དུང་ཞེན་མེ་ཏོག་གིས་སྐྲ་ལོ་བསླེས་ཏེ།།

ཡིད་ཀྱི་གཙང་ཆབ་ཀྱིས་ཤ་རུས་འཁྲུད་མཁན།། 

འདང་བརྩེའི་འོ་སྤྲི་ཡི་མཚོ་ཁར་བཞུགས་པའི།། 

སྙིང་གི་ལྷ་མོ་ལགས་ཤིན་ཏུ་དྲན་ནོ།། 

ས་སྲོས་མག་མོག་ལ་ཤུགས་གླུ་ལེན་ཞིང་།། 

ཉི་ཟེར་ལམ་ལམ་དུ་འཛུམ་གྱིས་བསུ་བའི།། 

སྐྲ་ལོ་ཉག་མ་རེ་རླུང་གིས་གཡོ་དུས།། 

བཞིན་རས་དྭངས་གསལ་དེ་ཅི་འདྲའི་སྙིང་རྗེ།། 

ཟུར་མིག་ལྷེམ་ལྷེམ་གྱི་བྱམས་བརྩེ་རང་ཐོར།། 

དཀར་དམར་འཇམ་ཤ་ཡི་མེ་དྲོད་རང་འཐུལ།། 

ཨ་མའི་གཉུག་གཤིས་ཀྱི་ཚན་ཁ་འབར་བའི།། 

དུང་སེམས་སྙི་མོ་དེ་བརྗེད་ས་མ་རེད།། 

དབྱངས་གསལ་རྨི་ལམ་གྱི་དོ་ར་འགྲིམས་ཏེ།། 

མེས་པོའི་གླེགས་བམ་གྱི་ཡིག་འབྲུའི་ནང་ན།། 

གཤིས་བཟང་ཡིད་འོང་གི་སྙིང་ལ་འབྱར་བའི།། 

དམ་ཚིག་ཨ་ལོང་ཁྱོད་འདང་ཞིག་ཆེ་ཨང་།། 

ཚོགས་དྲུག་རྣམ་ཤེས་ཀྱི་བར་ན་སིམ་པའི།། 

དུང་དུང་འགྱུ་བག་གི་སྐད་ཆ་ཡོན་པོ།། 

ཚོར་བའི་བཟི་ཁ་ནས་བཀྲུས་ལ་རོལ་པས།། 

ཤ་རུས་པགས་གསུམ་ནས་ཡལ་བ་མ་བྱུང་།། 

བརྩེ་སེམས་མེ་ཏོག་གི་ཟིལ་ཆུ་ཕྲ་མོ།། 

བིམ་པའི་ཤེལ་ཕོར་གྱི་ཁ་ལ་རྩེན་པ།། 

ལས་འབྲས་རྒྱུད་སྐུད་ཀྱིས་འདི་ཕྱི་བཅད་རུང་།། 

ལྕེ་རྩེ་ལྗང་མདོག་ལ་བྱིལ་བྱིལ་བྱས་སོང་།། 

མཛེས་སྡུག་སྤྲིན་དཀར་གྱི་རྗེས་ལ་ལྟ་ཞོར།། 

ཟླ་བའི་དཀྱིལ་འཁོར་དེ་མེ་ལོང་སྣང་སྟེ།། 

རི་བོ་བརྒྱ་སྟོང་གི་རྒྱབ་ངོས་དེ་ནས།། 

དྲན་པ་མཚོ་ཆེན་གྱི་བང་ཁ་མ་འཐུལ།། 

ཟླ་འོད་བསིལ་བསེར་གྱིས་ལྕང་ལོ་ཡོམ་ཡོམ།། 

དཔེ་སྒྲོམ་གྲུ་བཞི་ཡི་ཁ་དོག་ཟུར་ན།། 

ཁེར་རྐྱང་ཞེ་འདང་གི་སྨྲེང་བ་འཁུར་བའི།། 

ཁྱོད་རང་ཅུང་ཙམ་ཞིག་སྐྱོ་བཞིན་ཡོད་སྙམ།། 

ང་ནི་ཁུ་སིམ་གྱིས་སྒེའུ་འགྲམ་ཞིག་ན།། 

སྐར་མའི་ངོ་གདོང་ལ་སྙན་ངག་བྲིས་ཏེ།། 

དོ་ནུབ་ཟླ་འོད་ཀྱི་ཆང་ཕོར་ཁ་ན།། 

ཁྱོད་ལ་མེ་ཏོག་གི་གཞས་ཚིག་བྲིས་ཡོད།།