།སྒྱུ་མའི་འཕྲུལ་འདྲའི་གཟུགས་བརྙན་གྲངས་མང་མཆིས།།རྒྱ་མཐོངས་མཐའ་སྐོར་ཀུན་དགའ་ར་བའི་ནང༌། །དྲི་མེད་ཤེལ་གྱི་ཁང་བཟང་མང་པོས་བསྐོར། །དབུས་སུ་བསྟན་གཙོ་གཤེན་ལྷ་འོད་དཀར་སྐུ། །ལོངས་སྤྱོད་རྫོགས་སྐུའི་ཆས་ཀྱིས་བརྒྱན་ཏེ་བཞུགས། །དེའི་མཐར་གཡོན་དུ་གསང་སྔགས་བསྟན་པ་ཡི།།སྟོན་པ་ཁྱེའུ་འཆི་མེད་གཙུག་ཕུད་སོགས། །གསང་བདག་རལ་གྲི་ཐོད་ཁྲག་འཛིན་པ་ཡི། །མཐིང་སྔོན་འཛུམ་པའི་གྲུབ་ཆེན་ཚོགས་རྣམས་བཞུགས། །གཡས་སུ་སྟོན་པ་ཁྲི་གཙུག་རྒྱལ་བ་སོགས། །ཚུལ་གོས་རྣམ་གསུམ་ངུར་སྨྲིག་གོས་བསྣམས་ཤིང༌། །མཁར་གསིལ་ལྷུང་བཟེད་དྲང་སྲོང་ཚུལ་འཛིན་པའི། །འདུལ་རྒྱུད་མཁན་སློབ་ཚོགས་རྣམས་རིམ་གྱིས་བཞུགས། །རྒྱལ་བའི་རྣམ་ཐར་མཛད་པ་བཅུ་གཉིས་དང༌། །སྐྱབས་འགྲོ་སྐྱེས་ཚོགས་ཆོ་ག་བཅུ་གཉིས་སོགས། །གསེར་ཐང་ཟ་འོག་གོས་ཀྱི་མཐའ་ཤམ་ཅན།།ཕྲིན་ལས་རི་མོས་གསལ་འདེབས་བྱེད་པ་མང༌།། ཕྱོགས་བཞིའི་གྱེན་ཐང་ཞི་རྒྱས་དབང་དྲག་ལྷ། །ཕན་ཚུན་མ་བསྣོལ་ལུང་དང་མཐུན་པར་བཀོད། །ཤར་ནུབ་སྒོ་ཆུང་གསེར་དངུལ་པ་ཏྲ་ཅན།།འབྲུག་ཁྱུང་ཆུ་སྲིན་སེང་གེའི་གཟུགས་ཀྱིས་བརྒྱན། །སྐུ་གཟུགས་རྟེན་གསུམ་གཟུངས་འཇུག་ལེགས་སྦྱར་ཞིང༌། །ཁ་དོག་མ་འདྲེས་སྣ་ཚོགས་མདངས་གསལ་བའི། །བཟོ་དྲུབ་སྒྱུ་མའི་འཕྲུལ་ལས་བཏོན་པ་འདྲའི། །སྟོང་ཕྲག་གྲངས་འཛིན་ནོར་བུའི་རྒྱན་ཕྲེང་བཞི།། དཀར་ནག་རྒྱ་ཡུལ་འགྲིམ་པའི་འབྱོར་ལྡན་གྱིས།། སྣ་ཚོགས་གོས་ཀྱིས་བསོད་ནམས་ཚོགས་རྫོགས་ཕྱིར།། རྒྱལ་མཚན་འཕེན་གདུགས་མང་པོའི་མཆོད་བཤམས་དེ། །སྟོང་གསུམ་ཡོ་བྱད་གཅིག་ཏུ་སྤུངས་པ་འདྲ།། ཐུན་མིན་རིང་ལུགས་མདོ་སྔགས་ཟུང་འབྲེལ་ཡང༌།།སྡེ་གཉིས་སྒྲིག་ལམ་སྤང་བསྒྱུར་ཐ་དད་ཕྱིར། །གླིང་ཚན་གཉིས་ལ་བཅའ་ཡིག་སོ་སོ་དང༌། །དགེ་དབྱུག་གཉིས་ནི་ཁྲོ་ཆེན་རྒྱལ་པོས་ཕུལ། །དེ་འོག་ཕྱི་ཁྱམས་སྒོ་འཕྱོར་ཆེན་པོ་རུ། ། གྱད་དང་ཤང་ཤང་དཔལ་མགོན་ཆེ་བརྒྱད་ཀྱིས། །ཁྲོ་གཏུམ་འགྲེང་བཏུད་བཞད་འཛུམ་རོལ་རྩེད་ཀྱི།། གཟུགས་བརྙན་འདི་དག་ཨེ་མ་བློ་ལས་ཡར།།འབྲུག་ཁྱུང་ཆུ་སྲིན་རྨ་བྱའི་ཟློས་གར་ངོམ། །དམར་སེར་ཚོན་གྱིས་རྟ་བདུན་སྣང་བ་འགོག། ངོ་མཚར་རི་མོ་སྒྱུ་མའི་འཕྲུལ་ཕྱུང་འདྲའི།།གསེར་ཁང་འདི་ཡིས་རྫོགས་ལྡན་འགུགས་པར་བྱེད། ། རིན་ཆེན་ལས་གྲུབ་སྒོ་ཆེན་གཡས་གཡོན་དུ།། ལྟ་ཞིང་ཉན་པའི་རྒྱལ་ཆེན་སྡེ་བཞི་འགྱིང༌།། གསེར་གྱི་འབྲུག་གཉིས་བར་སྣང་ཁམས་ལ་མཆོང༌།།སེང་གེ་བརྒྱད་ཀྱིས་འོག་གཞི་གནོན་ཚུལ་མཛད། །འདིར་ཞུགས་སྤང་བསྒྱུར་གྲོལ་བའི་ལམ་པ་དང༌། །ཇ་ཐུག་མང་ཇས་མཆོད་པའི་དད་ལྡན་རྣམས། །ཚེ་བསོད་གཟི་བརྗིད་ལྷ་ལ་བརྙེགས་པའི་ཕྱིར། །རྒྱལ་ཆེན་རིགས་བཞིའི་ལྷ་རྣམས་གར་གྱིས་འགྱིང༌།། འདི་ཕྱིའི་མདུན་མ་ལེགས་པའི་མི་རྣམས་ཀྱང༌།། བདེ་ཆེན་ཞིང་དུ་སྨོན་པ་གལ་ཆེ་བས། །ཞིང་དེའི་ཡོན་ཏན་རང་བཞིན་མཛུབ་སྟོན་གྱི། །གསལ་འདེབས་ཞིང་བཀོད་ཀླུ་དབང་ཕྱོགས་ནས་བསྟན།།གང་ཞིག་མི་དགེའི་ལས་ཀྱིས་ཚེ་འཕོས་ནས། །ཉོན་མོངས་དབང་གིས་རིགས་དྲུག་གར་སྐྱེས་ཀྱང༌། །ཚ་གྲང་སོགས་ཀྱིས་བདེ་བའི་སྐབས་མེད་པས། །དུག་ལྔ་སུན་འབྱིན་ཆ་ལྔའི་འཁོར་ལོ་བཀོད།།ལུང་རིགས་ཉིན་བྱེད་འོད་ཀྱིས་སྟོངས་པ་ཡི། །ལོག་རྟོག་མུན་པར་འཁྱམས་ལ་ཕན་ཕྱིར་དུ། །བཅུ་ཕྲག་རིག་པའི་གནས་ཀྱི་འབྱུང་ཁུངས་ཀྱི།། ལེགས་ཤད་ཟླ་བའི་འཛུམ་ཟེར་ངོམ་བཞིན་ཡོད། ། མདོ་སྔགས་ཟུང་འབྲེལ་རྒྱལ་བ་སྨན་རི་བའི།། རིང་ལུགས་ཇི་བཞིན་མ་གཏོགས་འདོད་དབང་གིས། །བསྒྱུར་འདོད་ཝ་སྐྱེས་ཚོགས་རྣམས་འཇོམས་བྱེད་ཀྱི། །འཚོགས་གཏམ་སེང་གེའི་ངར་སྐད་ནང་དུ་བསྒྲགས། ། ཚིག་དོན་གཏེར་གྱུར་ཀུན་འཁོར་འདྲ་མིན་གཟུགས།། སྒྲ་སྙན་སྡེབས་སྦྱོར་སུམ་ལྡན་དབུ་བརྒྱན་ནས།། སྤུངས་མར་ཡི་གེའི་གཟུགས་བཟང་བཀོད་པ་དེས། །བཅུ་ཕྲག་རིག་པའི་བདག་པོའི་ཡོན་ཏན་ངོམ། །ཕྱོགས་ལས་རྣམ་རྒྱལ་ཁང་བཟང་ཡང་ཐོག་གི །གཡས་སུ་པར་ཁང་ཆེན་མོ་ཞེས་བྱ་བར།།རྨེའུ་དཔལ་མཉམ་མེད་ཀུན་མཁྱེན་ཉི་མིང་གི །གསུང་འབུམ་དཀའ་གནད་གསལ་བའི་པར་རྣམས་བཞུགས།། གཡོན་དུ་སྒྲུབ་ཁང་ཆེན་མོར་བོན་སྐྱོང་ཚོགས།། རྒྱུན་མཆོད་ཚོགས་འཁོར་ཆག་མེད་རྩོལ་བའི་སྒྲུབ། །མ་བདུད་བཙན་གསུམ་སྐུ་བརྙན་རང་བྱོན་རྣམས། །ལྟ་བའི་མི་མངོན་སྦས་པའི་ཚུལ་གྱིས་བཞུགས།། ཕྱོགས་ བཞིར་རིན་ཆེན་སྤན་རྒྱན་ཆ་བརྒྱད་དང༌། །ཟུར་བཞིར་གསེར་གྱི་རྒྱལ་མཚན་ཆེ་བ་བཞི།། དབུས་སུ་གསེར་ཏོག་གཞི་འདོམ་གཉིས་ཀྱི་ཚད། །མདུན་ཕྱོགས་རི་དྭགས་བོན་འཁོར་ཚད་མེད་བཞུགས།།འདུ་ཁང་དེ་ཡི་ཕྱོགས་བཞི་སྟེང་འོག་ཀུན།། རྣམ་རྒྱལ་གཏེར་བུམ་གྲངས་མང་རྟེན་དུ་བཞག། དྲང་སྲོང་ཁྲིམས་ལྡན་བླ་གྲྭ་ལྔ་བཅུ་ནས།། མངའ་གསོལ་རབ་གནས་རྒྱས་པའི་ཆོ་ག་རྫོགས། །ནང་དུ་སྨིན་གྲོལ་བཅུད་འཛོམ་ཇ་ཁང་ནང༌། །གསེར་ཟངས་ཆེན་མོ་སྨོན་པ་ཡོངས་འགྲུབ་གཉིས། །ཤར་ལྷོ་ནུབ་བྱང་གྲྭ་ཚང་རྣམ་པ་བཞིའི།།གསེར་ཟངས་འདོད་དགུ་བསམ་འཕེལ་བཞི་ཡིས་བསྐོར།། རིན་ཆེན་གཉིས་པའི་སྤྲས་འབུར་མེ་ཏོག་དང༌། །འབྲུག་དང་ཆུ་སྲིན་དབུ་ཡིས་རབ་བརྒྱན་པའི། །ཟངས་ཀྱི་ཇ་བྲ་སྤོས་ལེགས་དབང་ཟླའི་གྲངས། །རག་བྲ་ཉི་ཤུ་རྩ་ལྔའི་གྲངས་ཙམ་མཆིས། །གཞན་ཡང་རྒྱུན་འཁྱེར་གཡའ་དང་དྲི་བྲལ་བའི། ། གསེར་གྱི་སྤྲས་འབུར་ཟངས་ ཀྱི་མཆུ་སྒྲོས་ཅན།། ཤུག་པའི་ཇ་བྲ་ཐུག་ཟོ་ལྔ་བཅུའི་གྲངས།། རྡུལ་ཕྱིས་ལེགས་པའི་གཟི་མདངས་ངོམ་བཞིན་ཡོད།། ནུབ་ཏུ་བོན་སྤྱོད་བསམ་གཏན་ཁང་བཟང་ནང༌། །གསུང་དབྱངས་ལྷ་མཆོག་སྨྲ་བའི་སེང་གེ་སོགས།