གླིང་གེ་སར་དར་ནས་དམག་འགྲོ་དར།།

སྨན་འབྲུག་མོ་དར་ནས་བག་འགྲོ་དར།།

གླིང་གེ་འབྲུག་གཉིས་ཀྱི་བཞག་པ་ལས།།

འདིར་བག་བཤད་བསྡུས་པ་བཀོད་པར་བྱ།།

འདིར་མཐུན་སྦྱོར་གཉེན་སྟོན་དང་འབྲེལ་བའི་

བག་བཤད་མདོར་བསྡུས་སུ་བཀོད་པ་ལ་དོན་

བརྒྱད་ལས།

དང་པོ་མནའ་མའི་བག་གདན་གྱི་བཤད་པ་ནི།

དྲི་བ། ཡ།ང་ཚོ་མནའ་མའི་འབབ་ས་ལ།།

བག་གདན་ཅི་དང་ཅི་ཞིག་ཡོད།།

ལན། ཡ། གཡུ་དང་བྱེ་རུ་སྤོས་ཤེལ་སོགས།།

རྒྱན་ཆའི་རིགས་ཀྱི་དགུ་ཚན་གཅིག།

དར་དང་གོས་ཆེན་འབུ་རས་སོགས།།

ན་བཟའི་རིགས་ཀྱི་དགུ་ཚན་གཅིག།

རྟ་དང་འབྲི་དང་མཛོ་མོ་སོགས།།

རྐང་འགྲོས་རིགས་ཀྱི་དགུ་ཚན་གཅིག།

སྟག་ལྤགས་གཟིག་ལྤགས་དོམ་ལྤགས་སོགས།།

པགས་པའི་རིགས་ཀྱི་དགུ་ཚན་གཅིག།

ཁ་གདན་འབོལ་གདན་ཕྱིང་གདན་སོགས།།

འབོལ་གདན་རིགས་ཀྱི་དགུ་ཚན་གཅིག།

སྐྱིད་ཉི་མ་འདྲ་བའི་བུ་མོ་ལ།།

གནམ་ཨ་སྔོན་འདྲ་བའི་འཁོར་ས་ཡོད།།

སེང་དཀར་མོ་འདྲ་བའི་བུ་མོ་ལ།།

གངས་དཀར་པོ་འདྲ་བའི་འཁོར་ས་ཡོད།།

རྒོད་ཐང་དཀར་འདྲ་བའི་བུ་མོ་ལ།།

བྲག་དཀར་འཛོང་འདྲ་བའི་འཁོར་ས་ཡོད།།

སྟག་དམར་ཡག་འདྲ་བའི་བུ་མོ་ལ།།

ནགས་རྒྱ་རྫོང་འདྲ་བའི་འཁོར་ས་ཡོད།།

གཉིས་པ་སྒོ་ལ་འཛུལ་བའི་བཤད་པ་ནི།

ཁང་འོག་མ་བར་མ་སྟེང་མ་གསུམ།།

ཁང་སྟེང་མ་བླ་ལུའི་ཆོས་སྒོ་རེད།།

ལྷ་བླ་ལུའི་ཆོས་སྒོ་ཅི་ཡིས་ཕྱེ།།

ལྷ་བླ་ལུའི་ཆོས་སྒོ་སྤོས་ཀྱིས་ཕྱེ།།

ཤུག་སྤོས་སྤང་སྤོས་རྫ་སྤོས་གསུམ།།

སྤོས་དེ་གསུམ་བརྒྱུད་ནས་ཡར་རེ་ཕྱེ།།

ཁང་འོག་མ་བར་མ་སྟེང་མ་གསུམ།།

ཁང་བར་མ་དཔོན་ལུའི་ཁྲིམས་སྒོ་རེད།།

གོང་དཔོན་ལུའི་ཁྲིམས་སྒོ་ཅི་ཡིས་ཕྱེ།།

གོང་དཔོན་ལུའི་ཁྲིམས་སྒོ་དར་གྱིས་ཕྱེ།།

དར་དཀར་པོ་དམར་པོ་སེར་པོ་གསུམ།།

དར་དེ་གསུམ་བརྒྱུད་ནས་ཡར་རེ་ཕྱེ།།

ཁང་འོག་མ་བར་མ་སྟེང་མ་གསུམ།།

ཁང་འོག་མ་ཨ་ཁུའི་གཏམ་སྒོ་རེད།།

ཕ་ཨ་ཁུའི་གཏམ་སྒོ་ཅི་ཡིས་ཕྱེ།།

ཕ་ཨ་ཁུའི་གཏམ་སྒོ་ཆང་གིས་ཕྱེ།།

གྲོ་ཆང་ནས་ཆང་རྒུན་ཆང་གསུམ།།

ཆང་དེ་གསུམ་བརྒྱུད་ནས་ཡར་རེ་ཕྱེ།།

སྒོ་ཕྱི་མ་བར་མ་ནང་མ་གསུམ།།

སྒོ་ཕྱི་མ་ཟལ་མོ་འབྲི་ཡིས་གང་།།

འབྲི་ཟལ་མོ་ང་ལ་མི་འདྲོག་ལེ།།

བཞོ་གསེར་ཟོ་བརྒྱུད་ནས་འདྲིད་བཞིན་ཡོང་།།

སྒོ་ཕྱི་མ་བར་མ་ནང་མ་གསུམ།།

སྒོ་བར་མ་འདོ་བ་རྟ་ཡིས་གང་།།

རྟ་འདོ་བ་ང་ལ་མི་འདྲོག་ལེ།།

སྒ་གསེར་སྒ་བརྒྱུད་ནས་འདྲིད་བཞིན་ཡོང་།།

སྒོ་ཕྱི་མ་བར་མ་ནང་མ་གསུམ།།

སྒོ་ནང་མ་གཡང་དཀར་ལུག་གིས་གང་།།

ལུག་གཡང་དཀར་ང་ལ་མི་འདྲོག་ལེ།།

བལ་སོག་བལ་བརྒྱུད་ནས་འདྲིད་བཞིན་ཡོང་།།

རྒྱབ་སྒོ་ཕྱི་མ་ཡར་ཕྱེ་དང་།།

དར་དཀར་པོ་བརྒྱུད་ནས་ཡར་རེ་ཕྱེ།།

སྐས་ཐེམ་སྒྲོལ་མ་ཉེར་གཅིག་རེད།།

སྐས་མགོ་ཨ་ཡིག་རང་བྱོན་རེད།།

མདོ་ར་པདྨའི་པད་ཐང་རེད།།

ཆུ་ར་རྒྱ་མཚོ་ཡར་འཁྱིལ་རེད།།

ཕྱི་ལ་བལྟས་ན་རི་བོ་འདྲ།།

རི་བོར་རི་དྭགས་འཁོར་བར་ཤོག།

རང་འཐག་རུས་སྦལ་རྒྱ་བོ་རེད།།

ཡ་མཆིག་དེ་དུང་ལས་གྲུབ་ནས་གདའ།།

མ་མཆིག་དེ་གཡུ་ལས་གྲུབ་ནས་གདའ།།

ཁ་བ་འབབ་འབབ་བབས་ནས་ཤོག།

གངས་རིའི་གསོག་གསོག་བསགས་ནས་ཤོག།

དཀྱིལ་ཀ་པདྨ་འདབ་བརྒྱད་རེད།།

ཀ་བ་འདི་ནི་ཕ་རྒྱུད་འདྲ།།

ཕ་རྒྱུད་ཙནྡན་སྡོང་པོ་རེད།།

ཀ་བ་ཡར་བཙུགས་གསེར་ཀ་ཡིན།།

གདུང་མ་མར་བཀོད་དངུལ་གདུང་ཡིན།།

ཀ་ཐོད་ཆུ་སྲིན་ཁ་སྤྲོད་ཡིན།།

བཤད་དགོས་བྱུང་ན་འདི་འདྲ་རེད།།

གསུམ་པ་རྟེན་འབྲེལ་མཐུན་བཤད་ནི།

འོ། ལེགས་སོ།། ལེགས་སོ།།

དེ་རིང་གནམ་ལ་སྐར་མ་ཡག།

དེ་རིང་བར་ལ་བསིལ་བུ་འཇམ།།

དེ་རིང་ས་ལ་དུས་ཚོད་བཟང་།།

བཟང་གསུམ་གྱི་རྟེན་འབྲེལ་འགྲིག་པ་ལ།།

རི་བོ་སྒུལ་བའི་ཤུགས་ཤིག་དགོས།།

རྒྱ་མཚོ་དཀྲུག་པའི་བློ་ཞིག་དགོས།།

མི་མང་འཛོམ་པའི་གཏམ་ཞིག་དགོས།།

ཕུ་ཡི་བླ་མ་ལ་ཐུགས་བརྟག་ཞུས།

བླ་མའི་ཐུགས་བརྟག་བཟང་།

བར་གྱི་མོ་མ་ལ་མོ་ཞུས།

མོ་མའི་མོ་བཟང་།

མདའ་ཡི་རྩིས་པ་ལ་རྩིས་ཞུས།

རྩིས་པའི་རྩིས་བཟང་།

མོ་བཟང་དང་རྩིས་བཟང་ཐུག་ནས་གདའ།

འབྱུང་བ་དང་སྤར་ཁ་མཐུན་ནས་གདའ།

ལོ་སྐོར་དང་སྨེ་བ་མཐུན་ནས་གདའ།

དེ་རིང་སྐར་མ་མགོ་ལ་ཐུག།

ལས་ཅི་བྱས་མགོ་ལ་ཡག་པར་ཤོག།

དེ་རིང་སྐར་མ་ལག་ལ་ཐུག།

ལས་ཅི་བྱས་ལག་ལ་ལོན་པར་ཤོག།

དེ་རིང་སྐར་མ་རྒྱལ་ལ་ཐུག།

ལས་ཅི་བྱས་རྒྱལ་ཁ་ལོན་པར་ཤོག།

བཞི་པ་རི་ཞིང་ཆུ་གསུམ་གྱི་བཤད་པ་ནི།

ཕྱི་མི་འགྱུར་གཡུང་དྲུང་ར་བས་བསྐོར།།

བར་མི་འགྱུར་བཀྲ་ཤིས་རྟགས་ཀྱིས་བསྐོར།།

ནང་མི་འགྱུར་ནོར་བུ་དགའ་འཁྱིལ་ཡོད།།

ཕུ་ལ་གངས་རིས་བསྐོར་བའི་རི།།

གངས་ལ་སེངྒེ་འཁོར་བའི་རི།།

སེང་ལ་གཡུ་རལ་རྒྱས་པར་ཤོག།

བར་ལ་ཙནྡན་ནགས་ཀྱི་རི།།

ནགས་ལ་སྟག་མོ་འཁོར་བའི་རི།།

སྟག་མོ་འཛུམ་དྲུག་རྒྱས་པར་ཤོག།

མདའ་ལ་མཚོ་མོ་འཁྱིལ་བའི་རི།།

མཚོ་ལ་ཉ་སྲམ་འཁོར་བའི་རི།།

ཉ་སྲམ་རྐྱལ་རྩལ་རྒྱས་པར་ཤོག།

རྒྱབ་རི་སེངྒེ་འགྱིང་བའི་རི།།

སེང་ལ་གཡུ་རལ་རྒྱས་འདྲ་ཡོད།།

མདུན་རི་འདོད་འཇོའི་བུམ་པའི་རི།།

གཏེར་བུམ་ནོར་བུས་བརྒྱན་འདྲ་ཡོད།།

རི་མཐའ་ས་ཞིང་ཆགས་ལེ་དེ།།

ཞིང་ཆུ་མ་པུསྟི་བརྩེགས་འདྲ་ཡོད།།

འབྲུ་སྔོན་མོའི་གཏེར་ཁ་བོར་བར་ཤོག།

གཤམ་ལ་ཆུ་བོ་རྒྱུ་ལེ་དེ།།

ཆབ་ཆུ་བོ་ཆབ་མ་བརྡབ་འདྲ་ཡོད།།

ལྔ་པ་ཇ་ཆང་འོ་གསུམ་གྱི་བཤད་པ་ལ།

ཐོག་མར་ཇ་བཤད་ནི།

གཡས་གསེར་སྐྱེམས་ནང་ལ་ཇ་སྣ་ཡོད།།

ཇ་འདི་ཡི་འབྱུང་ཁུངས་བཤད་པ་ན།།

ཤར་རྒྱ་ནག་བཀྲ་ཤིས་རི་བོ་ནས།།

ཚོང་དཔོན་ནོར་བུ་བཟང་པོ་གཅིག།

ལག་དོ་ཀརྨ་བཀྲ་ཤིས་གཉིས།།

རྒྱབ་དྲེལ་མི་ཉག་འཚེར་མོ་གསུམ།།

རྒྱ་ནག་པོའི་ཇ་གཡང་འབེབས་པའི་དུས།།

ཉིན་རེའི་ཉིན་གྱི་ཤོག་དཀར་ཇ།།

སྲིབ་རིའི་སྲིབ་ཀྱི་ཤོག་ནག་ཇ།།

ཉིན་སྲིབ་བར་གྱི་ཤོག་དམར་ཇ།།

ཇ་རབ་ཇ་ཡི་བླ་མ་དང་།།

རྒྱ་ཇ་མེ་ཏོག་གཡང་འཛིན་གཅིག།

ཏིལ་འབྲུ་ཇ་ཡི་དཔོན་པོ་གཉིས།།

ཅན་ཤིང་ཇ་ཡི་དཔའ་བོ་གསུམ།།

འབྲུ་དང་ཇ་ཡི་མ་བྱན་བཞི།།

ལྷ་ཇ་ཇ་ཡི་གཡོག་མོ་ལྔ།།

ཀོང་རྩི་ཇ་ཡི་གཡོག་དང་དྲུག།

རྫ་ཆུ་བསིལ་མ་དེ་དང་བདུན།།

འབྲི་མར་སེར་པོ་དེ་དང་བརྒྱད།།

བྱང་ཚྭ་དཀར་ཡག་དེ་དང་དགུ།།

དགུ་སེར་ཇ་ཡི་དགུ་དཀྲུག་བརྒྱབ།།

ཇ་ཐེངས་གསུམ་བཞེས་དང་དབུ་འཕང་མཐོ།།

དབང་པོ་གསལ་ཞིང་རིག་པ་རྣོ།།

ལྷ་བླ་མས་གསོལ་ན་ཆོས་སྒོ་ཡངས།།

གོང་དཔོན་པོས་གསོལ་ན་ཁྲིམས་སྒོ་ཡངས།།

མ་སྲུ་མོས་གསོལ་ན་གནས་སྒོ་ཡངས།།

བུ་ཚ་བོས་གསོལ་ན་དགྲ་མགོ་ནོན།།

སྨན་བུ་མོས་གསོལ་ན་བག་འགྲོ་བྱེད།།

ཆུང་བྱིས་པས་གསོལ་ན་རྩེད་ར་རྒྱས།།

གཉེན་ཕོ་མོ་རྣམས་ཀྱིས་རེ་རེ་མཆོད།།

རྟགས་དང་རྟེན་འབྲེལ་འགྲིག་ལེ་ཡིན།།

ལས་དང་སྨོན་ལམ་བཟང་ལེ་ཡིན།།

གཉིས་པ་ཆང་བཤད་ནི།

གཡོན་དངུལ་སྐྱེམས་ནང་ལ་ཆང་སྣ་ཡོད།།

ཆང་འདི་ཡི་འབྱུང་ཁུངས་བཤད་དགོས་ན།།

ཕུན་སུམ་ཚོགས་པའི་ཐབ་ཀྱི་ནང་།།

དམར་འོད་འཚེར་བའི་མེ་ཞིག་འབུད།།

བཀྲ་ཤིས་འཁྱིལ་པའི་ཟངས་ཤིག་བཙུགས།།

རྒྱུན་ཆད་མེད་པའི་ཆུ་ཞིག་བླུགས།།

ཨ་ཡག་ནས་ཀྱི་ཕ་དང་གཅིག།

དར་ཡག་ནས་ཀྱི་མ་དང་གཉིས།།

རྒྱ་སྨུག་ནས་ཀྱི་བང་མཛོད་གསུམ།།

སེང་ཁྲི་ནས་ཀྱི་སྡེ་པ་བཞི།།

སྨ་ར་ནས་ཀྱི་བླ་མ་ལྔ།།

ཁྲ་བོ་ནས་ཀྱི་ཞང་པོ་དྲུག།

ནས་དཀར་ནས་ཀྱི་སྐྱ་བོ་བདུན།།

དམར་ཁྲ་ནས་ཀྱི་གྲྭ་པ་བརྒྱད།།

སྔོ་ཆུང་ནས་ཀྱི་རྒན་མ་དགུ།།

ཁ་ར་ནས་ཀྱི་གཡོག་མོ་བཅུ།།

ལོ་གསུམ་བཙོས་པའི་ལོ་ཆང་ཡིན།།

ཟླ་གསུམ་བཙོས་པའི་ཟླ་ཆང་ཡིན།།

ཆང་ཐེངས་གསུམ་བཞེས་དང་དབུ་འཕང་མཐོ།།

ཕ་ཡུལ་སྟོད་ཀྱི་བུར་དཀར་ཆང་།།

ཚ་བ་རོང་གི་རྒུན་འབྲུམ་ཆང་།།

རྫ་ཡུལ་རོང་གི་འབྲས་དམར་ཆང་།།

ལོ་ལ་བཙོས་པའི་ལོ་ཆང་ཡོད།།

ལོ་ཆང་ལོ་ཡག་ཁམ་པ་ཡོད།།

ཟླ་ལ་བཙོས་པའི་ཟླ་ཆང་ཡོད།།

ཟླ་ཆང་ཟིལ་མངར་ལྡན་པ་ཡོད།།

ཞག་ལ་བཙོས་པའི་ཞག་ཆང་ཡོད།།

ཞག་ཆང་ཞག་ལོ་མེ་འབར་ཡོད།།

ཉིན་ལ་བཙོས་པའི་ཉིན་ཆང་ཡོད།།

ཉིན་ཆང་བདུད་རྩི་ཟེགས་མ་ཡོད།།

དཀར་ཡོལ་བཀྲ་ཤིས་རྟགས་བརྒྱད་ནང་།།

རྒྱལ་སྲིད་རི་མོ་སྣ་བདུན་ཡོད།།

སེངྒེའི་མར་གྱི་ཁ་རྒྱན་ཡོད།།

ཆང་ཐེངས་གསུམ་བཞེས་དང་དབུ་འཕང་མཐོ།།

གཉེན་ཕོ་མོ་རྣམས་ཀྱིས་རེ་རེ་མཆོད།།

རྟགས་དང་རྟེན་འབྲེལ་འགྲིག་ལེ་ཡིན།།

ལས་དང་སྨོན་ལམ་བཟང་ལེ་ཡིན།།

གསུམ་པ་འོ་བཤད་ནི།

མདུན་དུང་སྐྱེམས་ནང་དུ་འོ་འདྲེན་ཡོད།།

སེངྒེ་དཀར་མོའི་འོ་མ་གཅིག།

གཡུ་འབྲུག་སྔོན་མོའི་འོ་མ་གཉིས།།

རྒྱ་ཚ་བ་མོའི་འོ་མ་གསུམ།།

མ་ཧེ་ཁ་དཀར་འོ་མ་བཞི།།

ཟལ་མོ་འབྲི་ཡི་འོ་མ་ལྔ།།

ཁྱུང་དཀར་མཛོ་མོའི་འོ་མ་དྲུག།

འདོད་འཇོའི་བ་ཡི་འོ་མ་བདུན།།

གཡང་དཀར་ལུག་གི་འོ་མ་བརྒྱད།།

ཚེ་ཚེ་ར་ཡི་འོ་མ་དགུ།།

འོ་སྣ་ནང་གི་འོ་འདྲེན་དེ།།

ཐེངས་གསུམ་བཞེས་དང་ཤ་ལོ་དཀར།།

གཟུགས་པོ་སོས་ཤིང་ཁ་ཞིང་ཆེ།།

རྩི་དང་རོ་བཅུད་ལྡན་པ་ཡོད།།

བཀྲ་ཤིས་དུས་ཀྱི་སྨོན་ལམ་འགྲུབ།།

དྲུག་པ་དར་བཤད་ནི།

ངའི་ལག་ནང་འཛིན་པའི་དར་དཀར་འདི།།

སྟེང་ལྷ་མོ་གསུམ་གྱིས་བཀལ་ལེ་ཡིན།།

བར་གཉན་མོ་གསུམ་གྱིས་བསྒྲིགས་ལེ་ཡིན།།

འོག་ཀླུ་མོ་གསུམ་གྱིས་བཏགས་ལེ་ཡིན།།

དར་མགོར་བཀྲ་ཤིས་རྟགས་བརྒྱད་ཡོད།།

དར་དཀྱིལ་རྒྱལ་སྲིད་སྣ་བདུན་ཡོད།།

དར་མཐར་མུ་ཏིག་ཛར་ལོ་ཡོད།།

བྱུང་བ་ནག་པོ་རྒྱ་ནས་བྱུང་།།

དར་བ་དབུ་ནག་བོད་ལ་དར།།

ཚོང་དཔོན་ནོར་བུ་བཟང་པོས་ཉོས།།

ལག་དོ་ཀརྨ་བཀྲ་ཤིས་ཀྱིས།།

རྒྱ་དྲེལ་མི་ཉག་འཚེར་མོར་བཀལ།།

ཆུ་ལ་ཆུ་རིན་མ་སྤྲད་དར།།

ཟམ་ལ་ཟམ་རིན་མ་སྤྲད་དར།།

ལ་ལ་ལ་བཙས་མ་གསོ་དར།།

ལྷ་བླ་མར་མཇལ་དར་མ་ཕུལ་དར།།

གོང་དཔོན་པོར་ཁྲིམས་དར་མ་ཕུལ་དར།།

དར་དཀར་པོ་དྲི་མ་མེད་པ་འདི།།

ཡར་གཡུགས་ཨ་སྔོན་གནམ་ལ་གཡུགས།།

གནམ་འཁོར་ལོ་རྩིབ་བརྒྱད་གུར་ཞིག་ཕུབ།།

མར་གཡུགས་དོག་མོ་ས་ལ་གཡུགས།།

ས་པདྨ་འདབ་བརྒྱད་གདན་ཞིག་བཏིང་།།

ཁྲི་རིན་ཆེན་བརྩེགས་པའི་གདན་སྟེང་ནས།།

ཕྱིང་པ་དཀར་པོའི་གདན་ཞིག་བཏིང་།།

ཕྱི་མི་འགྱུར་རྒྱ་ནག་ལྕགས་རི་ཡོད།།

ནང་མི་འགྱུར་གཡུང་དྲུང་ལག་སྦྲེལ་ཡོད།།

སྟོད་མི་འགྱུར་མི་འུ་གདུང་དྲུག་ཡོད།།

དར་དཀར་པོ་ཨ་ཤེ་ཁ་བཏགས་འདི།།

བུ་བུ་མོ་གཉིས་ཀྱི་མགུལ་ལ་སྒྲོན།།

དར་མདུད་རིན་ཆེན་སྤུངས་པ་རྒྱག།

དང་པོ་དར་གྱི་མདུད་པ་དེ།།

ལྷ་ཚངས་པ་དཀར་པོའི་མདུད་པ་ཡིན།།

གཉིས་པ་དར་གྱི་མདུད་པ་དེ།།

བར་གཉན་ཆེན་སྐུ་ལྷའི་མདུད་པ་ཡིན།།

གསུམ་པ་དར་གྱི་མདུད་པ་དེ།།

འོག་ཀླུ་རྒྱལ་གཙུག་ནའི་མདུད་པ་ཡིན།།

རྡོ་རྗེ་སྤ་ཆེན་མདུད།

མི་ཉག་གཡུ་རྩེའི་མདུད།

ཚོང་དཔོན་དར་ལུ་མདུད།

ཁ་མཚར་གཏམ་གྱི་མདུད།

ཤ་ཟ་མར་གྱི་མདུད།

ཆང་འཐུང་སྐྱུ་རུའི་མདུད།

རྡོ་རྗེ་ཚེ་ཡི་མདུད།

ཚེ་སྲོག་བྲག་ལས་སྲ་བར་ཤོག།

ལྕགས་ཀྱི་སྲོག་རྩ་འགྲུབ་པར་ཤོག།

མི་རྒྱུད་ཆུ་ལས་རིང་བར་ཤོག།

མི་ལོ་བརྒྱ་ལ་འཚོ་བར་ཤོག།

སྟོན་བརྒྱ་མིག་གིས་མཐོང་བར་ཤོག།

ཚེ་ཉི་ཟླ་གཉིས་དང་མཉམ་པར་ཤོག།

འཆི་མེད་ཚེ་ཡི་གཡུང་དྲུང་ཐོབ་གྱུར་ཅིག།

བདུན་པ་གསོལ་སྟོན་ལ་རོལ་རྗེས་ཀྱི་

གཡང་འབོད་ནི།

མདའ་དར་དང་ཕྱེ་མར་ལག་ཏུ་བཟུང་ནས་

འདི་སྐད་བརྗོད་དོ།།

ཕྱི་མི་དགོས་དངུལ་དཀར་གྱི་མེ་ལོང་།།

བྲི་མི་དགོས་འཇའ་ཚོན་གྱི་རི་མོ།།

ཤད་མི་དགོས་ཇོ་བོ་ཡི་དབུ་སྐྲ།།

བཙུགས་མི་དགོས་དཔག་བསམ་གྱི་ལྗོན་ཤིང་།།

ཉི་མ་ཁ་དཀར་ངོ་དཀར་ལོ།།

གཡང་ལེན་དང་བཀྲ་ཤིས་བརྗོད་དགོས།།

དེ་རིང་བཀྲ་ཤིས་གཡང་ཞིག་འབོད།།

སྟོད་རྒྱ་གར་རྒྱལ་པོའི་ཆོས་གཡང་ཁུག།

སྨད་རྒྱ་ནག་རྒྱལ་པོའི་ཁྲིམས་གཡང་ཁུག།

བར་བལ་པོ་རྒྱལ་པོའི་ཚོང་གཡང་ཁུག།

བྷ་ཏ་ཧོར་གྱི་རྟ་གཡང་ཁུག།

སྟག་གཟིག་རྒྱལ་པོའི་ནོར་གཡང་ཁུག།

ནམ་མཁའི་མཐོང་ནས་གཡང་ཞིག་འབོད།།

ཉི་མ་བཞིན་དུ་དྲོད་ཀྱི་གཡང་།།

སྐྱེ་དངོས་བཞིན་དུ་མཚར་བའི་གཡང་།།

བར་སྣང་མཐོང་ནས་གཡང་ཞིག་འབོད།།

ཆུ་སྤྲིན་བཞིན་དུ་འཚུབ་པའི་གཡང་།།

སྦྲང་ཆར་བཞིན་དུ་འབབ་པའི་གཡང་།།

འབྲས་དྲུག་བཞིན་དུ་སྨིན་པའི་གཡང་།།

ས་དོག་མོ་བརྒྱུད་ནས་གཡང་ཞིག་འབོད།།

རི་རྒྱལ་བཞིན་དུ་བརྟན་པའི་གཡང་།།

གངས་རི་བཞིན་དུ་སྤུངས་པའི་གཡང་།།

ཆུ་བོ་བཞིན་དུ་འབབ་པའི་གཡང་།།

རྒྱ་མཚོ་བཞིན་དུ་འཁྱིལ་པའི་གཡང་།།

དེ་རིང་བཀྲ་ཤིས་ཉི་མ་ལ།།

ངོ་མཚར་ཆེ་བའི་གཡང་ཞིག་འབོད།།

སྟེང་ལྷ་ཡི་བུ་མོ་འོད་དཀར་བྱོན།།

བར་གཉན་གྱི་བུ་མོ་འོད་ཅན་བྱོན།།

འོག་ཀླུ་ཡི་བུ་མོ་ཆུ་ལྷ་བྱོན།།

ཤར་ཕྱོགས་དྲི་ཟའི་ལག་ནས་ཚེ་གཡང་ཁུག།

ལྷོ་ཕྱོགས་གཤིན་རྗེའི་ལག་ནས་ཚེ་གཡང་ཁུག།

ནུབ་ཕྱོགས་ཆུ་ལྷའི་ལག་ནས་ཚེ་གཡང་ཁུག།

བྱང་ཕྱོགས་གནོད་སྦྱིན་ལག་ནས་ཚེ་གཡང་ཁུག།

ཤར་ལྷོ་མེ་ལྷའི་ལག་ནས་ཚེ་གཡང་ཁུག།

ལྷོ་ནུབ་སྲིན་པོའི་ལག་ནས་ཚེ་གཡང་ཁུག།

ནུབ་བྱང་རླུང་ལྷའི་ལག་ནས་ཚེ་གཡང་ཁུག།

བྱང་ཤར་དབང་ལྡན་ལག་ནས་ཚེ་གཡང་ཁུག།

སྟེང་ཕྱོགས་ཚངས་པའི་ལག་ནས་ཚེ་གཡང་ཁུག།

འོག་ཕྱོགས་ཀླུ་གཉན་ལག་ནས་ཚེ་གཡང་ཁུག།

འབྱུང་བ་རྣམ་ལྔའི་ལག་ནས་ཚེ་གཡང་ཁུག།

འཆི་བདག་གཤིན་རྗེའི་ལག་ནས་ཚེ་གཡང་ཁུག།

བདུད་དང་འདྲེ་སྲིན་ལག་ནས་ཚེ་གཡང་ཁུག།

ཁམས་གསུམ་སྲིད་གསུམ་ལག་ནས་

ཚེ་གཡང་ཁུག།

    ས་འོག་ས་སྟེང་ས་བླ་གསུམ་གྱི་ལག་ནས་

    བཀྲ་ཤིས་ཐམས་ཅད་འདིར་ཁུག་ཅིག།

མི་གཡང་ཁྱིམ་དུ་ལོན་པར་ཤོག།

ནོར་གཡང་ཁྱིམ་དུ་ལོན་པར་ཤོག།

ཞིང་གཡང་མཛོད་དུ་ལོན་པར་ཤོག།

ནས་གཡང་སྒམ་དུ་ལོན་པར་ཤོག།

ཆང་གཡང་བན་དུ་ལོན་པར་ཤོག།

ཟས་གཡང་གོ་ཁར་ལོན་པར་ཤོག།

ཕྱུགས་གཡང་ར་བར་ལོན་པར་ཤོག།

དེ་ནས་མདའ་དར་བུ་ཡི་ལག་དང་།

ཕྱེ་མར་བུ་མོའི་ལག་ཏུ་ཕུལ་ནས།

ཕྱྭ་གཡང་ཤོག།

གཡང་ཁུག་ཅིག་ཅེས་ལན་གསུམ་བརྗོད་དོ།།

བརྒྱད་པ་བཀྲ་ཤིས་བརྗོད་པ་ནི།

ཐབ་གཡས་ཐབ་གཡོན་ཐབ་དཀྱིལ་ཐབ་གསུམ།།

ཐབ་གཡས་ཐབ་གསེར་ཐབ་ཁྲ་མོ་རེད།།

ཇ་འུ་ཟིའི་འགྲུལ་ལམ་མི་ཆད་པའི་བཀྲ་ཤིས་ཤོག།

དྲེལ་སྨུག་ཆུང་མཐའ་ནས་བསྐོར་བའི་

བཀྲ་ཤིས་ཤོག།

ཐབ་གཡོན་ཐབ་དངུལ་ཐབ་ཁྲ་མོ་རེད།།

ཆང་སྐྱེམས་འབར་གྱི་འགྲུལ་ལམ་མི་ཆད་པའི་

བཀྲ་ཤིས་ཤོག།

ཆབ་ཆུ་མས་མཐའ་ནས་བསྐོར་བའི་

བཀྲ་ཤིས་ཤོག།

ཐབ་དཀྱིལ་ཐབ་དུང་ཐབ་ཁྲ་མོ་རེད།།

    དཀར་འོ་མའི་འགྲུལ་ལམ་མི་ཆད་པའི་

    བཀྲ་ཤིས་ཤོག།

    འབྲི་ཟལ་ཆུང་མཐའ་ནས་བསྐོར་བའི་

    བཀྲ་ཤིས་ཤོག།

ཁྱིམ་ལ་མི་ཡིས་གང་བའི་བཀྲ་ཤིས་ཤོག།

བང་མཛོད་འབྲུ་ཡིས་གང་བའི་བཀྲ་ཤིས་ཤོག།

ཕྱུགས་རར་ནོར་གྱིས་གང་བའི་བཀྲ་ཤིས་ཤོག།

མི་སྲོག་བྲག་ལས་སྲ་བའི་བཀྲ་ཤིས་ཤོག།

བྲག་ལ་ཞིག་རལ་མེད་པའི་བཀྲ་ཤིས་ཤོག།

མི་ཚེ་ཆུ་ལས་རིང་བའི་བཀྲ་ཤིས་ཤོག།

ཆུ་ལ་རྒྱུན་ཆད་མེད་པའི་བཀྲ་ཤིས་ཤོག།

བཀྲ་ཤིས་ཐམས་ཅད་འདིར་བྱོན་ཅིག།

མི་ཕྱྭ་ཁུག་ལ་ཕྱུགས་གཡང་ཤོག།ཕྱྭ་ཁུག་ཅིག།

གཡང་ཁུག་ཅིག། སྐྱབས་ལ་བྱོན་ཅིག།

ཅེས་བརྗོད་དེ་མེ་ཏོག་གི་ཆར་སིལ་མ་བསྙིལ་བས་

དགེ་ལེགས་སུ་བྱའོ།།ཅེས་པའང་འདི་རིགས་ལ་དུངས་ཞེན་ལྕི་བའི་རབ་བརྟན་དགེ་ལེགས་ཕུན་ཚོགས་ཀྱིས་ཆུ་སྟག་རྒྱལ་ཟླའི་དམར་ཕྱོགས་ཀྱི་བཟང་པོ་གཉིས་པར་མཁར་མདོ་ནས་བསྡུས་པ་དགེ་ལེགས་འཕེལ།