སྲད་འདབ་གསར། 2019-10-10
འཆར་སྒོའི་གསང་བ་བརྟོལ་ཏེ།
ཡིག་འབྲུའི་གྲོང་ལ་འཁྱམ་མཁན་དེ་ང་ཡིན།
སྨྱུ་གུའི་རྐྱལ་བ་སྒུལ་ཏེ།
ཚོར་འདུའི་གྲུ་རྫིངས་དེད་མཁན་དེ་ཡང་ང་ཡིན།
ལྷོ་ཕྱོགས་འདི་རྒྱ་མཚོ་ཞིག་ཡིན་ན།
འགྲན་རྩོད་ནི་རྦ་རླབས་ཤིག་རེད།
འཛམ་གླིང་འདི་ནམ་མཁའ་རང་ཡིན་ན།
འགྲན་རྩོད་ནི་གློག་དམར་ཞིག་ཅི་ལ་མིན།
དམར་ཆིལ་ཆིལ་དུ་གཡོ་གྱིན་པའི་དར་ཆ།
ངའི་མེས་པོའི་རྣམ་ཤེས་ཀྱིས་བཙིར་བའི་ཟུངས་ཁྲག་ཡིན་ལ།
འོད་ཆེམ་ཆེམ་དུ་འཕྲོ་བཞིན་པའི་སྐར་མ།
ངའི་མེས་པོའི་བློ་རིག་གིས་འཚེར་བའི་
ཟིལ་རྔམ་གྱི་བཀྲག་མདངས་ཀྱང་ཡིན།
ཉི་ཟླ་གཟའ་སྐར་གྱི་མ་ཎི་ཆུ་འཁོར།
དབྱར་དགུན་སྟོན་དཔྱིད་ཀྱི་ཤིང་ལོ་སྒྲོལ་མ།
ཁྱོད་ཀྱིས་ཀྲུང་ཧྭ་ཟེར་བའི་གྱད་མི་ཞིག་རིག་ཨེ་མྱོང་།
ཁྱོད་ཀྱིས་ཀྲུང་ཧྭ་ཟེར་བའི་དབྱངས་འགྱུར་ཞིག་ཐོས་ཨེ་མྱོང་།
ཡ་གླིང་ཤར་མ་ན་ངའི་མེས་རྒྱལ་ཆགས་ཡོད།
རི་བོ་དང་ཆུ་བོའི་ཕང་བ་ན་ངའི་མེས་རྒྱལ་འགྱིང་ཡོད།
ས་འདི་ནི།
གསར་རྟོགས་བྱིས་པའི་གསོན་ཤུགས་ཀྱི་རྩེད་ར་ཡིན་ལ།
གནས་འདི་ནི། ལོ་རྒྱུས་རྒད་པོའི་བང་སོའི་བཤམ་
མཛོད་ཅིག་ཀྱང་ཡིན།
དགུང་ཨ་སྔོན་དབྱིངས་ན་གླག་རྒོད་ཀྱིས་མིག་ཟུང་ཅེར་ས།
ས་དོག་མོའི་ཞིང་ན་དབུགས་ཆགས་ཀྱིས་མཐེ་བོང་ཀེར་ས།
ཆུ་ཀླུང་ཁམས་ཆེན་མོའི་ཕྱུག་བདག་གི་སྐུ་མགྲོན་རྙིང་པ།
ཨེ་མ། འདི་ནི་སུ་ཡང་མ་ཡིན་ཏེ།
མིང་དུ་ཀྲུང་ཧྭ་ཀྲུང་ཧྭ་ཞེས།
སྒལ་ཚིགས་ཀྲོང་ངེར་བསྲིངས་བའི་ངའི་མེས་རྒྱལ་དེའོ།།
སྐད་དུ་ཀྲུང་ཧྭ་ཀྲུང་ཧྭ་ཞེས།
མགོ་བོ་མཐོན་པོར་བཏེགས་པའི་ངའི་མེས་རྒྱལ་དེའོ།།
མི་ལོ་དུ་མ་དུ་མ་ཞིག་གི་སྔ་རོལ་དུ།
སྐར་ལྔའི་དར་དམར།
ཁྱོད་ཀྱི་ང་རོ་དང་ཁུ་ཚུར་གྱི་འོག་ནས།
རུ་ངར་བའི་འདྲེ་དམག་གི་མགོ་ལག་བཅད་ཅིང་།
ཁྱོད་ཀྱི་ཟིལ་རྔམ་དང་འོད་ཟེར་འོག་ཏུ།
ཁྱོན་ཡངས་བའི་ཁྱིམ་ཚང་ང་དྲུག་གི་ལང་ཚོ་ཡང་དར།
ཀྱེ་ཀྱེ།
ལོ་དང་ཟླ་བ་ཡི་དྲི་ཟའི་བུ་མོ།
ཁྱོད་ཀྱིས་ཀྲུང་ཧྭ་ཟེར་བའི་དྲི་ལ་མནོམ་ཨེ་མྱོང་།
ཁྱོད་ཀྱིས་ཀྲུང་ཧྭ་ཟེར་བའི་རོ་བཅུད་དེ་སྒོམ་ཨེ་མྱོང་།
དེ་བས་ཀྱང་། ཁྱོད་ཀྱིས་ཀྲུང་ཧཱ་ཟེར་བའི་དུས་རབས་ཀྱི་
རྒྱ་སྟག་ཁྲ་མོ་དེར་རེག་ཨེ་མྱོང་།
རྩོམ་གསར། 10