གཞི་ཚང་ཟླ་བ་གྲགས་པ། 2020-01-16
ཡང་དག་སྤྲོས་དྲི་ནམ་ཡང་མ་འཐུལ་བར།།
ཐ་སྙད་འཇིངས་ལ་བྱིང་བའི་ནེ་ཙོ་པ།།
གོང་དུ་བཀུར་ཞིང་འདྲེན་པོའི་ཚུལ་འདི་ལ།།
བདག་ཀྱང་མི་རངས་གནས་ལུགས་ཤུམ་པར་བྱེད།།
དཀར་ནག་རྒྱུ་ལ་ཚོར་བ་མངར་སྐྱུར་སོགས།།
རྒྱལ་པོའི་མཛད་པ་བྲན་གྱིས་ཟློག་ཐབས་བྲལ།།
སྔ་ཕྱི་རྐྱེན་གྱིས་འཕེལ་བའི་བར་ཆད་གང་།།
སངས་དུས་ཡོད་ཀྱང་ལོ་ཟླ་འགོར་རམ་ཅི།།
སྲིད་པའི་ཉི་མ་རྒྱང་རིང་དབྱིངས་ན་གསལ།།
གཟུགས་པོ་རྐང་ལག་ཐག་པས་བཀྱིགས་ནས་འདུག།
ཡིད་ཀྱི་གཞུང་ལ་སྨུག་པའི་གཞིས་སྒར་ཆགས།།
བདག་ནི་ནམ་ཞིག་སྤྲིན་པའི་ཕ་རོལ་སླེབས།།
འཁོར་བ་འདི་ཉིད་རྒྱུན་དུ་འཁོར་ངེས་ཀྱང་།།
མི་ཡུལ་འཁོར་བ་དུས་ཚོད་འགྱང་ཞིང་དཀའ།།
གཙང་ཆུ་རིང་མོས་ཉིན་བཞིན་གངས་དང་བཀྱེད།།
བདག་གིས་སྨྲ་བ་མེད་པར་འཕག་འཚག་བརྒྱབ།།
ས་སྲོད་མཚམས་ནས་སྐྱོ་བའི་མགུར་མ་འཐེན།།
མཆི་མས་སྦངས་པའི་ལོ་ཟླར་ཕྱི་འདང་བྱས།།
རི་བོང་མ་སོད་སྡོམ་པ་ཤོར་བའི་གཏམ།།
ཡིད་ལ་བརྣགས་པས་བདག་ནི་ངུ་སྙིང་འདོད།།
སང་ཞོགས་ཉི་མའི་སྐྱ་རེངས་གྲོལ་བའི་དུས།།
པད་མའི་ཁྱུ་ཚོགས་རེ་ཞིག་བདེ་མོ་འཇོག།
འདས་པའི་ལོ་རྒྱུས་དག་ནི་ཡང་ཡང་བཀླག།
རང་ཉིད་འཚམ་པའི་ལམ་ལ་གཞུག་པར་བྱ།།
རྩོམ་གསར། 10