ཀྲུང་གོའི་བོད་ཀྱི་དྲ་བའི་འཕྲིན།ཚེས19ཉིན།ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་ཡོངས་ཀྱི་རྩ་འཛུགས་ལས་ཀའི་གྲོས་ཚོགས་ཁུལ་ཨུའི་སྙན་ཞུ་ཁང་དུ་འཚོགས་པ།གྲོས་ཚོགས་འདིའི་ལས་འགན་གཙོ་བོ་ནི།ཀྲུང་དབྱང་དང་ཞིང་ཨུའི་ཏང་གི་འཛུགས་སྐྱོང་དང་རྩ་འཛུགས་ལས་ཀའི་བླང་བྱ་གསར་པ་ལ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་།རང་ཁུལ་གྱི་རྩ་འཛུགས་ལས་ཀར་ཐུག་པའི་གནས་བབ་དང་ལས་འགན་ལ་དབྱེ་ཞིབ་བྱེད་པ།མིག་སྔ་དང་དེང་ཕྱིན་དུས་ཡུན་ཞིག་རིང་རང་ཁུལ་གྱི་ཏང་གི་འཛུགས་སྐྱོང་དང་རྩ་འཛུགས་ལས་ཀའི་འགན་འཁྲི་བཀོད་སྒྲིག་བྱེད་རྒྱུ་དེ་ཡིན།
གྲོས་ཚོགས་ཐོག་བདེ་ཆེན་ཁུལ་གྱི་ཏང་ཨུའི་ཧྲུའུ་ཅི་ཀྲང་ཏིང་ལིའང་གིས་༼རྒྱལ་ཡོངས་དང་ཞིང་ཆེན་ཡོངས་ཀྱི་རྩ་འཛུགས་ལས་ཀའི་གྲོས་ཚོགས་ཀྱི་དགོངས་དོན་ལ་སློབ་སྦྱོང་དང་ལག་བསྟར་གཏིང་ཟབ་བྱས་ནས་བདེ་ཆེན་གྱི་རྩ་འཛུགས་ལས་ཀའི་ཚན་རིག་ཅན་གྱི་ཆུ་ཚད་ཁྱོན་ཡོངས་ནས་མཐོ་རུ་གཏོང་དགོས༽ཞེས་པའི་གསུང་བཤད་གནང་བ་རེད།
བདེ་ཆེན་ཁུལ་གྱི་ཏང་ཨུའི་ཧྲུའུ་ཅི་གཞོན་པ་མ་ཝུན་ལུང་གིས་གྲོས་ཚོགས་གཙོ་སྐྱོང་གནང་བ།ཁུལ་ཨུའི་རྒྱུན་ཨུ།སེམས་ཀྱི་ཉི་ཟླ་རྫོང་ཨུའི་ཧྲུའུ་ཅི་ཡུས་ཧྲིང་ཞང་དང་།ཁུལ་ཨུའི་རྒྱུན་ཨུ།ཁུལ་ཨུའི་དྲུང་ཆེན་ལིའུ་ཅ་ཞུན།ཁུལ་ཨུའི་རྒྱུན་ཨུ།ཁུལ་སྒྲིག་ཁྲིམས་ཨུའི་ཧྲུའུ་ཅི་ཆེ་ཅན་ཞིན།ཁུལ་ཨུའི་རྒྱུན་ཨུ།ཁུལ་ཨུའི་རྩ་འཛུགས་པུའུ་ཡི་པུའུ་ཀྲང་སུའུ་ཡུས།ཁུལ་མི་དམངས་ཞིབ་དཔྱོད་ཁང་གི་ཞིབ་དཔྱོད་འགོ་འཛིན་ལི་ཧྲི་ཆིང་།ཉེན་རྟོག་དྲག་དཔུང་བདེ་ཆེན་ཡན་ལག་རུ་ཁག་གི་ཆབ་སྲིད་ཨུ་ཡོན་དབྱིན་ཧྲུའུ་ལིན་བཅས་གྲོས་ཚོགས་སུ་ཞུགས་པ་རེད།
ཀྲང་ཏིང་ལིའང་གིས་གསུང་བཤད་གནང་དུས་བསྟན་དོན།རྩ་འཛུགས་སྡེ་ཁག་གིས་ཏང་གི་འཛུགས་སྐྱོང་ཁྲོད་དུ་ལས་བྱེད་རུ་ཁག་གི་འཛུགས་སྐྱོང་ལ་ཤུགས་སྣོན་རྒྱག་པ་དང་གཞི་རིམ་རྩ་འཛུགས་འཛུགས་སྐྱོང་དང་ཤེས་ལྡན་མི་སྣ་གསོ་སྐྱོང་བྱེད་པའི་གལ་ཆེའི་ལས་འགན་འཁུར་གྱིན་ཡོད་དེ།རྩ་འཛུགས་ལས་ཀ་ཡག་པོ་སྒྲུབ་རྒྱུ་དེ་ཁུལ་ཡོངས་ཀྱི་བྱ་གཞག་ཁག་གི་འཕེལ་རྒྱས་ལ་སྐུལ་འདེད་གཏོང་བ་དང་འབྱོར་འབྲིང་སྤྱི་ཚོགས་མངོན་འགྱུར་ཡོང་བའི་རྨང་གཞི་དང་ཁག་ཐེག་ཡིན།
ཀྲང་ཏིང་ལིའང་གིས་བླང་བྱ་བཏོན་དོན།ཁུལ་ཡོངས་ཀྱི་རིམ་པ་ཁག་དང་སྡེ་ཁག་སོ་སོ་ཡིས་མུ་མཐུད་དུ་རང་ཉིད་ཀྱི་འཛུགས་སྐྱོང་དྲག་ཏུ་བཏང་ནས་ཆབ་སྲིད་ལ་དོ་སྣང་དང་སྤྱི་པའི་ཀུན་སྤྱོད་ལ་བརྩི་མཐོང་།ལས་སྒོ་བྱང་ཆུབ་ལ་སྤྱོད་ཚུལ་ལེགས་པ་བཅས་བྱས་ནས།མུ་མཐུད་དུ་ལས་ཀའི་ཚན་རིག་ཅན་གྱི་ཆུ་ཚོད་མཐོ་རུ་གཏོང་དགོས།གཅིག་ནི་ཆབ་སྲིད་བརྟན་པོའི་ཚད་གཞི་དྲག་ཏུ་གཏོང་དགོས།གཉིས་ནི་གཞུང་དྲང་ཚུལ་ལྡན་གྱི་ལྟེ་བའི་རིན་ཐང་དྲག་ཏུ་གཏོང་དགོས།གསུམ་ནི་ནུས་པ་དང་བྱང་ཚད་ཀྱི་གཞི་རྩའི་བླང་བྱ་དྲག་ཏུ་གཏོང་དགོས།བཞི་ནི་སྤྱོད་ཚུལ་དང་སྒྲིག་ལམ་གྱི་གཞི་རྩའི་ཁག་ཐེག་དྲག་ཏུ་གཏོང་དགོས།
མ་ཝུན་ལུང་གིས་གྲོས་ཚོགས་གཙོ་སྐྱོང་གནང་དུས་བླང་བྱ་བཏོན་དོན།གཅིག་ནི་བསམ་བློ་དང་བྱ་སྤྱོད་དེ་ཁུལ་ཨུའི་བཀོད་སྒྲིག་གི་ཐོག་ཏུ་གཅིག་གྱུར་ཡོང་བ་བྱེད་དགོས་པ་དང་།རྩ་འཛུགས་ལས་ཀའི་དགོས་གཏུག་ཆེ་བའི་འདུ་ཤེས་དང་འགན་འཁྲིའི་འདུ་ཤེས་མཐོ་རུ་གཏོང་དགོས།གཉིས་ནི་གཙོ་བོ་ངེས་གསལ་བྱས་ནས་བསྒྱུར་བཅོས་སྒོ་འབྱེད་ཀྱི་སྙིང་སྟོབས་ལ་བརྟེན་ཏེ་རྩ་འཛུགས་ལས་ཀ་ཁག་མདུན་དུ་སྤེལ་དགོས།གསུམ་ནི་འགན་འཁྲི་ལག་བསྟར་བྱས་ནས་རྩ་འཛུགས་ལས་ཀར་གྲུབ་འབྲས་ཐོབ་པར་ཁག་ཐེག་བྱེད་དགོས།
གྲོས་ཚོགས་ཐོག་ཚོ་ཆུང་དུ་བགོས་ནས་ཀྲང་ཏིང་ལིའང་ཧྲུའུ་ཅིའི་གསུང་བཤད་ལ་གྲོས་བསྡུར་བྱས་པ་རེད།
ཁུལ་ཨུའི་པུའུ་ཨུ་སོ་སོའི་འགན་འཁུར་པ་གཙོ་བོ་དང་ཁུལ་རིམ་པའི་རྒྱལ་ཁབ་ལས་ཁུངས་ཀྱི་ཨུ་དང་གཞུང་ལས་ཁང་།ཅུས་སོ་སོའི་ཏང་རྩ་འཛུགས(ཨུ)།མི་དམངས་ཚོགས་པའི་ཏང་རྩ་འཛུགས།ཁུལ་ཁོངས་གཏོགས་ཁེ་ལས་དང་བྱ་གཞག་སྡེ་ཁག་གི་ཏང་རྩ་འཛུགས(ཨུ)།རྫོང་སོ་སོའི་རྩ་འཛུགས་པུའུ་ཡི་པུའུ་ཀྲང་།ཁུལ་ཨུའི་རྩ་འཛུགས་པུའུ་ཡི་ལས་བྱེད་ལྷན་རྒྱས་བཅས་ཁུལ་ཨུའི་ཚོགས་ར་གཙོ་བོའི་ཚོགས་འདུར་ཞུགས་པ་རེད།རྫོང་སོ་སོའི་ཧྲུའུ་ཅི་དང་ཧྲུའུ་ཅི་གཞོན་པ།རྫོང་ཐད་གཏོགས་སྡེ་ཁག་སོ་སོའི་ཏང་རྩ་འཛུགས་ཀྱི་ཧྲུའུ་ཅི།ཤང་དང་གྲོང་རྡལ་སོ་སོའི་ཏང་ཨུའི་ཧྲུའུ་ཅི།རྩ་འཛུགས་ཨུ་ཡོན།རྫོང་ཨུའི་རྩ་འཛུགས་པུའུ་ཡི་ལས་བྱེད་ལྷན་རྒྱས་དང་།གསར་སྤེལ་ཆུས་ཀྱི་ཏང་ཨུའི་ཧྲུའུ་ཅི་དང་ཏང་ཨུའི་ཧྲུའུ་ཅི་གཞོན་པ།ཐད་གཏོགས་སྡེ་ཁག་སོ་སོའི་ཏང་རྩ་འཛུགས་ཀྱི་ཧྲུའུ་ཅི་བཅས་རྫོང་སོ་སོ་དང་གསར་སྤེལ་ཆུས་ཡན་ལག་ཚོགས་རའི་ཚོགས་འདུར་ཞུགས་པ་རེད།  །