ད་ལོའི་གནམ་ལོ་གསར་ཚེས་ནས་བཟུང་། རང་ཁུལ་གྱི་ས་ཁུལ་ཕལ་ཆེར་ལ་མངོན་གསལ་དུ་ཆར་ཆུ་དང་ཁ་བ་འབབ་མེད་སྟབས་གནམ་གཤིས་ཧ་ཅང་སྐམ་ཚད་ཆེ་ནས་ནགས་ཚལ་མེ་སྐྱོན་གྱི་གནས་ཚུལ་བྱུང་སླ་བ་རེད།དེར་བརྟེན་ཉེ་ཆར་རང་ཁུལ་གྱིས་བྱེད་ཐབས་ལྔ་སྤྱད་ནས་མིག་སྔའི་ནགས་ཚལ་མེ་འགོག་གི་ལས་ཀ་ཏན་ཏིག་བསྒྲུབས་པ་རེད།
     ཏང་སྲིད་གཉིས་ཀྱི་འགོ་ཁྲིད་གཙོ་བོས་སྐུ་དངོས་སུ་ལྟ་སྐུལ་ཞིབ་བཤེར་བྱས།ཁུལ་ཨུ་དང་ཁུལ་སྲིད་གཞུང་གི་འགོ་ཁྲིད་གཙོ་བོས་སྔོན་རྗེས་སུ་ནགས་ཚལ་མེ་འགོག་བཀོད་འདོམས་ལྟེ་གནས་དང་རྫོང་སོ་སོའི་ནགས་ཚལ་མེ་འགོག་གི་རེས་སྐོར་ལས་ཀ་སྒྲུབ་ཚུལ་ལ་སྐུ་དངོས་སུ་ལྟ་སྐོར་དང་འཐེན་ཞིབ་ཐེངས་མང་བྱས་ནས། རིམ་པ་ཁག་གི་ནགས་ཚལ་མེ་འགོག་ལས་ཁུངས་དང་ནགས་ལས་གཙོ་གཉེར་སྡེ་ཁག་ལ་ལས་ཀ་ཡག་པོ་སྒྲུབ་རྒྱུའི་ཐད་ནུས་ཤུགས་འདོན་དགོས་པ་དང་།དཀའ་སྤྱད་སྙིང་རུས་དང་། ལུས་སྲོག་བློས་གཏོང་བ། ལེགས་སྐྱེས་སུ་འབུལ་ཕོད་པའི་ནགས་ཚལ་གྱི་སྐུ་སྲུང་པ་ཞིག་བྱེད་པའི་སྙིང་སྟོབས་རྒྱུན་འཁྱོངས་བྱས་ནས། ཤང་དང་།གྲོང་ཚོ།དུད་ཚང་གི་ཁྱིམ་ནང་སོགས་ལ་ཕྱིན་ནས་མེ་སྐྱོན་ཚོད་འཛིན་གྱི་ལས་ཀ་སྤེལ་ནས་ཁུལ་ཡོངས་སུ་སྐྱེ་ཁམས་ཉེན་མེད་ཡོང་བར་ཁག་ཐེག་བྱེད་དགོས་པའི་བླང་བྱ་བཏོན་ཡོད།རྫོང་སོ་སོའི་ཤང་ཏང་ཨུ་དང་སྲིད་གཞུང་གི་འགོ་ཁྲིད་གཙོ་བོས་ཁུལ་ཨུ་དང་ཁུལ་སྲིད་གཞུང་།ཁུལ་ནགས་ཚལ་མེ་འགོག་བཀོད་འདོམས་པུའུ་ཡི་བཀོད་སྒྲིག་ལྟར། དོན་འཁྱོལ་དང་། ལྟ་ཞིབ། ལེགས་བཅོས།ཐག་གཅོད་བཅས་བྱ་རྒྱུ་དམ་འཛིན་བྱས་ནས།རིམ་པ་རེ་རེས་དམ་འཛིན་དང་དོན་འཁྱོལ་བྱེད་པའི་ནགས་ཚལ་མེ་འགོག་གི་ལས་ཀའི་རྣམ་པ་ཆགས་ཡོད།ནགས་ཚལ་མེ་འགོག་གི་ལས་ཀར་འགོ་ཁྲིད་ཀྱིས་ས་ཁུལ་གྱི་འགན་འཁྲིའི་ལམ་ལུགས་ལག་བསྟར་བྱས། ཁུལ་ནགས་ལས་ཅུས་ཀྱི་རྫོང་རིམ་པའི་འགོ་ཁྲིད་ལ་འགན་འཁྲིའི་ས་ཁུལ་དབྱེ་མཚམས་གཅོད་པའི་བྱེད་ཐབས་སྤྱད་ནས།རྫོང་སོ་སོའི་དོ་དམ་ཅུས།ཁུལ་ཁོངས་གཏོགས་ནགས་ལས་ཁེ་ལས་དོན་ལས་སྡེ་ཚན་གྱིས་ནགས་ཚལ་མེ་འགོག་གི་ལས་ཀར་འགན་གཙང་ལེན་བྱས་པ་རེད།
    ནགས་ལས་ལས་བཟོ་མི་སྣའི་གུང་གསེང་དུས་ཚོད་མེད་པ་བྱས་ཏེ་ལས་རྐང་བརྟན་སྲུང་བྱས།ཁུལ་ཡོངས་ཀྱི་ནགས་ལས་མ་ལག་གི་ལས་བྱེད་པ་དང་ལས་བཟོ་ཡོངས་རྫོགས་ཀྱི་དཔྱིད་གསར་དུས་ཆེན་དང་བོད་ལོ་གསར་གྱི་གུང་གསེང་དུས་ཚོད་མེད་པ་བཟོས་ནས་རྒྱུན་ལྡན་ལྟར་ལས་དོན་བསྒྲུབས་པ་དང་ལས་རྐང་བརྟན་སྲུང་བྱས་ནས་ནགས་ཚལ་མེ་འགོག་གི་ལས་ཀ་སྒྲུབ་གང་ཐུབ་བྱས་པ་རེད།
      དོན་དངོས་དང་འབྲེལ་ནས་མེ་འགོག་ལས་ཀར་ཞིབ་འཇུག་ཐག་གཅོད་དང་བཀོད་སྒྲིག་ཡང་ཡང་བྱས། ཁུལ་ནགས་ལས་ཅུས་དང་ཁུལ་ནགས་ཚལ་མེ་འགོག་བཀོད་འདོམས་པུའུ་ཡིས་ཆེད་དོན་ཞིབ་འཇུག་ཐག་གཅོད་ཀྱི་གྲོས་ཚོགས་ཐེངས་མང་འཚོགས་པར་མ་ཟད་ནགས་ཚལ་མེ་འགོག་གི་ལས་ཀ་བཀོད་སྒྲིག་བྱས་པ་དང་། སྔར་ལྷག་གིས་མིག་སྔའི་ནགས་ཚལ་མེ་འགོག་གི་ལས་ཀ་ཡག་པོ་སྒྲུབ་ཆེད་བྲེལ་མྱུར་གྱི་བཀོད་སྒྲིག་བྱས་ནས། ས་གནས་ཁག་ལ་འགན་འཁྲི་དོན་འཁྱོལ་དང་། མེ་སྐྱོན་སྔོན་འགོག དྲིལ་བསྒྲགས་དང་སློབ་གསོ། མེ་སྐྱོན་ཐག་གཅོད། བབ་བསྟུན་ལས་རེས་གཏན་སྲུང། དངོས་ཟོག་འགན་ལེན་བྱ་རྒྱུ་སོགས་ཀྱི་ལས་ཀར་ཤུགས་སྣོན་རྒྱག་དགོས་པའི་རེ་བ་བཏོན་པ་རེད།
    ཡོངས་ཁྱབ་ཏུ་ནུས་ཤུགས་སྐུལ་སློབ་བྱས་ཏེ་ཕྱོགས་ཡོངས་ནས་མེ་སྐྱོན་འགོག་སྲུང་ནན་པོ་བྱས། གཙོ་གནད་ནགས་ཁུལ་གྱི་ཤང་དང་༼གྲོང་རྡལ་༽སོ་སོས་རྣམ་གྲངས་གཉིས་ཀྱི་ལམ་ལུགས་ལག་བསྟར་བྱ་རྒྱུ་རྒྱུན་འཁྱོངས་བྱེད་པ་དང་།ནགས་སྲུང་མི་སྣ་དང་འགན་འཁྲི་ཁུར་མཁན་དུད་ཚང་གིས་ངེས་ཅན་དང་ངེས་མེད་ཀྱིས་དུས་ཚོད་ཐོག་འགན་འཁྲིའི་ས་ཁུལ་དུ་ལྟ་སྐོར་དང་སྲུང་སྐྱོང་བྱས་པ་དང་། ནགས་ཚལ་ཉེན་རྟོག་དཔུང་སྡེ་དང་རྫོང་སོ་སོའི་ནགས་ཚལ་མེ་འགོག་ཆེད་ལས་དཔུང་སྡེ་སྔོན་དུ་བཅའ་སྡོད་བྱེད་པ་དང་ནམ་ཡིན་ཡང་བཀའ་སྒུག་པ།ཤང་དང་༼གྲོང་རྡལ་༽སོ་སོས་ནུས་ཤུགས་སྒྲིག་འཛུགས་བྱས་ཏེ་ནགས་ཁུལ་དང་རི་ལ་ཁྲིམས་དང་འགལ་ནས་མེ་སྤྱོད་པའི་བྱ་སྤྱོད་ལ་ཞིབ་བཤེར་དང་གཏན་འགོག་བྱས།ནགས་ལས་ལས་བྱེད་པ་དང་ལས་བཟོ།ནགས་ཚལ་མེ་འགོག་གི་ཆེད་ལས་དཔུང་སྡེ། མེ་འགོག་དཔོན་དམག དྲག་ཆས་ཉེན་རྟོག་དཔུང་སྡེའི་དཔོན་དམག་གཙོ་བོས་དུར་མཆོད་ཀྱི་ཤོག་བུ་སྲེག་ས་དང་ཚོན་ཁྲ་ཅན་གྱི་ཤོག་སྦག་སྦར་སའི་ས་ཁུལ་གཙོ་བོ་རུ་ཕྱིན་ནས་མེ་སྐྱོན་ནན་འགོག་བྱས་པ།ཁུལ་དང་རྫོང་གི་ནགས་ཚལ་མེ་འགོག་ལས་ཁུངས་ཀྱིས་འགོ་ཁྲིད་ཀྱིས་སྣེ་ཁྲིད་མཁན་བྱེད་པ་དང་ཆུ་ཚོད་24ལ་ལས་རེས་བྱེད་པའི་ལམ་ལུགས་རྒྱུན་འཁྱོངས་བྱས་པ།ཚན་རིག་དང་མཐུན་པའི་སྒོས་བཀོད་སྒྲིག་དང་རིམ་པ་རེ་རེ་བཞིན་འགོག་སྲུང་བྱས་པས་ཕན་ནུས་ལྡན་པའི་སྒོས་ནགས་ཚལ་མེ་སྐྱོན་བྱུང་བར་བཀག་སྡོམ་བྱས་པ་རེད།