བོད་ཚྭ་ཁུ། 2019-08-23
རླུང་བུ་རྒྱང་དུ་འགྲོ་དུས།།
ང་རང་འགྲོ་འདོད་མ་སོང་།།
རྒྱང་རིང་ལོ་མ་བསམ་དུས།།
ང་རང་འགྲོ་འདོད་བྱུང་སོང་།།
སྡེ་མཐའ་ཁ་བས་གཡོགས་དུས།།
ང་རང་འཁྱག་སྣང་མ་བྱུང་།།
སེམས་ལ་རྨ་ཁ་ཤོར་དུས།།
ང་རང་འཁྱག་སྣང་བྱུང་སོང་།།
བན་ཆུང་སྣང་བས་དེད་དུས།།
རི་ལ་འགྲོ་སྣང་མ་སྐྱེས།།
བགྲེས་པོས་སྤྱན་ཆབ་གཏོར་དུས།།
ང་རང་འགྲོ་དགོས་བསམ་སོང་།།
རི་རྩེར་ཉི་འོད་ཐེབས་དུས།།
ཁྱེད་རང་དྲན་རྒྱུ་མ་བྱུང་།།
ཟླ་བ་ཁེར་འགྲོ་མཐོང་དུས།།
ཁྱེད་ཀྱི་ཞལ་རས་དྲན་བྱུང་།།
ང་རང་སྐྱིད་པོ་ཡིན་དུས།།
གཞན་པར་ཐུགས་སེམས་མ་བྱུང་།།
ང་རང་སྨྲེང་བ་བྱུང་དུས།།
ཐུགས་ཁག་མེད་པ་བསམ་བྱུང་།།
རྩོམ་གསར། 10