2003ལོ་ནས་བཟུང་།ཀྲེན་ཅང་གིས་ཞིང་ཆེན་ཡོངས་ཀྱི་ཞིང་སྡེར“དཔེར་སྟོན་གྲོང་ཚོ་སྟོང་དང་བཅོས་སྐྱོང་གྲོང་ཚོ་ཁྲིའི”ལས་གྲྭ་སྤེལ་ནས་གྲུབ་འབྲས་མངོན་གསལ་དོད་པོ་ཐོབ་པ་རེད།ཉེ་ཆར།ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི།རྒྱལ་ཁབ་ཀྲུའུ་ཞི།ཀྲུང་དབྱང་དམག་ཨུའི་ཀྲུའུ་ཞི་ཞི་ཅིན་ཕིང་གིས་དེར་གལ་ཆེའི་བཀའ་སློབ་གནང་ནས་ནན་གསུང་གནང་རྒྱུར།ཀྲེན་ཅང་ཞིང་ཆེན་གྱིས“དཔེར་སྟོན་གྲོང་ཚོ་སྟོང་དང་བཅོས་སྐྱོང་གྲོང་ཚོ་ཁྲིའི”ལས་གྲྭ་སྤེལ་བའི་ཉམས་མྱོང་ལ་ཕྱོགས་བསྡོམས་བྱས་པས་མ་ཚད་ཁྱབ་གདལ་གཏོང་དགོས།ས་གནས་ཁག་གིས་ཞིང་སྡེ་གསར་པ་འཛུགས་སྐྲུན་བྱེད་རིམ་ནང་ཡུལ་བབ་དང་བསྟུན་དགོས་ཤིང་།རིགས་བགོས་ཁྲིད་སྟོན།སྔོན་དུ་འཆར་འགོད།ནང་རྐྱེན་འཐུས་སྒོ་ཚང་བ།གནད་ཆེ་གཙོར་བཟུང་།གཅིག་འགྱུར་མཐུན་སྦྱོར་བཅས་བྱས་ཏེ་དུས་ཡུན་རིང་པོར་འབད་འཐབ་བྱས་པར་བརྒྱུད་སྒོ་ཀུན་ནས་ཞིང་སྡེའི་ཐོན་སྐྱེད་དང་འཚོ་འི་ཆ་རྐྱེན་ལེགས་བཅོས་བྱེད་དགོས།
    ཞི་ཅིན་ཕིང་གིས་བཀའ་སློབ་ཀྱི་སྙིང་དོན་ལ་དམིགས་ཏེ་ཀྲུང་དབྱང་གི་འབྲེལ་ཡོད་སྡེ་ཁག་གིས་དུས་ཐོག་ཏུ་ཀྲེན་ཅང་ཞིང་ཆེན་གྱི་ཉམས་མྱོང་ལ་ཕྱོགས་བསྡུས་བྱས་མ་ཚད།ལས་ཡུལ་དངོས་ཀྱི་གྲོས་ཚོགས་འཚོག་པར་སྒྲིག་འཛུགས་བྱས་ཡོད།རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཁེ་ཆང་གིས་གྲོས་ཚོགས་ལ་ཆེད་དུ་མཆན་བཀོད་མཛུབ་སྟོན་གནང་ནས་ནན་གསུང་གནང་རྒྱུར།ཞིང་སྡེའི་མི་སྡོད་ཁོར་ཡུག་ལེགས་བཅོས་བྱེད་རྒྱུ་ནི་ཞིང་པ་དུང་ཕྱུག་མང་པོའི་རེ་འདུན་ཡིན་པ་རེད།ས་གནས་ཁག་དང་འབྲེལ་ཡོད་སྡེ་ཁག་གིས་དོན་དངོས་ནས་འགོ་ཚུགས་ཏེ་གཅིག་གྱུར་འཆར་འགོད་དང་།ཡུལ་བབ་དང་བསྟུན་ནས་ནུས་ཤུགས་གང་ལྕོགས་བྱེད་དགོས།ཞིང་པས་གཙོ་གནད་ཀྱི་ཐོབ་ཐང་རྒྱུན་འཁྱོངས་བྱེད་དགོས།ཞིང་པའི་རེ་འདུན་ལ་བརྩི་བཀུར།ཞིང་སྡེའི་ཁྱད་ཆོས་དམིགས་སུ་ཐོན་པ།རྒྱུན་སྲོལ་གྱི་རིག་གནས་དར་སྤེལ་གཏོང་དགོས།གོ་རིམ་ལྡན་པའི་སྒོས་ཞིང་སྡེའི་མི་སྡོད་ཁོར་ཡུག་ཕྱོགས་བསྡུས་བཅོས་སྐྱོང་བྱེད་པར་སྐུལ་འདེད་བཏང་སྟེ་མཛེས་སྡུག་ལྡན་པའི་གྲོང་ཚོ་མགྱོགས་པོ་སྐྲུན་གང་ཐུབ་བྱེད་དགོས།
    ཟླ་བ10པའི་ཚེས9ཉིན།རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཝང་ཡང་གིས་རྒྱལ་ཡོངས་ཀྱི་ཞིང་སྡེའི་མི་སྡོད་ཁོར་ཡུག་ལེགས་བཅོས་བྱེད་པའི་ལས་ཀའི་གྲོས་ཚོགས་ཐོག་ཞི་ཅིན་ཕིང་གི་གལ་ཆེའི་བཀའ་སློབ་ལ་སློབ་སྦྱོང་བྱ་རྒྱུ་བཀོད་སྒྲིག་གནང་ཡོད།ཁོང་གིས་ས་གནས་ཁག་གིས་ཞིང་སྡེའི་མི་སྡོད་ཁོར་ཡུག་འཛུགས་སྐྲུན་བྱ་རྒྱུར་མཐོང་ཆེན་ཆེན་པོ་བྱེད་དགོས་པ་དང་།འགོ་ཁྲིད་བྱ་རྒྱུར་ཤུགས་སྣོན་དོ་དན་རྒྱག་དགོས།ཚན་རིག་དང་མཐུན་པར་འཆར་འགོད་དང་སྒྲིག་འཛུགས་ཞིབ་ཕྲ་བྱེད་དགོས།ཞིང་སྡེའི་རྨང་གཞི་སྒྲིག་ཆས་འཛུགས་སྐྲུན་དང་ཁོར་ཡུག་བཟོ་བཅོས་བྱེད་པར་ཤུགས་སྣོན་རྒྱག་དགོས་པ་ཞེས་ནན་གསུང་གནང་།