ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་བདེ་ཆེན་རྫོང་གིས་རྩྭ་སའི་སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་ཕྱོགས་ཡོངས་ནས་ལག་བསྟར་བྱས་པ་དང་། སྔོན་དཔག་བྱས་པ་ལྟར་ན་ད་ལོར་ཕྱུགས་བསྐྱུར་ཁ་གསབ་བྱེད་པའི་རྩྭ་སའི་རྒྱ་ཁྱོན་མུའུ་ས་ཡ་གཉིས་དང་འབུམ་གཅིག་ཁྲི་གཉིས་ལྷག་ལ་འབུད་ཐུབ་པ་དང་། ཕྱུགས་རྩྭ་དོ་མཉམ་ཡོང་བར་གཟེངས་བསྟོད་བྱེད་པའི་རྩྭ་སའི་རྒྱ་ཁྱོན་མུའུ་ས་ཡ་གཉིས་དང་འབུམ་བདུན་ཁྲི་དགུ་ལྷག་ལ་འབུད་ཐུབ། གཟན་རྩྭ་བཏབ་པར་ཁ་གསབ་བྱེད་པའི་རྩ་སའི་རྒྱ་ཁྱོན་མུའུ་འབུམ་གསུམ་དང་ཁྲི་བཞི་ལྷག་ལ་འབུད་ཐུབ་པ་དང་། རྫོང་ཡོངས་ཀྱི་འབྲོག་པར་ཐོན་སྐྱེད་རྒྱུ་ཆའི་ཐད་ནས་ཕྱོགས་བསྡུས་ཁ་གསབ་བྱེད་པའི་ཁྱིམ་ཚང་སྟོང་བདུན་དང་དྲུག་བརྒྱ་ཞེ་དགུ་ལ་འབུད་ཐུབ། ཕྱུགས་འཚོ་མཚམས་བཞག་པའི་རྩྭ་སའི་སྔོ་ཁེབས་ཀྱི་ཚད་བརྒྱ་ཆའི་བཅོ་ལྔ་འཕར་བ་དང་། སྐྱེ་དངོས་ཐོན་ཚད་བརྒྱ་ཆའི་སུམ་ཅུའི་ཡན་ལ་བསླེབས་ཏེ། རྩྭ་ས་མུའུ་ས་ཡ་གཉིས་དང་འབུམ་བདུན་ཁྲི་དགུ་ལྷག་གི་སྟེང་དུ་ཕྱུགས་རྩྭ་དོ་མཉམ་གྱི་དམིགས་འབེན་མངོན་འགྱུར་བྱུང་། དེ་དང་མཉམ་དུ་འབྲོག་པའི་ལོ་རེའི་ཆ་སྙོམས་ཡོང་སྒོ་སྒོར་མོ་སྟོང་གཅིག་དང་སུམ་བརྒྱའི་ཡན་ལ་བསླེབས་ནས་འབྲོག་པའི་སྲིད་ཇུས་རང་བཞིན་གྱི་ཡོང་སྒོ་འཕར་སྣོན་བྱུང་ཚད་མི་རེར་ཆ་སྙོམས་སྒོར་མོ་བཞི་བརྒྱ་དང་ལྔ་བཅུའི་ཡན་ལ་བསླེབས།

རྒྱུས་ལོན་བྱུང་བ་ལྟར་ན། མིག་སྔར་བདེ་ཆེན་རྫོང་གི་རྩྭ་སའི་སྐྱེ་ཁམས་སྲུང་སྐྱོབ་ཁ་གསབ་ལམ་ལུགས་ཀྱི་དུས་རིམ་སྔོན་མའི་བྱ་བ་སྣ་ཚོགས་ཕལ་ཆེར་འགྲུབ་ཡོད་ལ། མི་འགྱང་བར་རྩྭ་ས་ཁྱིམ་ཚང་གིས་འགན་གཙང་ལེན་བྱེད་རྒྱུ་ཡིན་པ་དང་། ད་ལོའི་ལོ་མཇུག་བར་དུ་ཁ་གསབ་མ་དངུལ་ཡོད་ཚད་ཁྱིམ་ཚང་ལ་སྟེར་རྒྱུ་རེད།