|
སྤྱིར་དཀྱིལ་འཁོར་ཞེས་པ་ནི་ལྷ་གཙོ་འཁོར་རྟེན་དང་བཅས་པའི་བཀོད་པ་སྟེ་རྒྱལ་བ་རྡོ་རྗེ་འཆང་གིས་གདུལ་བྱའི་དབང་གིས་རྒྱུད་དེ་དང་དེ་གསུང་བའི་སྐབས་སུ་ལྷ་དེ་དང་དེའི་དཀྱིལ་འཁོར་གྱི་བཀོད་པ་དངོས་སུ་སྤྲུལ་ཏེ་དབང་བསྐུར་ཅིང་རྒྱུད་བསྟན། དགོངས་གཞི་དང་དགོས་པའི་དབང་གིས་བློས་བསླངས་ཀྱི་དཀྱིལ་འཁོར། ལུས་དཀྱིལ་གྱི་དཀྱིལ་འཁོར། བསམ་གཏན་གྱི་དཀྱིལ་འཁོར་ལ་སོགས་པ་ཚོགས་གཉིས་སྒྲུབ་ཚུལ་གྱི་མན་ངག་ཞིབ་པ་རྒྱུད་སྡེ་སོ་སོ་ན་བསྟན་ཡོད། དེ་ལྟར་བོད་དུ་བཞེངས་པའི་ཚུལ་གྱི་མགོ་འབུས་ཙམ་ཞིག་སྟོན་ན། སྲོང་བཙན་ཡབ་ཡུམ་གྱིས་ར་སའི་གཙུག་ལག་ཁང་དུ་འཇམ་དཔལ་དྲག་པོའི་དཀྱིལ་འཁོར་དང༌། ཐུགས་རྗེ་ཆེན་པོའི་དཀྱིལ་འཁོར་སོགས་བྲིས་བཞེངས་མཛད་པ་དང༌། ཁྲི་སྲོང་གི་དུས་བསམ་ཡས་སུ་གསང་སྔགས་ཀྱི་དཀྱིལ་འཁོར་ཆ་ཚང་བཞེངས་པ་དང༌། སློབ་དཔོན་ཆེན་པོས་ཕྱག་བྲིས་མཛད་པའི་དཀྱིལ་འཁོར་ཡང་མང་བར་གྲགས། ཁྱད་པར་དུ་ཕོ་བྲང་པོ་ཏ་ལ་ནི་ཕྱི་རྒྱལ་པོའི་ཕོ་བྲང་དང༌། ནང་གཙུག་ལག་ཁང༌། གསང་བ་བླ་མེད་ཀྱི་དཀྱིལ་འཁོར་གྱི་རྣམ་པར་བཞེངས། ས་ཆེན་གོང་མ་ན་རིམ་དང༌། ཀུན་མཁྱེན་བུ་སྟོན་གྲུབ་ལ་སོགས་པའི་གདན་ས་དག་ཏུ་བཀའ་བརྒྱུད་སོ་སོའི་ཐུན་མོང་དང་ཐུན་མོང་མ་ཡིན་པའི་དཀྱིལ་འཁོར་ཆ་ཚང་བ་རེ་བཞེངས་པར་བརྟེན། བོད་ཁམས་ཡོངས་སུ་རྡུལ་ཚོན་དང་རས་བྲིས། ལོག་བྲིས་སོགས་ཀྱི་དཀྱིལ་འཁོར་བགྲང་ལས་འདས་པ་བཞེངས་དང་བཞེང་བ་ལྟར་དང༌། ཁྱད་པར་དུ་རྗེ་ཐམས་ཅད་མཁྱེན་པས་དགའ་ལྡན་དུ་ཕྱག་ལེན་ཕྲ་ཞིབ་ཀྱིས་བདེ་གསང་ལ་སོགས་པའི་དཀྱིལ་འཁོར་དང་བློས་བསླངས་ངོ་མཚར་བ་བཞེངས་པའི་བཀའ་སྲོལ་ད་ལྟ་འཕེལ་བཞིན་པ་དང༌།གཞན་རིན་པོ་ཆེའི་དཀྱིལ་འཁོར་དང༌། གསེར་དངུལ། ཟངས། མུ་ཏིག ཙན་དན། སའི་རྒྱུ་སྣ་ཚོགས་ཀྱིས་བསྒྲུབས་པའང་ཤིན་ཏུ་མང་བ་ཕལ་ཆེ་བ་དུས་དབང་གིས་འཇིག་ཀྱང་ད་ལྟའང་མངོན་དུ་གྱུར་པ་མང་བོ་ཞིག་བཞུགས། བློས་བསླངས་ཞེས་པ་བློ་ངོར་སྒོམ་དོན་གྱི་དཀྱིལ་འཁོར་དེ་གཟུགས་སུ་བསླངས་པ་དང༌། རྡུལ་ཚོན་ནི་རིན་ཆེན་བྱེ་མས་འབུར་ཐོན་དུ་སྤུངས་ཏེ་བཀོད་པ། རས་བྲིས་ནི་རིན་པོ་ཆེའི་ཁུ་བས་བྲིས་པ་སྟེ། ཐམས་ཅད་དཀྱིལ་འཁོར་དངོས་ཀྱི་དོད་ཐུབ་ཡིན་ཏེ། དེ་ལ་རྟེན་གཞལ་ཡས་ཁང་ལྷའི་ཕོ་བྲང་གི་རྣམ་པ་དང༌། བརྟེན་པ་ལྷ་གཙོ་འཁོར་གྱི་བཀོད་པ་སྐུ་བརྙན་དང་ས་བོན་ཕྱག་མཚན་ཚོམ་བུ་ལ་སོགས་པའི་སྒོ་ནས་བཞག་པ་ཡིན་ནོ།།
 དོ་སྣང་ཆེ་བའི་རྩོམ།
| | | | |
