དབང་གྲགས་རྡོ་རྗེ། 2019-08-27
མི་ལོ་ལྔ་བཅུར་ཐིམ་པའི།
སེམས་སུ་དྲོད་ཁོལ་གནང་བའི་ཨ་ཕ་ལགས།
མི་ལོ་ལྔ་བཅུ་ནི།
ཁྱེད་ཀྱི་དགའ་སྡུག་གི་འཚོ་བའི་མངར་སྐྱུར་ཡིན།
འདས་སོང་ལ་ཕྱིར་རྟོག་བྱས་ཚེ།
ཁྱེད་རང་ཆུང་དུས།
སྤྱང་ཀི་བཞིན་རྒྱབ་རྟེན་གྱི་གཉེན་ཉེ་མེད།
ཁྱེད་ལ་རེ་ཆད་དང་སྐྱོ་སྣང་མེད་པར།
བརྩོན་འགྲུས་ཀྱི་རྟ་ཕོ་བཞོན་ནས་རྒྱུག
ཁྱེད་ཀྱིས་མཚན་མོའི་འཇིགས་སྣང་བསད་དེ།
སྐྱ་རེངས་ཀྱི་འཛུམ་མདངས་བསྒུག
ཨ་ཕ་ལགས། སེམས་ཀྱི་གངས་རི།
འཁོར་བའི་ཉིན་སྲིབ་ཀྱི་སྡིག་སྒྲིབ་ལས།
ཁྱེད་རང་ནི་ཅི་འདྲའི་གྲང་ཨང་།
ཁྱེད་ཉིད་གྲང་དོན་ཡོད་ཚད།
ངེད་བཟའ་མི་ཚོའི་སླད་དུ་མ་ཡིན་ནམ།
བྱམས་བརྩེའི་བལ་ཁ་འཇམ་པོས།
ངེད་བཟའ་མི་ཚོ་རྟག་ཏུ་བདེ་ཞིང་སྐྱིད་པར་རུམ།
ཨ་ཕ་ལགས།
ཁྱེད་ཉིད་ཡོད་པས།
ང་རང་ཧ་ཅང་དྭངས་གཙང་ཡིན།
ཁྱེད་ཀྱི་སློབ་གསོའི་ཐིགས་པ་རེ་རེས།
ངའི་སེམས་ཀྱི་རྩྭ་ཐང་དུ་མེ་ཏོག་བཞད་བྱུང་།
རྩ་དོན་གྱི་གོ་རིམ་ལྡན་པའི་ཨ་ཕ།
གཞན་ལ་ངོ་དགའ་ཡིས་འཁྲབ་སྟོན་བྱེད་པའི་སྟ་གོན་མེད།
བློ་གཤོག་གི་འཕུར་རྩལ་རྐྱོང་བའི་ཨ་ཕ།
རིགས་ཞེན་གྱི་དད་པ་འཁྱིལ་བའི་མཚོ་མོ།
ཨ་ཕ་ལགས། སེམས་ཀྱི་གངས་རི།
འཇིག་རྟེན་གྱི་བྱ་དངོས་མཐའ་དག་ཟད་ཀྱང་ཆོག
ཁྱེད་རང་ཡོད་པས་ཕྱུག
ངས་ཅི་ཡང་མ་རྙེད་ཀྱང་ཆོག
ཁྱེད་ཀྱི་སྐུ་ཚེ་རིང་བ་དེའི་ཚིམས།
ཁོ་བོ་སུ་དང་འགལ་ཟླ་བྱས་ཀྱང་།
ཁྱེད་རང་ཡོད་པས་རྟུལ་ཕོད་པའོ།།
རྩོམ་གསར། 10