སྡུག་འཁོར་བ་འདི་སྡུག་རབས་ཤེས་ཀྱང་།།

སྐྱིད་བདེ་ཆེན་གྱི་དགེ་རྩ་མ་སོགས།།

གནས་ཁམས་གསུམ་གྱི་འགྲོ་དྲུག་ཕ་མ།།

དགྲ་འཆི་བདག་གི་ཞགས་ནས་ཐར་དཀའ།།

བུ་མ་གཡང་གི་སྐྱབས་གཅིག་ཨ་མ།།

ཚེ་མི་རྟག་གིས་ཕྱི་མར་ཁྲིད་སོང་།།

བུ་དྭ་ཕྲུག་གི་སེམས་ཁ་མ་ནོན།།

དྲིན་ཨ་མ་ཁྱེད་སེམས་ནས་དྲན་བྱུང་།།

མ་དྲིན་ཆེན་ཁྱེད་མཇལ་ན་འདོད་ཀྱང་།།

ཚེ་འདི་ཕྱི་ཡིས་བར་ཐག་ཕྱེས་འདུག།

མ་མ་མཇལ་གྱི་ལོ་ཟླ་ཞག་དུས།།

བུ་མ་གཡང་ངས་ཨ་མ་དྲན་བྱུང་།།

དུས་སྙིགས་མ་འདི་དུག་ལྔ་རང་རྡོལ།།

བུ་ཤ་ཆད་ཀྱང་ཆུ་ནང་གཡུག་ཕོད།།

བུ་མ་གཡང་ང་སྲོག་བཞིན་གཉོར་ནས།།

དྲིན་ཨ་མ་ཁྱེད་དཀའ་ལས་ཆེ་སོང་།།

མགོན་མཚན་ལྡན་གྱི་བླ་མའི་སྐུ་མདུན།།

བཀའ་གདམས་ངག་གི་དཔལ་ལ་རོལ་ཏེ།།

དྲིན་ཕ་མ་ཚོའི་བཀའ་དྲིན་རིག་དུས།།

མ་དྲིན་ཆེན་མ་ལྷག་ཏུ་དྲན་བྱུང་།།

ལུས་ན་ཚོད་ནི་ང་ལས་ཆེ་ཡང་།།

དྲིན་ཨ་མ་ཞེས་འབོད་པ་གོ་ན།།

རྐྱེན་བྲོ་ནད་ཀྱིས་གཞན་ཡུལ་དྲངས་པའི།།

མ་དྲིན་ཆེན་ཁྱེད་ལྷག་ཏུ་དྲན་བྱུང་།།

ཆུང་བྱིས་དུས་ཀྱི་བག་མེད་འདུར་རྒོད།།

དྲིན་ཨ་མ་ལ་གུས་མེད་བསམ་ན།།

སེམས་ཕྱི་ནང་ལ་འགྱོད་གདུང་ཁྱབ་སྟེ།།

མ་དྲིན་ཆེན་ཁྱེད་ལྷག་ཏུ་དྲན་བྱུང་།།

ཡུལ་ས་ཁུག་གི་འདྲ་དུང་ལུང་ནང།།

སྐྱིད་མ་བུ་ཡི་མཉམ་འཛོམ་རྣམ་པ།།

སྙིང་མཆོང་གུར་དུ་གསལ་ལེར་འཆར་དུས།།

མ་དྲིན་ཆེན་ཁྱེད་ལྷག་ཏུ་དྲན་བྱུང་།།

བུ་མ་གཡང་ང་ལོ་ན་སོན་ཏེ།།

དྲིན་ཕ་མ་ཡི་དྲིན་ངོ་ཤེས་དུས།།

དྲིན་ཨ་མ་ཁྱེད་ས་སྟེང་མི་འདུག།

བུ་བསོད་ཟད་ང་ཤིན་ཏུ་སྐྱོ་ཨང་།།

མ་དྲིན་ཆེན་ཁྱེད་འཁོར་འདས་གར་ཡོད།།

གནང་དེ་ག་ནས་ང་གཡང་ཨེ་གཟིགས།།

ལོ་ཡུན་རིང་གི་བསགས་བཟང་དགེ་ཚོགས།།

སེམས་རྣམ་དག་གིས་མཆོད་འབུལ་བྱས་ཡོད།།

དྲིན་ཨ་མ་ཡིས་ཤེས་རྟོགས་ཨེ་བྱུང་།།

ཕྱི་ཚུལ་གོས་ནས་ནང་ཁྲིམས་བླངས་ཉིན།།

ཤག་སྤྱིལ་ཆུང་ལ་སུན་སྣང་མ་སྐྱེས།།

སྡོམ་དམ་ཚིག་ལ་ཉམས་ཆག་མ་བྱུང་།།

སྐྱབས་དཀོན་མཆོག་ལ་དད་པས་ཟིན་ཡོད།།

ལས་རྒྱུ་འབྲས་ལ་ཐེ་ཚོམ་ཤོར་མེད།།

ཕ་ཨ་ཅེ་ལ་བརྩེ་བས་བཀུར་ཡོང་།།

བཀའ་གཞུང་ལུགས་ལ་ཅི་ནུས་འབད་ཡོང་།།

འཆི་བར་དོ་ཡི་སྒོ་ཁར་འགྲིམ་ཉིན།།

ཚུལ་ནང་ཁྲིམས་འདི་བསྐྱུར་ན་མ་གཏོགས།།

གསོན་དལ་རྟེན་གྱི་རིན་ཆེན་ནོར་བུ།།

གཅེས་ཉར་ཚགས་ཀྱིས་གས་ཆག་མི་གཏོང་།།

དྲིན་ཨ་མ་ལ་གང་ཞུས་སེམས་གཏམ།།

རྫུན་གཡོ་སྒྱུ་ཡིས་མགོ་མཇུག་ཤན་མེད།།

བདེན་དམ་ཚིག་གིས་དཀར་པོ་བྱས་འདི།།

བུ་མ་གཡང་གི་ལོ་སར་ལེགས་སྐྱེས།།