ཆུ་འབྲུབ་སྐབས་ཁུལ་ཡོངས་ཀྱི་ས་ཁུལ་ཕལ་ཆེར་དྲག་ཆར་འབབ་པའི་གནམ་གཤིས་བྱུང་བས་ས་ཆ་འགའ་ལ་ས་གཤིས་ཀྱི་གནོད་སྐྱོན་བྱུང་བ་རེད།གནམ་གཤིས་སྡེ་ཁག་གིས་སྔོན་དཔག་བྱས་པར་ལྟ་ན།ཉེ་ཆར་སྔར་བཞིན་ཆར་པ་འབྲིང་ཙམ་དང་ཆེ་ཙམ་ཐ་ན་དྲག་ཆར་འབབ་པའི་གནམ་གཤིས་བྱུང་ནས་ཆུ་ལོག་དང་།འདམ་རྡོ་ཆུ་རུད།རི་ཉིལ་བ་སོགས་ཀྱི་གནོད་སྐྱོན་བྱུང་སྲིད་པས་ཆུ་ལོག་གི་གནོད་སྐྱོན་སྔོན་འགོག་བྱེད་པའི་གནས་ཚུལ་ཚབས་ཆེ་བ་རེད།ཉེ་སྔོན་ཁུལ་སྲིད་གཞུང་གི་གཞུང་ལས་ཁང་གིས་བྲེལ་མྱུར་གྱི་བརྡ་ཐོ་བཏང་ནས་ཆུ་འབྲུབ་སྐབས་ཀྱི་གནོད་འགོག་ལས་ཀ་དངོས་སུ་ཡག་པོ་སྒྲུབ་སྟེ་མི་དམངས་ཀྱི་ཚེ་སྲོག་དང་རྒྱུ་ནོར་བདེ་འཇགས་ཡོང་བར་ཁག་ཐེག་གང་ཐུབ་བྱེད་དགོས་པའི་བླང་བྱ་བཏོན་པ་རེད།
བརྡ་ཐོའི་ནང་བསྟན་དོན།མིག་སྔར་དྲག་ཆར་འབབ་པའི་དུས་ལ་སླེབས་ཡོད།རྫོང་དང་།ཤང་།གྲོང་རྡལ་བཅས་ཀྱི་སྲིད་གཞུང་སོ་སོ་དང་།སྡེ་ཁག་དང་ཨར་ལས་འཛུགས་སྐྲུན་སྡེ་ཚན།བཟོ་གཏེར་ཁེ་ལས་དང་དོན་ལས་སྡེ་ཚན་སོ་སོས་ངེས་པར་དུ་ཆུ་འབྲུབ་སྐབས་ཀྱི་གནོད་འགོག་ལས་ཀར་ཚད་མཐོན་པོས་མཐོང་ཆེན་དང་།གནོད་འགོག་གི་འགན་འཁྲི་སྣ་ཚོགས་དོན་འཁྱོལ་ཡག་པོ་བྱ་རྒྱུ་དམ་འཛིན་བྱེད་དགོས་པ་དང་།འགན་ཁུར་བློ་མཐུན་གཙོ་བོས་གནོད་འགོག་ལས་ཀ་ལ་དངོས་སུ་བཀོད་སྒྲིག་དང་།ལྟ་སྐུལ་ཞིབ་བཤེར།བྱེད་ཐབས་དོན་འཁྱོལ་བཅས་བྱེད་པ་དང་།ལས་བགོས་འགན་ཁུར་གྱི་བློ་མཐུན་གྱིས་དངོས་སུ་དམ་འཛིན་བྱས་ནས་འགན་འཁྲི་སྣ་ཚོགས་མི་སྒེར་ལ་དོན་འཁྱོལ་བྱེད་དགོས།ཆུ་འབྲུབ་སྐབས་ཀྱི་ཆུ་ཚོད་24ལ་ངེས་པར་དུ་མཁོ་བསྟུན་གྱི་ལས་རེས་ལམ་ལུགས་ལག་བསྟར་ནན་པོ་དང་དངོས་སུ་དོན་འཁྱོལ་བྱེད་དགོས།  ཆུ་མཚམས་གཙོ་ཆེ་དང་ས་གཤིས་ཀྱི་མངོན་མེད་གནོད་སྐྱོན་ཐེབས་ཁུལ་དུ་ཆགས་ཡོད་པའི་མང་ཚོགས་ཡོད་ཚད་ལ་ངེས་པར་དུ་ཆེད་བཀོད་མི་སྣ་ལས་རེས་བྱེད་མཁན་དོན་འཁོལ་བྱེད་དགོས།འགོ་ཁྲིད་ཀྱིས་མཐོང་ཆེན་དང་འགན་འཁྲི་དོན་ཐོག་ཏུ་མི་འཁྱོལ་པ་དང་།ལས་འགན་སྣང་མེད་ལྷོད་གཡེང་དུ་གཏོང་བ།མི་བདེན་རྫུན་སྒྲིག  རྫུན་ཞུ་དང་གཡོ་འཕྲུལ་སོགས་བྱས་སྟབས་འགན་འཛོལ་གྱི་བྱུར་རྐྱེན་བྱུང་མཁན་ལ་འབྲེལ་ཡོད་མི་སྣའི་འགན་འཁྲི་བདའ་འདེད་བཏང་ནས་ཐག་གཅོད་ནན་པོ་བྱེད་དགོས་པ་ལས་ངན་ལང་གཏན་ནས་གཏོང་མི་ཆོག
བརྡ་ཐོའི་ནང་བླང་བྱ་བསྟན་དོན།རྫོང་དང་སྡེ་ཁག་སོ་སོ་ལ་ཞིང་ཆེན་ཏང་ཨུ་དང་སྲིད་གཞུང་གིས་སྔོན་འགོག་དང་གནོད་གཡོལ་བྱེད་པ་དང་རང་འགུལ་གྱིས་གནོད་སྐྱོན་གཡོལ་ཐུབ་པ་བྱེད་པའི་གནོད་འགོག་ལས་ཀའི་བླང་བྱ་དངོས་སུ་དོན་འཁྱོལ་བྱེད་དགོས་པ་དང་།ཁྱད་པར་དུ་འཛུགས་སྐྲུན་སྡེ་ཚན་དང་།ཨར་ལས་སྡེ་ཚན།བཟོ་གཏེར་ཁེ་ལས་དང་དོན་ལས་སྡེ་ཚན་གྱིས་རང་འགུལ་གྱིས་ཡུལ་དེའི་འབྲེལ་ཡོད་སྡེ་ཁག་དང་འབྲེལ་བ་བྱས་ནས།དུས་ཐོག་ཏུ་སྔོན་ཚུད་ཀྱི་ཉེན་བརྡའི་ཆ་འཕྲིན་ཤེས་ཐུབ་པ་དང་།མྱུར་དུ་འཇིགས་སྣང་ཐེབས་པའི་མི་སྣ་ཉེན་མེད་ཀྱི་གནས་སུ་སྤོ་རྒྱུ་སྒྲིག་འཛུགས་བྱེད་དགོས།
བརྡ་ཐོའི་ནང་ནན་པོ་བསྟན་དོན།རྫོང་དང་སྡེ་ཁག་སོ་སོས་སྔར་ལས་ལྷག་པར་གནོད་སྐྱོན་སྔོན་འགོག་དང་ཉུང་དུ་གཏོང་བའི་ཤེས་བྱ་དྲིལ་བསྒྲགས་དང་གསོ་སྐྱོང་སྦྱོང་བརྡར་བྱ་རྒྱུར་ཤུགས་སྣོན་བརྒྱབ་ནས།ཧུར་ཐག་གིས་ཕྱོགས་བསྡུས་ཀྱི་མཁོ་བསྟུན་སྦྱོང་བརྡར་བྱ་རྒྱུ་སྒྲིག་འཛུགས་བྱེད་པ་དང་།རྒྱ་ཆེའི་ལས་བྱེད་པ་དང་མང་ཚོགས་ལ་གནོད་སྐྱོན་སྔོན་འགོག་དང་ཉུང་དུ་གཏོང་བའི་འདུ་ཤེས་བརྟན་འཛུགས་ཀྱི་སློབ་གསོ་བྱས་ནས།མུ་མཐུད་དེ་ལས་བྱེད་པ་དང་མང་ཚོགས་ལ་གནོད་སྐྱོན་སྔོན་འགོག་དང་ཉུང་དུ་གཏོང་བའི་ནུས་པ་མཐོར་འདེགས་གཏོང་དགོས།