱེད་ཀྱི་ལྷིང་འཇགས་ཀུན་ནས་དཀྲོགས་སོང་ཟེར་བ་བདེན་ནམ།

བདག་གི་རྟའུ་ལུང་པ་ཡ།

ནས་དེའུ་ཕྱུག་མོས་ཀླུ་ཡུལ་གྱི་ནོར་གཡང་མང་པོ་ཡུལ་འདིར་དྲངས་ཡོད་ཟེར།

རྣམ་རྒྱལ་མཆོད་རྟེན་གྱིས་ས་བཅུད་ཀྱི་སྤར་ཁ་མ་ལུས་ཡུལ་འདིར་སྤུངས་ཡོད་ཟེར།

རྨི་ལམ་གྱི་ཞིང་ནས་ཕུགས་འདུན་གྱི་ཉི་འོད་ཚེས་པའི་ཡུལ་གྲུ།

ཁྱེད་ནི་ས་དཔྱད་ཀྱི་རི་མོ་ཡོངས་སུ་ཚང་བའི་ཞིང་ཁམས་དེ་ཡིན།

སྣོད་བཅུད་ཀྱི་གཟི་བྱིན་འབར་བའི་ཞིང་ཁམས་ལགས།

ད་ཐེངས་ཁྱེད་ཀྱི་བཞིན་རིས་འགྱུར་ཏེ།

འགྲོ་ལམ་བཀག་ཅིང་ཁ་ཤུབས་གྱོན་ཡོད་ཟེར་བ་བདེན་ནམ།

བདག་གི་རྟའུ་ལུང་པ་ཡ།

ས་འགུལ་གྱི་ལོ་རྒྱུས་དེ་དག་དྲན་ན་ད་ཐེངས་འདི་ཨེན་ཙམ་རེད།

གོང་རིམ་གྱི་ལས་ཁུངས་དང་རིགས་མཐུན་གྱི་སྤུན་ཟླ་དག་གིས།

ཁྱེད་ཀྱི་གཡས་ནས་སྐྱོར་ཞིང་གཡོན་ནས་སྐྱོབ་བཞིན་ཡོད་པས།

ཁྱེད་ཀྱི་མཛེས་སྡུག་གི་བཞིན་མདངས་རེ་རེ་ལ།

ཡིད་ཆད་ཀྱི་སྐྱོ་ཉམས་རེ་རེ་ཤོར་དོན་མེད་ཡ།

ཕུགས་འདུན་འཚོལ་སྙེག་གི་གོམ་སྟབས་རེ་རེའང།

མདུན་སྐྱོད་ཀྱི་མཚམས་འཇོག་དགོས་དོན་ཡེ་ནས་མེད།

བདག་གི་རྟའུ་ལུང་པ་ཡ།

རྟེན་འབྲེལ་གྱི་ཁ་གཡང་འགྲིག་པའི་སང་ཉིན་སྔ་མོར།

ཁྱེད་ཀྱི་པང་ནས་ནད་དུག་མཐའ་དག་འཇའ་བཞིན་ཡལ་ཟིན་པས།

ཁྱེད་ཀྱི་རི་ར་བ་ཁང་ཁྱིམ་སྔར་བཞིན་གཡང་དུ་འཁྱིལ་ཡོད།

དེ་དུས་ཕྱི་མི་སྐྱོ་བོ་ནང་དུ་འོང་ཆོག་ལ།

ནང་མི་སྨུག་པོ་ཕྱི་ལ་འགྲོ་ཆོག

སྐབས་དེར་གོ་རེ་ཞིམ་པོ་རེ་ལ་ཙོང་གཙང་མ་རེ་སྤོད་བཞིན།

ཕ་སྐད་ཕ་ཡིག་གི་ལམ་ནས་ཁ་བརྡ་རེ་བཤད་ཆོག་པར་ཞུ།

བདག་གི་རྟའུ་ལུང་པ་ཡ།

2020.2.14མགར་རྒྱལ་སྲས་ཀྱིས་ཕ་ཡུལ་ནས་བྲིས།