དུང་ཁྲག 2020-03-03
གངས་རི་ཤེལ་དཀར་འདྲ་བོའི་དྭངས་གཙང་ཡོད།།
གངས་སེང་གཡུ་རལ་ཅན་པོའི་སྙིང་སྟོབས་ཡོད།།
གངས་ཕྲུག་ས་ཡ་དྲུག་གི་རྒྱབ་བརྟེན་ཡོད།།
གངས་ལྗོངས་རྟའུའི་སྤུན་ཟླ་སེམས་མ་ཕམ།།
ཕྱི་མཛེས་རྣམ་དག་ལྷ་ཡི་དགའ་ཚལ་ཡིན།།
ནང་མཛེས་བྱམས་བརྩེ་དྭངས་མའི་དྲི་བསུང་འཐུལ།།
ནང་སེམས་བག་ཕེབས་གནས་པའི་དམ་ཆོས་ཡོད།།
ཕྱི་ཡི་བར་ཆད་འགོག་པའི་སྤུན་ཟླ་ཡོད།།
མུན་ནག་ཀླུང་གི་ཆུ་ཤེལ་དཀྱིལ་འཁོར་ཡིན།།
གྲང་ངར་གསེབ་གྱི་མེ་ཕུང་གསོན་པོ་ཡིན།།
ནད་དུག་མདུན་གྱི་དཔའ་བོ་ཁེར་རྒྱུག་ཡིན།།
རྟའུའི་སྤུན་ཟླ་ཁྱེད་ལས་དཔའ་བ་མེད།།
མེས་པོ་གཅིག་གི་ཤ་རུས་གསོན་པོ་ཡིན།།
ལམ་ཁ་གཅིག་གི་སྐྱིད་སྡུག་ཁུར་རོགས་ཡིན།།
ཤ་དང་རུས་པར་ཐིམ་པའི་བརྩེ་དུང་འདི།།
ཡལ་མེད་གཏན་དུ་གནས་ཡོད་སྙིང་གི་སྤུན།།
སྙན་པའི་ཚིག་ལ་སྙིང་གཏམ་བསྟར་མེད་ཀྱང་།།
སེམས་ཀྱི་གཏིང་ནས་སྨོན་ལམ་བརྒྱབ་ནས་ཡོད།།
རེ་བའི་འོད་སྣང་ཁྱེད་ལ་བསྒྲོན་མེད་རུང་།།
སེམས་ཀྱི་ཟབ་ས་དེ་ན་གཏན་དུ་འཚེར།།
དོ་སྣང་ཆེ་བའི་རྩོམ།
རྩོམ་གསར། 10