—2011ལོའི་ཟླ3ཚེས5ཉིན་རྒྱལ་ཡོངས་མི་དམངས་འཐུས་མིའི་ཚོགས་ཆེན་སྐབས་བཅུ་གཅིག་པའི་གྲོས་ཚོགས་ཐེངས་བཞི་པའི་ཐོག
     རྒྱལ་སྲིད་སྤྱི་ཁྱབ་ཁང་གི་ཙུང་ལི།ཝུན་ཅ་པའོ།
     འཐུས་མི་རྣམ་པ།
     ད་ལྟ་ངས་རྒྱལ་སྲིད་སྤྱི་ཁྱབ་ཁང་གི་ཚབ་ཞུས་ཏེ་ཚོགས་ཆེན་ལ་སྲིད་གཞུང་གི་ལས་དོན་སྙན་སེང་ཞུ་རྒྱུ་ཡིན་པས།འཐུས་མི་རྣམ་པས་གྲོས་ཞིབ་གནང་རོགས་ཞུ་རྒྱུ་མ་ཟད།རྒྱལ་ཡོངས་སྲིད་གྲོས་ཀྱི་ཨུ་ཡོན་རྣམ་པས་ཀྱང་དགོངས་འཆར་གནང་རོགས་ཞུ་རྒྱུ་ཡིན།
     གཅིགལོ་ལྔ་ཚན་བཅུ་གཅིག་པའི་རིང་གི་རྒྱལ་དམངས་དཔལ་འབྱོར་དང་སྤྱི་ཚོགས་གོང་དུ་སྤེལ་ཚུལ་ཕྱིར་དྲན་བྱས་པ།
     ལོ་ལྔ་ཚན་བཅུ་གཅིག་པའི་དུས་སྐབས་ནི་རང་རྒྱལ་འཕེལ་རྒྱས་གཏོང་རིམ་སྤྱིར་བཏང་མིན་པའི་ལོ་ལྔ་རེད།རྒྱལ་ནང་གི་གནས་བབ་ཪྙོག་འཛིང་ཆེ་བ་དང་ཉམས་ཉེན་དང་འགྲན་རྩོད་གལ་ཆེན་རབ་དང་རིམ་པའི་མདུན་དུ།ཀྲུང་གོའི་གུང་ཁྲན་ཏང་གིས་རྒྱལ་ཡོངས་མི་རིགས་ཁག་གི་མི་དམངས་ལ་མཐུན་སྒྲིལ་དང་ཁོང་ཚོའི་སྣེ་ཁྲིད་དེ་བསྒྱུར་བཅོས་སྒོ་འབྱེད་དང་དེང་རབས་ཅན་དུ་འགྱུར་བའི་འཛུགས་སྐྲུན་ལ་ཁྱོན་ཡོངས་ནས་སྐུལ་སྤེལ་བཏང་བས།རྒྱལ་ཁབ་ཀྱི་རྣམ་པར་ལོ་རྒྱུས་ཀྱི་རང་བཞིན་པའི་འགྱུར་ལྡོག་བྱུང་བ་རེད།
     —ལོ་ལྔ་པོ་དེའི་ནང་རང་རྒྱལ་སྤྱི་ཚོགས་ཀྱི་ཐོན་སྐྱེད་ནུས་ཤུགས་དང་།ཕྱོགས་བསྡུས་རྒྱལ་སྟོབས་མངོན་གསལ་ཆེ་རུ་ཕྱིན་པ་རེད།ང་ཚོས་རྒྱལ་སྤྱིའི་དངུལ་རྩའི་ཉམས་ཉེན་གྱི་གནོད་སྐྱོན་ལ་ཁ་གཏད་ཕན་འབྲས་ཐོན་པར་བཅལ་བ་དང་།དཔལ་འབྱོར་རྒྱུན་མཐུད་དང་བརྟན་པོའི་ངང་འཕེལ་རྒྱས་མགྱོགས་ཙམ་ཡོང་བར་བྱས་པས།ལོ་ལྔ་ཚན་བཅུ་གཅིག་པའི་དམིགས་ཚད་དང་ལས་འགན་གཙོ་བོ་རྒྱལ་ཁའི་ངང་ལེགས་འགྲུབ་བྱུང་ཞིང་།རྒྱལ་དམངས་དཔལ་འབྱོར་སྐས་རིམ་གསར་པར་བསྐྱོད་པ་རེད།རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་ཁྲི39.8ཟིན་ཏེ་ལོ་རེར་བརྒྱ་ཆ11.2འཕར་བ་དང་།ནོར་སྲིད་ཀྱི་ཡོང་སྒོ་སྒོར་དུར་ཕྱུར་ཁྲི3.16ནས་དུང་ཕྱུར་ཁྲི8.31བར་འཕར་བ་རེད།མི་ཞུགས་འཇིག་རྟེན་ལ་འཕུར་བ་དང་།ཟླ་བའི་གོ་ལར་བརྟག་པའི་ལས་གཞི།ཚད་བརྒལ་གྱི་རྩིས་འཁོར་སོགས་ཚན་རྩལ་རྩེར་སོན་འགག་སྒྲོལ་བྱུང་བ་རེད།རྒྱལ་སྲུང་དང་དམག་དཔུང་དེང་རབས་ཅན་དུ་འཛུགས་སྐྲུན་བྱེད་པར་གྲུབ་འབྲས་གལ་ཆེན་ཐོབ་པ་རེད།
     —ལོ་ལྔ་པོ་དེའི་ནང་སྤྱི་ཚོགས་ཀྱི་བྱ་གཞག་ཁག་འཕེལ་རྒྱས་མགྱོགས་སུ་ཕྱིན་པ་དང་།མི་དམངས་ཀྱི་འཚོ་བ་ལེགས་བཅོས་མངོན་གསལ་བྱུང་བ་རེད།སློབ་གསོ་དང་།ཚན་རྩལ།རིག་གནས།འཕྲོད་བསྟེན།ལུས་རྩལ་བཅས་ཀྱི་བྱ་གཞག་ཁྱོན་ཡོངས་ནས་འཕེལ་རྒྱས་བྱུང་ཡོད།གྲོང་ཁྱེར་དང་གྲོང་གསེབ་ཏུ་ལས་ཞུགས་མི་ཁྲི་5771བསྐྱར་འཕར་བྱུང་བ་དང་།གྲོང་གསེབ་ཀྱི་ངལ་རྩོལ་ནུས་ཤུགས་ཁྲི4500སྤོ་སྒྱུར་བྱས་པ།གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ལག་ཐོག་ཡོང་འབབ་དང་གྲོང་གསེབ་ཀྱི་གྲོང་མི་མི་རེའི་ཡོང་འབ་ཁེར་གཙང་སོ་སོར་ལོ་རེར་བརྒྱ་ཆ9.7དང་བརྒྱ་ཆ་8.9འཕར་བ།གྲོང་ཁྱེར་དང་གྲོང་གསེབ་དུ་མཆེད་པའི་སྤྱི་ཚོགས་ཀྱི་འགན་སྲུང་མ་ལག་རིམ་བཞིན་འཐུས་སྒོ་ཚང་དུ་ཕྱིན་པ་རེད།
     —ལོ་ལྔ་པོ་དེའི་ནང་བསྒྱུར་བཅོས་སྒོ་འབྱེད་ལ་གྲུབ་འབྲས་གལ་ཆེན་ཐོབ་པ་རེད།ཁྱབ་ཁོངས་གལ་ཆེན་དང་འགག་རྩའི་ལྷུ་ཚིགས་ཀྱི་བསྒྱུར་བཅོས་འགག་གནད་གསར་པ་སྒྲོལ་བ་དང་།སྤྱི་ཚོགས་རིང་ལུགས་ཀྱི་ཚོང་རའི་དཔལ་འབྱོར་སྒྲིག་སྲོལ་འཐུས་སྒོ་སྔར་ལས་ཚང་དུ་ཕྱིན་པ་རེད།ན་ནིང་ཕྱི་ཕྱོགས་ཉོ་ཚོང་བསྡོམས་འབོར་ཨ་སྒོར་དུང་ཕྱུར་ཁྲི2.97ཟིན་པ་དང་།སྒོ་ཕྱེ་བའི་དཔལ་འབྱོར་གྱི་ཆུ་ཚད་མངོན་གསལ་མཐོ་རུ་ཕྱིན་པ་རེད།
     —ལོ་ལྔ་པོ་དེའི་ནང་རང་རྒྱལ་གྱི་རྒྱལ་སྤྱིའི་གོ་གནས་དང་ཤུགས་རྐྱེན་མངོན་གསལ་ཆེ་རུ་ཕྱིན་པ་རེད།ང་ཚོས་རྒྱལ་སྤྱིའི་ལས་དོན་ཁྲོད་དུ་དགེ་མཚན་ལྡན་པའི་ནུས་པ་གལ་ཆེན་བཏོན་ནས།རྒྱལ་ཁབ་ཀྱི་བདག་དབང་དང་།བདེ་འཇགས།འཕེལ་རྒྱལ་གཏོང་བའི་ཁེ་དབང་བཅས་སྲུང་སྐྱོང་ནུས་ལྡན་བྱས་པས།ཕྱི་འབྲེལ་གྱི་ཕྱོགས་གང་སྤྱིར་གྲུབ་འབྲས་གལ་ཆེན་ཐོབ་པ་རེད།པེ་ཅིན་གྱི་ཨོ་རྩལ་འགྲན་ཚོགས་དང་།ཧྲང་ཧའེ་ཡི་འཛམ་གླིང་དངོས་མང་སྟོན་ཚོགས།ཀོང་ཀྲོའུ་ཡི་ཨ་ཤེ་ཡའི་ལུས་རྩལ་འགྲན་ཚོགས་བཅས་ལམ་ལྷོང་བྱུང་ཏེ་ཀྲུང་ཧྭ་མི་རིགས་ཀྱི་ལོ་མང་རིང་གི་བསམ་འདུན་གྲུབ་པ་རེད།
     གྲུབ་འབྲས་འོད་སྟོང་འབར་བ་དེ་དག་གི་ཐོག་ནས་ཀྲུང་གོའི་ཁྱད་ཆོད་ལྡན་པའི་སྤྱི་ཚོགས་རིང་ལུགས་ཀྱི་ཁྱད་འཕགས་རང་བཞིན་གང་ལེགས་མཚོན་པ་དང་།བསྒྱུར་བཅོས་སྒོ་འབྱེད་ཀྱི་སྟོབས་ཤུགས་རླབས་པོ་ཆེ་མཚོན་ཏེ་རྒྱལ་ཡོངས་མི་རིགས་ཁག་གི་མི་དམངས་རང་ཡིད་རང་ཆེས་དང་།སྤོབས་སེམས་ཆེས་ཆེར་རྒྱས་པ་དང་།ཀྲུང་ཧྭ་མི་རིགས་ཀྱི་གོང་བུར་འགྲིལ་ཤུགས་དང་བློ་ཁ་ཕྱོགས་ཤུགས་ཆེ་རུ་ཕྱིན་པས།ང་ཚོས་ལོ་རྒྱུས་ཀྱི་རྒྱང་སྐྱོད་ལམ་བུ་གསར་པར་བློ་སྟོབས་ཆེན་པོས་མདུན་སྐྱོད་བྱེད་པར་སྐུལ་ལྕག་ཐེབས་ངེས་རེད།
     ལོ་ལྔའི་རིང་ལ་ང་ཚོས་ལས་དོན་བསྒྲུབས་པ་གཙོ་བོ་གཤམ་གསལ།
     （གཅིག）སྤྱི་ཁོག་ནས་སྙོམས་སྒྲིག་སྟངས་འཛིན་བྱེད་ཤུགས་ཆེ་རུ་བཏང་བ་དང་ལེགས་བཅོས་བྱས་པས།དཔལ་འབྱོར་བརྟན་པོའི་ངང་ནས་འཕེལ་རྒྱས་མགྱོགས་པོ་ཡོང་བར་སྐུལ་མ་ཐེབས་པ་རེད།ང་ཚོས་སྤྱི་ཁོག་ནས་སྙོམས་སྒྲིག་སྟངས་འཛིན་བྱེད་པའི་ཁ་ཕྱོགས་དང་།གཙོ་གནད།ཤུགས་ཚད་བཅས་ཁོང་དུ་ཆུད་པ་བྱ་རྒྱུར་ཡིད་གཟབ་བྱས་ནས་དཔལ་འབྱོར་ལས་དོན་གྱི་རང་འགུལ་དང་དབང་ཆ་ཁོང་དུ་བརྟན་པོ་ཆུད་པར་བྱས་ཡོད།ལོ་ལྔ་ཚན་བཅུ་གཅིག་པའི་དུས་འགོར་མ་དངུལ་འཇོག་ཐལ་ཤོར་ཚུལ་དང་ཉོ་ཚོང་གི་དྲང་ཁྱབ་ཆེ་ཐལ་ཤོར་བ།སྤེལ་ཕྱོགས་གཙོ་བོ་ཐལ་ཆེ་བ་བཅས་དང་དེ་བཞིན་གྲུབ་ཚུལ་གྱི་རང་བཞིན་དང་།ནང་འདྲེན་གྱི་དངོས་ཟོག་གོང་ཚད་འཕར་ཐལ་ཆེ་ཚུལ་ལ་དམིགས་ཏེ་སྲིད་ཇུས་གྱི་བྱེད་ཐབས་འཆུག་མེད་སྤྱད་དེ་འགོ་འབུར་བ་ཙམ་ནས་འཕེལ་ཕྱོགས་སུ་འགྱུར་ཚུལ་མངོན་པའི་གནད་དོན་དང་།གནད་དོན་ཆ་ཤས་ནས་སྤྱི་ཡོངས་སུ་འགྱུར་ཚུལ་བཀག་འགོག་ཕན་འབྲས་ཐོན་པར་བྱས་ཡོད།ཉེ་ལོའི་རིང་ལ་ལོ་མང་མ་ཐོན་པའི་རྒྱལ་སྤྱིའི་དངུལ་རྩའི་ཉམས་ཉེན་གྱི་གནོད་སྐྱོན་བྱུང་བར་དམིགས་ནས།ང་ཚོས་གཟབ་བརླིང་ངང་ཁ་གཏད་བཅལ་བ་དང་།ཚན་རིག་དང་མཐུན་པའི་ཇུས་ཐག་བཅད་པ།བློ་ཐག་ཆོད་པོས་ནོར་སྲིད་ཀྱི་སྲིད་ཇུས་དགེ་མཚན་ལྡན་པ་དང་དངུལ་ལོར་གྱི་སྲིད་ཇུས་ལྷུག་པོ་འོས་འཚམ་ལག་ལེན་བསྟར་བ་རེད།འཆར་འགོད་སྡེབ་གཅིག་ཏུ་དོན་འཁྱོལ་བྱ་རྒྱུ་མཐའ་འཁྱོངས་དང་།སྲིད་གཞུང་གི་གཏོང་སྒོ་ཇེ་མང་།གྲུབ་ཚུལ་གྱི་རང་བཞིན་ལྡན་པའི་དཔྱ་ཁྲལ་ཆག་ཡང་།ཐོན་ལས་གཙོ་བོ་ལེགས་སྒྲིག་དང་དར་རྒྱས་གཏོང་བའི་འཆར་འགོད་ཁྱབ་ཆེར་ལག་བསྟར།རང་བརྟེན་གསར་གཏོད་དང་ཚན་རྩལ་གྱི་རོགས་སྐྱོར་ཤུགས་ཆེན་བཅས་བྱས་ཏེ་སྤྱི་ཚོགས་ཀྱི་འགན་སྲུང་བྱེད་ཚད་ཇེ་ཆེར་བཏང་ཡོད།ནང་མཁོ་རྒྱ་སྐྱེད་པའི་འཐབ་ཇུས་ཀྱི་བྱེད་ཕྱོགས་མཐའ་འཁྱོངས་དང་།འཛད་སྤྱོད་ལ་སྐུལ་ལྕག་གཏོང་བའི་སྲིད་ཇུས་དང་བྱེད་ཐབས་རབ་དང་རིམ་པ་སྤྱད་དེ་གྲོང་ཁྱེར་དང་གྲོང་གསེབ་ཀྱི་གྲོང་མི་སྤྱི་དང་ལྷག་པར་དུ་ཡོང་སྒོ་ཉུང་བའི་མང་ཚོགས་ཀྱི་ཡོང་འབབ་མང་དུ་བཏང་བས།འཛད་སྤྱོད་བྱེད་ཁྱོན་མུ་མཐུད་ཆེ་རུ་ཕྱིན་པ་དང་།གྲུབ་ཚུལ་རྒྱུན་ཆད་མེད་པར་རིམ་འཕར་བྱུང་བ་རེད།ལོ་གཉིས་ནང་སྒོར་དུང་ཕྱུར་ཁྲི4འཕར་བའི་མ་དངུལ་འཇོག་པའི་འཆར་གཞི་དོན་འཁྱོལ་བྱེད་པ་དེའི་ནང་ཀྲུང་དབྱང་གི་མ་དངུལ་སྒོར་དུང་ཕྱུར་ཁྲི་1.18མང་དུ་ཕྱིན་པ་རེད།འགན་སྲུང་རང་བཞིན་གྱི་བདེར་འགོད་ལས་གཞི་དང་།གྲོང་གསེབ་ཀྱི་དམངས་འཚོའི་ལས་གཞི།སྤྱི་ཚོགས་ཀྱི་བྱ་གཞག་བཅས་ལ་མ་དངུལ་འཇོག་ཚད་བརྒྱ་ཆ་43.7ཟིན་པ་དང་།རང་བརྟེན་གསར་གཏོད་དང་།གྲུབ་ཚུལ་ལེགས་སྒྲིགནུས་སྲི་སྙིགས་འཕྲི་དང་སྐྱེ་ཁམས་འཛུགས་སྐྱོང་ལ་བརྒྱ་ཆ15.3ཟིན་པ།རྨང་གཞིའི་སྒྲིག་བཀོད་འཛུགས་སྐྲུན་གལ་ཆེན་ལ་བརྒྱ་ཆ23.6ཟིན་པ།གནོད་སྐྱོན་བྱུང་རྗེས་བསྐྱར་སྐྲུན་བྱེད་པར་བརྒྱ་ཆ་14.8ཟིན་པ་རེད།སྲིད་གཞུང་གི་མ་དངུལ་འཇོག་ཚུལ་གྱིས་སྤྱི་ཚོགས་ནས་མ་དངུལ་འཇོག་པར་སྐུལ་ཁྲིད་བྱས་པ་དང་།རྒྱལ་ནང་གི་དགོས་མཁོ་ཇེ་མང་དུ་ཕྱིན་ཏེ་ཕྱི་མཁོའི་ཉག་ཁ་ཕན་འབྲས་ཐོན་པར་གསབ་པ།དུས་ཐུང་ནང་དཔལ་འབྱོར་ཆག་ཚུལ་གྱི་ཁ་ཕྱོགས་བསྒྱུར་ཏེ་འཛམ་གླིང་ཐོག་སྔོན་ལ་བསྐྱར་འཕར་བྱེད་ཚུལ་བཟང་བ་དང་།དམིགས་བསལ་དཀའ་ངལ་ལས་རྣམ་པར་རྒྱལ་ཏེ་དམངས་འཚོར་འགན་སྲུང་དང་ལེགས་བཅོས་ནུས་ལྡན་ཐུབ་ཡོད་ལ་ཕུགས་གྱི་འཕེལ་རྒྱས་ལའང་རྨང་གཞི་བརྟན་པོ་བཏིང་ཡོད།
     （གཉིས།）“ཞིང་གསུམ”གྱི་ལས་དོན་ལྷོད་གཡེང་མེད་པར་ཡག་པོར་བསྒྲུབ་ནས་ཞིང་ལས་ཀྱི་རྨང་གཞི་སྲ་བརྟན་གཏོང་བ་དང་དེར་ཤུགས་སྣོན་བརྒྱབ་ཡོད།ཀྲུང་དབྱང་ནོར་སྲིད་ཀྱིས“ཞིང་གསུམ”ལ་མ་དངུལ་བཞག་པ་རིམ་བསགས་བྱས་ན་སྒོར་དུང་ཕྱུར་ཁྲི3ཉེ་བ་ཟིན་པ་དེ་ལོ་རེར་འཕར་ཚད་ཆ་སྙོམས་བརྒྱ་ཆ23ལས་བརྒལ་ཡོད།ཞིང་ལས་ཀྱི་དཔྱ་ཁྲལ་དང་ཁྲལ་གྲོན་སྣ་ཚོགས་རྩ་བ་ནས་མེད་པར་བཟོས་པ་དང་།ཞིང་པའི་འབྲུ་འདེབས་ཁྲལ་བསྡུའི་ལོ་རྒྱུ་མཇུག་བསྒྲིལ་ཏེ་ལོ་རེར་ཞིང་པའི་འཁུར་པོ་ཡང་དུ་གཏོང་ཚད་སྒོར་དུང་ཕྱུར1335ལས་བརྒལ་བ་རེད།འབྲུ་འདེབས་ཞིང་པར་ཁ་གསབ་བྱེད་པའི་ལམ་ལུགས་དང་ཐོན་ཁུལ་གཙོ་བོའི་ཁེ་ཕན་གསབ་པའི་རྐྱེན་སྲོལ་བཙུགས་པས།ཞིང་པའི་ཐོན་སྐྱེད་ཁ་གསབ་མ་དངུལ་ན་ནིང་སྒོར་དུང་ཕྱུར1226ཟིན་པ་རེད།འབྲུ་རིགས་སྣ་ཁ་གཙོ་བོ་ཉོ་སྒྲུབ་བྱེད་པར་རིན་གོང་དམའ་ཤོས་དང་སྐབས་འཕྲལ་ཉོ་སྒྲུབ་གསོག་འཇོག་བྱེད་པའི་སྲིད་ཇུས་ལག་ལེན་བསྟར་བ།གྲོ་དང་།འབྲས་ཉོ་སྒྲུབ་བྱེད་པའི་རིན་གོང་དམའ་ཤོས་བརྒྱ་ཆ25ནས་བརྒྱ་ཆ40སྤར་བ་དང་།རྨོ་ཞིང་སྲུང་སྐྱོང་ནན་པོར་བྱས་ཡོད།ཞིང་ལས་ཚན་རྩལ་ཡར་ཐོན་ཡོང་བར་སྐུལ་སྤེལ་གང་ཐུབ་བྱས་ཡོད།འབྲུ་རིགས་ཐོན་འབོར་ལོ་རྒྱུས་ཐོག་བསྟུད་མར་མཐོ་ཤོས་སུ་སླེབས་པ་དང་།ན་ནིང་རྒྱ་མ་དུང་ཕྱུར་ཁྲི1.09ཟིན་ཏེ་བསྟུད་མར་ལོ7རིང་ཐོན་འཕར་བྱུང་བ་རེད།ཞིང་པ་མི་རེར་ཡོང་འབབ་ཁེར་གཙང་སྒོར་5919བྱུང་སྟེ་བསྟུད་མར་འཕར་སྣོན་མགྱོགས་ཙམ་བྱུང་བ་རེད།གྲོང་གསེབ་ཕྱོགས་བསྡུས་ཀྱིས་བསྒྱུར་བཅོས་བརྟན་པོའི་ངང་ནས་བྱས་པ་དང་།ཐུན་མོང་གི་ནགས་དབང་ལམ་ལུགས་བསྒྱུར་བཅོས།རྒྱལ་ཁབ་ལ་དབང་བའི་ཞིང་ར་དོ་དམ་བྱེད་པའི་སྒྲིག་སྲོལ་ཁྱོན་ཡོངས་ནས་བསྒྱུར་བཅོས་བྱས་པ་ཡིན།ཞིང་ལས་དང་གྲོང་གསེབ་ཀྱི་རྨང་གཞིའི་སྒྲིག་བཀོད་འཛུགས་སྐྱོང་ཇེ་མགྱོགས་སུ་གཏོང་ཞིང་།ཆུ་མཛོད་ཆེ་འབྲིང་དང་ཆུང་གྲས་གཙོ་བོ7356ཉེན་སེལ་ཇེ་བརྟན་དུ་བཏང་བ་དང་།གྲོང་གསེབ་ཀྱི་མི་འབོར་དུང་ཕྱུར་2.15ཡི་འཐུང་ཆུ་ཉེན་མེད་ཡོང་བར་བྱས་པས།ཞིང་པའི་འཚོ་བ་ཇེ་ལེགས་སུ་སོང་བ་དང་།གྲོང་གསེབ་འཕེལ་རྒྱས་གཏོང་བའི་དུས་རིམ་གསར་པར་སླེབས་པ་རེད།
     （གསུམ།）དཔལ་འབྱོར་གྲུབ་ཚུལ་ལེགས་སྒྲིག་བྱེད་པར་སྐུལ་སྤེལ་ཤུགས་ཆེན་བཏང་བ་དང་།དཔལ་འབྱོར་འཕེལ་བའི་སྤུས་ཚད་དང་ཕན་འབྲས་ཆེ་རུ་བཏང་ཡོད།གཅིག་ནས་ཐོན་ལས་ཀྱི་གྲུབ་ཚུལ་ལེགས་སྒྲིག་དང་རང་བརྟེན་གསར་གཏོད་ཇེ་མགྱོགས་སུ་བཏང་ཡོད།ཁེ་ལས་ཀྱི་ལག་རྩལ་བསྒྱུར་བཀོད་དང་ཟླ་སྒྲིལ་བསྐྱར་སྒྲིག་བྱ་རྒྱུར་སྐུལ་སྤེལ་ཤུགས་ཆེན་བཏང་བ་དང་།བཟོ་ལས་དང་ལྷག་པར་དུ་སྒྲིག་ཆས་བཟོ་སྐྲུན་ལས་རིགས་སྤྱི་ཡོངས་ཀྱི་ཆུ་ཚད་དང་འགྲན་ནུས་མངོན་གསལ་ཆེ་རུ་ཕྱིན་ཡོད།འཐབ་ཇུས་དང་ལྡན་པའི་གསར་དར་ཐོན་ལས་འཚར་ལོངས་མགྱོགས་པོ་བྱུང་ཡོད།རྒྱལ་ཁབ་ལ་དབང་བའི་གསར་གཏོད་མ་ལག་འཛུགས་སྐྱོང་མགྱོགས་སུ་བཏང་བ་དང་།ཤེས་བྱ་གསར་གཏོད་ཀྱི་ལས་གཞི་དང་ལག་རྩལ་གསར་གཏོད་ཀྱི་ལས་གཞི་ལག་བསྟར་བྱས་ཏེ་ཐོན་ལས་འཕེལ་རྒྱས་གཏོང་བར་མཁོ་བའི་མདུན་གྲལ་ལག་རྩལ་དང་།ལྟེ་བའི་ལག་རྩལ།འགག་རྩའི་སྒྲིག་ཆས་ལག་རྩལ་བཅས་པ་ཁག་ཅིག་འགག་སྒྲོལ་བྱུང་བ་དང་།ཚན་ཞིབ་ཀྱི་གྲུབ་འབྲས་འབོར་ཆེན་ཞིག་ཐོན་ལས་ཅན་དུ་གྱུར་པ་དང་།ཞབས་ཞུའི་ལས་རིགས་འཕེལ་རྒྱས་མགྱོགས་པོ་བྱུང་སྟེ་རྒྱལ་ནང་གི་ཐོན་སྐྱེད་རིན་ཐང་བསྡོམས་འབོར་ནང་གི་བསྡུར་ཚད་ཟིན་གྲངས་བརྒྱ་ཆའི་གྲངས2.5འཕར་ཡོད།རྨང་གཞིའི་སྒྲིག་བཀོད་འཛུགས་སྐྱོང་མངོན་གསལ་མགྱོགས་སུ་ཕྱིན་པ་ཡོད།ལོ་ལྔའི་ནང་ལྕགས་ལམ་གསར་པ་སྤྱི་ལེ་ཁྲི1.6བཟོས་པ་དང་།གཞུང་ལམ་སྤྱི་ལེ་ཁྲི63.9གསར་བཟོ་བྱས་པ་དེའི་ནང་མྱུར་བགྲོད་གཞུང་ལམ་སྤྱི་ལེ་ཁྲི་3.3ཟིན་ཡོད།ནམ་གྲུ་ཐང33གསར་བཟོ་རྒྱས་སྐྲུན་བྱས་ཡོད།ཆུ་རགས་སྤྱི་ལེ་ཁྲི1.7གསར་རྒྱག་དང་ཇེ་བརྟན་དུ་བཏང་ཡོད།གཉིས་ནས་ནུས་སྲི་སྙིགས་འཕྲི་དང་།སྐྱེ་ཁམས་འཛུགས་སྐྱོང་།ཁོར་ཡུག་སྲུང་སྐྱོང་བཅས་བརྟན་པོའི་ངང་ནས་སྤེལ་ཡོད།2020ལོ་བར་རང་རྒྱལ་གྱིས་དྲོད་ཁང་རླངས་གཟུགས་འབུད་ཚད་ཚོད་འཛིན་པའི་དམིགས་ཚད་དང་སྲིད་ཇུས་ཀྱི་བྱེད་ཐབས་བཏོན་པ་དང་།ནུས་སྲི་སྙིགས་འཕྲིའི་ཕྱོགས་བསྡུས་ཀྱི་ལས་དོན་འཆར་གཞི་ལག་བསྟར་བྱ་རྒྱུའི་གཏན་འབེབས་བྱས་ཡོད།ནུས་ཁུངས་གཙང་མ་འཕེལ་རྒྱས་ཤུགས་ཆེན་བཏང་བ་དང་།གློག་འདོན་འཕྲུལ་འཁོར་གྱི་གློག་འདོན་ཚད་སྟོང་ཝ་དུང་ཕྱུར་4.45འཕར་བ་དེའི་ནང་ཆུ་གློག་སྟོང་ཝ་ཁྲི9601ཟིན་པ་དང་།ཉིང་རྡུང་གློག་སྟོང་ཝ་ཁྲི384ཟིན་པ།མེ་ཤུགས་གློག་འདོན་འཁོར་ཚན་སྟོང་ཝ་ཁྲི7210སྒོ་བརྒྱབ་པ།རྡོ་སོལ་དང་།ངར་ལྕགས་བཙོ་སྦྱང་།ཨར་འདམ།བསྲེགས་སོལ་བཅས་ཀྱི་ཐོན་ནུས་ཁག་ཅིག་དོར་ཡོད།ནགས་ལས་སྐྱེ་ཁམས་ཀྱི་ལས་གཞི་གཙོ་བོར་སྐུལ་སྤེལ་བཏང་ནས་ཤིང་འཛུགས་སྤྱི་ཆིང་ཁྲི2529བྱས་ཡོད།ས་ཆུ་ཤོར་ཁྱོན་སྤྱི་ལེ་གྲུ་བཞི་མ་ཁྲི23ཕྱོགས་བསྡུས་ཀྱིས་བཅོས་སྐྱོང་བྱས་པ་དང་།ཆུའི་འབབ་རྒྱུད་གཙོ་བོའི་སྦགས་བཙོག་འགོག་བཅོས་དང་མཁའ་རླུང་གི་སྦགས་བཙོག་འགོག་བཅོས།བཟོ་ལས་ཀྱི་“སྙིགས་རོ་གསུམ”བཅོས་སྐྱོང་བཅས་བྱེད་པར་ཤུགས་སྣོན་བརྒྱབ་ཡོད།རྒྱུན་འཁོར་དཔལ་འབྱོར་འཕེལ་རྒྱས་ཤུགས་ཆེན་བཏང་ཡོད།ལོ་ལྔའི་རིང་རིམ་བསགས་བྱས་པ་ལྟར་ན།ཚན་པ་རེའི་རྒྱལ་ནང་ཐོན་སྐྱེད་རིན་ཐང་བསྡོམས་འབོར་གྱི་ནུས་ཁུངས་ཟད་ཚད་བརྒྱ་ཆ་19.1ཆག་པ་དང་།རྫས་འགྱུར་དབྱང་མཁོ་ཚད་དང་།དབྱང་གཉིས་ཐན་འགྱུར་འབུད་ཚད་སོ་སོར་བརྒྱ་ཆ12.45དང་བརྒྱ་ཆ་14.29ཆག་ཡོད།གསུམ་ནས་ཁུལ་ཁོངས་ཀྱི་དཔལ་འབྱོར་མཐུན་སྦྱོར་ངང་འཕེལ་རྒྱས་གཏོང་བར་སྐུལ་སྤེལ་བཏང་ཡོད།ས་ཁོངས་འཕེལ་རྒྱས་གཏོང་བའི་སྤྱི་ཡོངས་ཀྱི་འཐབ་ཇུས་དོན་འཁྱོལ་དང་།རྒྱལ་ཡོངས་ཀྱི་གཙོ་ནུས་ཐོན་ཁུལ་གྱི་འཆར་འགོད་ཡོངས་བསྒྲགས་དོན་འཁྱོལ།ནུབ་རྒྱུད་གསར་སྤེལ་ཆེན་པོའི་ལོ་གསར་པ་བཅུའི་སློབ་སྟོན་གྱི་དགོངས་འཆར་དང་ས་ཁོངས་འཕེལ་རྒྱས་གཏོང་བའི་འཆར་འགོད་རབ་དང་རིམ་པ་གཏན་ལ་ཕལ་པ།བོད་ལྗོངས་དང་ཞིང་ཆེན་བཞིའི་བོད་ཁུལ།ཞིན་ཅང་སོགས་མི་རིགས་ས་ཁུལ་མཆོང་སྐྱོད་ལྟ་བུའི་གོང་འཕེལ་ཡོང་བའི་བྱེད་ཐབས་གསར་པ་སྤྱོད་ཡོད།དབུས་ནུབ་ཁུལ་དང་ཤར་བྱང་ས་ཁུལ་འཕེལ་རྒྱས་མགྱོགས་སུ་བཏང་བས།དཔལ་འབྱོར་གྱི་དམིགས་ཚད་གཙོ་བོ་སྤེལ་བའི་མྱུར་ཚད་རྒྱལ་ཡོངས་ཀྱི་ཆ་སྙོམས་ཆུ་ཚད་ལས་བརྒལ་བ་དང་།ཤར་རྒྱུར་ཁུལ་གྱི་དཔལ་འབྱོར་གྲུབ་ཚུལ་རྒྱུན་མ་ཆད་པར་ཇེ་བཟང་དུ་སོང་བ་དང་།རང་བརྟེན་གསར་གཏོད་དང་འགྲན་ནུས་རིམ་བཞིན་ཆེ་རུ་ཕྱིན་ཞིང་།ས་ཁུལ་བར་གྱི་མ་མཐའི་སྤྱི་པའི་ཞབས་ཞུའི་ཁྱད་པར་ཇེ་ཆུང་དུ་སོང་སྟེ་ཁྱད་ཆོས་སྣ་ཚོགས་ལྡན་པའི་ས་ཁོངས་འཕེལ་རྒྱས་འགྲོ་ཚུལ་རིམ་བཞིན་ཆགས་པ་རེད།