།ཤེས་རབ་ལྷ་བདུན་སྐུ་བརྙན་བྲིས་འབུར་གྱི།།བཅུ་ཕྲག་གཞུང་བརྒྱ་འདྲེན་པའི་རྣམ་དཔྱོད་མཛད། །དེའི་མདུན་རྩོད་གྲྭའི་ར་བ་རྒྱ་ཆེའི་ནང༌། །ཐོས་བསམ་གསར་ཞུགས་ཁ་དོག་དཀར་དམར་ནས། །བསླབ་པ་མཐར་སོན་སྔགས་རིམ་མན་ཆད་ཀྱིས། །གཞུང་ཆེན་དྲུག་གི་ཚིག་དོན་རྩོད་འཐེན་བྱེད།། དང་པོའི་འཇུག་སྒོ་ཁ་དོག་དཀར་དམར་དང༌། །ཁྱབ་ཕྲན་རྩོད་པའི་བསྡུས་ཆུང་འཛིན་གྲྭ་གཉིས། །ཕྲ་ཞིབ་རིག་ལམ་སྒྱུ་མའི་རྟ་ཞོན་ཏེ། །ཚིག་འཕྲུལ་ལྕག་གིས་བྲབ་ནས་འགྲན་བསྡུར་ངོམ།། དེའི་ཡན་བསྡུས་འབྲིང་བསྡུས་ཆེན་འཛིན་གྲྭ་གཉིས།། བསྡུས་ཚན་བཅོ་བརྒྱད་རིག་པའི་རྩལ་སྦྱངས་ཏེ། །ཐལ་ཕྲེང་ཤེས་རབ་རལ་གྲི་སོ་གཉིས་ཀྱིས།། ཡིན་སྒྲུབ་མིན་དགག་རྩོད་པའི་རྣམ་དཔྱོད་འགྲན།།དེའི་ཡན་བློ་རྟགས་ཚད་མའི་འཛིན་གྲྭ་གཉིས། །དཔྱད་གསུམ་དག་པའི་ལུང་གི་གནམ་རུ་ལ།། ཚུལ་གསུམ་ཚང་པའི་གཏན་ཚིགས་མདའ་སྦྱར་ནས། །འཕངས་པས་དགག་བྱའི་འབེན་ལ་སུས་བསྣུན་རྩོད།། དེའི་ཡན་གཞུང་གསར་ཕར་ཕྱིན་འཛིན་གྲྭ་གཉིས།། རྒྱ་ཆེའི་གཞུང་འགྲེལ་བྱ་ལམ་མཐའ་བཅད་དེ།། ཕས་རྒོལ་ལོག་རྟོག་སྦྲུམ་མའི་མངལ་ལྷུང་བའི།། ལུང་རིགས་གཡུ་འབྲུག་སྔོན་མོའི་ངར་སྐད་སྒྲོག།། དེའི་ཡན་མཛོད་འདུལ་འཛིན་གྲྭ་གོང་འོག་གཉིས།།ཐེག་ཆེན་ལྟ་བའི་གངས་རིར་གནས་བཅས་ནས། །རྣམ་དཔྱོད་གཡུ་རལ་ཤིགས་སེ་འགྱིང་བཞིན་དུ།། ལུང་རིགས་དབྱངས་ཀྱིས་ཕས་རྒོལ་དོན་སྙིང་འགས། །དེའི་ཡན་དབུ་མ་གསར་རྙིང་འཛིན་གྲྭ་གཉིས། །རྟག་ཆད་མཐའ་བྲལ་ལམ་གྱི་གྲུར་ཞུགས་ཏེ། །དབུ་མའི་གཞུང་ལུགས་རྒྱ་མཚོའི་གཏིང་གཞལ་ནས།། སྤྲོས་མེད་ལྟ་བའི་ནོར་བུ་སུས་རྙེད་རྩོད། །དེའི་ཡན་ཡང་རྩེ་སྔགས་རིམ་འཛིན་གྲྭ་ཡིས། །རིམ་གཉིས་ཟབ་མོའི་ལམ་གྱི་གཟུང་རྣོན་གྱིས།། དཀའ་གནད་ཏོག་ཙམ་ཚིག་དོན་སྒོ་ཕྱེ་ནས། །ལྟ་སྒོམ་རིན་ཆེན་ལུང་རིགས་དར་གྱིས་དྲངས། །དེ་ལྟར་གཞུང་ཆེན་རྩོད་པའི་ངལ་གསོའི་ མཚམས། །བརྡ་དག་ཡན་ལག་བརྒྱད་ལྡན་ཆབ་བླངས་ནས། །སྒྲ་སོགས་རིག་གནས་འབྲས་དཀར་སྤུངས་པའི་ཐུག །སྙན་ཚིག་མཆོད་པའི་དབྱངས་ཀྱིས་དྲངས་ཏེ་གསོལ། །ནུབ་ཕྱོགས་ཡིད་འོང་ཉམས་དགའི་ཕོ་ཕྲང་ནང༌། །སྲིད་གསུམ་མངའ་བདག་རྒྱལ་ཆེན་དགེ་བསྙེན་དང༌། །ནང་འཁོར་བཀའ་བློན་རྣམ་བཞིའི་འཁོར་ཚོགས་ཀྱིས། །དགྲ་སྡེ་ཕྱེ་མར་འཐག་པའི་ཕྲིན་ལས་མཛད། །ནང་བསྟན་རྒྱལ་ཆེན་སྐུ་ཟོབ་འབག་ཞལ་མདངས། །མཐོང་སྣང་མི་འདྲ་ཤིགས་ཤིགས་འགུལ་ནུས་ཤིང༌། །ཞབས་གདན་བསྟན་དགྲའི་བམ་རོའི་ཁ་ནང་ནས། །ཁྲག་གི་ཐིགས་པ་རང་འབབ་གཅིག་ བཞུགས་སོ། །ནང་འཁོར་བཀའ་བློན་རྣམ་བཞིའི་སྐུ་ཟོབ་འབག །གཞན་དང་མི་འདྲ་ངོ་མཚར་ལྷ་བབ་སྐུ། །ཆོ་འཕྲུལ་ཁྲོ་བཞད་ཕྱག་མཚན་བརྗེ་རེས་དང༌། །གབ་མངོན་སྤེལ་བཞིན་དྲེགས་པའི་ཚུལ་གྱིས་འགྱིང༌། །སྲིད་རྒྱལ་ཐུགས་སྤྲུལ་ཤ་ཟན་རྒྱལ་མོ་ཡི། །སྐུ་ཟོབ་འབག་ཞལ་དབུ་སྐྲ་རང་སྐྱེས་ཅན། །ཟོལ་གྱིས་འགྱིང་བའི་ཞབས་གདན་བྱིས་པ་ནས། །བསྟན་དགྲ་བསྒྲལ་རྟགས་མྱ་ངན་སྐེ་རེ་འཆོར། །གཞན་ཡང་རྡོ་རིལ་འདམ་ལྟར་བཅིངས་བ་དང༌།།ཁ་དོག་སྣ་ལྔའི་མདངས་གསལ་རྒྱ་མཚོའི་རྡོ། །གྲུ་མདུང་ཤང་ལང་དར་རྐུད་བཞིན་མདུད་པའི། །ལྷ་དང་བླ་མས་རྫུ་འཕྲུལ་འགྲན་རྟགས་མང༌། །མཐའ་དབུས་བན་བོན་རེས་སུ་མ་ཆད་པས། །གསེར་དངུལ་རྐོང་འཐེབ་དར་ཟབ་མཆོད་པས་བསྟོད། །རྒྱུན་མཆོད་ཚོགས་འཁོར་བསང་གསོལ་གཞུང་བསྲང་བའི། །རྨ་མེད་དྲང་སྲོང་གཅིག་གིས་སྒྲུབ་པ་མཛད། །ཞ་དཀར་བོན་ལས་ཐ་ཚིག་མི་འགྱུར་ཕྱིར། །ཕྱི་ཁྱོན་གཡུང་དྲུང་ལྟ་བུའི་ལྕགས་རིའི་བསྐོར། །དགྲ་སྡེ་བརླགས་པའི་ཕྲིན་ལས་མཚོན་ཕྱིར་དུ། །ཐིག་ནག་ཁ་ཏྲཾ་རྩེ་གསུམ་སྟེང་ནས་ངོམ། །མདོ་སྨད་ས་ཡི་ཐིག་ལེ་རྨེའུ་རྒྱལ་དང༌། །དུད་ཁ་ཁྲི་སྡེའི་སྟོབས་ཤུགས་གཅིག་བསྒྲིལ་ནས། །དཔངས་ཚན་ཉི་ཟླའི་མདུན་ལ་སླེབས་པ་འདྲའི། །ངོ་མཚར་མཆོད་རྟེན་སྐྱེ་དགུའི་རྟེན་དུ་བཞེངས། །ཕྱི་བརྩིགས་ཁྲོ་ཕུར་སྟག་ལྷའི་རྡོ་བརྐོས་དང༌། །བར་དུ་རྣམ་རྒྱལ་རྡོ་བརྐོས་གཏེར་བུམ་བརྩིགས། །ནང་བཅུད་བཀའ་དང་རྟེན་འགྱུར་ཀུན་རྫོགས་ཤིང༌། །ཡང་སྙིང་སྤ་རིགས་བསྟན་རྒྱལ་དབུ་ཡང་བཞུགས། །རྩ་བར་སྟོང་འཁོར་ལྕགས་རིས་ཕྱོགས་བཞི་བསྐོར། །བར་དུ་ཞི་རྒྱས་དབང་དྲག་ལྷ་ཚོགས་བཀོད། །སྟེང་དུ་བསྟན་གཙོ་རྣམ་པར་རྒྱལ་བའི་སྐུ། །ཡོན་ཆབ་མར་མེའི་མཆོད་པ་ཆག་མེད་འབུལ། །དེ་འདྲའི་རྣམ་རྒྱལ་མཆོད་རྟེན་ཡང་རྩེ༌། །དུས་བཟང་འཇའ་ཚོན་སྣ་ལྔའི་གུར་ཁྱིམ་ནང༌། །རྣམ་གསུམ་ཚུལ་གོས་གྱོན་པའི་བླ་མ་ནས། །དབང་བསྐུར་ཁྲུས་གསོལ་བྱེད་པ་མཐོང་བ་མང༌། །སྟེང་དུ་ལྷ་རྣམས་དགྱེས་པས་འཇའ་གུར་དབུབ། །བར་དུ་མི་རྣམས་མོས་པས་ཕྱག་བསྐོར་མཛད། །འོག་ཏུ་ཀླུ་ཡིས་རྒྱ་་་་་མཚོའི་ཡོན་ཆབ་འབུལ། །ལྷ་ཀླུ་མི་ཡིས་བཀུར་བའི་རྟེན་འདི་རྨད།།ཕྱི་ལྟར་རྣམ་རྒྱལ་མཆོད་རྟེན་ནང་ལྟར་ན། །མཁའ་སྤྱོད་ཕོ་བྲང་ཡང་གསང་བདེ་གནས་འདིར། །གོམ་གཅིག་བོར་བས་ཚེ་གཅིག་བར་ཆོད་ཞི། །ཚེ་རྫོགས་རྟག་གཟིགས་ཡུལ་དུ་སྐྱེ་ངེས་གསུང༌།། རྟག་གཟིགས་ཤམ་པོ་ལྷ་རྩེའི་ཕོ་བྲང་ནས། །གཤེན་རབ་ཐུགས་སྤྲུལ་བོན་རིའི་དབུ་རྩེ་དང༌། །སྣང་དགོན་རྣམ་རྒྱལ་མཆོད་རྟེན་རྩེ་མོའི་བར། །འཇའ་ཚོན་སྤྲིན་གྱིས་འབྲེལ་ཞེས་གསུངས་པ་མང༌།།བརྒྱ་ཕྲག་རྩེ་མོའི་གྲངས་འཛིན་གྲྭ་ཁང་དབུས། །ཆེ་བརྗིད་ལེགས་པའི་ཚུལ་གྱིས་འཕགས་པ་ཡི། །ནང་ཆེན་ཆེ་དྲུག་བླ་བྲང་སོ་སོའི་ནང༌།