།སྐུ་གསུང་ཐུགས་རྟེན་བཞུགས་ཚུལ་གཞན་ནས་གསལ།-།འཇིགས་བརྒྱད་སྲུང་ཞིང་གཞན་ལ་སྐྱབས་སྦྱིན་ཚུལ། །ཕུར་སྟག་བྱམས་གདུགས་འཁོར་ལོས་ཟུར་བཞི་སྲུང༌། །ཕ་རོལ་དུན་ཙེའི་བྱད་ཁ་ཟློག་པའི་ཐབས། །བྱད་ཟློག་མཆོད་རྟེན་ལྡོག་པ་མདོ་ན་བརྩིགས། །ཕྱོགས་བཞིར་གླིང་ཆུང་བཞི་ཡི་དར་ཆེན་བཞི། །མཚམས་བཞིར་ཡིག་བརྒྱའི་འཁོར་ལོ་ཆེ་བཞི་དང༌། །མཐའ་སྐོར་སྟོང་འཁོར་ལྕགས་རིའི་ཚུལ་འཛིན་པ། །རྔ་ཡུལ་སྣང་དགོན་ཕྱི་སྣོད་ཆགས་ཚུལ་ལོ། །དེ་ནི་སྔ་དར་བསྟན་པའི་ལོ་རྒྱུས་ཏེ། །དེ་བཞིན་སླར་ཡང་མི་རིང་འབྱུང་འདོད་ན། །དེ་དོན་ཡིད་ལ་ངེས་བཞིན་གསོལ་ཐོབ་དང༌། །དེ་ལྟར་མི་འོང་ངེས་པ་ཅི་ཞིག་ཡོད། །ད་དུང་སེམས་དཔའི་སྒྲིག་ལམ་གྲུ་གཟེངས་ཀྱིས། །མང་འཚོགས་རིན་ཆེན་འབྱུང་གནས་ལེགས་བགྲོད་ནས། །མདོ་སྔགས་ལུང་རིགས་མ་ནི་ཀ་ལེན་ཚུལ།།དགོས་གལ་ཆེ་ཡང་རེ་ཞིག་དེ་ཙམ་མོ། །བསྟན་པའི་བཀའ་སྲུང་མ་མཆོག་སྲིད་པའི་རྒྱལ། །བདུད་བཙན་རྒྱལ་པོ་ཤེལ་ཁྲབ་གྲགས་སེང་དང༌། །དགེ་བསྙེན་ཤ་ཟན་བོན་སྐྱོང་རྒྱ་མཚོའི་སྡེ།- །གཡེར་མེད་སྲུང་སྐྱོབ་སྡོང་གྲོགས་མ་ཞན་ཅིག །སྔོན་གོམས་ལེགས་སྨོན་དུས་ཀྱིས་ཉེར་དྲངས་ཏེ། །འཆད་རྩོད་རྩོམ་པའི་བློ་གྲོས་འདབ་ཡངས་ཤིང༌། །ཟབ་མོ་ལྟ་བའི་གེ་སར་གཏེར་འཛིན་པའི། །བསླབ་གསུམ་དྲི་བསུང་འཐུལ་རྣམས་ལྷན་རྒྱས་ཤོག། ༧ འདིར་ཞར་བྱུང་ཞིག་ཆེན་བཅོ་བརྒྱད་དང་ཁྱད་པར་སྣང་ཞིག་བླ་རབས་ཀྱི་གྲངས་ནི། ཞུ་སྒོམ་རྣམ་ཐར་ལས། ལས་ཀྱི་སྨོན་ལམ་མདོ་ཁམས་སྨད་ལ་ཡོད། །ང་ལ་རྒྱུད་འཛིན་ཀུན་བཟང་བྱིན་རླབས་བུ། །ཞིག་པོ་བཅོ་བརྒྱད་འགྲོ་བའི་བླ་མར་ཡོང༌། །འདྲེན་པའི་བརྒྱུད་པ་བླ་རབས་བཅོ་བརྒྱད་བར། །ང་ཡི་བྱིན་རླབས་བརྒྱུད་ནས་ཞུགས་པ་ལ། །ཁ་ལག་གང་འབྲེལ་ངན་སོང་ལྟུང་སྒོ་ཁེགས། །ཞེས་དང༌། སྐུ་ཡི་ཞིག་པོ་དྲུག་གིས་གང་མཇལ་ཐར་བར་འདྲོང༌། ཞེས་པ་ནས། སྣང་ཞིག་འབྲུ་ཞིག་ལྡོང་ཞིག་གླང་ཞིག་ཤེལ་ཞིག་སྒ་ཞིག་དྲུག་སྐུ་ཡི་ཐུགས་སྲས་ཡིན། ནག་ཞིག་གཡུ་ཞིག་སྟག་ཞིག་རྐྱང་ཞིག་སེ་ཞིག་བྲི་ཞིག་དྲུག གསུང་གི་སློབ་མ་ཡིན་པས་དཀར་པོ་སུམ་སྦྱོར་གྱི་གདམས་པ་གནང་དགོས། རྒྱ་ཞིག་འགག་ཞིག་བ་ཞིག་དང༌། ཅོག་ཞིག་གོ་ཞིག་ཨུར་ཞིག་དྲུག ཐུགས་ཀྱི་སློབ་མ་ཡིན་པས།ཨ་དཀར་ལྟ་བ་གཅིག་རྒྱུད་མ་བསྒོམ་རང་སར་གྲོལ་བའི་གདམས་པ་གནང་དགོས་ཞེས་གསུངས་ལྟར་རོ།།

༧ གཉིས་པ་སྣང་ཞིག་བླ་རབས་ཀྱི་གྲངས་ནི། དང་པོ་སྣང་ཞིག་དོ་འཕགས་བྱོན་ནས་མི་ལོ་དགུ་བརྒྱ་དང་ལྷག་སོང་སྟེ། རབ་བྱུང་དང་པོ་ས་འབྲུག་ལོར་དོ་འཕགས་སྐུ་འཁྲུངས་པའི་ཕྱིར། དེས་ན་དོ་འཕགས་ནས་བཟུང་ད་བར་དུ་སྣང་ཞིག་གི་གདུང་ལ་བླ་མ་བྱོན་རིམ་ནི། སྐུ་ཕྲེང་དང་པོ་དོ་འཕགས་སམ་ཡོན་ཏན་རྒྱལ་མཚན། ཉི་མ་འཛིན། ལྷུན་གྲུབ་རྒྱལ་མཚན། ཀུན་དགའ་རྒྱལ་མཚན། ནམ་མཁའ་རྒྱལ་མཚན།ཟླ་བ་རྒྱལ་མཚན། ཡོན་ཏན་རྒྱལ་མཚན། ཀུན་དགའ་ལྷུན་གྲུབ།ཤེས་རབ་རྒྱལ་མཚན། ལྷུན་གྲུབ་རྒྱལ་མཚན། ཤེས་རབ་འོད་ཟེར།ཆགས་མེད་བྱ་བྲལ། བསྟན་པ་རྒྱལ་མཚན། ཚུལ་ཁྲིམས་རྒྱལ་མཚན།ཡེ་ཤེས་རྒྱལ་མཚན། བསོད་ནམས་རྒྱལ་མཚན། ལྷུན་གྲུབ་དབང་ལྡན། བསྟན་པ་ཚུལ་ཁྲིམས། རིན་ཆེན་ལྷུན་གྲུབ། ཤེས་རབ་རྒྱལ་བ། ནམ་མཁའ་རྒྱལ་མཚན། ཤེས་རབ་དབང་རྒྱལ། ཚེ་དབང་རྒྱལ་མཚན། ཚུལ་ཁྲིམས་དབང་མཆོག བསྟན་པ་ཚུལ་ཁྲིམས། བསྟན་པ་ལྷུན་གྲུབ། ཤེས་རབ་བློ་གྲོས། ཚུལ་ཁྲིམས་བསྟན་འཛིན། རིན་ཆེན་རྒྱལ་མཚན། གཡུང་དྲུང་བསྟན་པ་དར་རྒྱས། ཕུན་ཚོགས་དབང་རྒྱལ། བློ་གྲོས་ཐོགས་མེད། བསྟན་པའི་ཉི་མ། གཡུང་དྲུང་བསྟན་འཛིན། ནམ་མཁའ་བློ་གྲོས། བསྟན་པའི་རྒྱལ་མཚན། རྒྱལ་དབང་བསྟན་འཛིན། བསྟན་པ་རབ་རྒྱས། ད་ལྟ་ཞལ་བཞུགས་པ་མཆོག་སྤྲུལ་ནམ་མཁའ་བློ་ལྡན་ནོ། །དེའི་ནང་ནས་བཀྲ་ཤིས་གཡུང་དྲུང་གླིང་གི་གསེར་ཁྲིའི་རྒྱུད་རིམ་ནི། དང་པོ་རིན་ཆེན་རྒྱལ་མཚན། དེའི་བློ་གྲོས་ཐོགས་མེད། དེའི་བསྟན་པའི་ཉི་མ། དེའི་ནམ་མཁའ་བློ་གྲོས། དེའི་བསྟན་པ་རབ་རྒྱས་ཏེ་གསེར་ཁྲི་ལྔ་བའོ།། སྣང་ཞིག་བླ་རབས་ཀྱི་གྲངས་འདི་ནི་བླ་མ་གོང་མའི་རྣམ་ཐར་དང༌། དགེ་བའི་བཤེས་གཉེན་དམ་པའི་ཞལ་རྒྱུན་ལས་བཀོད་དོ།། ཞེས་པའི་སྣང་དགོན་དཀར་ཆག་བློ་གསར་མགུལ་རྒྱན་འདི་ནི་མཆེད་གྲོགས་བསོད་ནམས་གཡུང་དྲུང་གིས་བསྐུལ་བས། སྣང་དགོན་རབ་འབྱམས་ཡོངས་ཀྱི་ཐ་ཤར་བ་ནམ་མཁའ་ཚུལ་ཁྲིམས་མིང་གིས་སྦྱར་བར་ཉེས་འགལ་བཤགས་ཤིང་དགེ་སྲིད་མ་གྱུར་འགྲོ་ལ་བསྔོ།བཀྲ་ཤིས་སོ།། དགེའོ།།