ཀྲུང་གོའི་བོད་ཀྱི་དྲ་བའི་འཕྲིན། མིག་སྔར།　ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླའི་མི་དམངས་སྨན་ཁང་ན་བསྡད་ཡོད་པའི་ས་འགུལ་གྱི་རྨས་མ་ལྗིད་མོ་མི3ལ་གཤགས་བཅོས་བྱས་ནས་སྨན་བཅོས་བྱེད་བཞིན་ཡོད་ལ།　ཚེ་སྲོག་གི་ཉེན་ཁ་ལས་ཐར་ཡོད།
ཟླ9བའི་ཚེས5ཉིན།　ལོ་ན14ཡིན་པའི་དམའ་འབྲིང་ལོ་རིམ་དང་པོའི་སློབ་མ་རྡོ་རྗེ་ལྷ་མོ་གཤགས་བཅོས་བྱས་ནས་སྨན་བཅོས་བྱས་པ་དང་།　ནད་ལྗིད་མོའི་ལྟ་སྐུལ་སྲུང་སྐྱོབ་ཁང་ནས་སྤྱིར་བཏང་གི་ནད་ཁང་དུ་གནས་སྤར་ཞིང་།　　དྲག་བསྐྱེད་རང་བཞིན་གྱི་སྨན་བཅོས་བྱེད་བཞིན་ཡོད།　ལོ་ན28ལོན་པའི་ཀྲང་ཧྲའོ་ནན་དང་།　ལོ་ན30ལོན་པའི་ལུའི་ཡན་གཉིས་ནི་སོ་སོར་ཧྲིན་ཡང་དང་ཀྲིན་ཀྲོའུ་ནས་ཡོང་བ་ཡིན་ཞིང་།　སེམས་ཀྱི་ཉི་ཟླ་ནས་ཡུལ་སྐོར་བྱེད་པའི་ལམ་བར་དུ་ས་འགུལ་བྱུང་ཞིང་རི་ནས་རྡོ་ཉིལ་ཏེ་རྨས་ཕོག་ལ།　སྐབས་ཐོག་ཏུ་སྨན་ཁང་དུ་བསྐྱལ་ཡང་།　རྨས་ཕོག་པ་ཅུང་ཚབས་ཆེ་བས་ནད་གཞི་ལྗིད་མོའི་ནད་ཁང་དུ་བཀོད་སྒྲིག་བྱས།
སྨན་ཁང་གི་སྨན་པས་ངོ་སྤྲོད་བྱེད་དོན།　ཟླ8པའི་ཚེས31ཉིན་གྱི་སྔ་དྲོར།　རྨས་མ་ཐོན་མ་ཐག་སྨན་ཁང་གི་ཕྱོགས་ནས་ཁོ་ཚོར་མྱུར་དུ་བརྟག་དཔྱད་བྱས་པ་ན།　རྡོ་རྗེ་ལྷ་མོ་དང་།　ཀྲང་ཧྲའོ་ནན།　ལུའི་ཡན་བཅས་ཀྱི་རྐང་བའི་རུས་པ་བཅག་ཡོད་པ་དང་།　ཚད་རིམ་མི་འདྲ་བའི་རྨས་ཕོག་ཡོད་པས་ནད་ལྗིད་མོའི་ལྟ་སྐུལ་སྲུང་སྐྱོབ་ཁང་དུ་བསྡད་ཡོད།　ཟླ９བའི་ཚེས４ཉིན།　ཀྲང་ཧྲའོ་ནན་དང་ལུའི་ཡན་གཉིས་ལ་གཤགས་བཅོས་བྱས་པ་དང་།　སྨན་པ་རྣམས་ཀྱི་འབད་བརྩོན་བྱས་འོག　　གཤགས་བཅོས་བྱས་པ་བདེ་བླག་ཡིན་ཞིང་།　　གཤགས་བཅོས་བྱས་ཚར་རྗེས་ཁོ་གཉིས་ཀ་སྤྱིར་བཏང་དུ་ནད་ཁང་དུ་གནས་སྤར་བ་རེད།
རྒྱུས་ལོན་བྱུང་བ་ལྟར་ན།　“8.28”ས་འགུལ་དང་།“8.31”ས་འགུལ་ཁྲོད།　བདེ་ཆེན་ཁུལ་སེམས་ཀྱི་ཉི་ཟླའི་མི་དམངས་སྨན་ཁང་གིས་བསྡོམས་པས་རྨས་མ29དང་ལེན་བྱས་པ་དང་།　མིག་སྔར་རྨས་མ12སྨན་ཁང་ལས་བུད་པ་དང་།　རྨས་མ17གྱིས་སྨན་བཅོས་བྱེད་བཞིན་ཡོད།　དེའི་ཁྲོད་དུ་རྨས་མ་ལྗིད་མོ་མི6ཡོད།　རྨས་མ་ལྗིད་མོའི་ཁྲོད་དུ་མི３ལ་གཤགས་བཅོས་བྱས་ཚར་ནས་སྤྱིར་བཏང་གི་ནད་ཁང་དུ་གནས་སྤར་ཡོད་ལ།　རྨས་མ་མི1ཚེས8ཉིན་གྱི་ཕྱི་དྲོར་གོང་རིམ་སྨན་ཁང་ལ་གནས་སྤར་ནས་སྨན་བཅོས་བྱེད་བཞིན་ཡོད།　གཞན་པའི་རྨས་མ་ལྗིད་མོ2ལ་ཚེ་སྲོག་གི་ཉེན་ཁ་མེད་ཅིང་སྨན་ཁང་གི་ཕྱོགས་ནས་ནུས་པ་གང་ཡོད་ཀྱིས་སྨན་བཅོས་བྱེད་བཞིན་ཡོད།  །