ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། མཉམ་འབྲེལ་རྒྱལ་ཚོགས་ཀྱི་སློབ་གསོ་དང་ཚན་རིག་རིག་གནས་རྩ་འཛུགས་ཀྱི་འཛམ་གླིང་ཤུལ་བཞག་ཨུ་ཡོན་ལྷན་ཁང་གི་གྲོས་ཚོགས་སྐབས་སོ་དགུ་བ་ཚེས་ཉེར་བརྒྱད་ཉིན་གྱི་དགོང་མོར་འཇར་མན་གྱི་པའོ་ཨིན་ནས་ཚོགས་མགོ་བརྩམས།ཚོགས་ཆེན་ནས་སྐོར་ཐེངས་གསར་བའི་འཛམ་གླིང་རང་བྱུང་དང་རིག་གནས་ཤུལ་བཞག་ལས་གཞི་སྐོར་ཐེངས་གསར་བར་གྲོས་ཞིབ་བྱས་ཏེ།འཛམ་གླིང་ཤུལ་བཞག་གི་མིང་ཐོའི་ནང་བཞག་པའི་སྲུང་སྐྱོབ་བྱ་བར་ལྟ་རྟོག་མཛུབ་སྟོན་བྱས།འཛམ་གླིང་ཤུལ་བཞག་ལ་སྲུང་སྐྱོབ་བྱས་ཏེ་ཐལ་སྤྱོད་རྩ་འཛུགས་ཀྱི་གཏོར་བརླག་ཐེབས་པར་སྔོན་འགོག་བྱེད་པ་ནི་ཐེངས་འདིའི་ཚོགས་ཆེན་གྱི་གཙོ་གནད་ཡིན།མཉམ་འབྲེལ་རྒྱལ་ཚོགས་ཀྱི་སློབ་གསོ་དང་ཚན་རིག་རིག་གནས་རྩ་འཛུགས་ཀྱི་སྤྱི་ཁྱབ་ལས་འཛིན་པ་པའོ་ཁི་ཝ་ཡིས་ཚོགས་ཆེན་མགོ་རྩོམ་པའི་མཛད་སྒོའི་སྟེང་བཤད་རྒྱུར།འཛམ་གླིང་ཤུལ་བཞག་ལ་གཏོར་བརླག་གཏོང་བ་ནི་མི་ཆོས་རིང་ལུགས་ཀྱི་ཉམས་ཉེན་དང་བདེ་འཇགས་ཉམས་ཉེན་གྱི་གནད་འགག་གི་ཁག་ཅིག་ཡིན་པ་དང་།འཛམ་གླིང་ཤུལ་བཞག་ལ་སྲུང་སྐྱོབ་བྱེད་པ་དང་མིའི་རིགས་ཀྱི་ཚེ་སྲོག་ལ་སྲུང་སྐྱོབ་བྱེད་པ་གཉིས་ཁ་འབྲལ་ཐབས་མེད་ཟེར།མཉམ་འབྲེལ་རྒྱལ་ཚོགས་ཀྱི་སློབ་གསོ་དང་ཚན་རིག་རིག་གནས་རྩ་འཛུགས་ཀྱི་ཚོགས་ཆེན་སྐབས་སོ་བདུན་པའི་ཀྲུའུ་ཞི།ཀྲུང་གོའི་སློབ་གསོ་པུའུ་ཡི་པུའུ་ཀྲང་གཞོན་པ་ཧི་ཕེན་གྱིས་མགོ་རྩོམ་པའི་མཛད་སྒོའི་སྟེང་གཏམ་བཤད་སྤེལ་ཏེ།དེང་སྐབས་འཛམ་གླིང་ཤུལ་བཞག་སྲུང་སྐྱོབ་ཐད་རང་བྱུང་གནོད་འཚེ་དང་མིས་བཟོས་གནོད་འཚེ་ཟུང་གི་འགྲན་རྩོད་ཐེབས་ཡོད།ཉེ་སྔོན་ཐུ་ནི་ཞི་ཡཱ་དང་ཧྥ་རན་སི།ཁི་ཝེ་ཐི་བཅས་ནས་འཇིགས་སྐུལ་དོན་རྐྱེན་བྱུང་བ་དང་།ཡང་བསྐྱར་རིག་གནས་བཟོད་སྒོམ་དང་འཛམ་གླིང་གི་ཞི་བདེ་ལ་ཡར་སྐུལ་བྱེད་པའི་གལ་ཆེན་རང་བཞིན་གསལ་བཤད་བྱས་ཡོད།ཁོས་ད་རུང་འཛམ་གླིང་ཤུལ་བཞག་སྲུང་སྐྱོབ་ལ་ཤུགས་སྣོན་པའི་གྲོས་གཞི་བཏོན་ཏེ།ཤུལ་བཞག་ཨུ་ཡོན་ལྷན་ཁང་གི་བཅོས་བསྒྱུར་དང་འཕེལ་རྒྱས་སུ་འགྲོ་བཞིན་པའི་རྒྱལ་ཁབ་ཀྱི་ཤུལ་བཞག་སྲུང་སྐྱོབ་དོ་དམ་ལ་ཤུགས་སྣོན་པར་རྒྱབ་སྐྱོར་དང་།ཤུལ་བཞག་གི་སློབ་གསོའི་བྱེད་ནུས་འདོན་སྤྲོད་བྱེད་པ་སོགས་ཕྱོགས་མང་བོར་འབྲེལ་ཡོད།རྒྱུས་ལོན་བྱུང་བ་ལྟར་ན།ཐེངས་འདིའི་ཚོགས་ཆེན་ནས་ཤུལ་བཞག་ལ་རེ་ཞུ་བྱེད་པའི་ལས་གཞི་སོ་བརྒྱད་ལ་གྲོས་ཞིབ་བྱེད་རྒྱུ་ཡིན་པ་དང་།དེའི་ནང་རང་བྱུང་ཤུལ་བཞག་གི་ལས་གཞི་ལྔ་དང་།རིག་གནས་ཤུལ་བཞག་སྣ་སོ་གཉིས།རང་བྱུང་དང་རིག་གནས་ཟུང་ལྡན་གྱི་ཤུལ་བཞག་སྣ་གཅིག་བཅས་ཡོད།  །