བཞི།）བློ་བརྟན་འགྱུར་མེད་ཀྱིས་བསྒྱུར་བཅོས་སྒོ་འབྱེད་བྱས་པས།དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་གཏིང་ཤུགས་ཆེ་རུ་ཕྱིན་པ་རེད།ནོར་སྲིད་ཀྱི་གཏོང་སྤྲོད་སྤོ་སྒྱུར་ལམ་ལུགས་རིམ་བཞིན་འཐུས་ཚང་དུ་ཕྱིན་པ་དང་།རྫོང་རིམ་པའི་རྨང་གཞིའི་རྒྱུ་སྟོབས་འགན་སྲུང་བྱེད་པའི་རྐྱེན་སྲོལ་རགས་ཙམ་བཙུགས་ཤིང་།གནས་ཐང་འཕར་ཁྲལ་རིགས་བསྒྱུར་ཁྱོན་ཡོངས་ནས་དོན་འཁྱོལ་བྱེད་འགོ་ཚུགས་པ་དང་།བཅོས་སྣུམ་གྱི་རིམ་གོང་དང་ཁྲལ་གྲོན་བསྒྱུར་བཅོས་བདེ་བླགས་ངང་བྱས་པ།ཐོན་ཁུངས་ཀྱི་དཔྱ་ཁྲལ་བསྒྱུར་བཅོས་ཚོད་ལྟ་བྱེད་འགོ་བཙུགས་པ།ཕྱི་ནང་གཉིས་ནས་མ་དངུལ་བཞག་པའི་ཁེ་ལས་ཀྱི་དཔྱ་ཁྲལ་ལམ་ལུགས་ཁྱོན་ཡོངས་ནས་གཅིག་གྱུར་བཅས་བྱས་པ་རེད།རྒྱལ་ཁབ་ལ་དབང་བའི་ཚོང་ལས་དངུལ་ཁང་ཆེ་རིགས་ཀྱི་མ་རྐང་ལམ་ལུགས་བསྒྱུར་བཅོས་བདེ་བླག་ངང་བྱས་ནས་སྲིད་ཇུས་ཀྱི་ངོ་བོ་ལྡན་པའི་དངུལ་རྩའི་སྒྲིག་གཞི་བསྒྱུར་བཅོས་དང་གྲོང་གསེབ་ཀྱི་ཡིད་རྟོན་ཁང་བསྒྱུར་བཅོས་བྱེད་པར་སྐུལ་སྤེལ་ཧུར་ཐག་བཏང་བ་དང་།ཚོང་རར་བཏོན་པའི་ཀུང་སིའི་རྐང་དབང་དབྱེ་བ་གཅོད་སྟངས་བརྟན་པོའི་ངང་ནས་ཐག་གཅོད་བྱས་པ།ལས་སྒོ་གཏོད་གཞི་དང་།རྐང་འཛིན་སྟོན་གྲངས་དུས་བཅད་ཚོང་ཟོག་དང་མ་དངུལ་འཛིན་ལོར་འདུ་འཁོར་བདེ་བླག་ངང་སྤེལ་བ།དངུལ་འཛིན་ཚོང་ར་བརྟན་པོའི་ངང་འཕེལ་རྒྱས་བཏང་བ།འགན་བཅོལ་ལས་རིགས་བསྒྱུར་བཅོས་སྒོ་འབྱེད་གཏིང་ཟབ་བྱས་པ།མི་དམངས་ཤོག་སྒོར་གྱི་དངུལ་བརྗེས་འཛའ་ཐང་རྣམ་པ་ཆགས་པར་བྱེད་པའི་རྐྱེན་སྲོལ་བསྒྱུར་བཅོས་གོ་རིམ་ལྡན་པར་བྱས་པ།རྒྱལ་མཚམས་ལས་བརྒལ་བའི་ཉོ་ཚོང་མི་དམངས་ཤོག་སྒོར་ཐོག་ནས་བསྡོམས་རྩིས་རྒྱག་པའི་ཚོད་ལྟ་བྱེད་ཁྱོན་རྒྱུན་མ་ཆད་པར་ཆེ་རུ་བཏང་བ་བཅས་བྱས་ཡོད།རྒྱལ་ཁབ་ལ་དབང་བའི་ཁེ་ལས་ཀུང་སིའི་མ་རྐང་ལམ་ལུགས་བསྒྱུར་བཅོས་དང་།རྒྱལ་ཁབ་ལ་དབང་བའི་མ་རྩར་ལྟ་སྐུལ་དོ་དམ་བྱེད་པའི་སྒྲིག་སྲོལ་བསྒྱུར་བཅོས་ལ་གྲུབ་འབྲས་དགེ་མཚན་ལྡན་པ་ཐོབ་པ་རེད།སྦྲག་ལས་སྒྲིག་སྲོལ་བསྒྱུར་བཅོས་མགྱོགས་སུ་བཏང་བ་དང་།ཁེ་ལས་ཆུང་འབྲིང་འཕེལ་རྒྱས་ཡོང་བ་དང་དམངས་ཁྲོད་ནས་མ་དངུལ་འཇོག་པའི་སྲིད་ཇུས་རབ་དང་རིམ་པ་གཏན་འབེབས་དང་ལག་བསྟར་བྱས་པ་དང་།སྤྱི་ལ་དབང་བ་མ་ཡིན་པའི་དཔལ་འབྱོར་འཕེལ་རྒྱས་གཏོང་བའི་ཁོར་ཡུག་རྒྱུན་མ་ཆད་པར་ལེགས་བཅོས་བྱུང་སྟེ་དབང་བའི་ལམ་ལུགས་སྣ་མང་གི་དཔལ་འབྱོར་ཐུན་མོང་ཐོག་འཕེལ་རྒྱས་བྱུང་བ་རེད།
     ཕྱི་ཕྱོགས་སུ་སྒོ་འབྱེད་ཁྱོན་དང་གཏིང་ཚད་རྒྱུན་མ་ཆད་པར་ཆེ་རུ་བཏང་བ་དང་།ཕྱིར་གཏོང་ནང་འདྲེན་བྱེད་གྲངས་བསྡོམས་འབོར་ལོ་རེར་ཆ་སྙོམས་བརྒྱ་ཆ15.9འཕར་བ་དང་།གྲུབ་ཚུལ་རྒྱུན་མ་ཆད་པར་བཟང་དུ་ཕྱིན་ཡོད།ཉོ་ཚོང་གི་དྲང་ཁྱད་ལོ་གཉིས་རིང་བསྟུད་མར་ཆག་ཅིང་།2010ལོར་སྔ་ལོ་ལས་བརྒྱ་ཆ6.4ཆག་པ་རེད།ཕྱི་རྒྱལ་གྱི་མ་རྩ་སྤྱོད་ཚད་ཇེ་མང་དུ་ཕྱིན་ཡོད།ཁེ་ལས“ཕྱིར་སྐྱོད་”ཀྱི་གོམ་སྟབས་མངོན་གསལ་མགྱོགས་སུ་ཕྱིན་ཞིང་།རིམ་བསགས་བྱས་ནས་ཕྱི་ཕྱོགས་སུ་ཐད་ཀར་མ་དངུལ་ཨ་སྒོར་དུང་ཕྱུར་2200བཞག་པ་དང་།ཕྱི་ཕྱོགས་སུ་ལས་གྲྭ་འགན་གཙང་ལེན་པ་དང་ངལ་ལས་མཉམ་ལས་བྱེད་གྲངས་ཨ་སྒོར་དུང་ཕྱུར་3352ཟིན་ཡོད།འཛམ་གླིང་ཡོངས་ཀྱི་དཔལ་འབྱོར་བཅོས་སྐྱོང་གི་རྐྱེན་སྲོལ་བསྒྱུར་བཅོས་དང་ས་ཁོངས་ཀྱི་མཉམ་ལས་རྐྱེན་སྲོལ་འཛུགས་སྐྱོང་བྱེད་པར་ཧུར་ཐག་ངང་ཞུགས་པ་དང་།ཕྱོགས་མང་དང་།ཕྱོགས་གཉིས་པོའི་དཔལ་འབྱོར་མཉམ་ལས་མུ་མཐུད་གཏིང་ཟབ་ངང་སྤེལ་ཡོད།ཕྱི་ཕྱོགས་སུ་རོགས་སྐྱོར་བྱེད་ཁྱོན་བསྟུད་མར་རྒྱ་སྐྱེད་ཡོད།ཕྱི་ཕྱོགས་སུ་སྒོ་ཕྱེ་བ་དེས་དཔལ་འབྱོར་འཕེལ་རྒྱས་དང་གྲུབ་ཚུལ་སྙོམས་སྒྲིག་ལ་སྐུལ་སྤེལ་ནུས་ལྡན་ཐེབས་ཏེ་ལས་ཞུགས་མང་དུ་ཕྱིན་པ་དང་།སྔོན་ཐོན་ལག་རྩལ་ནང་འདྲེན་དང་དོ་དམ་གྱི་ཉམས་མྱོང་བསྡུ་ལེན་བྱས་པས།རང་རྒྱལ་གྱི་རྒྱལ་སྤྱིའི་གོ་གནས་ཇེ་མཐོར་ཕྱིན་པ་རེད།
     （ལྔ།）སྤྱི་ཚོགས་ཀྱི་བྱ་གཞག་འཕེལ་རྒྱས་མགྱོགས་པོ་ཕྱིན་པ་དང་།དམངས་འཚོ་འགན་སྲུང་དང་ལེགས་བཅོས་ཏན་ཏིག་ཐུབ་པ་རེད།དཔལ་འབྱོར་དང་སྤྱི་ཚོགས་འཕེལ་རྒྱས་འཚམ་མཐུན་ཡོང་བར་བྱ་རྒྱུ་ཐོག་མཐའ་བར་གསུམ་དུ་མཐའ་འཁྱོངས་དང་།དམངས་འཚོ་ལེགས་བཅོས་བྱེད་པར་དམིགས་ནས་འཕེལ་རྒྱས་གཏོང་ཐབས་བྱས་ཡོད།ལས་ཀར་ཞུགས་རྒྱུ་དེ་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་སྔོན་འགྲོའི་གོ་བབ་དུ་བཞག་ཡོད།ལས་རིགས་གསོ་སྐྱོང་དང་ལས་ཞུགས་ཞབས་ཞུར་ཤུགས་སྣོན་བརྒྱབ་ནས་མཐོ་རིམ་སློབ་གྲྭའི་སློབ་ཐོན་སློབ་མ་དང་།གྲོང་གསེབ་ཀྱི་ངལ་རྩོལ་ནུས་ཤུགས་སྤོ་སྒྱུར།གྲོང་ཁྱེར་དང་གྲོང་རྡལ་གྱི་ལས་ཞུགས་དཀའ་ངལ་ཡོད་མི་ལས་ཀར་ཞུགས་རྒྱུར་སྐུལ་སྤེལ།དམག་ལོག་ལ་ལས་ཀ་བགོ་སྒྲིག་ཡག་པོ་བཅས་བྱས་ཡོད།ངལ་རྩོལ་གན་རྒྱའི་སྐོར་གྱི་བཅའ་ཁྲིམས་དང་།ལས་ཞུགས་ལ་སྐུལ་སྤེལ་གཏོང་རྒྱུའི་སྐོར་གྱི་བཅའ་ཁྲིམས་ལག་བསྟར་བྱས་ཏེ་གླ་ཕོགས་དམའ་ཤོས་ཀྱི་ཚད་གཞི་ཡོངས་ཁྱབ་ཏུ་མཐོ་རུ་བཏང་བ་དང་།འཆམ་མཐུན་གྱི་ངལ་རྩོལ་འབྲེལ་བ་འཛུགས་པར་སྐུལ་སྤེལ་བཏང་ཡོད།གྲོང་ཁྱེར་དང་གྲོང་གསེབ་ཏུ་ཁྱབ་པའི་སྤྱི་ཚོགས་ཀྱི་འགན་སྲུང་མ་ལག་ལེགས་སྐྱོང་བྱེད་པར་འགག་སྒྲོལ་གྱི་གྲུབ་འབྲས་ཐོབ་པ་དང་།གྲོང་ཁྱེར་དང་གྲོང་གསེབ་ཀྱི་ལས་བཟོ་པའི་མ་མཐའི་རྒན་གསོའི་འགན་བཅོལ་ཞིང་ཆེན་རིམ་པ་གཅིག་གྱུར་བྱུང་བ།རྒན་གསོའི་འགན་བཅོལ་འབྲེལ་བ་ཞིང་ཆེན་ལས་བརྒལ་ཏེ་སྤོ་བསྒྱུར་འབྲེལ་མཐུད་བྱེད་ཐབས་དོན་འཁྱོལ་བྱས་པ།ཁེ་ལས་ཀྱི་ལས་འཁྱུར་པའི་མ་མཐའི་རྒན་གསོ་བྱེད་དངུལ་གྱི་ཚད་གཞི་བསྟུད་མར་ལོ7རིང་མཐོ་རུ་བཏང་ཞིང་།ལོ་རེར་ཆ་སྙོམས་བརྒྱ་ཆ10འཕར་བ་དང་།གྲོང་གསེབ་ཏུ་སྤྱི་ཚོགས་ཀྱི་འགན་བཅོལ་དཔེ་གསར་ཚོད་ལྟ་བྱེད་པའི་ཁྱབ་ཁྱོན་རྫོང（གྲོང་ཁྱེར་དང་།ས་ཁུལ）བརྒྱ་ཆ24ཟིན་ཡོད།སྨན་བཅོས་འཕྲོད་བསྟེན་སྒྲིག་སྲོལ་བསྒྱུར་བཅོས་ཧུར་བརྩོན་དང་བརྟན་བརླིང་ངང་ནས་བྱས་པ་དང་།གྲོང་ཁྱེར་དང་གྲོང་རྡལ་གྱི་གྲོང་མིའི་མ་མཐའི་སྨན་བཅོས་འགན་བཅོལ་ལམ་ལུགས་དང་།གྲོང་གསེབ་ཀྱི་མཉམ་ལས་སྨན་བཅོས་ལམ་ལུགས་དཔེ་གསར་ཁྱོན་ཡོངས་ནས་ལག་བསྟར་བྱས་པས།གྲོང་ཁྱེར་དང་གྲོང་རྡལ་གྱི་ལས་བཟོ་པ་དུང་ཕྱུར་4.32དང་གྲོང་ཁྱེར་དང་གྲོང་རྡལ་གྲོང་མི་དུང་ཕྱུར་8.35ལ་ཕན་ཐོགས་བྱུང་བ་རེད།མ་མཐའི་འཚོ་རྟེན་འགན་སྲུང་ལམ་ལུགས་ཡོངས་ཁྱབ་བྱུང་བ་དང་།གྲོང་ཁྱེར་དང་གྲོང་གསེབ་ཀྱི་སྤྱི་ཚོགས་རོགས་སྐྱོབ་མ་ལག་རྩ་བའི་ཆ་ནས་བཙུགས་ཡོད།སྤྱི་ཚོགས་ཀྱི་ཕན་བདེ་དང་།གོད་གསོས་ལྟ་སྐྱོང་།དགེ་རྩ་དང་དབང་པོ་སྐྱོན་ཅན་པའི་བྱ་གཞག་བཅས་ལ་གྲུབ་འབྲས་གསར་པ་ཐོབ་ཡོད།རྒྱལ་ཡོངས་ཀྱི་སྤྱི་ཚོགས་འགན་སྲུང་ཐེབས་རྩ་རིམ་པར་གསོག་ཚད་སྒོར་དུང་ཕྱུར7810ཟིན་ཏེ་ལོ་ལྔའི་གོང་ལས་དུང་ཕྱུར5800ལྷག་ཙམ་འཕར་བ་རེད།འགན་སྲུང་རང་བཞིན་གྱི་སྡོད་ཁང་འཛུགས་སྐྲུན་དང་སྤྱིལ་ཁྱིམ་ཁུལ་ལེགས་བཅོས་ཤུགས་ཆེན་བྱས་པས།དཀའ་ངལ་ཡོད་པའི་ཁྱིམ་དུད་ཁྲི1100སྡོད་ཁང་གསར་པར་སྤོ་སྐལ་ཐོབ་པ་རེད།ང་ཚོས་མི་དམངས་ཡོངས་རྫོགས་ལ་རྒས་དུས་འཚོ་རྟེན་ཡོད་པ་དང་།ན་དུས་སྨན་བཅོས་ཐུབ་པ།སྡོད་སའི་ཁང་པ་ཡོད་པ་བཅས་ཀྱི་འབད་བརྩོན་རྒྱུན་འཁྱོངས་ལྷོད་མེད་བྱ་དགོས།
     རྒྱལ་ཁབ་ཀྱི་དུས་ཡུན་རིང་འབྲིང་གི་སློབ་གསོ་བསྒྱུར་བཅོས་དང་འཕེལ་རྒྱས་གཏོང་བའི་འཆར་འགོད་ཀྱི་རྩ་འཛིན་གཏན་འབེབས་དང་ལག་བསྟར་བྱས་ཡོད།ལོ་ལྔའི་ནང་རྒྱལ་ཡོངས་ཀྱི་ནོར་སྲིད་ནས་སློབ་གསོའི་གཏོང་སྒོ་རིམ་བསགས་བྱས་ན་སྒོར་དུང་ཕྱུར་ཁྲི4.45ཟིན་པས།ལོ་རེར་ཆ་སྙོམས་བརྒྱ་ཆ22.4འཕར་ཡོད།གྲོང་ཁྱེར་དང་གྲོང་གསེབ་ཏུ་སློབ་ཡོན་མི་དགོས་པར་འོས་འགན་སློབ་གསོ་ཁྱོན་ཡོངས་ནས་མངོན་འགྱུར་བྱས་པ་དང་།སློབ་ལོ་རན་པའི་བྱིས་པ་ཚང་མར་“སློབ་ཡོན་མི་དགོས་པར་སློབ་སྐལ་རག་པ་”བྱས་ཡོད།འོས་འགན་སློབ་གསོའི་དུས་རིམ་དུ་དགེ་རྒན་ལ་བྱས་འབྲས་གླ་ཕོགས་ལམ་ལུགས་ཁྱོན་ཡོངས་ནས་ལག་བསྟར་བྱས་ཡོད།འབྲིང་རིམ་ལས་རིགས་སློབ་གསོས་གྲོང་གསེབ་ཀྱི་དཔལ་འབྱོར་དཀའ་ངལ་ཡོད་པའི་ཁྱིམ་ཚང་དང་།གྲོང་ཁྱེར་གྱི་ཡོང་འབབ་དམའ་བའི་ཁྱིམ་དུད།ཁྱིམ་པ་དང་འབྲེལ་བ་ཡོད་པའི་ཆེད་སྦྱོང་སློབ་མར་སློབ་ཡོན་མི་དགོས་པ་བཅས་བཟོ་ཡོད།རྒྱལ་ཁབ་ཀྱིས་སློབ་ཞུགས་རོགས་སྐྱོར་ལམ་ལུགས་དོན་འཁྱོལ་གང་མགྱོགས་བྱས་པ་དང་།ནོར་སྲིད་ཀྱིས་མ་དངུལ་འཇོག་ཚད2006ལོར་སྒོར་དུང་ཕྱུར18ཡིན་པ་ནས2010ལོར་སྒོར་དུང་ཕྱུར་306བར་སྤར་ཏེ་དེའི་ཁྱབ་ཁྱོན་མཐོ་རིམ་སློབ་གྲྭ་ནས་འབྲིང་རིམ་ལས་རིགས་སློབ་གྲྭ་དང་སློབ་འབྲིང་དཀྱུས་མ་བར་རྒྱ་བསྐྱེད་པ་དང་།རྒྱུ་དངོས་ཀྱི་རོགས་རམ་ཐོབ་གྲངས་སློབ་མ་ཁྱོན་བསྡོམས་ཁྲི2130ཟིན་པ།འོས་འགན་སློབ་གསོ་ལེན་པའི་ཞག་སྡོད་སློབ་མ་ཁྲི1200ལྷག་ཙམ་ལའང་འཚོ་བའི་རོགས་དངུལ་འདོན་སྤྲོད་བྱས་ཡོད།གྲོང་གསེབ་ཀྱི་སློབ་གྲྭ་ཆུང་འབྲིང་གི་ཉེན་ཅན་ཁང་པ་བསྒྱུར་བཀོད་དང་ལས་རིགས་སློབ་གསོའི་རྨང་གཞིའི་སྒྲིག་བཀོད་འཛུགས་སྐྱོང་བྱ་རྒྱུ་མགྱོགས་སུ་བཏང་ཡོད།མཐོ་རིམ་སློབ་གསོའི་སྤུས་ཚད་དང་ཆུ་ཚད་ཁྱོན་ཡོངས་ནས་མཐོ་རུ་བཏང་བ་དང་།མཐོ་རིམ་སློབ་གྲྭའི་གསར་གཏོད་བྱེད་ནུས་ཆེ་རུ་བཏང་ཡོད།རྒྱལ་ཁབ་ཀྱི་ཚན་རིག་དང་ལག་རྩལ་འཕེལ་རྒྱས་གཏོང་བའི་དུས་ཡུན་རིང་འབྲིང་གི་འཆར་འགོད་ཀྱི་རྩ་གནད་གཏན་འབེབས་བྱས་པ་མ་ཟད་ལག་བསྟར་ཡང་བྱས་ཡོད།ཀྲུང་དབྱང་ནོར་སྲིད་ཀྱིས་ཚན་རྩལ་ལ་སྒོར་དུང་ཕྱུར་6197བཞག་པས།ལོ་རེར་ཆ་སྙོམས་བརྒྱ་ཆ22.7འཕར་ཏེ་གྲུབ་འབྲས་གལ་ཆེན་རབ་དང་རིམ་པ་ཐོབ་ཡོད།གཞི་རིམ་གྱི་སྨན་བཅོས་འཕྲོད་བསྟེན་ཞབས་ཞུའི་ནུས་པ་ཇེ་ཆེར་བཏང་ཡོད།རྒྱལ་ཁབ་ཀྱིས་ཆེད་དོན་མ་དངུལ་བཀོད་སྒྲིག་གནང་སྟེ་ཞང་གྲོང་གི་འཕྲོད་བསྟེན་ཁང་ཁྲི2.3དང་།རྫོང་གི་སྨན་ཁང་1500།རྫོང་གི་ཀྲུང་ལུགས་སྨན་ཁང་500།རྫོང་གི་མ་བུ་བདེ་སྲུང་ཁང1000བཅས་ལེགས་བཅོས་དང་གསར་འཛུགས་བྱས་པ་དང་།སྡེ་ཁུལ་གྱི་འཕྲོད་བསྟེན་ཞབས་ཞུའི་ལྟེ་གནས2400བཙུགས་ཡོད།མི་འབོར་གྱི་འཆར་འགོད་དམིགས་ཚད་བདེ་བླགས་ངང་འགྲུབ་ཡོད་པ་དང་།རིག་གནས་སྒྲིག་སྲོལ་བསྒྱུར་བཅོས་ལ་གྲུབ་འབྲས་གལ་ཆེན་ཐོབ་ཡོད།སྤྱི་པའི་རིག་གནས་ཞབས་ཞུའི་མ་ལག་ལེགས་སྐྱོང་བྱེད་ཚུལ་མངོན་གསལ་མགྱོགས་སུ་བཏང་བ་དང་།རིག་གནས་ཐོན་ལས་དཔྱིད་དཔལ་བཞད་པ་ལྟར་འཕེལ་རྒྱས་བྱུང་ཡོད།མཚན་ཉིད་རིག་པ་དང་སྤྱི་ཚོགས་ཚན་རིགགསར་འགྱུར་དཔེ་སྐྲུན།རླུང་འཕྲིན་བཪྙན་འཕྲིན།རྩོམ་རིག་སྒྱུ་རྩལ་བཅས་དར་རྒྱས་དང་ཡར་ཐོན་བྱུང་བ་རེད།གྲོང་ཁྱེར་དང་གྲོང་གསེབ་ཀྱི་སྤྱི་པའི་ལུས་རྩལ་སྒྲིག་བཀོད་འཛུགས་སྐྱོང་བྱེད་ཚུལ་མགྱོགས་སུ་ཕྱིན་པ་དང་།དམངས་ཡོངས་ཀྱི་ལུས་སྦྱོང་བྱེད་སྒོའི་དར་སྲོལ་ཆགས་ཡོད།ཁྱོན་ཡོངས་ནས་ཁྲིམས་ལུགས་ལེགས་སྐྱོང་བྱས་པ་དང་།“ལོ་ལྔ་ཚན་ལྔའི”ཁྲིམས་ལུགས་ཁྱབ་སྤེལ་བདེ་བླག་བྱུང་བ་རེད།སྤྱི་ཚོགས་དོ་དམ་གསར་གཏོད་དང་དོ་དམ་བྱེད་ཤུགས་ཆེ་རུ་བཏང་བ་དང་།སྤྱི་ཚོགས་འཆམ་མཐུན་དང་བརྟན་ལྷིང་རྒྱུན་འཁྱོངས་བྱུང་བ་རེད།
     ཝུན་ཁྲོན་གྱི་དམིགས་བསལ་ས་ཡོམ་ཆེན་པོ་སོགས་རང་བྱུང་གི་གནོད་འཚེ་ཚབས་ཆེན་འགོག་རྒོལ་དང་དེར་འཐབ་རྩོད་བྱེད་པར་རྒྱལ་ཁ་ཆེན་པོ་ཐོབ་པ་དང་།ཝུན་ཁྲོན་དུ་གནོད་འཚེ་བྱུང་རྗེས་སླར་གསོ་བསྐྱར་སྐྲུན་བྱེད་པའི་ལོ་གསུམ་གྱི་ལས་འགན་ལོ་གཉིས་ནས་རྩ་བའི་ཆ་ནས་འགྲུབ་ཅིང་།ཡུལ་ཤུལ་གྱི་ས་ཡོམ་ཆེན་པོ་དང་འབྲུག་ཆུའི་ཆུ་ལོག་འདམ་རུད་ཆེན་པོའི་གནོད་འཚེ་བྱུང་རྗེས་ཀྱི་སླར་གསོ་བསྐྱར་སྐྲུན་གོ་རིམ་ལྡན་པར་བྱས་ཡོད།གནོད་འཚེའི་ཉམས་སད་ཐེག་པ་བརྒྱུད་དེ་ཀྲུང་གོའི་མི་དམངས་སྔར་བས་འཚར་ལོངས་དང་།རང་ཡིད་རང་ཆེས།འགྱུར་མེད་སྟོབས་ལྡན་བཅས་སུ་གྱུར་པ་དང་།ཀྲུང་ཧྭ་མི་རིགས་ལན་བརྒྱར་ཕམ་རུང་དཔའ་མི་ཞུམ་པ་དང་།ཡར་ཐོན་ལྷུར་ལེན་གྱི་རླབས་པོ་ཆེའི་སྙིང་སྟོབས་ནི་འགྲན་ཟླ་བྲལ་བ་རེད།
     ལོ་ལྔའི་རིང་ལ་ང་ཚོས་སྲིད་འཛིན་དོ་དམ་སྒྲིག་སྲོལ་བསྒྱུར་བཅོས་རྒྱུན་མ་ཆད་པར་ཟབ་སྤེལ་བྱས་པ་དང་།སྲིད་གཞུང་གི་འགན་ནུས་བསྒྱུར་རྒྱུ་མགྱོགས་སུ་བཏང་བས།སྲིད་གཞུང་གི་སྒྲིག་སྲོལ་བསྒྱུར་བཅོས་བྱེད་རིང་གསར་པ་ཁྱོན་ཡོངས་ནས་འགྲུབ་པ་དང་།ཁྲིམས་མཐུན་ལྟར་སྲིད་འཛིན་ཟབ་སྤེལ་དང་།ཁྲིམས་སྐྱོང་གི་སྲིད་གཞུང་དང་ཞབས་ཞུ་ཅན་གྱི་སྲིད་གཞུང་འཛུགས་སྐྱོང་བྱས་པ།སྲིད་དོན་ཡོངས་བསྒྲགས་ལ་སྐུལ་སྤེལ།སྲིད་འཛིན་གྱི་ཁག་འགན་འདྲི་རྩད་བྱེད་ཤུགས་ཆེ་རུ་བཏང་བ།རུལ་རྒོལ་གྱི་འཐབ་རྩོད་རྒྱུན་འཁྱོངས་ལྷོད་མེད་བཅས་བྱས་པས།སྲིད་གཞུང་རང་ངོས་འཛུགས་སྐྱོང་བྱེད་པར་གྲུབ་འབྲས་དགེ་མཚན་ལྡན་པ་ཕོབ་པ་རེད།
     འདས་པའི་ལོ་ལྔའི་རིང་ང་ཚོས་གོམ་པ་རིམ་བགྲོད་ཀྱིས་བསྐྱོད་པས།དེའི་དོན་དུ་ཀྲུང་གོའི་མི་དམངས་སྤོབས་པ་རྒྱས་པར་བྱེད་པའི་རྒྱུ་མཚན་ཡོད།ལོ་ལྔའི་གྲུབ་འབྲས་ནི་ལས་སླ་པོར་བྱུང་བ་ཞིག་མིན།དེ་ནི་བློ་མཐུན་ཧུའུ་ཅིན་ཐའོ་ཡིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གིས་ཁྱོན་ཡོངས་ཀྱི་གནས་ཚུལ་འཛིན་སྐྱོང་དང་།དབུ་ཁྲིད་ཡང་དག་གནང་བའི་འབྲས་བུ་ཡིན་པ་དང་།ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་ཀྱིས་ཐུན་མོང་ཐོག་འབད་འཐབ་བྱས་པའི་འབྲས་བུ་ཡིན་པས།འདིར་ངས་རྒྱལ་སྲིས་སྤྱི་ཁྱབ་ཁང་གི་ཚབ་ཞུས་ཏེ་རྒྱལ་ཡོངས་མི་རིགས་ཁག་གི་མི་དམངས་དང་།དམངས་གཙོའི་ཏང་ཤོག་ཁགམི་དམངས་ཀྱི་ཚོགས་པ་ཁགལས་རིགས་ཁག་གི་མི་དྲག་བཅས་ལ་ལྷག་བསམ་ཟོལ་མེད་ཀྱིས་ཐུགས་རྗེ་ཆེ་ཞུ་རྒྱུ་དང་།སྤུན་ཟླ་ཞང་ཀང་དམིགས་བསལ་སྲིད་འཛིན་ཁུལ་དང་།སྤུན་ཟླ་ཨའོ་མོན་སྲིད་འཛིན་ཁུལ།སྤུན་ཟླ་ཐའེ་ཝན་བཅས་དང་ཕྱིར་སྡོད་སྤུན་ཟླ་བཅས་ལ་ལྷག་བསམ་ཟོལ་མེད་ཀྱིས་ཐུགས་རྗེ་ཆེ་ཞུ་རྒྱུ་ཡིན།ཀྲུང་གོ་དེང་རབས་ཅན་དུ་འགྱུར་བའི་འཛུགས་སྐྲུན་ལ་ཐུགས་ཁུར་དང་རོགས་སྐྱོང་གནང་མཁན་རྒྱལ་ཁབ་ཁག་གི་སྲིད་གཞུང་དང་།རྒྱལ་སྤྱིའི་རྩ་འཛུགས།རྒྱལ་ཁབ་ཁག་གི་གྲོང་པོ་རྣམ་པར་ལྷག་བསམ་ཟོལ་མེད་ཀྱིས་ཐུགས་ཇེ་ཆེ་ཞུ་རྒྱུ་ཡིན།
     རང་རྒྱལ་འཕེལ་རྒྱས་གཏོང་རིམ་ཁྲོད་དོ་མཉམ་མིན་པ་དང་།མཐུན་འགྲིག་མིན་པ།རྒྱུན་མཐུད་མི་ཐུབ་པ་བཅས་ཀྱི་གནད་དོན་སྔར་བཞིན་མངོན་གསལ་ཡིན་པ།ང་ཚོས་རིག་པ་དྭངས་གསལ་གྱིས་ངོས་འཛིན་བྱུང་ཡོད་པ་གཙོ་བོ་ནི།དཔལ་འབྱོར་འཕེལ་བར་བྱེད་པའི་ཐོན་ཁུངས་ཁོར་ཡུག་ལ་ཚོད་འཛིན་ཤུགས་ཆེན་བྱས་པ་དང་།མ་དངུལ་འཇོག་པ་དང་འཛད་སྤྱོད་ཀྱི་འབྲེལ་བ་དོ་མཉམ་མིན་པ།ཡོང་འབབ་བགོ་བཤའི་བར་ཁྱད་པར་ཅུང་ཆེ་བ།ཚན་རྩལ་གསར་གཏོད་ཀྱི་ནུས་པ་མི་ཆེ་བ།ཐོན་ལས་ཀྱི་གྲུབ་ཚུལ་ལུགས་མཐུན་མིན་པ།ཞིང་ལས་ཀྱི་རྨང་གཞི་སྔར་བཞིན་ཞན་པ།གྲོང་ཁྱེར་དང་གྲོང་གསེབ་ཀྱི་ས་ཁོངས་གོང་འཕེལ་མཐུན་འགྲིག་མིན་པ།ལས་ཞུགས་སྤྱི་འབོར་གྱི་ཁུར་པོ་དང་གྲུབ་ཚུལ་རང་བཞིན་གྱི་འགལ་བ་མཉམ་དུ་གནས་པ།ཚན་རིག་དང་མཐུན་པའི་འཕེལ་རྒྱས་ལ་ཚོད་འཛིན་ཐེངས་པའི་སྒྲིག་སྲོལ་དང་རྐྱེན་སྲོལ་གྱི་འགོག་རྐྱེན་སྔར་བཞིན་ཅུང་མང་བ་བཅས་རེད།རྒྱལ་ནང་ཐོན་སྐྱེད་རིན་ཐང་བསྡོམས་འབོར་གྱི་བསྡུར་ཚད་ནང་ནས་ལོ་ལྔ་ཚན་བཅུ་གཅིག་པའི་འཆར་འགོད་དམིགས་ཚད་ཀྱི་ཞབས་ཞུའི་ལས་རིགས་གནས་ཐང་འཕར་ཚད་དང་།ལས་ཞུགས་ཀྱི་བསྡུར་ཚད།ཞིབ་འཇུག་དང་ཚོད་ལྟའི་ཐོག་ནས་འཕེལ་རྒྱས་ཀྱི་འགྲོ་གྲོན་གཏོང་བའི་བསྡུར་ཚད་ཟིན་གྲངས་ལེགས་འགྲུབ་བྱུང་མེད།མང་ཚོགས་ཁག་ཅིག་གིས་བསམ་འཆར་དྲག་པོ་འདོན་པའི་གནད་དོན་རྩ་བ་ནས་ཐག་གཅོད་ཐུབ་མེད་པ་གཙོ་བོ་ནི།སྤུས་ལེགས་ཀྱི་སློབ་གསོ་དང་སྨན་བཅོས་ཀྱི་ཐོན་ཁུངས་བསྡོམས་འབོར་མི་འདང་བ་དང་ཁྱབ་སྟངས་ཆ་སྙོམས་མིན་པ།ཟོག་གོང་འཕར་བའི་གནོན་ཤུགས་ཆེ་རུ་ཕྱིན་པ་དང་།གྲོང་ཁྱེར་ཆ་ཤས་ཀྱི་ཁང་པའི་རིན་གོང་འཕར་ཐལ་ཆེ་བ།ཁྲིམས་འགལ་གྱིས་ས་ཆ་བསྡུ་ལེན་དང་བཤིག་སྤོ་སོགས་བྱས་པ་ལས་བྱུང་བའི་སྤྱི་ཚོགས་ཀྱི་འགལ་བ་ཇེ་མང་དུ་གྱུར་པ།ཟས་རིགས་བདེ་འཇགས་ཀྱི་གནད་དོན་མངོན་གསལ་དོད་ཙམ་ཡིན་པ།ཁྱབ་ཁོངས་ཁ་ཤས་སུ་རུལ་སུངས་ཀྱི་སྣང་ཚུལ་ཚབས་ཆེ་བ་བཅས་རེད།ང་ཚོས་ངེས་པར་དུ་རྒྱལ་ཁབ་དང་མི་དམངས་ལ་འགན་འཁྲི་ཚད་མཐོན་པོ་འཁུར་བའི་སྙིང་སྟོབས་བཅངས་ནས་དཀའ་ཚེགས་ཆེ་བའི་ལས་དོན་ཞིབ་ཚགས་བྱེད་པ་དང་རྒྱུན་འཁྱོངས་ལྷོད་མེད་ཀྱིས་འབད་བརྩོན་བྱེད་པར་བརྟེན་ནས་གནད་དོན་དེ་དག་ཐག་གཅོད་ཇེ་མགྱོགས་སུ་བྱས་ནས་མི་དམངས་བློ་ཡིད་འཚིམ་པར་བྱ་རྒྱུ་ཡིན།
     ལོ་ལྔ་ཚན་བཅུ་གཅིག་པའི་སྐབས་ཀྱི་སྲིད་གཞུང་གི་ལས་དོན་ལ་ཕྱི་མིག་བལྟས་ན།གཤམ་གྱི་ཕྱོགས་འགའི་ཐད་ཀྱི་ང་ཚོའི་ངོས་ཟིན་དང་མྱོང་ཚོར་སྔར་བས་ཇེ་ཟབ་ཏུ་གྱུར་ཡོད་དེ།
     གཅིག་ནས་ཚན་རིག་དང་མཐུན་པའི་འཕེལ་རྒྱས་ངེས་པར་དུ་རྒྱུན་འཁྱོངས་བྱ་དགོས།ང་ཚོ་འགྲན་སློང་ནན་པོ་སྣ་ཚོགས་ལས་རྣམ་པར་རྒྱལ་བ་ནི་འཕེལ་རྒྱས་ལ་བརྟན་པ་ཡིན།ཁྱབ་ཁོངས་ཁག་ནས་ཐོབ་པའི་གྲུབ་འབྲས་དང་འཕེལ་རྒྱས་ཡོད་ཚད་ནི་འཕེལ་རྒྱས་ལ་བརྟེན་པ་ཡིན།མདུན་སྐྱོད་ཀྱི་བགྲོད་ལམ་སྟེང་གི་དཀའ་ངལ་དང་གནད་དོན་ཐག་གཅོད་དགོས་ན་སྔར་བཞིན་འཕེལ་རྒྱས་ལ་བརྟེན་དགོས།རང་རྒྱལ་སྔར་བཞིན་སྤྱི་ཚོགས་རིང་ལུགས་ཀྱི་ཐོག་མའི་དུས་རིམ་དུ་གནས་ཡོད་པ་མ་ཟད་ད་དུང་དུས་ཡུན་རིང་པོར་གནས་སྲིད་པས།ངེས་པར་དུ་དཔལ་འབྱོར་འཛུགས་སྐྲུན་ལྟེ་བར་འཛིན་པ་རྒྱུན་འཁྱོངས་དང་།ཚན་རིག་དང་མཐུན་པའི་འཕེལ་རྒྱས་རྒྱུན་འཁྱོངས་བྱ་དགོས།མི་རྩ་བར་བཟུང་སྟེ་དམངས་འཚོ་འགན་སྲུང་དང་ལེགས་བཅོས་བྱ་རྒྱུ་དེ་ལས་དོན་ཡོད་ཚད་ཀྱི་འགོ་རྩོམ་ས་དང་དམིགས་སར་བྱས་ནས་བློ་བརྟན་འགྱུར་མེད་ཀྱིས་ཕྱུག་འགྱུར་གྱི་ལམ་དུ་མཉམ་བསྐྱོད་བྱས་ཏེ་འཕེལ་རྒྱས་ཀྱི་གྲུབ་འབྲས་ཀྱིས་མི་དམངས་ཡོངས་ལ་ཕན་ཐོགས་པར་བྱ་དགོས།གཅིག་གྱུར་འཆར་འགོད་དང་ཁྱོན་ཡོངས་ལ་ལྟ་རྟོག་མཐའ་འཁྱོངས་བྱས་ཏེ་གྲོང་ཁྱེར་དང་གྲོང་གསེབ་དང་།ས་ཁོངས་ཀྱི་དཔལ་འབྱོར་དང་སྤྱི་ཚོགས་མཐུན་འགྲིག་ངང་གོང་དུ་འཕེལ་བར་བྱ་དགོས།དཔལ་འབྱོར་གོང་དུ་སྤེལ་སྟངས་ཇེ་མགྱོགས་སུ་གཏོང་བ་དང་།རང་བརྟེན་གསར་གཏོད་ལ་སྐུལ་འདེད་ཤུགས་ཆེན་གཏོང་བ།ཐོན་ཁུངས་གྲོན་ཆུང་དང་ཁོར་ཡུག་སྲུང་སྐྱོང་བཅས་བྱས་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་རྒྱུ་དེ་མི་འབོར་ཐོན་ཁུངས་ཁོར་ཡུག་གསུམ་དང་མཐུན་འགྲིག་ཡོང་བར་བྱེད་པ་དང་།གོང་འཕེལ་གྱི་ཁྱོན་ཡོངས་རང་བཞིན་དང་།མཐུན་འགྲིག་རང་བཞིན།རྒྱུན་མཐུད་རང་བཞིན་བཅས་ཇེ་མཐོར་གཏོང་དགོས།
     གཉིས་ནས་སྲིད་གཞུང་གིས་སྙོམས་སྒྲིག་དང་ཚོང་རའི་རྐྱེན་སྲོལ་ངེས་པར་དུ་གཅིག་གྱུར་དམ་ཚགས་རྒྱུན་འཁྱོངས་བྱ་དགོས།ཚོང་རའི་རྐྱེན་སྲོལ་འཐུས་ཚང་དང་།སྤྱི་ཁོག་སྙོམས་སྒྲིག་ཕན་འབྲས་ཐོན་པར་བྱེད་པ་གཉིས་ཀ་སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་སྲོལ་ལ་མེད་དུ་མི་རུང་བའི་གྲུབ་ཆ་གལ་ཆེན་ཡིན།ཚོང་རའི་ཕན་ནུས་མང་བ་དགོས་སམ་ཡང་ན་སྲིད་གཞུང་གི་ཕན་ནུས་མང་བ་དགོས་མིན་ངེས་པར་དུ་སྟབས་བསྟུན་གདམ་ག་རྒྱག་དགོས།རྒྱལ་སྤྱིའི་དངུལ་རྩའི་ཉམས་ཉེན་གྱི་གནོད་སྐྱོན་ལ་ཁ་གཏད་འཇལ་སྐབས་ང་ཚོས་སྤྱི་ཁོག་སྙོམས་སྒྲིག་ལ་ཤུགས་སྣོན་དང་ལེགས་བཅོས་བྱས་ཏེ་ཚོང་རའི་ནོར་འཁྲུལ་དུས་ཐོག་ཏུ་ཡོ་བསྲང་དང་།ཚོང་རའི་ནུས་པ་ཤོབ་བ་ཁ་གསབ་བྱས་ཏེ།དཔལ་འབྱོར་འཕར་ཆག་ཆེན་པོ་མི་ཡོང་བར་བྱེད་པ་ནི་ཡང་དག་ཡིན་པ་ལག་ལེན་ལས་རྦད་དེ་ར་འཕྲོད་བྱུང་བ་རེད།ང་ཚོས་ངེས་པར་དུ་སྤྱི་ཚོགས་རིང་ལུགས་ཀྱི་ཚོར་རའི་དཔལ་འབྱོར་སྒྲིག་སྲོལ་རྒྱུན་ཆད་མེད་པར་འཐུས་སྒོ་ཚང་དུ་གཏོང་བ་དང་།ཐོན་ཁུངས་བཀོད་སྒྲིག་བྱེད་པའི་ཁྲོད་ཀྱི་ཚོང་རའི་རྨང་གཞིའི་རང་བཞིན་གྱི་ཕན་ནུས་འདོན་སྤེལ་གང་ལེགས་བྱས་ཏེ་དཔལ་འབྱོར་གྱི་གཏིང་ཤུགས་འདོན་སྤེལ་བྱ་དགོས།དུས་མཚུངས་སུ་ཚན་རིག་དང་མཐུན་པར་སྤྱི་ཁོག་སྙོམས་སྒྲིག་བྱེད་ཐབས་སྤྱད་དེ་དཔལ་འབྱོར་ཡུན་རིང་བརྟན་ལྷིང་ངང་འཕེལ་རྒྱས་མགྱོགས་ཙམ་ཡོང་བར་བྱ་དགོས།
     གསུམ་ནས་རྒྱལ་ནང་དང་རྒྱལ་སྤྱིའི་ཁྱོན་ཡོངས་གཉིས་ངེས་པར་དུ་གཅིག་གྱུར་གྱིས་འཆར་འགོད་རྒྱུན་འཁྱོངས་བྱ་དགོས།དཔལ་འབྱོར་གོ་ལ་ཧྲིལ་པོ་ཅན་དུ་འཕེལ་རྒྱས་གཏིང་ཟབ་འགྲོ་བ་ཕྱི་ཕྱོགས་སུ་སྒོ་འབྱེད་ཚུལ་རྒྱུན་མ་ཆད་པར་གཏིང་ཟབ་ཏུ་འགྲོ་བའི་ཆ་རྐྱེན་འོགརང་རྒྱལ་གྱི་དཔལ་འབྱོར་དང་འཛམ་གླིང་གི་དཔལ་འབྱོར་འབྲེལ་བ་ཉིན་རེ་བཞིན་དམ་དུ་འགྲོ་བཞིན་ཡོད་པ་དང་།མཉམ་འགུལ་དང་བརྟེན་རེས་བྱེད་ཤུགས་རྒྱུན་མ་ཆད་པར་ཆེ་རུ་ཕྱིན་ཡོད།འཛམ་གླིང་ལ་ལྟ་བའི་མིག་རྒྱང་རིང་པོ་ངེས་པར་དགོས་པ་དང་།འཐབ་འཛིང་གི་བསམ་གཞིགས་བྱེད་ཤུགས་ཆེ་རུ་གཏོང་བ།རྒྱལ་སྤྱིའི་གནས་བབ་ཀྱི་འཕེལ་རྒྱས་དང་འགྱུར་ལྡོག་ཁྲོད་འཕེལ་རྒྱས་ཀྱི་གོ་སྐབས་དམ་འཛིན་གང་ལེགས་དང་།ཉེན་ཁ་དང་འགྲན་སློང་ལ་ཁ་གཏད་བརྟན་པོར་འཇལ་མཁས་པ།རྒྱལ་ནང་དང་རྒྱལ་སྤྱིའི་ཚོང་ར་གཉིས་དང་ཐོན་ཁུངས་གཉིས་བེད་སྤྱོད་གང་ལེགས།རྒྱལ་ནང་འཕེལ་རྒྱས་དང་ཕྱི་ཕྱོགས་སུ་སྒོ་འབྱེད་པའི་འབྲེལ་བ་གཅིག་གྱུར་འཆར་འགོད་ཀྱིས་ཐག་གཅོད་གང་ལེགས་བཅས་བྱས་ཏེ་ཕྱི་ནང་གཉིས་ཀར་ལྟ་རྟོག་དང་དོ་མཉམ་ངང་འཕེལ་རྒྱས་ངོ་མ་ཡོང་བར་བྱ་དགོས།
     བཞི་ནས་བསྒྱུར་བཅོས་སྒོ་འབྱེད་ནི་དཔལ་འབྱོར་དང་སྤྱི་ཚོགས་གོང་དུ་སྤེལ་བའི་རྩ་བའི་སྒུལ་ཤུགས་སུ་འཛིན་རྒྱུ་ངེས་པར་དུ་མཐའ་འཁྱོངས་བྱ་དགོས།བསྒྱུར་བཅོས་སྒོ་འབྱེད་ནི་རྒྱལ་ཁབ་སྟོབས་འབྱོར་ལྡན་པ་དང་མི་དམངས་བདེ་སྐྱིད་ལྡན་པར་བྱེད་པའི་བགྲོད་ལམ་ལྡོག་མེད་ཡིན་པས།ངེས་པར་དུ་སྤྱི་ཚོགས་རིང་ལུགས་ཀྱི་དེང་རབས་ཅན་འཛུགས་སྐྲུན་བྱེད་པའི་རྒྱུན་རིམ་ཧྲིལ་པོར་ཁྱབ་པར་བྱ་དགོས།ང་ཚོས་ཆོད་སེམས་དང་སྙིང་སྟོབས་སྔར་བས་ཆེན་པོ་བཅངས་ཏེ་བསྒྱུར་བཅོས་ལ་སྐུལ་འདེད་བཏང་ནས་བསྒྱུར་བཅོས་ཀྱི་ཇུས་ཐག་གཅོད་པའི་ཚན་རིག་རང་བཞིན་ཆེ་རུ་གཏོང་བ་དང་།བསྒྱུར་བཅོས་བྱེད་ཐབས་ཀྱི་མཐུན་སྦྱོར་རང་བཞིན་་ཇེ་ཆེར་གཏོང་བ།དཔལ་འབྱོར་དང་།ཆབ་སྲིད།རིག་གནས།སྤྱི་ཚོགས་སོགས་ཕྱོགས་གང་སྤྱིའི་བསྒྱུར་བཅོས་དང་གསར་སྐྲུན་བྱེད་པར་ཁྱོན་ཡོངས་ནས་སྐུལ་འདེད་བཏང་སྟེ་སྒྲིག་སྲོལ་དང་རྐྱེན་སྲོལ་གྱི་འགོག་རྐྱེན་རྩ་བ་ནས་སེལ་བ་དང་།ཐོན་སྐྱེད་ནུས་ཤུགས་བཅིངས་འགྲོལ་དང་གོང་སྤེལ་གཏོང་ཅི་ཐུབ་བྱས་ཏེ་སྤྱི་ཚོགས་དྲང་སྙོམས་དྲང་བདེན་ཡོང་བ་བྱ་དགོས།མི་དམངས་ཀྱི་འཚོ་བའི་ཆུ་ཚད་ལེགས་བཅོས་བྱ་རྒྱུ་དེ་བསྒྱུར་བཅོས་དང་གོང་སྤེལ་བརྟན་ལྷིང་གསུམ་གྱི་འབྲེལ་བ་ཐག་གཅོད་ཡང་དག་བྱ་རྒྱུ་དང་ཟུང་འབྲེལ་དང་།བསྒྱུར་བཅོས་བྱེད་ཤུགས་དང་།འཕེལ་རྒྱས་གཏོང་བའི་མྱུར་ཚད།སྤྱི་ཚོགས་ཀྱི་ཐེག་ཚད་བཅས་ཟུང་འབྲེལ་མཐའ་འཁྱོངས་བྱས་ཏེ་བསྒྱུར་བཅོས་ལ་བརྟེན་ནས་འཆམ་མཐུན་བརྟན་ལྷིང་ཡོང་བར་བྱས་ཐོག་མི་དམངས་བདེར་འཁོད་ལས་བརྩོན་དང་།སྤྱི་ཚོགས་བདེ་འཇགས་རིམ་ལྡན།རྒྱལ་ཁབ་ཡུན་རིང་བདེར་འཁོད་བཅས་ཡོང་བའི་འགན་ལེན་བྱ་དགོས།