སྒོ་རང་གྲོལ། 2019-11-06
བདེ་སྐྱིད་ཀྱི་ནོར་བ་ཞིག་སྔོན་ལ་ཤོར་ནས།།
སྡུག་ཡུས་ཀྱི་བདེན་པ་ཞིག་རྗེས་སོར་མངོན་ན།།
ནང་སེམས་སུ་ནོང་འགྱོད་ཅིག་ད་ལྟ་སྐྱེ་བཞིན།།
མ་འོངས་ཀྱི་ལྷ་དབང་དེ་བསུ་རུ་ཆས་རོགས།།
ཡར་བལྟས་ཀྱི་ཟླ་བ་ཀན་ཁྱོད་ཀྱིས་རིག་གམ།།
ཁེར་རྐྱང་གི་ངུ་འབོད་དེ་སྨག་རིམ་ནང་རེད།།
མཚན་གཞུང་གི་ངོ་གདོང་འདི་ཁྱོད་ཀྱིས་མཐོང་ན།།
ཟླ་བ་ཁོ་ཁེར་རྐྱང་དུ་ལྷག་ཏུ་གསལ་སོང་།།
མིག་ཆུ་དང་སེམས་ངལ་དག་རང་སར་སྐམ་ནས།།
དགའ་བ་དང་འཁྲེང་ཞེན་ཚོ་སོ་སོར་བཀར་ན།།
འཇིག་རྟེན་གྱི་རེ་བ་ཞིག་ཤི་མ་གསོན་རེད།།
བསམ་བློ་ཞིག་སྣེ་གཉིས་ནས་གཅིག་དུ་ཀར་འགྲོ།
བློས་གཏོང་སོགས་ཡིད་ཆད་ཀྱི་ཚིག་འབྲི་དེ་དག།
གང་ཞིག་ནས་ཐོར་ན་ཅི་ཡིན་བསམ་ན།།
ནང་སེམས་ཀྱི་ཟབ་ས་དེར་ཚ་གདུག་ཆེ་སོང་།།
ངུ་བ་ལས་མིག་ཆུ་འདི་འབྱིད་རོགས་མེད་སོང་།།
སྐད་ཆ་ཡི་ཡིད་ཆེས་དག་སེམས་སུ་བསྙལ་ཡང་།།
གློ་བུར་དུ་འབྲེལ་ཐག་ཀན་ཉེ་ལ་རིང་བས།།
དོགས་པ་དང་ཐེ་ཚོམ་སོགས་ཐོད་ལ་གཟན་པས།།
འགྲེལ་བཤད་དང་གཏམ་གླེང་ཚོ་གསལ་མོ་མ་རེད།།
ད་སྐབས་ཀྱི་བྱ་ཚུལ་དེར་ལྟ་ཉན་མེད་ཅིང་།།
བློ་ཁོག་གི་ཁང་ཁྱིམ་དེ་སྟོང་བར་ལུས་སོང་།།
གྱང་ཆག་དང་ཁང་ཤུལ་ན་རིན་ཆེན་མེད་ཀྱང་།།
ད་དུང་ཡང་ཞེན་ཆགས་ཤིག་ཁོག་ལ་སྦས་ཡོད།།
རྩོམ་གསར། 10