འཇམ་དབྱངས་ཉི་མ། 2019-10-28
སྐྱེ་སྔོན་བག་ཆགས་གང་གིས་རྒྱུ་བྱས་ཏེ།།
མི་མཇེད་ཞིང་གི་མགྲོན་དུ་ཉེར་བྱོན་ལ།།
རྐང་གཉིས་གཙོ་བོའི་བསྟན་པའི་རྒྱལ་མཚན་བསྒྲེང་།།
མར་བའི་ཐུགས་ཀྱི་སྲས་གཅིག་མི་ལ་དྲན།།
ཡུམ་གྱི་བཀས་བསྐུལ་མཐུ་རྩལ་ལེགས་པར་བསྒྲུབ།།
དགྲ་བོ་ཚར་བཅད་ཡོད་ཚད་བདེ་ལ་བཀོད།།
འཇིག་རྟེན་སྣང་ངོར་དགྲ་འདུལ་གཉེན་སྐྱོང་མཛད།།
མཛད་པ་སྣ་ཚོགས་སྟོན་པའི་མི་ལ་དྲན།།
མི་ཆོས་རྒྱང་དོར་དམ་ཆོས་གཙུག་ཏུ་བཀུར།།
མི་གྲལ་ལས་བུད་དབེན་པའི་རི་ལ་ཕེབས།།
མི་ཡུལ་སྐྱེ་འགྲོར་ཉམས་མགུར་མང་དུ་གསུངས།།
མི་ཡི་མཆོག་གྱུར་གྲུབ་ཐོབ་མི་ལ་དྲན།།
ཆོས་ཕྱིར་དཀའ་བ་སྤྱད་ལ་སྔར་བྱས་སྡིག།
ཁོག་ཏུ་དུག་སོང་ཇི་བཞིན་འགྱོད་པས་བཤགས།།
སྐུ་ཚེ་གཅིག་ལ་མཆོག་གི་དངོས་གྲུབ་བརྙེས།།
སྒྲུབ་བརྒྱུད་བསྟན་པའི་སྲོལ་འཛུགས་མི་ལ་དྲན།།
འདི་སྣང་ཆོས་ཀུན་སྒྱུ་མ་རྨི་ལམ་ཞེས།།
འཁོར་བའི་ཆོས་ལ་རྫོགས་ཚིག་བཞི་ཤད་བྲིས།།
མཛད་མེད་ཏིང་འཛིན་ཟས་ཀྱི་དཔལ་ལ་རོལ།།
ངེས་དོན་ཆོས་པའི་མཆོག་གྱུར་མི་ལ་དྲན།།
ཚེ་གཅིག་སངས་རྒྱས་མཛད་པ་མངོན་དུ་གྱུར།།
ལུགས་གཉིས་བསླབ་བྱས་འགྲོ་བའི་ཐུགས་རྒྱུད་གྲོལ།།
མཆོག་གསུམ་ཀུན་འདུས་རྫོགས་ཆེན་རྣལ་འབྱོར་པ།།
སྔགས་འཆང་བྱེ་བའི་གཙུག་རྒྱན་མི་ལ་དྲན།།
ཆོས་པ་སྒོམ་པར་རློམ་པ་མང་པོ་ཞིག།
ཆོས་བརྒྱད་བྲན་དུ་གྱུར་བའི་རྣམ་ཐར་ལས།།
ཆོས་ཚུལ་གང་ཞིག་གང་ལས་ལེགས་པར་གསན།།
ཆོས་པའི་རྣམ་ཐར་ལེགས་སྐྱོང་མི་ལ་དྲན།།
ནུབ་མེད་མཛད་རྗེས་རྡོ་རིང་སྲ་བརྟན་ཞིག།
གངས་ཀྱི་དབུ་རྩེར་བསྒྲེང་བའི་སྒོམ་ཆེན་ཏེ།།
མར་བའི་ཐུགས་ཀྱི་དགོངས་པའི་མཛོད་འཛིན་པ།།
གོས་ཧྲིལ་མནབས་པའི་རྣལ་འབྱོར་མི་ལ་དྲན།།
རྩོམ་གསར། 10