ཤོ་ཐོག་མར་རྒྱག་དུས་ཤོ་འབོད་འདི་ལྟར་བྱ་སྟེ།འོ།ཚུགས་བཟང་།ཚུགས་བཟང་།ཚུགས་བཟང་།ཕོ་ལྷས་ཚུགས།མོ་ལྷས་ཚུགས།དགྲ་ལྷ་ཡོན་ཏན་དཀར་པོས་ཚུགས།ཨ་ནེ་གོང་སྨན་རྒྱལ་མོས་ཚུགས།ཤོ་བདག་རྡོ་རྗེ་ལེགས་པས་ཚུགས།ཐེའུ་རང་རྒྱལ་པོ་སྤུན་དགུས་ཚུགས།དགའ་ས་ནས་ཡོང་།སྐྱིད་སར་ཚུགས།ཨ་མི་སྔོན་མོས་བྲོ་འཁྲབ་སར་ཚུགས།ཕོ་ངའི་མིང་ལ་ཐོབ་རྒྱལ་གྱི་དབང་པོ་ཟེར།མི་ཕོ་ཁྱོད་ཀྱི་མིང་ལ་ཤོ་ཡི་དབང་པོ་ཐོགས།ཤོ་མོ་འདི་རི་ཐོག་ལ་ཚུགས་སོ།།བང་མ་དེ་རླུང་ཐོག་ནས་ལེན་ནོ།།ཞེས་འབོད།
ཤོ་ཨ་ལི་མས་གར་བྱེད་ས།ཡང་ལི་མས་བྲོ་འཁྲབ་ས།ཤོ་པ་རས་གཡས་བསྐོར་བརྒྱག་ས།མི་ཕམ་ས།རང་ཁེ་ས།ཤོ་བདག་རྡོ་རྗེ་ལེགས་པ།དམ་ཅན་ལག་པ་སྔོ་རྗེན་ནེ།ཐེའུ་རང་ལག་པ་སྤུ་སུ་རེ།ཕོབས།
པ་ར་བབ་བྱུང་དུས།བསྭོ་བསྭོ།ཁྱོད་འདྲ་བ་བརྒྱ་ཤོག ཁྱོད་འདྲ་བ་སྟོང་ཤོག ཞལ་ཟས་ལ་འདོམ་གང་།མར་མེ་ལ་ཁྲུ་གང་།པ་ར་ཁྱོད་སྔ་མ་བྱུང་།ཕྱི་མ་བྱུང་།རེམ་པའི་ཐིག་ཆེན་བཅོ་བརྒྱད་ལ་རྒྱབ་བྱུང་།ཞེས་ཟེར།
 པ་རས་སྤོབས་བཟླས་ན་རྒྱལ་ཁམས་ལོ་ཡག
པ་ར་ཕེབས་ཀྱི་དང་པོ་རེད།འུར་རྡོ་མཚོན་གྱི་གཉིས་པ་རེད།ཤོ་ལ་པ་ར་མེད་པ་ཅི་རེད།གོང་ལ་དཔོན་ལུ་མེད་པ་ཅི་རེད།ཤོ་ལ་པ་ར་མེད་པ་ཅི་རེད།ཕོ་ཕྱུག་པོ་ལ་ད་ར་མེད་པ་ཅི་རེད།པ་ར་ལ་སྤེན་པ་བཀྲ་ཤིས་ཟེར།ཉི་མ་ལ་ཟླ་བ་ཚེ་རིང་ཟེར།མགྱ་མགྱ་གྱིས་ཤོག མགྱོགས་མགྱོགས་གྱིས་ཤོག པ་ར་ཡང་ལྟ་གྱིས་ཤོག པ་རའི་བུ་མོ་ལྟེ་ཤོ་མ།ལྟེ་བའི་ཞབས་ལ་མཐོ་གང་ཡོད།རྒྱུ་མ་མི་ལུག་ཡ་མཚན་ཆེ།པ་ར་གཅིག་གིས་ང་འགྲོ་ཟེར།པ་ར་གཅིག་གིས་ཁོ་འགྲོ་ཟེར།ཐེའུ་རང་པ་རས་ང་འགྲོ་ཟེར།དམ་ཅན་པ་རས་ང་འགྲོ་ཟེར།འགྲོ་ངོ་མ་ཐེའུ་རང་པ་ར་འགྲོ།པ་ར་ཤོག་དང་ད་ར་བླུད།ད་ར་ཨ་མའི་ལག་ལ་ཡོད།
པ་ར་ཤོག་དང་ད་ར་བླུད།ད་ར་འོ་མའི་རྒྱ་མཚོ་ཡིན།པ་ར་ཤོག་དང་ད་ར་བླུད།པ་ཕྲུག་ངེད་གཉིས་རྩེད་མོ་རྩེ།པ་ར་ཤོད་དང་ད་ར་བླུད།ཨ་སྟག་ཤོག་དང་འབྲོང་ཤ་སྟེར།ཐེའུ་རང་ཤོག་དང་ཡོས་ཁྲ་སྦྱིན།（ད་ར་ནི་མར་བཏོན་པའི་འོ་མ་སྐྱུར་པོ་ལ་ཟེར།）པ་རེ་ཟེར་དུས་སྤོག་རེ་སྐྱེལ།དེ་དུས་སེམས་བུ་ཀྲོག་ཀྲོག་གྱིས།
འབབ་ཚེ་རིང་དུང་གི་རྣ་རྒྱན་ཅན།འབོད་མི་དགོས་ཤོ་པའི་གྲོགས་ལ་བྱོན།
ཤོ་མིག་གསུམ་པ།སུག
གསུར་ཐོངས་ཤོག་དྲི་ཟའི་གནོད་པ།
སུག་སུག་བླ་ལུའི་དབུ་ཞྭ་རེད།རྗེ་མི་ལ་རས་པའི་སྒོམ་ཞྭ་རེད།སུག་དང་སུ་ལུ་མགོ་འཛོམས་རེད།སྡང་དང་བེའུ་ཚ་ཞང་རེད།སུག་ཐུང་གྲུམ་པའི་པགས་པ་དེ།མགྱོགས་པ་རྟ་ཡི་ཟེ་རྒྱན་ཡིན།སུག་ཐུང་གྲུ་ཐུང་ཁུར་པོ་ཁུར།དེ་ལ་མགྱོགས་པ་ཐོགས་ལེ་མིན།ཨ་སྐྱིད་ཚག་པས་མདའ་གཞུ་ཁུར།དེ་ལ་དཔའ་བོ་ཐོགས་ལེ་མིན།ཨ་སྐྱིད་ཚག་པ་ནི་འབུ་ཆ་ག་པ།
སུག་སྟིམ་སྐམ་པོས་ཧུབ་ཅིག་བསྐོལ།མི་རྟ་བཅོ་བརྒྱད་རྒྱག་རབས་ཡོད།སུག་སྟིམ་སྐམ་པོས་ཧུབ་ཅིག་བསྐོལ།དེ་རིང་མི་དགོས་སང་ཉིན་རྒྱགས།སུག་སྟིམ་སྐམ་པོས་ཧུབ་ཅིག་བསྐོལ།ང་ཡིས་མི་འཐུང་ཁྱོད་ལ་དྲངས།（སུག་སྟིམ་ནི་རྐང་ལག་ལ་ཟེར།）སུག་སུག་བུ་མོའི་འདུག་ལུགས་དེ།ཕྱི་རྟིང་སྟུ་དང་ཁ་སྤྲོད་རེད།སུག་ཁྱི་འཆམ་མགོ་ལ་གྲ་མ་ཟུག ཨ་ཚ་ཨ་ནས་རྒྱུན་མི་ཆད།སུག་སོག་པོས་བྱས་བྱས་ངས་མ་བྱས།ཐེའུ་རང་འབེན་ནི་ངས་མ་རྫོགས།ཕྱུག་པོ་བུ་ལ་བློ་དྲིས་ན།མགོ་ནག་མི་ལ་རྒྱན་མི་བསྐུར།ཕོ་སུག་དར་དཀར་མཛེས་མཛེས་རེད།མོ་སུག་དར་ནག་མཛེས་མཛེས་རེད།སུག་ཕོ་མོ་གཉིས་ལ་རྟ་ཞིག་གདའ།རྟ་དེ་ལ་སུག་མཛེས་རབ་དཀར་ཐོགས།
ཤོ་མིག་བཞི་པ།ཟིག
ཟིག་འབའ་ཁྲ་ཆུང་རྒྱབ་ལ་ཁུར།ཁ་ལ་ཨེ་བསམ་མ་ཎི་འདོན།
ཟིག་པ་ལྷ་འདྲེས་ཟིག ཆུ་ནང་ཉ་མོ་ཟིག