འཛིན་པ་མེད་པར་རང་རང་ངོ་བོ་ཡི། །གྲུབ་པར་སྣང་ཞིང་འཛིན་པ་ཉིད་ཡིན་ནོ།།དེ་ལྟར་བས་ན་རང་གི་ལུས་སེམས་གཉིས། །ཚོགས་པའི་སྟེང་དུ་ང་ཞེས་ཕར་བཏགས་ཙམ། །མིན་པར་ང་དེ་ངོ་བོས་གྲུབ་སྣང་གི། །ཡུལ་དེ་དགག་བྱ་བདག་ཅེས་བྱ་བ་ཡིན། །དེ་འདྲའི་སྣང་ཚུལ་ལྟར་དུ་ང་གྲུབ་ན། །ང་དེ་ལུས་སེམས་གཉིས་དང་གཅིག་ཐ་དད། །གང་རུང་ཉིད་དུ་གྲུབ་དགོས་དེ་ལས་གཞན། །གྲུབ་ཚུལ་ཕུང་གསུམ་པ་ཞིག་མེད་ཕྱིར་རོ། །གཅིག་ཏུ་གྲུབ་ན་ལུས་སེམས་གཉིས་ཡོད་བཞིན། །ང་ཡང་རང་རྒྱུད་ཐ་དད་གཉིས་སུ་འགྱུར། །ཡང་ན་ང་གཅིག་ཡིན་པ་དེ་བཞིན་དུ། །ལུས་སེམས་གཉིས་ཀྱང་ཆ་མེད་གཅིག་ཏུ་འགྱུར། །གཞན་ཡང་ང་དང་ལུས་སེམས་གཅིག་ཡིན་ན། །དབྱེ་བ་གཏན་ནས་མེད་པའི་གཅིག་ཡིན་དགོས། །དེས་ན་ང་ཡི་ལུས་དང་ངའི་སེམས་ཞེས་། །སོ་སོར་འབྱེད་པའི་ཐ་སྙད་མི་འཐད་དོ། །དེ་ཕྱིར་ང་དང་ལུས་སེམས་གཅིག་གྲུབ་ན། །དེ་ལས་གཞན་དུའང་ཉེས་པ་མང་ཡོད་བས། །ང་འམ་བདག་དེ་ལུས་སེམས་གཉིས་པོ་དང་། །ངོ་བོ་གཅིག་ཏུ་གྲུབ་པ་མ་ཡིན་ནོ། །གལ་ཏེ་ཐ་དད་ཉིད་དུ་གྲུབ་ཞེ་ན། །འདི་ནི་ལུས་སོ་འདི་ནི་སེམས་ཡིན་ཞིང་། །འདི་ནི་ང་ཞེས་སོ་སོར་དགོས་པ་ལས། །དེ་ལྟར་མེད་ཕྱིར་ཐ་དད་དུ་མ་གྲུབ། །དེ་ཕྱིར་ང་དེ་ལུས་སེམས་གཉིས་པོ་དང་། །གཅིག་དང་ཐ་དད་གང་དུའང་མ་གྲུབ་པས། །ང་ཞེས་བྱ་བ་ལུས་སེམས་གཉིས་ཚོགས་ལས། །བྱུང་བ་བདེན་མེད་སྒྱུ་མ་ལྟ་བུའོ། །དེ་བཞིན་ལུས་ཞེས་བྱ་བའང་ཡན་ལག་ལྔ། །ཚོགས་པའི་ཤ་རུས་ཕུང་པོ་འདིའི་སྟེང་དུ། །ཕར་བཏགས་ཙམ་མིན་ངོ་བོས་གྲུབ་སྣང་དེ། །དགག་བྱ་བདེན་པའི་སྣང་བ་ཉིད་ཡིན་ནོ། །སྣང་ཚུལ་དེ་ལྟར་གྲུབ་ན་ལུས་དེ་དང་། །ལུས་ཀྱི་ཆ་རྣམས་གཅིག་དང་ཐ་དད་ཀྱི། །རྣམ་པ་གང་རུང་ཉིད་དུ་གྲུབ་དགོས་ཏེ། །དེ་ལས་གཞན་དུ་གྲུབ་ཚུལ་མེེད་ཕྱིར་རོ། །གཅིག་ཏུ་གྲུབ་ན་ལུས་ལ་མགོ་སོགས་ཀྱི། །ཆ་ཤས་མང་ཕྱིར་ལུས་དེའང་མང་པོ་འགྱུར། །ཡང་ན་ལུས་གཅིག་ཡིན་ཕྱིར་ལུས་ཀྱི་ནི། །ཆ་ཤས་དུ་མའང་ཆ་མེད་གཅིག་ཏུ་འགྱུར། །གལ་ཏེ་ཐ་དད་གྲུབ་ན་རྐང་ལག་སོགས། །ལུས་ཀྱི་ཆ་རྣམས་སོ་སོར་བསལ་ཤུལ་དུ། །ལུས་དེ་འདི་ཞེས་དགོས་ནའང་དེ་མེད་ཕྱིར། །ལུས་ཀྱང་ཆ་ཤས་ཚོགས་ལ་བཏགས་པ་ཙམ། །སེམས་ལའང་ལྷས་བྱིན་གྱི་ནི་སེམས་དེ་ཉིད། །ལྷས་བྱིན་རང་གི་སེམས་ཀྱི་སྔ་ཕྱིའི་ཆའི། །སྟེང་དུ་བཏགས་ཙམ་མིན་པར་རང་ངོས་ནས། །གྲུབ་པར་སྣང་དེ་དགག་བྱའི་སྣང་ཚུལ་ལོ། །དེ་ལྟར་གྲུབ་ན་ལྷས་བྱིན་རང་ཉིད་ཀྱི། །སེམས་དང་དེ་ཡི་སེམས་ཀྱི་སྔ་ཕྱིའི་ཆ། །གཉིས་པོ་གཅིག་དང་ཐ་དད་གང་རུང་དུ། །གྲུབ་ཏེ་གཞན་དུ་གྲུབ་ཐབས་མེད་པས་སོ། །གཅིག་ཏུ་གྲུབ་ན་སེམས་ཀྱི་སྔ་ཕྱིའི་ཆ། །མང་བས་སེམས་དེ་མང་པོར་ཐལ་བར་འགྱུར། །ཡང་ན་སེམས་གཅིག་ཡིན་ལྟར་སེམས་དེ་ཡི། །སྔ་ཕྱིའི་ཆ་རྣམས་མེད་གཅིག་ཏུ་རྗེས་སུ། །ཐ་དད་ཉིད་དུ་གྲུབ་ཚེ་སེམས་དེ་ཡི། །སྐད་ཅིག་སྔ་ཕྱིའི་ཆ་རྣམས་བསལ་རྗེས་སུ། །དེ་འདྲའི་སེམས་དེ་འདི་ཞེས་བསྟན་དགོས་ན། །དེ་ལྟར་མེད་ཕྱིར་སེམས་ཞེས་བྱ་བ་ཡང་། །རང་གི་སྔ་ཕྱིའི་ཆ་ལ་བཏགས་པར་ཟད། །དེ་ལྟར་ང་དང་ལུས་དང་སེམས་རྣམས་ལ། །གནད་བཞིས་དཔྱད་ན་རང་བཞིན་ཡོད་མིན་ལྟར། །འདུས་བྱས་འདུས་མ་བྱས་ཀྱི་ཆོས་ཀུན་ལའང་། །དེ་བཞིན་དཔྱད་ན་མཁའ་ལྟར་མཐོང་བར་འགྱུར། །མདོར་ན་འཁོར་འདས་ཆོས་རྣམས་མ་ལུས་པ། །མིང་དང་རྟོག་པས་ཕར་བཞག་ཙམ་ཞིག་ལས། །རང་རང་ཡུལ་གྱི་སྟེང་ནས་ཚུལ་གྲུབ་པའི། །ཆོས་ནི་རྡུལ་ཕྲན་ཙམ་ཡང་ཡོད་མ་ཡིན། །དེ་ལྟར་ཆོས་ཀུན་རང་ངོས་མ་གྲུབ་ན། །འོ་ན་ཡོོད་ཚུལ་ཇི་ལྟར་ཡོད་ཅེ་ན། །སྒྱུ་མ་རྨི་ལམ་བྲག་ཆ་ཆུ་ཟླ་ལྟར། །སྣང་ཞིང་ངོ་བོས་སྟོང་པའི་ཚུལ་དུ་ཡོད། །དེ་ལྟ་ན་ཡང་ཆོས་ཀུན་གཏན་མེད་དུ། །འགྱུར་བ་མིན་ཏེ་དཔེར་ན་ཟག་ཅ་དེ། །རྒྱུ་རྣམས་ཚོགས་ཚེ་འབྱུང་ཞིང་དཔྱད་པ་ན། །མི་རྙེད་མོད་ཀྱང་མེད་པར་མི་འགྱུར་པ།།དེ་དེ་བཞིན་དུ་ཆོས་རྣམས་རང་རང་གི། །རྟེན་འབྲེལ་ཚོགས་ཚེ་དེ་དང་དེར་སྣང་ལ། །དོན་དམ་དཔྱད་པའི་རིགས་པས་དཔྱད་པའི་ཚེ། །གང་དུའང་མེད་ཀྱང་གཏན་མེད་མི་འགྱུར་རོ། །དཔྱད་ཚེ་མེད་པར་མཐོང་གང་བདེན་མེད་དུ། །མཐོང་བ་ཡིན་གྱི་གཏན་མེད་མཐོང་བ་མིན། །ཐ་སྙད་ཉིད་དུ་ཡོད་པའང་བྲག་ཅ་ལྟར། །ཡོད་ཀྱི་བདེན་གྲུབ་ཉིད་དུ་ཡོད་པ་མིན། །དེ་ཕྱིར་ཟབ་དོན་དཔྱད་པའི་རིགས་ཚུལ་གྱིས། །དཔྱད་ཚེ་ཆོས་ཀུན་མཁའ་ལྟར་མཐོང་བཞིན་དུ། །རྟེན་འབྲེལ་བྱ་བྱེད་ལྷག་པར་འཐད་པ་ཡི། །ངེས་པ་རྙེད་གང་ལྟ་བའི་མཐའ་ཐུག་གོ །རྗེས་ཐོབ་སྒྱུ་མའི་རྣལ་འབྱོར་སྐྱང་ཚུལ་ནི། སྒྱུ་མའི་རྟ་གླང་མིག་ངོར་སྣང་ན་ཡང་། །དེར་མ་གྲུབ་པར་ངེས་པའི་རྒྱུ་མཚན་གྱིས། །སྣང་བ་དེ་ནི་སྒྱུ་མར་རྟོགས་པ་བཞིན། །ཆོས་ཀུན་ཐ་སྙད་ཤེས་པ་བསྙོན་མེད་དུ། །སྣང་ཡང་ངོ་བོས་སྟོང་པར་ངེས་པའི་མཐུས། །རྗེས་ཐོབ་ཡུལ་སྣང་སྒྱུ་མར་འབད་མེད་དུ། །འཆར་ལས་སྒྱུ་མར་བསྒོམ་ཚུལ་ལོགས་སུ་མེད། །དེ་ལྟར་མཉམ་གཞག་ནམ་མཁའི་རྣལ་འབྱོར་དང་། །རྗེས་ཐོབ་ཡུལ་སྣང་སྒྱུ་མའི་རྣལ་འབྱོར་གཉིས། །ཟུང་དུ་སྦྲེལ་ཞིང་ཟབ་དོན་ལ་དམིགས་པའི། །ཞི་ལྷག་ཟུང་འབྲེལ་ལམ་བཟང་ཐོབ་པར་བྱ། །དེ་ལྟར་ནུས་པར་བྱིན་གྱིས་བརླབ་ཏུ་གསོལ། །རྡོ་རྗེ་ཐེག་པར་འཇུག་ཚུལ་ནི། ངེས་འབྱུང་བྱང་ཆུབ་སེམས་དང་ལྟ་བ་སྟེ། །ཐུན་མོང་ལམ་རྣམས་མངོན་དུ་གྱུར་བ་ན། །མཚན་ཉིད་ཀུན་ལྡན་རྡོ་རྗེ་སློབ་དཔོན་མཆོག། །མཉེས་པ་གསུམ་གྱིས་མཉེས་པར་བྱེད་པ་དང། །དབང་བཞིན་ནོད་དེ་སྐུ་བཞིའི་ས་བོན་བསྐྲུན། །ཟབ་ལམ་རིམ་གཉིས་རྣལ་འབྱོར་ལ་འབད་དེ། །ཟུང་འཇུག་གོ་འཕང་མྱུར་དུ་ཐོབ་པར་བྱ། །དེ་ལྟར་ནུས་པར་བྱིན་གྱིས་བརླབ་ཏུ་གསོལ། །དེ་ནས། དེར་ནི་རིང་དུ་འབད་ལས་ཚོགས་གཉིས་ནི། །ཞེས་སོགས་སྨོན་ལམ་ཡང་བྱའོ། །སྨྲས་པ། །ཀྱེ་མ་སྔོན་ཆད་སྲིད་པ་འདིར། །ཟོལ་ཆུན་འཁྱུད་མོ་ལྟར་འཁོར་ཡང་། །ཕལ་ཆེར་མི་ཁོམ་གནས་འཁྱམས་ནས། །འདི་འདྲའི་ལམ་བཟང་དང་མ་མཇལ། །ད་རེས་དལ་འབྱོར་རྟེན་ཐོབ་ཅིང་། །བཤེས་གཉེན་དམ་པས་རྗེས་སུ་བཟུང་། །ལམ་མཆོག་འདི་འདྲ་མཇལ་སྐབས་སུ། །དལ་བར་སྡོད་པ་ཤིན་ཏུ་བླུན། །དེ་ཕྱིར་ཚེ་འདིའི་བྱ་བྱེད་རྣམས། །སྦྲུལ་ཤུན་ལྟ་བུར་དོར་བྱས་ནས། །ལམ་བཟང་འདི་ལ་ཉིན་མཚན་དུ། །འབད་དེ་སྙིང་པོ་ལོན་པར་བྱ། །འདི་ལྟར་བསྐྲུན་པའི་བདེ་ཚོགས་མཐུས། །དེང་ནས་སྐྱེ་བ་ཐམས་ཅད་དུ། །ཆོས་ཚུལ་འདི་དང་མི་འབྲལ་་ཞིང་། །འགྲོ་ཀུན་ལམ་འདིས་གྲོལ་གྱུར་ཅིག། །ཅེས་བྱང་ཆུབ་ལམ་གྱི་རིམ་པའི་གདམས་པ་ཟབ་མོ་རྣམས་ས་བཅད་སོགས་ཀྱི་སྤྲོས་པ་དོར་ནས་སྙིང་པོ་གང་ཡིན་ཚིགས་སུ་བཅད་ནས་ཉམས་སུ་བཅད་པའི་སྒོ་ནས་ཉམས་སུ་ལེན་ཚུལ་དམ་ཆོས་བདུད་རྩིའི་སྙིང་པོ་ཅེས་བྱ་བ་འདི་ནི། །རང་གི་ཤར་བསྒོམ་དུ་བྱ་བ་དང་། །སྐལ་མཉམ་གཞན་ལའང་ཕན་དུ་རེ་བའི་བསམ་པས་དགེ་སྦྱོང་གི་ཐ་ཤལ་ལེགས་སྦྱར་གྱི་སྐད་དུ་ཛྙན་བི་དྱར་འབོད་པས་ཀོང་ཡུལ་རི་ཁྲོད་དགའ་ལྡན་བསམ་གཏན་གླིང་དུ་སྦྱར་བ་འདི་ཡང་བསྟན་པའི་སྙིང་པོ་མི་ནུབ་པའི་རྒྱལ་མཚན་དུ་གྱུར་ཅིག། །༈ གསུང་རབ་དགོངས་འགྲེལ་དང་བཅས་འགལ་མེད་དུ། །གང་ཟག་ཅིག་གི་ཉམས་ལེན་གདམས་པ་རུ། །ལེགས་པར་འདོམས་ལ་བྱང་ཆུབ་ལམ་རིམ་ཞེས། །ཚང་ལ་མ་ནོར་བསྟན་པའི་སྙིང་པོ་སྒྲུབ། །དེ་ཡི་ཟབ་དོན་མན་ངག་བཅུད་བསྡུས་ནས། །ཉུང་ངུའི་ཚིག་གི་རྗེན་པར་སྟོན་པ་འདི། །དམ་ཆོས་བདུད་རྩིའི་ཆུ་གཏེར་སྙིང་པོ་བཞིན། །རྒྱལ་སྲས་རྒྱ་མཚོའི་ཉམས་མྱང་ལས་འོངས་ཉིད། །དེ་སླད་སྐལ་བཟང་འདུལ་བྱར་ཐེག་མཆོག་གི། །ལམ་བཟང་ཡངས་པོར་སྒྲུབ་པའི་དགའ་སྟོན་དུ། །རྩོལ་མེད་དད་ལྡན་མཻཏྲི་བི་དྱ་ནས། །མཐུན་པའི་རྐྱེན་སྦྱར་པར་དུ་བསྐྲུན་པའི་དགེས། །བློ་བཟང་རྒྱལ་བའི་རིང་ལུགས་བཤད་སྒྲུབ་དང་། །དེ་ཉིད་འཛིན་སྐྱོང་སྤེལ་བའི་སྐྱེས་མཆོག་ཚོགས། །དེ་ལ་སྲིད་ཞུར་བརྩོན་པའི་སྦྱིན་བདག་སོགས། །བསྟན་དང་དེ་རྐྱེན་ཀུན་ནས་རྒྱས་གྱུར་ཅིག། །ལམ་བཟང་འདི་ལ་ཐོས་བསམ་སྒོམ་གསུམ་གྱིས། །སྒྲུབ་པ་བྱེད་པས་ས་སྟེང་གང་བ་དང་། །དེ་དག་ཀུན་གྱི་རྒྱུད་ལ་འབད་མེད་དུ། །ཡོངས་རྫོགས་ལམ་འདིའི་ཉམས་མྱོང་རྒྱས་གྱུར་ཅིག། །རྣམ་འདྲེན་རྒྱལ་དབང་ཕྱག་ན་པདྨོཡི་༧ཞབས་སེན་མི་ཤིག་སྲིད་མཐར་རབ་བརྟན་ཅིང་། །ཐུགས་སྐྱེད་ཇི་བཞིན་རླབས་ཆེན་འཕྲིན་ལས་ཀྱིས། །སྣང་བར་ས་སྟེང་སྐྱེ་རྒུ་ལོངས་སྤྱོད་ཤོག། །རྒྱུ་སྦྱོར་གྱིས་མཚོན་བདག་དང་འགྲོ་ཀུན་ཀྱང་། །ཚེ་རབ་ཀུན་ཏུ་ལམ་བཟང་འདི་ཉིད་དང་། །འབྲལ་བ་མེད་པར་སྒྲུབ་པའི་མཐར་སོན་ནས། །སྐུ་གསུམ་གོ་འཕང་མྱུར་དུ་མངོན་བྱེད་ཤོག། །དེ་ལྟར་ཀོང་པོ་ཡེ་ཤེས་བརྩོན་འགྲུས་རིན་པོ་ཆེའི་གསུང་ལམ་རིམ་དམ་ཆོས་བདུད་རྩིའི་སྙིང་པོ་འདི་བཞིན་བྱང་ཆུབ་ལམ་གྱི་རིམ་པ་ལ་བློ་སྦྱོང་བ་རྣམས་ཀྱི་ཉམས་སུ་བླང་བྱར་གནད་ཆེ་ཡང་དཔེ་རྒྱུན་དཀོན་སྟབས་དགེ་བའི་བཤེས་གཉེན་ཆེན་པོ་ཡེ་ཤེས་དབང་ཕྱུག་ལགས་ནས་ནན་ཆེར་སྐུལ་མ་གནང་བར་བརྟེན་ལྷག་བསམ་དད་བསྐུལ་མཻཏྲི་བིདྱ་ནས་རབ་བྱུང་བཅུ་དྲུག་པའི་ལྕགས་སྤྲེལ་ལོར་པར་དུ་སྐྲུན་པའི་དགེ་བསྔོ་དེ་བཞིན་དུ་འགྲུབ་པར་གྱུར་ཅིག། །འགྲོ་དོན་འཕེལ། །