ལྷོ་བརྒྱུད་ནང་བསྟན་དང་བྱང་བརྒྱུད་ནང་བསྟན་ཞེས་པའི་ཐ་སྙད་འདི་བོད་རང་གི་ཆོས་འབྱུང་དག་ཏུ་དངོས་སུ་ཐོན་མ་མྱོང་བར་མངོན་ཞིང་། ཡིན་ནའང་ཡིག་རིགས་གཞན་གྱི་ཆོས་འབྱུང་ཕལ་མོ་ཆེར་དུས་རྒྱུན་ཐ་སྙད་འདི་བཀོལ་བཞིན་མཆིས་ལ། ང་ཚོས་འདིར་དེ་གཉིས་ཀྱི་གོ་དོན་རགས་ཙམ་ཞུ་ན། དེའང་དུས་གསུམ་རྒྱལ་བའི་ཡུམ་གྱུར་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཡུལ་དབུས་ནས་ལྷོ་ཕྱོགས་ཀྱི་རྒྱུད་དུ་སྤྱོད་པར་འགྱུར་རོ།། ཞེས་པ་ནས། བྱང་ཕྱོགས་ནས་བྱང་ཕྱོགས་ཀྱི་ཕྱོགས་དེ་ཉིད་དུ་རྒྱས་པར་འགྱུར་རོ།། ཞེས་ལུང་དུ་བསྟན་པ་ལྟར་རྒྱལ་བའི་བསྟན་པ་རིན་པོ་ཆེ་ཐོག་མར་ཕྱི་ཕྱོགས་སུ་དར་བའི་ཚེ་གཙོ་བོ་རྒྱ་གར་གྱི་ལྷོ་བྱང་གཉིས་སུ་གྱེས་ཏེ་དར་བར་བཤད་ཅིང་། དཔེར་ན་རྒྱ་གར་གྱི་ལྷོ་ཕྱོགས་སུ་གཏོགས་པའི་རྒྱལ་ཁབ་སིང་ག་ལའི་གླིང་དང་། བྷར་མ། ཐེ་ལན་ཊ། ཁམ་ཕུ་ཁྲེ། ལོ་སི་སོགས་ཡུལ་གྲུ་མང་བོར་དར་བའི་ནང་བ་སངས་རྒྱས་ཀྱི་བསྟན་པ་ལ་ལྷོ་བརྒྱུད་ནང་བསྟན་དང་། དེ་བཞིན་རྒྱ་གར་གྱིས་རྟིང་གཞི་བྱས་ཏེ་དེའི་བྱང་ཕྱོགས་ཀྱི་ཡུལ་གྲུ་དཔེར་ན་མ་ཧཱ་ཙི་ན་དང་། ཁོ་རེ་ཡ། འཇར་པན། ཝེ་ཐེ་ནམ། བོད་ཧོར་སོགས་སུ་དར་བའི་ནང་བའི་བསྟན་པ་ལ་བྱང་བརྒྱུད་ནང་བསྟན་ཞེས་གྲགས་ཆེ། ལྷོ་བརྒྱུད་ནང་བསྟན་གྱིས་གནས་བརྟན་པའི་ལུགས་གཙོ་བོར་འཛིན་པའི་རྒྱུ་མཚན་གྱིས་འདི་ལ་ཡོངས་ཁྱབ་ཐེག་པ་ཆུང་ངུའི་བསྟན་པ་དང་། ཅིག་ཤོས་ལ་ཐེག་པ་ཆེན་པོའི་བསྟན་པ་ཞེས་ཀྱང་བརྗོད་དོ།། ཕྱི་མ་འདི་དང་རང་རེའི་དེབ་ཐེར་ཆོས་འབྱུང་དུ་བསྟན་པ་བྱང་དར་ཞེས་འཁོད་པའི་ཐ་སྙད་ཀྱི་གོ་དོན་དང་ཁྱབ་ཆེ་ཆུང་སོགས་ཅུང་ཟད་མི་འདྲ་བར་མངོན་པས་དཔྱད།

  ཕྱོགས་དེ་གཉིས་ཀར་དར་བའི་རྒྱལ་བའི་གསུང་རབ་མཚོན་བྱེད་ཀྱི་ཡི་གེའང་མི་གཅིག་པར་བཤད་དེ། དེའང་ལྷོ་བརྒྱུད་ནང་བསྟན་ལ་མཚོན་ན། ཁོ་ཚོས་གཙོ་བོ་པྲ་ཀྲྀ་ཏིའམ་པཱ་ལིའི་སྐད་དུ་བྲིས་པའི་མདོ་སྡེ་ལ་སོགས་པ་ཁུངས་སུ་འཆང་བར་བྱེད་ཅིང་། སྐད་རིགས་འདི་ནི་གནའ་དུས་སངས་རྒྱས་ཞལ་བཞུགས་པའི་སྐབས་ཡུལ་དབུས་མགདྷའི་སྐྱེ་བོ་ཀུན་གྱི་སྐད་ཐུན་མོང་བ་ལྟ་བུ་ཡིན་འདུག་ལ། དེ་གའི་ཡུལ་མི་དག་གིས་འདི་ལ་པཱ་ལི་ཞེས་འབོད་པར་གྲགས་ཤིང་། འདིའི་དོན་དངོས་ནི་རྒྱུན་ཆགས་ཞེས་བྱ་བ་ཡིན་པ་དང་། སྐད་ཀྱི་ངོ་བོ་ལེགས་སྦྱར་རང་ལ་སྒྲ་འཇམ་དུ་སོང་བས་ར་སྒྲ་ཕལ་ཆེར་ཉམས་ཤིང་ཀྵ་ཡིག་ལ་སོགས་པ་བརྗོད་མི་བདེ་བ་དག་ཁ་ཡིག་ཏུ་བཀླགས་པ་སོགས་མང་བས་ཁ་ཅིག་འདི་སྐད་རིགས་བཞིའི་ཡ་གྱལ་ཡུལ་མི་རང་བཞིན་གྱི་སྐད་ཡིན་ཟེར་མཁན་ཡང་ཡོད། ལྷོ་ཕྱོགས་པ་དག་གིས་སྐད་འདི་ཉིད་ཀྱིས་སྟོན་པས་ཆོས་གསུངས་པར་བཞེད་དོ།། སིང་ག་ལའི་གླིང་སོགས་སུ་དར་བའི་རྒྱལ་བའི་གསུང་རབ་ནི་གོང་དུ་བཤད་མ་ཐག་པའི་པཱ་ལིའི་སྐད་ཀྱི་སྟེང་ནས་དར་སྤེལ་བྱས་པ་ལགས་ཤིང་། དང་ཐོག་ཡུལ་འདིར་དར་བའི་ཚེ་ཡི་གེར་བཀོད་པ་མེད་པར་བཤད་ལ། དེ་ནས་སྤྱི་ལོ་སྔོན་གྱི་དུས་རབས་དང་བོའི་དུས་སུ་སླེབས་པ་ན། སིང་ག་ལའི་རྒྱལ་པོ་པུཏཱབྷྱ་བུ་འཇིགས་མེད（无畏波陀伽摩呢﹚ཀྱིས་གཙུག་ལག་ཁང་ཆེན་དུ་དགེ་འདུན་བསྡུས་ཏེ་སྡེ་སྣོད་གསུམ་པཱ་ལིའི་སྐད་དུ་བྲིས་པ་སྒྲ་བསྒྱུར་ནས་སེང་ག་ལའི་ཡི་གེར་བཏབ། འདིའི་ཐད་མཁས་དབང་དགེ་འདུན་ཆོས་འཕེལ་གྱིས་ཀྱང་གནས་བརྟན་པ་དག་གི་སྡེ་སྣོད་ནི་སངས་རྒྱས་འདས་ནས་ལྔ་བརྒྱ་དང་བཅུ་གྲངས་ཙམ་ན་གླེགས་བམ་དུ་བྲིས་ཞེས་གསུངས་པ་དང་དུས་མཐུན་པ་འདྲ་སྙམ།

 དེ་ནས་དུས་རབས་ལྔ་བའི་ནང་། ཡུལ་དབུས་མགདྷའི་སྡེ་སྣོད་གསུམ་པ་བཙུན་པ་ཆེན་པོ་སངས་རྒྱས་དབྱངས་བུདྔྷ་གྷོཥ﹙Buddhaghosa﹚བྱ་བ་སིང་ག་ལར་བྱོན། སླར་ཡང་སིང་ག་ལའི་ཡི་གེས་པཱ་ལིའི་སྡེ་སྣོད་གསུམ་ལ་དག་ཐེར་ཞིབ་གཏུགས་མཛད་ཅིང་། དུས་ཕྱིས་བྷར་མ་དང་། ཁམ་ཕུ་ཊེ། ཐེ་ལན་ཊ་སོགས་ཀྱིས་ཀྱང་པཱ་ལིའི་ཡི་གེར་བྲིས་པའི་སྡེ་སྣོད་གསུམ་པོ་རང་རང་གི་ཡི་གེར་སྒྲ་ཕབ་མཛད། དེ་བཞིན་ཉེ་རབས་ཀྱི་དུས་འགོ་ཟིན་པ་ནས་ཡོ་རོབ་གླིང་གི་མཁས་དབང་མང་བོ་ཞིག་གིས་རོ་མའི་ཡི་གེར་སྒྲ་བསྒྱུར་ཏེ་ཁྱབ་སྤེལ་དུ་བཏང་ཞིང་ད་ལྟ་མཐོང་བཞིན་པའི་པཱ་ལིའི་གསུང་རབ་ཀྱང་དེ་ཡིན་པར་བཤད་དོ།།

བྱང་བརྒྱུད་ནང་བསྟན་ནི་གཙོ་བོ་ལེགས་སྦྱར་གྱི་སྐད་དམ་སཾ་སྐྲྀ་ཏ་ལྷའི་སྐད་དུ་བྲིས་པའི་རྒྱལ་བའི་གསུང་རབ་དག་མཆོག་ཏུ་འཛིན་ལ། སྐད་རིགས་འདི་ཉིད་ནི་སྔོན་དུས་རྒྱ་གར་དུ་མི་རིགས་བཞིར་ཕྱེས་པའི་མཐོ་ཤོས་རྒྱལ་རིགས་དང་རྗེ་རིགས་ཀྱིས་བཀོལ་སྤྱོད་བྱ་རྒྱུའི་སྐད་ཆ་ཡིན། བདག་ཅག་གི་སྟོན་པ་ཞལ་བཞུགས་པའི་དུས་སྐད་ཆ་འདི་དར་ཁྱབ་ཆེར་ཕྱིན་མེད་ཅིང་། དེའི་ཕྱིས་པཎྜི་ཏ་ཕེའར་ནེ་བྱ་བས་སྐད་གསར་བཅད་མཛད་པར་བརྟེན་རིམ་གྱིས་རྒྱ་གར་གྱི་ཡུལ་གྲུ་མང་ཤས་སུ་དར་ནས་ཁྱོན་སྔར་ལས་ཆེར་གྱུར་པ་དང་། ལེགས་སྦྱར་གྱི་སྐད་དུ་བྲིས་པའི་གསུང་རབ་ཕལ་མོ་ཆེའང་བྱང་ཕྱོགས་སུ་དར་ལ། དེ་ནས་ཡུན་གྱིས་ཀྲུང་ཡཱ་དང་ནུབ་རོལ་ས་ཁུལ་སོགས་ཡུལ་གྲུ་མང་བོར་དར་ཁྱབ་ཏུ་ཕྱིན་པར་བཤད་དོ།།
 ད་ལྟ་འཛམ་གླིང་སྟེང་དུ་རྒྱལ་བའི་གསུང་རབ་བགྲང་གིས་མི་ལང་བ་ཞིག་བཞུགས་འདུག་ཅིང་། དེ་དག་ཐམས་ཅད་ཀྱི་འབྱུང་ཁུངས་སམ་འཕྲོས་ཡུལ་གཙོ་བོ་ནི་པཱ་ལིའི་ཡི་གེ་དང་། རྒྱ་ཡིག་བོད་ཡིག་བཅས་ཡིན་པར་མཁས་པ་རྣམས་བཞེད་འདུག་གོ།