བོད་ཀྱི་སྐད་ཡིག་བགྲོ་གླེང་ཚོགས་འདུ་སྐབས་དང་པོ་ནན་ཁའེ་སློབ་ཆེན་དུ་འཚོགས་པ།

བྱང་ཆུབ་དབང་མོ། མཚོ་སྔོན་པོ་དྲ་བ། 2016-10-14

བགྲོ་གླེང་ཚོགས་འདུའི་ཟུར་ཞིག

ཉེ་ལམ། བོད་ཀྱི་སྐད་ཡིག་བགྲོ་གླེང་ཚོགས་འདུ་སྐབས་དང་པོ་ནན་ཁའེ་སློབ་གྲྭ་ཆེན་མོར་བདེ་བླག་ངང་འཚོགས་ཤིང་།སློབ་གསོ་པུའུ་ཡི་རྒྱ་ཡིག་ཆེད་ལས་ཀྱི་སློབ་ཁྲིད་མཛུབ་སྟོན་ཨུ་ཡོན་ལྷན་ཁང་གི་ཀྲུའུ་རེན་དང་ཐེན་ཅིན་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་ཀྱི་ཀྲུའུ་ཞི།ནན་ཁའེ་སློབ་གྲྭ་ཆེན་མོའི་རིག་གཞུང་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཁྲེན་ཧུང་དང་།ནན་ཁའེ་སློབ་གྲྭ་ཆེན་མོའི་རྩོམ་རིག་སློབ་གླིང་གི་འགན་འཛིན་པ་ཧྲེན་ལི་ཡན།ལྷོ་ནུབ་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་བཙན་ལྷ་ངག་དབང་ཚུལ་ཁྲིམས།ཨ་མེ་རི་ཁའི་སི་མད་སོ་ནི་ཡན་སློབ་གླིང་གི་དམངས་སྲོལ་དང་རིག་གནས་ཤུལ་བཞག་ལྟེ་གནས་ཀྱི་སྐད་ཡིག་རིག་གནས་བསྐྱར་དར་ཁང་གི་འགན་འཛིན་པ་མཱ་རི་ལིན（Mary S.Linn）དང་ནན་ཁའེ་སློབ་གྲྭ་ཆེན་མོའི་སྐད་བརྡ་ཞིབ་འཇུག་སུའོ་ཡི་འགན་འཛིན་པ་ཧྲི་ཧྥེང་བཅས་འབྲེལ་ཡོད་འགོ་ཁྲིད་དང་ཆེད་མཁས་པ་དག་བགྲོ་གླེང་ཚོགས་འདུ་འགོ་ཚུགས་པའི་མཛད་སྒོར་ཞུགས་པར་མ་ཟད་ཤིས་ཚིག་ཕུལ།གཞན་ཐེངས་འདིའི་བགྲོ་གླེང་ཚོགས་འདུ་ལ་ནུབ་བྱང་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ།འབུམ་རམས་པའི་མཛུབ་སྟོན་དགེ་རྒན་དོར་ཞི་གདོང་དྲུག་སྙེམས་བློ་དང་མཚོ་སྔོན་བོད་ཀྱི་ཡིག་རྙིང་ཞིབ་འཇུག་ཚོགས་པའི་ཚོགས་གཙོ་གཞོན་པ།མཚོ་སྔོན་མི་རིགས་སློབ་ཆེན་གྱི་དགེ་རྒན་ཆེན་མོ་བིས་མདོ་བ་བདེ་མཆོགནན་ཁའེ་སློབ་གྲྭ་ཆེན་མོའི་དགེ་རྒན་ཆེན་མོ།མིང་དུ་གྲགས་པའི་རྒྱའི་བརྡ་སྤྲོད་ཆེད་མཁས་པ།ཀྲུང་གོའི་སྐད་ཡིག་དེང་རབས་ཅན་སློབ་ཚོགས་ཀྱི་ཚོགས་གཙོ་མཱ་ཆིན་ཀྲུའུ་བཅས་ཀྱིས་བསྐུར་བའི་ཤིས་ཚིག་ཀྱང་འབྱོར།ནན་ཁའེ་སློབ་གྲྭ་ཆེན་མོའི་རྒྱ་བོད་སྐད་བརྡ་ཞིབ་འཇུག་ལྟེ་གནས་ཀྱི་ཀྲུའུ་རེན་ཡེ་ཤེས་འོད་གསལ་ཨ་ཚོགས་ཀྱིས་བགྲོ་གླེང་ཚོགས་འདུ་ལ་གཙོ་སྐྱོང་མཛད།

བགྲོ་གླེང་ཚོགས་འདུའི་ཡུལ་དངོས།

ཐེངས་འདིའི་བོད་ཀྱི་སྐད་ཡིག་བགྲོ་གླེང་ཚོགས་འདུའི་སྟེང་ཀྲུང་གོ་སྤྱི་ཚོགས་ཚན་རིག་ཁང་གི་དགེ་རྒན་ཆེན་མོ་སུན་ཧུང་ཁའེ་དང་ཀྲུང་གོ་མི་དམངས་སློབ་གྲྭ་ཆེན་མོའི་དགེ་རྒན་ཆེན་མོ་ཆུས་ཨའེ་ཐང་།ནུབ་བྱང་མི་རིགས་སློབ་གྲྭ་ཆེན་མོའི་དགེ་རྒན་ཆེན་མོ་དཔའ་རིས་སངས་རྒྱས་དང་ཧྭ་ཁན།མཚོ་སྔོན་དགེ་ཐོན་སློབ་ཆེན་གྱི་དགེ་རྒན་ཆེན་མོ་ལྕགས་ཐར་རྒྱལ།ཨ་མེ་རི་ཁའེ་ཨོ་རེ་ཀོན་གཙུག་ལག་སློབ་ཆེན་གྱི་སློབ་དཔོན་ཆེན་མོ་དང་བརྡ་སྤྲོད་སློབ་གླིང་གི་འགན་འཛིན་པ་སི་ཀོ་ཐེ་དེ་ལན་སེས(Scott DeLancey)དང་སུད་སུ་པར་ནེ་སློབ་གྲྭ་ཆེན་མོའི་དགེ་རྒན་ཆེན་མོ་ཇོར་ཇི་ཝེན་དྲོམ་མུ(George van Driem) པེ་ཅིང་སློབ་གྲྭ་ཆེན་མོའི་དགེ་རྒན་ཆེན་མོ་གཞོན་པ་ལིན་ཡོ་ཅིང་།ཧྲེང་ཧའེ་དགེ་ཐོན་སློབ་གྲྭ་ཆེན་མོའི་དགེ་རྒན་ཆེན་མོ་དཀོན་མཆོགམཚོ་སྔོན་བོད་ཀྱི་ཡིག་རྙིང་ཞིབ་འཇུག་ཚོགས་པའི་ཚོགས་གཙོ་གཞོན་པ་དང་ཞུ་ཆེན་ལོ་ཙཱ་བ་ཆམ་ཚང་པདྨ་ལྷུན་གྲུབ།ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོ་ཚེ་དབང་ལྷ་མོ།དེ་མིན་ཀྲུང་གོའི་བོད་རིག་པ་ཞིབ་འཇུག་ལྟེ་གནས་དང་ཀྲུང་ཧྲན་སློབ་གྲྭ་ཆེན་མོ།བོད་ལྗོངས་སློབ་གྲྭ་ཆེན་མོ།ནུབ་བྱང་མི་རིགས་སློབ་གྲྭ་ཆེན་མོ།མཚོ་སྔོན་དགེ་ཐོན་སློབ་གྲྭ་ཆེན་མོ།ལྷོ་ནུབ་མི་རིགས་སློབ་གྲྭ་ཆེན་མོ།མཚོ་སྔོན་མི་རིགས་སློབ་གྲྭ་ཆེན་མོ།ནན་ཁའེ་སློབ་གྲྭ་ཆེན་མོ།ཀན་སུའུ་མི་རིགས་དགེ་འོས་སློབ་གླིང་།རྔ་བ་ཁུལ་དགེ་ཐོན་སློབ་གླིང་སོགས་སློབ་གྲྭ་དང་ཞིབ་འཇུག་སྡེ་ཁག་དག་ནས་ཕེབས་པའི་བོད་ཀྱི་སྐད་བརྡ་ཆེད་མཁས་པ་སུམ་ཅུ་ལྷག་ལྷན་དུ་འཛོམས་ནས་བོད་ཀྱི་སྐད་ཡིག་རིག་གནས་ཞིབ་འཇུག་གི་མིག་སྔའི་གནས་བབ་དང་རྩིས་འཁོར་སྐད་བརྡ་རིག་པ།བོད་ཀྱི་ཡུལ་སྐད་སོགས་ཟུར་སྣེ་མི་འདྲ་བ་ནས་བགྲོ་གླེང་གནང་བ་དང་།དཀར་མཛེས་བོད་རིགས་རང་སྐྱོང་ཁུལ་ཉག་ཆུ་རྫོང་དཔའ་སྡེ་སྡེ་བའི་དང་བླངས་དགེ་རྒན་གདུགས་དཀར་ལགས་ཀྱིས་དུས་ཡུན་རིང་བོར་གཞི་རིམ་གྱི་མང་ཚོགས་དང་སློབ་མ་རྣམས་ལ་བོད་ཀྱི་སྐད་ཡིག་རིག་གནས་སློབ་ཁྲིད་བྱས་པའི་མཉམ་མྱོང་ལས་འཕྲོས་ཏེ་གླེང་མོལ་མཛད།རྒྱ་བོད་སྐད་བརྡ་རིག་པའི་དབྱར་སྦྱོང་འཛིན་གྲྭའི་སློབ་མ་ཡོངས་ཐེངས་འདིའི་བོད་ཀྱི་སྐད་ཡིག་བགྲོ་གླེང་ཚོགས་འདུར་ཟུར་ཞུགས་བྱས།
གཞན་རྒྱ་བོད་སྐད་བརྡ་རིག་པའི་དབྱར་སྦྱོང་འཛིན་གྲྭ་སྐབས་དང་པོའང་སྤྱི་ཟླ་8པའི་ཚེས་21ཉིན་ནས་སྤྱི་ཟླ་9པའི་ཚེས་2ཉིན་བར་ནན་ཁའེ་སློབ་གྲྭ་ཆེན་མོ་ནས་འཚོགས་ཤིང་།རྒྱལ་ཁབ་ཕྱི་ནང་གི་མིང་དུ་གྲགས་པའི་དགེ་རྒན་དགུ་གདན་ཞུ་བྱས་ཏེ་བོད་ཁུལ་གྱི་སློབ་གྲྭ་སོ་སོ་དང་གཞན་མི་རིགས་སྐད་ཡིག་གི་ལས་གཉེར་སློབ་མ་38ལ་ཁྱོན་བསྡོམས་ཉིན་བཅུ་གསུམ་གྱི་རིང་ལ་ལོ་རྒྱུས་སྐད་བརྡ་རིག་པ་དང་རྒྱ་བོད་སྐད་བརྡའི་ལོ་རྒྱུས་ཞིབ་བསྡུར།བོད་འབར་སྐད་ཀྱི་ཞིབ་འཇུགཡུལ་དངོས་རྟོག་ཞིབ།སྒྲ་གདངས་ཚོད་ལྟའི་སྤྱོད་ཐབས།རྒྱལ་སྤྱིའི་སྒྲ་རྟགས།རྒྱུན་སྤྱོད་སྐད་བརྡ་རིག་པའི་མཉེན་ཆས་ཀྱི་བཀོལ་སྤྱོད།ཡུལ་སྐད་ཀྱི་ཟིན་བཀོད་དང་ཉར་ཚགས་སོགས་ཀྱི་ཐད་ནས་སློབ་ཁྲིད་གནང་།ཐེངས་འདིའི་དབྱར་སྦྱོང་འཛིན་གྲྭ་བརྒྱུད་སློབ་མ་ཚོའི་སྐད་བརྡ་རིག་པའི་གཞུང་ལུགས་ཀྱི་རྨང་གཞི་དང་ཞིབ་འཇུག་གི་ཐབས་ལམ།རིག་གཞུང་གནད་དོན་གྱི་གཞིག་སྟངས་ཐད་ཀྱི་ཆུ་ཚད་མཐོར་འདེགས་སུ་བཏང་བར་མ་ཟད།ཡུལ་སྐད་རྟོག་ཞིབ་ཀྱི་ཐབས་ལམ་དང་བརྡ་སྐད་རིག་པའི་ཞིབ་འཇུག་དང་འབྲེལ་བའི་མཉེན་ཆས་བཀོལ་སྤྱོད་ཐད་ལ་ཕན་ནུས་ཆེན་པོ་ཐོན་པ་རེད།

སློབ་ཁྲིད་ཀྱི་ཡུལ་དངོས།

མཉམ་པར།

ཐེངས་འདིའི་བོད་ཀྱི་སྐད་ཡིག་བགྲོ་གླེང་ཚོགས་འདུ་སྐབས་དང་པོ་དང་རྒྱ་བོད་སྐད་བརྡ་རིག་པའི་དབྱར་སྦྱོང་འཛིན་གྲྭ་སྐབས་དང་པོ་ནི་ནན་ཁའེ་སློབ་གྲྭ་ཆེན་མོའི་རྒྱ་བོད་སྐད་བརྡ་ཞིབ་འཇུག་ལྟེ་གནས་དང་མཚོ་སྔོན་བོད་ཀྱི་ཡིག་རྙིང་ཞིབ་འཇུག་ཚོགས་པ།ཧྲང་ཧའེ་དགེ་ཐོན་སློབ་གྲྭ་ཆེན་མོའི་བོད་རིག་པ་ཞིབ་འཇུག་ལྟེ་གནས་བཅས་ཀྱིས་མཉམ་སྒྲུབ་མཛད་པ་ཡིན་ལ།བོད་ཀྱི་སྐད་ཡིག་རིག་གནས་སྔར་ལས་ལྷག་པར་གོང་འཕེལ་དང་ན་གཞོན་སློབ་མ་མང་པོར་ཆེད་ལས་རང་བཞིན་གྱི་སྐད་བརྡ་རིག་པའི་སློབ་སྦྱོང་གི་སྟེགས་བུ་ཞིག་འདོན་སྤྲོད་བྱ་ཆེད་མ་འོངས་པར་དེ་འབྲེལ་གྱི་ལས་ཀ་མུ་མཐུད་དུ་བསྒྲུབ་འཆར་ཡོད་པས་དཔྱོད་ལྡན་ཀུན་གྱིས་ཐུགས་ཁུར་དང་རྒྱབ་སྐྱོབ་གནང་བར་བཀའ་དྲིན་ཞུ།

བོད་ཀྱི་སྐད་ཡིག་བགྲོ་གླེང་ཚོགས་འདུ་སྐབས་དང་པོ་ནན་ཁའེ་སློབ་ཆེན་དུ་འཚོགས་པ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10