ཀྲུང་གོའི་བོད་ཀྱི་དྲ་བའི་འཕྲིན། ཟླ8པའི་ཚེས20ཉིན།2013ལོའི་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་སེམས་ཀྱི་ཉི་ཟླའི་རིམ་མཐོའི་རྒྱུག་འགྲན་གྱི་གསར་འགྱུར་ཁྱབ་བསྒྲགས་ཚོགས་འདུ་པེ་ཅིན་ནས་སྤེལ་བ་དང་།སེམས་ཀྱི་ཉི་ཟླ་རྫོང་གི་འགན་འཁུར་མི་སྣས་ཚོགས་རར་བཞུགས་པའི་མིང་གྲགས་ཅན་གྱི་འགྲན་རྒྱུག་མཁན་དང་སྨྱན་བྱད་སོ་སོར་སེམས་ཀྱི་ཉི་ཟླ་རྫོང་གི་རང་བྱུང་ཐོན་ཁུངས་དང་འགྲན་དོན་གྱི་གནས་ཚུལ་ངོ་སྤྲོད་བྱས་པ་མ་ཟད།རྒྱལ་ཡོངས་ཀྱི་ལུས་རྩལ་དགའ་མཁན་རྣམས་ལ་འགྲན་ཞུགས་ཀྱི་གདན་འདྲེན་ཞུས་པ་རེད།

སེམས་ཀྱི་ཉི་ཟླ་ནི་རྨ་འབྲི་རྫ་གསུམ་བཞུར་རྒྱུན་གྱི་ལྟེ་བ་ཡིན་ལ།ཡུན་ནན་དང་མཚོ་བོད་མཐོ་སྒང་འབྲེལ་མཚམས་ཀྱི་ངོ་མཚར་ཆེ་བའི་ས་གཞི་དང་གང་ཟག་གིས་དུས་ཡུན་རིང་བོ་འཚོལ་སྙེག་བྱེད་པའི་བདེ་བ་ཅན་གྱི་ཞིང་ཁམས་ཡིན།སྟོན་ཟླ་བཅུ་པའི་དུས་བཟང་པོ་འདིར།2013ལོའི་སེམས་ཀྱི་ཉི་ཟླའི་རིམ་མཐོའི་རྒྱུག་འགྲན་སྟེ་སྐབས་དང་པོའི་སེམས་ཀྱི་ཉི་ཟླའི་རྒྱལ་སྤྱིའི་རྒྱུག་འགྲན་གནས་འདི་ནས་སྤེལ་རྒྱུ་རེད།

ཐེངས་འདིའི་འགྲན་བསྡུར་དེ2013ལོའི་ཟླ10པའི་ཚེས1ཉིན་འགོ་ཚུགས་རྒྱུ་གཏན་ཁེལ་བྱས་ཡོད་ལ།སེམས་ཀྱི་ཉི་ཟླའི་ཟླ་འོད་ཐང་ཆེན་ནས་རྒྱུག་འགོ་ཚུགས་ཏེ།ཇ་རྟའི་ཚོང་ལམ་གྱི་ས་ཚིགས་གཙོ་བོ་རྡོ་མཁར་རྫོང་དང་།མིང་གྲགས་ཅན་གྱི་ལྗོངས་ཁུལ་ཤྭ་ཁ་གངས་རི།རྒྱལ་སྤྱིའི་རློན་སའི་བདེ་སྲུང་ཁུལ་ནགས་ཕག་མཚོ་དང་གཟིག་རི་རྩྭ་ཐང་སོགས་ཀྱི་སྤྲོ་གསེང་གནས་མཆོག་བརྒྱུད་རྒྱུ་རེད།རྒྱལ་ཁབ་ཕྱི་ནང་གི་འགྲན་རྒྱུག་མཁན་རྣམས་ཐེངས་འདིའི་རྒྱུག་འགྲན་ཁྲོད་གངས་རི་དང་གྲོག་རོང་།རྩྭ་ཐང་།རི་ཀླུང་།མཚེའུ།གདོད་མའི་ནགས་ཚལ་དང་མི་རིགས་ཀྱི་ཁྱད་ཆོས་ལྡན་པའི་གྲོང་སྡེ་སོགས་བརྒལ་དགོས་ལ།རང་བྱུང་གི་མཛེས་བཀོད་དང་མིས་བཟོས་ཡུལ་ལྗོངས་ཀྱི་མཛེས་སྡུག་ཁྲོད་མཚོ་ངོས་ལས་མཐོ་ཚད་ཆ་སྙོམས་སྨི3500ཡི་མཐར་ཐུག་པའི་ལམ་ཐིག་ནས་འགྲན་བསྡུར་བྱས་ཏེ།སྤྱི་ལེ100ཡི་དཔོང་ཕྱིའི་རྒྱུག་འགྲན་མཇུག་རྫོགས་རྒྱུ་རེད།

ཐེངས་འདིའི་འགྲན་བསྡུར་ནི་སེམས་ཀྱི་ཉི་ཟླ་རྫོང་མི་དམངས་སྲིད་གཞུང་གིས་གཙོ་གཉེར་བྱས་པ་དང་།སྒྲུབ་འགན་ལས་ཁུངས་ཏེ་ཚད་མཐོའི་འཚོལ་ཞིབ་ཡུལ་སྐོར་དང་།ཉི་ཟླ་གླིང་གམཉམ་འབྲེལ་སྒྲུབ་འགན་ལས་ཁུངས་ཧྥང་ཀི་ཐེའོ་དབྱི་ཕིན་སོགས་ཡིན་ལ།རྒྱལ་ཁབ་ཕྱི་ནང་གི་འགྲན་བསྡུར་རྩ་འཛུགས་ཀྱི་ཉམས་མྱོང་ཧ་ཅང་མང་པོ་ཡོད་པ་རེད།འགྲན་བསྡུར་ཁྲོད་སྤྱི་ལེ་50ཅན་གྱི་ཚོ་ཆུང་དང་སྤྱི་ལེ་10ཅན་གྱི་ཚོ་ཆུང་།ཉམས་ལེན་མང་ཚོགས་ཚོ་ཆུང་བཅས་བཀོད་སྒྲིག་བྱས་ཡོད་པས།མི་མང་པོར་སྒོ་ཕྱིར་བསྐྱོད་པ་དང་།དཔོང་ཕྱིའི་རྒྱུག་འགྲན་གྱི་རྣམ་པས་རང་བྱུང་ཁམས་སུ་ལོག་ཕེབས་དང་རང་ཉིད་ལས་རྒྱལ་བ།ལུས་གཟུགས་བདེ་པོ་དང་སེམས་ཁམས་ལ་འབྲེལ་འདྲེས་བྱེད་ཐུབ་པ་རེད།

ཟླ་བ་གཅིག་ཀྱང་འགོར་མེད་པའི་སྔོན་འགྲོའི་དྲིལ་བསྒྲགས་བྱས་པ་བརྒྱུད།རྒྱལ་ཡོངས་རྒྱུག་མཁན་གྱི་ཁྲོད་དུ་ཁྱབ་རྒྱ་ཆེ་ཞིང་དགེ་མཚན་གྱི་ཤུགས་རྐྱེན་ཐེབས་ཡོད་པ་རེད།རྒྱལ་ཁབ་ཕྱི་ནང་གི་དཔོང་ཕྱིའི་རྒྱུག་འགྲན་མི་སྣ་གནས་འདིར་འཛོམས་ནས་རྒྱུག་འགྲན་བྱེད་རྒྱུ་རེད།སེམས་ཀྱི་ཉི་ཟླའི་རིམ་མཐོའི་རྒྱུག་འགྲན་ནི་རྒྱལ་ནང་དཔོང་ཕྱིའི་རྒྱུག་འགྲན་གྱི་མཛེས་སྡུག་གི་ཡུལ་ལྗོངས་ཞིག་ཡིན།

མཛེས་སྡུག་གི་གནས་མཆོག་དེ་ལ་སེམས་ཀྱིས་བརྒལ་རྒྱུ་རེད།  །