རབ་མཛེས་ལྟ་ན་སྡུག་པའི་ཐ་གྲུ་འདི། །

　　　　　　མཚུངས་ཆོས་འགྲན་ཟླ་བྲལ་བའི་སྐྱེད་མོས་ཚལ། །

　　　　　　ཡིད་འོང་ཉམས་དགའི་སུམ་རྩེན་མ་ལགས་ཏེ། །

　　　　　　འཕགས་པའི་གདུལ་ཞིང་ཉིད་ཕྱིར་སཱ་ལའི་ལྗོངས། །

　　　　　　ལྷ་ཡི་དཔལ་ལ་འགྲན་ཅིང་ནོར་གཏེར་གྱི། །

　　　　　　དངོས་གྲུབ་ཆར་དུ་འཇོ་བའི་དཔྱིད་གཅིག་པུ། །

　　　　　　བྷོ་ཊའི་ལྗོངས་ཆེན་གང་གི་ཁྱད་ཆོས་ཀྱིས། །

　　　　　　གདངས་ཅན་ཀླུ་ཡི་ཡུལ་གྱི་སྙན་པ་འགོག །

　　　　　　གྲང་ཞིང་བསིལ་ལ་རྡུལ་བྲལ་རྣམ་པ་ཅན། །

　　　　　　མགྱོ གས་ཤིང་འཇམ་ལ་རྟག་ཏུ་ལྷུང་ལྷུང་འབབ། །

　　　　　　དྭངས་ཤིང་གཙང་ལ་མགྲིན་པའི་དཔལ་གྱུར་བ། །

　　　　　　མཐོ་སྒང་ཆུ་བོ་ཀུན་ལ་ཕན་པའི་གཏེར། །

　　　　　　སྐབས་གསུམ་གནས་ཀྱི་ཉམས་དགའི་སྐྱེད་ཚལ་ན། །

　　　　　　ཚངས་པའི་སྲས་མོ་བཞད་པའི་སྒྲ་དབྱངས་སམ། །

　　　　　　བོད་ཡུལ་ལྗོན་པའི་ཚལ་གྱི་འཇོལ་མོའི་སྐད། །

　　　　　　གང་ཡིན་མ་ངེས་བདག་སེམས་འཕྱང་མོ་ཉུག །

　　　　　　མཐའ་ཡས་རྩྭ་ཐང་ཀུན་གསལ་ཁྱོན་ཡངས་ལ། །

　　　　　　ཕྱུགས་རིགས་རྟ་ནོར་ལུག་གསུམ་སྐར་ཚོགས་བཀྲ། །

　　　　　　རྫི་གླུ་སྙན་མོ་ཁུ་བྱུག་མགྲིན་པའི་སྒྲ། །

　　　　　　ཕ་ཡུལ་བསིལ་ལྡན་ལྗོངས་ན་ལྷང་ངེར་སྒྲོགས། །

　　　　　　བསླབ་གསུམ་རྩ་བ་རབ་བརྟན་རི་དབང་རྩེར། །

　　　　　　འཆད་རྩོད་རྩོམ་གསུམ་ཡར་ངོའི་ཟླ་བ་ཚེས། །

　　　　　　ཐོས་བསམ་སྒོམ་པའི་འོད་སྣང་ཕྱོགས་སུ་འཕྲོ། །

　　　　　　ཕ་ཡུལ་ཆོས་སྡེ་མུན་སེལ་ནོར་བུའི་འཚོ། །

　　　　　　རིག་པའི་སློབ་གླིང་རང་བྱུང་སྐྱེད་མོས་ཚལ། །

　　　　　　ན་ཆུང་སློབ་བུ་གཡུ་སྦྲང་གཞོན་ནུ་རྣམས། །

　　　　　　སྦྱང་བརྩོན་གཤོག་ཟུང་འདབ་ཡངས་རང་བརྐྱངས་ནས། །

　　　　　　ཤེས་བྱ་སྦྲང་རྩི་གསོག་ལ་ཅི་ཡང་བྲེལ། །

　　　　　　ཕྲ་ལྡེམ་ལང་ཚོ་པད་རྩ་གཞོན་ནུ་ལ། །

　　　　　　གཉེན་ལྕུག་ལག་སོར་ཡལ་འདབ་དལ་བར་གཡོ། །

　　　　　　དུང་སེམས་གཡུ་ཆུང་སྦྲང་མ་འགུག་པ་ཡི། །

　　　　　　གངས་ལྗོངས་སྨན་ཤར་རྣམས་ནི་མེ་ཏོག་ཚལ། །