གངས་ཐིགས། 2018-12-14
ཟླ་དགུ་ཞག་བཅུར་ལུས་ལ་ཁུར་བའི་ལུས་ཀྱིས་ངལ་བ་ཁྱད་དུ་བསད།།
དཀར་བཅུད་ནུ་ཞོས་ལུས་ཟུངས་གསོས་ཏེ་མི་བུ་ཞིག་གིས་རྣམ་ཐར་བསྐྱངས།།
ཅ་ཙེ་གོམ་ཙེ་ང་ལ་ཁྲིད་ནས་འགྲོ་འདུག་གོམ་ཁ་དོད་པོར་བཏང་།།
དྲིན་ཆེན་ཨ་མའི་བྱམས་བརྩེ་དྲོད་མོ་གཞལ་མཐའ་བྲལ་བས་མཐའ་མེད་དོ།།
འཁོར་བའི་དཀའ་སྡུག་ཕྲག་ཏུ་བླངས་ནས་རྔུལ་ཆུའི་ཐིགས་པས་ཁྱིམ་གཞི་བསྐྱངས།།
སེན་མགོ་ཁྲག་དང་སེན་སྟེང་རྣག་བྱས་མིང་སྲིང་ངེད་ཚོར་མདུན་ལམ་བཙལ།།
འཚོ་བའི་ལོངས་སྤྱོད་ཅི་དགར་རོལ་བ་དྲིན་ཆེན་ཕ་ལོའི་དཀའ་བའི་ཚེགས།།
ཆུ་བུར་མིག་གི་རྣམ་གཞག་ཡིན་པས་དྲིན་ཆེན་ཕ་ལོ་སྐུ་ཚེ་རིང་།།
མིང་སྲིང་ངེད་ཚོར་གར་འགྲོ་གང་འདུག་མིག་གིས་འཚོས་ཞིང་སེམས་ཀྱི་ཚེགས།།
གཅེས་གཅེས་གཉོར་གཉོར་བྱམས་བརྩེས་བསྐྱངས་བའི་ལོ་ཟླ་དེ་དག་ཁད་ཀྱིས་བརྒལ།།
དཀར་གཙང་གཙང་གི་ཐུགས་རྒྱུད་དྭངས་མོ་ཡོད་ཚད་ངེད་ཚོས་དོན་དུ་བསྒྲོན།།
དྲིན་ཆེན་ཕ་མའི་སྐུ་དྲིན་བསམ་ན་གཞལ་མཐའ་མེད་པས་མིག་མཐའ་ཆུ།།
བརྩེ་བའི་བཅུད་རྩི་ང་ཚོར་གཏམས་པའི་མིང་སྲིང་ངེད་ཚོ་གཉོམ་ལག་རྒྱས།།
ཁ་ལས་རླུང་རྟ་དར་བའི་ཞོར་དུ་དུས་རྒྱུན་ང་ཚོར་སྐྱབས་འཇུག་ཞུས།།
དཀོན་མཆོག་གསུམ་པོས་སྡོང་གྲོགས་མཛོད་ཅེས་ཁ་གཡང་ནམ་རྒྱུན་ཆད་མྱོང་མེད།།
དྲིན་ཆེན་ཕ་མའི་དྲིན་ལན་བསམ་ན་ཡ་ཆུང་ཁོག་པ་འཁྱག་སིབ་སེ།།
དུས་ཀྱི་ལོ་ཟླ་ཐུན་བཞིན་འདས་ཏེ་ཉི་མ་རེ་རེ་ལག་བརྡ་བཞག།
ཡབ་ཡུམ་གཉིས་ཀྱི་དབུ་སྐྲ་ནག་པོར་དུས་ཚོད་རེ་རེར་དཀར་ཐིག་ལྷུང་།།
མིག་ཟུང་རྒྱལ་མོ་ཕྱེ་ཙམ་བྱས་ནས་ཡབ་ཡུམ་གཉིས་ཀྱི་གདོང་ལ་བལྟས།།
རྒས་རྟགས་མངོན་པའི་ངང་ཚུལ་མཐོང་ན་ཡ་ཆུང་ཁོག་པ་སྐྱོ་ལྷང་ངེ་།།
རྩོམ་གསར། 10