རྒོད་པོ་ལ་ཕུལ་བའི་ཚིག་གི་མེ་ཏོག

གཞི་ཚང་ཟླ་བ་གྲགས་པ།        2019-11-13

རི་ངོས་བྲག་ཐེམ་འགྲིམ་པའི་ལས་དབང་ཡག་མོ།།

ཚེ་གཅིག་འདུན་པ་དྲག་པོས་བསྐུལ་བ་མིན་པར།།

ཚེ་རབས་བསོད་ནམས་ཕྲན་བུའི་སྡོངས་ལ་བརྟེན་ཏེ།།

མངོན་མཐོའི་ལྷ་ལས་འཕགས་པའི་གཟུགས་འདི་གྲུབ་སྐད།།

འབྱམས་ཀློང་མཁའ་ངོས་འཕུར་ན་རང་དབང་ལྡན་པའི།།

བསོད་ནམས་གཤོག་པ་ཐོགས་པ་གྱང་ངོས་སྲན་རིལ།།

བསྐལ་བརྒྱར་མི་ཡུལ་འགྲིམ་ཡང་རྙེད་པ་དཀའ་བའི།།

ཁྱད་འཕགས་རིན་ཆེན་ལུས་འདི་ཆུད་ཟོས་མ་གཏོང་།།

ལྷན་སྐྱེས་ནུས་པའི་གཤོག་ཟུང་ལྷབ་ལྷུབ་ལྡེམ་ཏེ།།

ལུང་འདབས་མུན་པའི་ཐོག་གི་ནམ་མཁར་རྩེན་དུས།།

མཐའ་མེད་སྟོང་དབྱིངས་འགྲིམ་པའི་གསེར་གྱི་ཉི་མས།།

དྲོ་གྲང་སྙོམས་པའི་འོད་ཀྱིས་བསུ་མ་ཨེ་བྱེད།།

སྒལ་ཚིགས་བྲག་ལ་ཁེན་པའི་མཚན་མོ་ནམ་ཞིག།

དམིགས་པ་ཏིང་འཛིན་ཀློང་ནས་མེ་ཏོག་ཨེ་འཁྲུངས།།

གཏན་མེད་གནམ་འཕང་གཅོད་པའི་རྩལ་དྲུག་མེད་ན།།

དཀར་པོ་ཟླ་བའི་བཞུགས་ཁྲི་ཐོབ་རབས་མི་འདུག།

འཐན་པ་ཤུགས་ཀྱིས་སྐྱོད་ལ་ནུབ་ཕྱོགས་འཕུར་སོང་།།

གངས་རི་དབལ་སོ་ཅན་པོའི་དབུས་སུ་འཕུར་སོང་།།

ལྷག་པའི་འཇོལ་མོས་ཚོགས་ཀྱིས་བསུ་མ་གནང་ཞིང་།།

གསེར་དངུལ་ཕྲ་མོའི་སྐྱིབས་ཤིག་སྟོང་པར་ལྷག་འདུག།

ལྟོས་དང་ནམ་མཁར་གནས་པའི་ཉི་མ་ལྷ་མོས།།

དཔྲལ་བའི་སྤྱན་ཟུང་བགྲད་དེ་ཁྱེད་ལ་བལྟས་འདུག།

སྣང་བའི་སྒྱུ་མར་གཡེངས་ཏེ་དལ་དལ་བྱས་ན།།

གནས་མཆོག་འོད་འབར་ཚལ་འདི་གཞན་དུ་འཕགས་འགྲོ།།

ཁྱེད་རང་ཀློང་གྱུར་ཁྱུང་གི་ཐུགས་སྲས་ཡིན་པས།།

མང་པོའི་ལྷ་ཞིག་བསྒྲུབ་ལ་ནན་ཏན་མཛའ་འདུག།

མཐོན་པའི་གནམ་དུ་འཕུར་ཡང་ས་གཞིར་ཅེར་ན།།

གྲོང་སྡེའི་རྔོན་པ་དག་གིས་ཞགས་ནག་བཟུང་འདུག།

ཁྱེད་ནི་དོགས་མོའི་གཡང་ལ་གོམས་གཤིས་ལྡན་པས།།

ཡངས་པའི་ཐང་ཆེན་དབུས་སུ་འབབ་པར་མ་བྱ།།

རང་ཉིད་འཛིན་མར་ལུས་པའི་གཤེད་ཙམ་མ་གཏོགས།།

གཏན་བདེའི་གོ་འཕང་རྙེད་པའི་རྒྱུ་རུ་མི་འགྲོ།།

  • ལེ་ཚན་སྔོན་མ།:ཚོར་བ་འདིའང་སྙན་ངག་ཡིན།
  • ལེ་ཚན་རྗེས་མ།:མི་ཚེའི་རིན་ཐང་བརླག་སླ།