ཁུག་ཤུལ་ཆུ་ཐིགས། 2019-12-02
ཨ་སྔོན་དགོང་ནས་སྤྲིན་པས་ལམ་ལ་བསྐྱལ།།
མེས་པོའི་རི་ཆུ་བརྒལ་ཏེ་ཕ་མཐའ་བགྲད།།
འདས་མ་ད་གསུམ་བསྣན་པའི་དུས་ཆེན་ནང་།།
མི་ལོ་དུ་མའི་འཛུམ་ཆུང་ཚེས་དུས་ཡོད།།
ཉི་མ་ནུབ་རི་གན་ནས་མ་རྒྱུད་གོང་།།
ཁོ་བོའི་ཞེན་ཆགས་རི་མོ་རྡུལ་གྱིས་སྦས།།
དུས་བཞིའི་ནང་ནས་སྟོན་རླུང་ངེས་མེད་གཡུག།
དམ་ཚིག་གཏིང་ལ་སྨྲེང་བའི་སྣང་བ་ཤར།།
ཞི་བའི་ཕ་ཁྱིམ་རྙེད་པའི་གཏན་སྟེང་ནས།།
ང་ཡི་མི་ཚེའི་གཉེན་གྲོགས་འཛོམས་ནས་བྲལ།།
སྐྱེ་འཆིའི་བར་གྱི་མི་རྟག་བརྡ་གླུ་བཀུག།
མྱོང་བའི་ཆོས་ལ་རྫོགས་ཚིག་བཞི་ཤད་བྲིས།།
ཁ་བའི་ཁྲུང་ཁྲུང་མཚོ་མཐའ་བསྐོར་ནས་འཕུར།།
མེ་ཏོག་སྣ་བརྒྱ་ཁུ་སིམ་ལྗོན་ནས་ལྡེམ།།
ཁང་སྟོང་ཆུང་ངུའི་དྲུང་ནས་ཕྱི་མིག་འཕངས།།
ཐོལ་གྱིས་བླངས་བའི་དབྱངས་རྟ་སྒོ་རུ་རྩིག།
རང་ཡུལ་ལུང་པ་གསེར་གྱི་འཛུམ་མདངས་ཕབ།།
ལྷ་ཤིང་ཤུག་པའི་མདུན་ནས་ཀི་ཞིག་བཏབ།།
ངེད་ཀྱི་ཐབ་ཚང་ནང་གི་དུ་བའི་རྒྱུན།།
ཕྱི་རུ་འཕྱུར་བའི་ནང་སེམས་རབ་ཏུ་གསོས།།
ཚེ་ཡི་ལས་འཕྲོ་མེ་ཏོག་ཁྲོད་ནས་རྙིད།།
སྲིད་པའི་དྲན་པ་བརྒྱ་ལ་མིག་ཆུ་སྟོང་།།
ཕྱིར་འོང་མེད་པའི་མི་ཚེའི་བར་ཐག་ནས།།
ནང་སེམས་སྐྱོ་མོ་ལམ་དང་ཟམ་པ་རེད།།
རྩོམ་གསར། 10