གསར་འགོད་པས་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་གནས་སྐོར་ཅུའུ་ནས་ཤེས་གསལ་བྱུང་བ་ལྟར་ན། “ལྔ་གཅིག”གུང་གསེང་སྐབས་སུ་བདེ་ཆེན་ཁུལ་གྱི་གནས་སྐོར་ཡུལ་ལྗོངས་ཁུལ་སོ་སོ་རུ་མི་ཚོགས་ཀྱིས་ཁེངས་འདུག་པ་དང་།  ཁུལ་ཡོངས་ནས་རྒྱལ་ཁབ་ཕྱི་ནང་གི་གནས་སྐོར་བ་བསྡོམས་པས་མི་ཐེངས་ཁྲི24.55སྣེ་ལེན་བྱས་པས།  གནས་སྐོར་ཐད་ཀྱི་ཡོང་སྒོ་སྒོར་ཁྲི7916.03ལེགས་འགྲུབ་བྱུང་།

 གནས་སྐོར་རྫོགས་ལྡན་དུས་སྐབས་ལ་བསུ་མ་བྱེད་ཆེད།  ཉེ་སྔོན་བདེ་ཆེན་ཁུལ་གནས་སྐོར་དང་བཟོ་ཚོང་སོགས་སྡེ་ཁག་མང་པོས་ཞིབ་བཤེར་ཚན་ཆུང་རྩ་འཛུགས་བྱས་ཏེ་ཁུལ་ནང་ཁུལ་གྱི་གནས་སྐོར་ཚོང་ཁང་དང་།  གསོལ་ཁང་། མགྲོན་ཁང་།  ཡུལ་ལྗོངས་ཁུལ་སོགས་གནས་སྐོར་ལས་རིགས་དང་འབྲེལ་བ་ཡོད་པའི་ལས་ཁུངས་ཀྱི་དངོས་ཟོག་རིན་གོང་ལ་ཕྱོགས་ཡོངས་ནས་ཞིབ་བཤེར་བྱས།  གནས་སྐོར་ལས་རིགས་ཚོང་གཉེར་བྱེད་པའི་ལས་ཁུངས་དག་གིས་དངོས་ཟོག་རིན་གོང་གཏན་འཁེལ་བྱེད་དགོས་པ་དང་།  གསོལ་ཁང་གིས་བཀོལ་བཞིན་པའི་ཚལ་ཐོ་དང་མགྲོན་ཁང་གི་ཁང་གླ།  ཡུལ་ལྗོངས་ཁུལ་སྒོ་བྱང་གི་རིན་གོང་སོགས་ངེས་པར་ཏུ་ཕྱི་ཕྱོགས་ལ་ཁྱབ་བསྒྲགས་བྱེད་དགོས་པའི་བླང་བྱ་བཏོན།  །