ཟླ་གསུམ་པའི་ཚེས་གཅིག་ཉིན་ནས་བཟུང་། མཚོ་སྔོན་ཞིང་ཆེན་ཡུས་ཧྲུའུ་ས་འགུལ་གནོད་ཐེབས་ས་ཁུལ་གྱི་སློབ་གྲྭ་རྣམས་ཀྱིས་སྔ་གཞུག་ཏུ་རིམ་བཞིན་སློབ་འགོ་བརྩམས། ཟླ་གསུམ་པའི་ཚེས་བརྒྱད་ཉིན། ཁུལ་ཡོངས་ཀྱི་སློབ་གྲྭ་བརྒྱ་དང་དོན་བརྒྱད་ཚང་མས་སློབ་འགོ་བརྩམས་པ་དང་། དེའི་ནང་དུ་ས་འགུལ་སྐབས་སུ་གནོད་འཚེ་ཚབས་ཆེན་ཐེབས་པའི་སྐྱེ་རྒུ་གྲོང་བརྡལ་འདུ་བའི་ཁུལ་ཡོངས་ཀྱི་སློབ་གྲྭའི་སློབ་ཁྲིད་སྒྲིག་ལམ་བདེ་བླག་རེད།
དཔྱིད་དུས་ཀྱི་སློབ་འགོ་རྒྱུན་ལྡན་དང་བརྟན་འཇགས་ངང་རྩོམ་པའི་བྱ་བར་འགན་སྲུང་བྱེད་ཆེད། ཡུས་ཧྲུའུ་ཁུལ་གྱིས་འབྲེལ་ཡོད་བྱ་བར་ནན་ཏན་སྒོས་བཀོད་སྒྲིག་བྱས། ཡུས་ཧྲུའུ་ཁུལ་གྱིས་མཚོ་སྔོན་ཞིང་ཆེན་ཏང་ཨུའི་སློབ་གསོ་བྱ་བའི་ཨུ་ཡོན་ལྷན་ཁང་དང་། ཞིང་ཆེན་སློབ་གསོ་ཐིན་གྱི་རེ་བ་ལྟར། «2011ལོའི་དཔྱིད་དུས་ཀྱི་སློབ་འགོ་རྩོམ་པའི་བྱ་བའི་བརྡ་ཐོ»བཏང་སྟེ་སློབ་འགོ་རྩོམ་པའི་བྱ་བར་སྔ་མོ་ནས་བཀོད་སྒྲིག་བྱས། ཟླ་གསུམ་པའི་ཚེས་གཅིག་ཉིན། ཡུས་ཧྲུའུ་ཁུལ་སློབ་གསོ་ཅུའུ་ཡིས་ཁུལ་དེའི་རྫོང་སོ་སོའི་སློབ་གསོ་ཅུའུ་ཡི་ཅུའུ་ཀྲང་རྩ་འཛུགས་བྱས་ནས་ད་ལོའི་དཔྱིད་དུས་ཀྱི་སློབ་འགོ་རྩོམ་པའི་བྱ་བ་དང་སློབ་གྲྭའི་བརྟན་འཇགས་བྱ་བའི་ཕྱོགས་ཀྱི་གྲོས་ཚོགས་བསྡུས་ཏེ་སྔར་ལས་ལྷག་པའི་སྒོ་ནས་བརྟན་འཇགས་བྱ་བའི་འགན་ཁུར་ལམ་ལུགས་འཐུས་ཚང་དུ་གཏོང་པ་དང་། སློབ་མའི་བསམ་བློའི་ཀུན་སྤྱོད་སློབ་གསོར་ཤུགས་སྣོན་པ། མི་རིགས་ཆོས་ལུགས་སྲིད་ཇུས་སྐོར་གྱི་སློབ་གསོ་དང་། མཚོ་སྔོན་ཞིང་ཆེན་གྱི་གནས་ཚུལ་སྐོར་གྱི་སློབ་གསོ། མེས་རྒྱལ་གྱི་ངེས་ཟིན་ཇེ་མཐོར་གཏོང་བ། ཁྲིམས་ལུགས་ཀྱི་འདུ་ཤེས་ཇེ་དྲག་ཏུ་གཏོང་བ་སོགས་ཀྱི་བྱ་བ་བཀོད་སྒྲིག་བྱས།