སྤེན་ཚེ་གཞོན་པ། 2019-08-15
ཆུ་ཆེན་པོའི་ནང་དུ་ཉ་ཁྱུ་འདུ། །
ཉ་གསེར་མིག་རྐྱལ་རྩལ་གང་འདོད་རེད། །
ལུས་གར་སྟབས་འཁྱུག་པའི་ཉམས་འགྱུར་དེས།།
ཞི་བདེ་ཡི་གླུ་ཆུང་ལེན་ལེ་རེད།།
སྤང་ཡངས་མོའི་སྟེང་དུ་ནོར་ལུག་བཀྲམ།།
ལུག་གཡང་དཀར་རྩྭ་ཆུ་གང་འདོད་རེད།།
ལུས་ཤ་ཤེད་རྒྱས་པའི་འབའ་སྐད་དེས།།
རང་དབང་གི་གླུ་ཆུང་ལེན་ལེ་རེད།།
ནགས་ལྗོན་ཤིང་སྐྱེད་ཚལ་ར་བ་རུ།།
བྱ་བྱིའུའི་ཚང་མལ་དྲོན་མོ་རེད།།
སྐད་སྙན་མོས་གཤོག་རླབས་འགྱུར་ཚུལ་དེས།།
བདེ་སྐྱིད་ཀྱི་གླུ་ཆུང་ལེན་ལེ་རེད།།
མཛེས་མེ་ཏོག་སྟོང་གི་ལྡུམ་ར་རུ།།
རྐང་དྲུག་གི་རྩི་བཅུད་འཐུ་ས་རེད།།
དབྱངས་སྙན་མོས་འཕུར་ལྡིང་བྱེད་པ་དེས།།
བརྩོན་འགྲུས་ཀྱི་གླུ་ཆུང་ལེན་ལེ་རེད།
སྨད་གྲོང་ཚོའི་འདབས་ཀྱི་སློབ་ར་རུ།།
ཆུང་བྱིས་པའི་བློ་རྨོངས་སེལ་ས་རེད།།
དབྱངས་གསལ་བྱེད་སུམ་ཅུའི་འགྱུར་ཁུགས་དེས།།
འདྲ་མཉམ་གྱི་གླུ་ཆུང་ལེན་ལེ་རེད།།
ངེད་གྲོང་གི་ཕུ་མདའ་བར་གསུམ་དུ།།
མི་རྒན་དར་གཞོན་གསུམ་འཚོ་ས་རེད།།
ཚིག་ཞེ་སའི་འབོད་པ་སྙན་མོ་དེས།།
ཤེས་དཔལ་གྱི་གླུ་ཆུང་ལེན་ལེ་རེད།།
གཉེན་གྲོང་པ་ཁྱིམ་མཚེས་ཕན་ཚུན་དབར།།
རོགས་གྲོགས་དན་གཅིག་ཕན་གཅིག་གྲོགས་རེད།།
སྐྱིད་སྡུག་པོ་མཉམ་མྱོང་དཔེ་དེ་ཡིས།།
འཆམ་མཐུན་གྱི་གླུ་ཆུང་ལེན་ལེ་རེད།།
མིག་མཆི་མ་འཆོར་བའི་སྔར་སོང་གི།།
སྡུག་ལོ་ཟླ་སྔོན་གྱི་ལོ་རྒྱུས་རེད།།
དུས་དེང་སང་གྲ་རྒྱས་འཚོ་བ་དེས།།
འབྱོར་ཕྱུག་གི་གླུ་ཆུང་ལེན་ལེ་རེད།།
རྩོམ་གསར། 10