སོག་སྨྱུག 2019-08-23
ཞེན་ཆགས་ལ་དང་ལུང་བའི་ཕར་ངོགས་ལ་ལྷུང་མྱོང་།།
དེ་ཡང་འཁོར་བའི་སྙིང་པོ་འཚོལ་སྟངས་ཞིག་ཡིན་སྐད།།
རི་ཆུ་སྟོང་དང་ལན་ཆགས་མཛད་མཐའ་རང་མེད་ཀྱང་།།
ལས་འཕྲོས་རྨི་ལམ་རིང་མོ་ཁྱེད་ཉིད་ལས་འདའ་མེད།།
སྣང་བའི་མཐིལ་དུ་ལྷུང་བའི་གཉོས་ཆུང་གི་སེམས་གཤིས།།
མདང་གསུམ་རྨི་ལམ་ཁྲོད་ནས་བོར་སོང་བ་བདེན་ནམ།།
སྤྲིན་གྱི་འདབ་མར་བསྐུར་བའི་འདི་ཕྱི་ཡི་གསང་གཏམ།།
ལན་གསུམ་ཉན་ཐུབ་ཨེ་བྱུང་དྲན་གཟེབ་གྱི་བྱིའུ་ཆུང་།།
ལ་མོ་རྒྱབ་ཀྱི་ཞེ་སྣང་གཅོང་རོང་དང་འགྲོགས་ནས།།
བྱེ་མའི་རི་དཔུང་བརྒལ་ནས་རྨི་ལམ་ཞིག་འཚོལ་མྱོང་།།
སྐར་ཚོགས་གྲང་འདར་རྒྱག་པའི་མཚན་མོ་དེར་ཉུལ་ནས།།
དཀར་གསལ་ཟླ་བའི་འཛུམ་ཞལ་བདག་ཡིད་གྱི་སྤྲོ་བསྡུས།།
ལོ་ཟླའི་བརྩེགས་རིམ་འཁྱིལ་བའི་བསྒུག་སེམས་ཀྱི་ངོ་བོ།།
གང་ཞིག་དྲན་པ་གཡང་ཊིའི་རྨི་ལམ་བཞིན་འཛུམ་འདྲ།།
ཁྱེད་ལ་གཡས་སྐོར་གཡོན་སྐོར་ལན་གསུམ་དུ་བྱས་ནས།།
བདག་གི་བརྩེ་བའི་པད་འདབ་བདེ་སྟོང་ངང་དབྱེར་མེད།།
བདག་གི་སྙན་ངག་མཁའ་གླང་དཀར་པོ་བཞིན་བཞུད་ན།།
བདག་སེམས་ཁྱེད་ལ་འཁྲེང་བའི་གཏམ་རྒྱུད་ཞིག་ཡིན་སྐད།།
ལས་ཀྱི་ལམ་བར་བརྒྱུད་པའི་གཡང་ཊིའི་ཡི་རྨི་ལམ།།
བདག་གི་ཚོར་བའི་ཕ་མཐའ་ཁྱོད་ཉིད་ལ་འཁྲེང་ཡོད།།
ཟླ་འོད་མཚོ་ནང་ལྷུང་ན་སེམས་ཁྲལ་ཞིག་ཡོད་སྐད།།
རྒྱང་རིང་རྨི་ལམ་ཁྲོད་ནས་འཛོམས་པ་ཞིག་བྱུང་མྱོང་།།
སེམས་ཀྱི་ཟླ་བའི་འོད་སྣང་རང་ལུས་ལ་བརྒྱབ་ཀྱང་།།
ནམ་ཞིག་ནུབ་འགྲོ་བསམ་ན་གཉོས་དུང་རང་གཤིས།།
ཁྱེད་ཉིད་ཡངས་པའི་རྩ་ཐང་གཞི་ཁྱིམ་ལ་ཉར་ནས།།
དོ་དགོང་གདན་དུ་བྱས་པའི་སྙན་ངག་ཏེ་ཡིན་འདྲ།།
སང་ཉིན་ཞོགས་པར་ཉི་རྩེ་ཤར་ནུབ་ལ་བརྒྱབ་ནས།།
གོམ་ཁ་རང་རང་ས་རུ་གྱེས་དགོས་རང་བྱུང་སོང་།།
སྣང་བའི་ཁང་མིག་ཞིག་ནས་འཛོམས་པ་རང་བྱུང་ན།།
མི་འགྱུར་དམ་བཅའི་མདུད་པ་བྲག་རི་ལ་གཏད་ཆོག
སྐར་མའི་གྲངས་ཀ་བརྩི་བཞིན་རྒྱང་རིང་ལ་ཅེར་ནས།།
ཚིག་གི་མེ་ཏོག་འགའ་ཡང་ཁྱོས་ཕྱོགས་སུ་གཏོར་ཆོག
རྒྱང་རིང་རྒྱང་རིང་ཞིག་གི་དགྱེས་འཛུམ་ལ་བལྟས་ན།།
ཚེ་སྲོག་དབྱངས་རྟ་གསར་བའི་གཞན་ཆུང་ལ་ཉན་ནས།།
བདག་གི་སྙན་ངག་འདབ་སྟོང་བརྒྱད་ལྡན་ཞིག་ཡིན་ན།།
གཡང་ཊིའི་རེ་བའི་འབྲས་བུ་བདེ་ལེགས་ཞིག་སྨིན་ཤོག།
ཁྱོད་རང་བཀྲ་ཤིས་འཁྱིལ་བའི་ཡུལ་གྲུ་ཞིག་ཡིན་ན།།
དེ་ལ་མེ་ཏོག་སྣ་བརྒྱའི་ས་བོན་ཞིག་འདེབས་འདོད།།
སྐལ་བཟང་རྨི་ལམ་ཁྲོད་ནས་ལན་གཅིག་ལ་མཇལ་ན།།
ཞེ་སེམས་རྨུ་ཐག་རིང་མོ་རྒྱང་རིང་ནས་འཐེན་ཆོག།
རྩོམ་གསར། 10