ཐང་ནག 2018-11-16
དབྱར་གྱི་རྔ་མ་གྲང་གིས་བསྡམས་པ་སྟེ།།
གྲང་ངར་རྒོད་པོ་ཁ་བ་བརྫུས་མགོ་བརྩམ།།
མི་སེམས་དྲོན་མོར་ཁ་བས་བརླན་བརླན་ནས།།
མིག་ཆུའི་མཐའ་རུ་བུ་ཡུག་འཚུབ་པ་བྱུང་།།
མིག་ཆུ་དྭངས་མོ་ཁ་བ་སྤྲུལ་ནས་སོང་།།
གདོང་གི་གཡས་གཡོན་བརྒྱུད་དེ་ལུད་པར་བྱས།།
སྐྱེ་ཡུལ་གཞས་སུ་བཏབས་པའི་དབྱངས་རིས་ཤིག།
སྡུག་གི་ཐང་ལ་དྲུད་ནས་སོང་བ་ཡིན།།
སྙིང་གི་མི་ལ་སེམས་པ་ཤོར་བ་ན།།
ཤི་བའི་སྡུག་བསྔལ་སེམས་ལ་བྱུང་བ་ཡོད།།
ལྷག་པར་དགའ་བ་གཞན་གྱིས་མ་ཚོར་ན།།
སྡུག་ལ་སྡུག་བསྔལ་རྐྱང་རྐྱང་བཙལ་ཏེ་འགྲོ།།
སྐབས་འགར་ཁ་ཡག་ཚིག་བཟང་བཤད་ན་ཐང་།།
སྤྲོ་བ་འབུམ་གྱི་ཡིད་ཆེས་སྟེར་ན་ཡང་།།
ལན་རེ་མགོ་གཡོག་རྩེད་ཆས་བྱས་པ་ན།།
ཨ་ཐང་ཆད་ནས་མགོ་བོ་ཆོག་པར་དཀའ།།
མི་ཚེ་ཐུང་ཐུང་སེམས་པ་ཆུང་ཆུང་ལ།།
ལས་ཀྱི་བྱམས་པ་འཁྲུལ་བའི་རྨི་ལམ་ཡིན།།
རྨི་ལམ་འཇའ་ཡིས་བསླུས་པའི་སྙིགས་མ་ལ།།
སྡུག་བསྔལ་སོ་སོ་ཁྱེར་ནས་སོ་སོར་འགྲོ།།
ཕྱིར་མིག་འའཕངས་ཏེ་གྱེས་ནས་འགྲོ་བ་ལ།།
སེམས་ཀྱི་ཕྱི་ཤུན་བྲད་འདྲའི་ན་ཟུག་དེ།།
མིག་ཆུ་སྟོན་ལོ་འདྲ་བ་ཐུར་དུ་འཐོར།།
པང་ཁེབས་ནག་པོའི་སྟེང་དུ་ཤོང་བར་དཀའ།།
ཆུ་བོ་རྟག་ཏུ་འབབ་པ་ཆད་རྒྱུ་མེད།།
རི་བོ་རྟག་ཏུ་མཐོ་བ་འཇིག་པ་མེད།།
ང་ཡིས་རུས་པ་དེ་ལྟར་མ་ཡིན་ཏེ།།
རླུང་བུའི་ཁྲོད་ཀྱི་མར་མེ་ཁེར་རྐྱང་ཡིན།།
ཐད་ཀའི་འཇིག་རྟེན་ཡར་མར་གཡེང་ས་ཡིན།།
ལས་ཀྱི་གཤིན་རྗེ་འཇིག་པ་ཡོད་མ་ཡིན།།
རང་ལ་བློ་སེམས་དཀར་བའི་མཆོག་གསུམ་ལ།།
ད་ནི་ཁྱེད་ལ་བཅོལ་ནས་འབད་པ་ཡིན།།
མདུན་གྱི་རི་ལ་བསྐོར་བ་བྱས་བྱས་ནས།།
ད་ནི་བདེ་སྐྱིད་ཁམ་གང་ལེན་པར་འོས།།
སུན་ཐག་ཆད་ནས་ཐ་མར་དྲན་རྒྱུ་ནི།།
དབེན་པའི་ན་བུན་དབྱིངས་སུ་འཛེགས་པར་བསམ།།
ཕྱེ་ལེབ་ཆུང་ཆུང་མེ་ཏོག་སྦྲང་རྩིར་ཆགས།།
དགུན་གྱི་དུས་ན་འཆི་བའི་ཁ་དོག་འཆར།།
དབྱར་གྱི་བདེ་བ་གྲང་གིས་བཅོམ་བྱས་ནས།།
འཁོར་བའི་ཚང་འདི་འཁྲུལ་བའི་རྨི་ལམ་རྟོགས།།
ལོ་གཅིག་གོས་གཅིག་གྲོགས་གཅིག་འགྲོགས་པ་ལ།།
རྟ་ཕོ་རྒོད་པོ་ཞོན་ནས་འགྲོ་བར་འདྲ།།
མི་སེམས་རྨི་ལམ་ཁོག་པ་བཅོ་བརྒྱད་ལ།།
སྐྱོ་བ་རྐང་ལ་ཟུག་ན་ཐུབ་པ་ཡིན།།
ཐུབ་སྐུ་སེར་པོ་ལུས་ན་ཁྱེར་བ་དེས།།
སྐྱེ་འཆི་འདུ་འབྲལ་ཁ་ཐོག་འཁོར་ལོ་ཡིན།།
འཇིག་རྟེན་གཅིག་ནས་གཅིག་ཏུ་བརྒྱུད་པ་ལ།།
ལམ་གྱི་གཞི་མདོ་འདི་རུ་ཀྲོང་ངེ་འགྲེང་།།
ལོ་ཀའི་ཞིང་ན་རི་ཆུ་རླུང་གསུམ་ཡོད།།
ལས་ཀྱི་འཁོར་བ་ཉི་མ་ཟླ་བ་ཡིན།།
བདེན་པ་ཆེན་པོས་ཐུབ་པས་མཐོང་སྣང་ལ།།
གྱང་གི་སྟེང་དུ་རི་མོ་བཀོད་པ་སྣང་།།
རྩོམ་གསར། 10