ཟླ་བཅུ་གཉིས་པའི་ཚེས་དྲུག་ཉིན་ཚོགས་པའི་ཡུས་ཧྲུའུ་ས་འགུལ་གནོད་འཚེའི་རྗེས་ཀྱི་བསྐྱར་འཛུགས་ལས་གཞིའི་འཆར་འགོད་བྱ་བའི་གྲོས་ཚོགས་ཚོགས་པ་དང་བསྟུན་ནས་ཡུས་ཧྲུའུ་ཡི་ད་ལོའི་དགུན་ཁ་དང་སང་ལོའི་དཔྱིད་ཀའི་གནོད་འཚེའི་རྗེས་ཀྱི་བསྐྱར་འཛུགས་ལས་གཞི་ལ་འཆར་འགོད་དང་ཇུས་འགོད་ཆེན་པོ་བྱེད་མགོ་བརྩམས།
  མཚོ་སྔོན་ཞིང་ཆེན་སྡོད་ཁང་མཁར་གྲོང་འཛུགས་སྐྲུན་ཐིན་དང་འཕེལ་རྒྱས་བཅོས་བསྒྱུར་ཨུ་ཡོན་ལྷན་ཁང་སོགས་སྡེ་ཁག་མང་པོ་དང་ཡུས་ཧྲུའུ་ས་ཁུལ་གྱི་འབྲེལ་ཡོད་ལས་ཁུངས་སོ་སོ། ཞིང་ཆེན་ཕྱི་ནང་ནས་ཡོང་པའི་རོགས་སྐྲུན་ལས་ཁུངས་བརྒྱ་ལྷག་དང་འཆར་འགོད་ཇུས་འགོད་ལས་ཁུངས་བཅས་བྱ་བར་ཞུགས། ལས་གཞི་ཆེན་པོ་སུམ་བརྒྱ་དང་ཉི་ཤུའི་འཆར་འགོད་ཇུས་འགོད་ལས་འགན་དེ་སང་ལོའི་ཟླ་གསུམ་པའི་ཟླ་མཇུག་གི་སྔོན་ལ་ཕྱོགས་ཡོངས་ནས་ལེགས་འགྲུབ་བྱས་ཏེ་སང་ལོའི་ཟླ་བཞི་བར་ཡུས་ཧྲུའུ་གནོད་འཚེའི་རྗེས་ཀྱི་བསྐྱར་འཛུགས་བྱ་བའི་མཐོ་རླབས་ཤིག་འཕྱུར་བར་བྱེད་པར་འགན་སྲུང་བྱེད་རྒྱུ་རེད།
  སང་ལོ་ནི་ཡུས་ཧྲུའུ་གནོད་འཚེའི་རྗེས་ཀྱི་བསྐྱར་འཛུགས་བྱ་བའི་གནད་འགག་གི་ལོ་ཞིག་ཡིན་ལ། ལོ་གསུམ་གྱི་བསྐྱར་འཛུགས་དམིགས་ཡུལ་ཕྱོགས་ཡོངས་ནས་ལེགས་འགྲུབ་བྱེད་པར་གལ་འགངས་ཧ་ཅང་ཆེ། ལས་གཞི་ལ་འཆར་འགོད་ཇུས་འགོད་བྱེད་པའི་རྨང་གཞི་རང་བཞིན་གྱི་བྱ་བ་དེ་ལེགས་པོར་སྒྲུབ་ཆེད། ད་ལོའི་ཟླ་བཅུ་གཅིག་པའི་ཚེས་བཅུ་གཅིག་ཉིན། མཚོ་སྔོན་ཞིང་ཆེན་ས་འགུལ་གནོད་འཚེའི་རྗེས་ཀྱི་བསྐྱར་འཛུགས་ཡུལ་དངོས་བཀོད་འདོམས་པུའུ་ཡིས་གྲོས་ཚོགས་བསྡུས་ཏེ་ད་ལོའི་དགུན་ཁ་དང་སང་ལོའི་དཔྱིད་ཀའི་གནོད་འཚེའི་རྗེས་ཀྱི་ལས་གཞི་ལ་འཆར་འགོད་ཇུས་འགོད་བྱེད་པའི་བྱ་བར་ཆེད་དུ་བཀོད་སྒྲིག་བྱས་པ་མ་ཟད། གནོད་འཚེའི་རྗེས་ཀྱི་བསྐྱར་འཛུགས་ལས་གཞི་ལ་འཆར་འགོད་ཇུས་འགོད་ཆེན་པོ་བྱེད་དགོས་པའི་རེ་བ་བཏོན།བཀོད་སྒྲིག་བྱས་པ་ལྟར་ན། ལས་གཞི་ཆེན་པོ་སུམ་བརྒྱ་དང་ཉི་ཤུའི་ཁྲོད་དུ་སྐྱེ་རྒུ་གྲོང་བརྡལ་ལ་ལས་གཞི་བརྒྱ་དང་སོ་བདུན་ཡོད་པ་དང་། སྐྱེ་རྒུ་གྲོང་བརྡལ་ལས་གཞན་པའི་ཞང་དང་སྡེ་བ་སོགས་ལ་ལས་གཞི་བརྒྱ་དང་གྱ་གསུམ་ཡོད།