འབར་མའི་རྒྱལ་སྲུང་དམག་དཔུང་གི་དམག་སྤྱི་ཁང་གིས་ཚེས་བདུན་ཉིན་གྱི་དགོང་མོར་ཁྱབ་སྒྲོག་བྱས་དོན། དམག་ཕྱོགས་ཀྱིས་དམག་བཀོལ་གྲུ་གཟིངས་དགུ་དང་གནམ་གྲུ་གསུམ་མངག་ནས་ཉིན་དེར་གར་སོང་མ་རྙེད་པའི་དམག་བཀོལ་སྐྱེལ་འདྲེན་གནམ་གྲུ་སྔོག་བཤེར་བྱེད་བཞིན་ཡོད་ཟེར། སྐྱེལ་འདྲེན་གནམ་གྲུ་དེའི་སྟེང་མི་བརྒྱ་དང་ཉེར་གཉིས་ཡོད་ཟེར།

འབར་མའི་རྒྱལ་སྲུང་དམག་དཔུང་གི་དམག་སྤྱི་ཁང་གིས་ཉིན་དེའི་དགོང་མོར་བསྒྲགས་པ་ལྟར་ན། གནམ་གྲུའི་སྟེང་མི་བརྒྱ་དང་ཉེར་གཉིས་ཡོད་པ་དང་། གནམ་གྲུའི་སྟེང་གི་ལས་བྱེད་མི་སྣ་བཅུ་བཞི་དང་འགྲུལ་བ་བརྒྱ་དང་བརྒྱད་ཡོད། འགྲུལ་བའི་ཁྲོད་དམག་མི་སོ་ལྔ་དང་། དམག་མིའི་ཁྱིམ་མི་དར་མ་ང་བརྒྱད་དང་བྱིས་པ་བཅོ་ལྔ་ཡོད་ཟེར།

འབར་མའི་རྒྱལ་སྲུང་དམག་དཔུང་གི་དམག་སྤྱི་ཁང་གིས་བསྒྲགས་པ་ལྟར་ན། གནམ་གྲུ་དེ་ཚེས་བདུན་ཉིན་གྱི་ཕྱི་དྲོའི་དུས་ཚོད་གཅིག་དང་སྐར་མ་དྲུག་གི་སྟེང་ལྷོ་ཕྱོགས་ཀྱི་ཏི་ལིན་ཏཱ་དབྱེ་ཞིང་ཆེན་གྱི་མཚོ་འགྲམ་གྲོང་ཁྱེར་ཏན་ལའོ་ནས་འཕུར་བ་དང་། སྔོན་གྱི་འཆར་གཞི་ལྟར་ན་དབྱང་ཀོང་ལ་འཕུར་རྩིས་ཡིན་པ་རེད། ཕྱི་དྲོའི་དུས་ཚོད་གཅིག་དང་སྐར་མ་སོ་ལྔའི་སྟེང་གནམ་གྲུ་དེས་ཞིང་ཆེན་དེའི་ལྟེ་གནས་གྲོང་ཁྱེར་ཐུའུ་ཝའི་ལྷོ་ནུབ་ཕྱོགས་ཀྱི་སྤྱི་ལེ་རེ་དགུའི་མཚམས་སུ་ཆེས་མཇུག་མཐར་ཐུའུ་ཝ་གནམ་གྲུ་ཐང་ལ་འབྲེལ་གཏུག་བྱས་རྗེས་གར་སོང་མ་རྙེད་པ་རེད།

འབར་མའི་དམག་ཕྱོགས་ཀྱིས་བསྟན་དོན། ཉིན་དེའི་ཕྱི་དྲོའི་དུས་ཚོད་གཉིས་ནས་བཟུང་། འབར་མའི་མཁའ་དམག་དང་མཚོ་དམག སྐམ་དམག་བཅས་ཀྱིས་གནམ་གྲུ་གར་སོང་མ་རྙེད་པའི་གནས་དེར་སྔོག་བཤེར་བྱས་པ་དང་། དམག་བཀོལ་གྱི་གྲུ་གཟིངས་རེ་འགའ་ཡང་སྔོག་བཤེར་བྱ་བར་ཞུགས་ཡོད་ཟེར།

འབར་མའི་དམག་ཕྱོགས་ཀྱིས་གསར་འགོད་པར་བཤད་རྒྱུར། གར་སོང་མ་རྙེད་པའི་གནམ་གྲུ་དེ་སར་ལྷུང་བ་དང་། གནམ་གྲུའི་ཆག་རོ་ཁག་ཅིག་རྙེད་ཡོད་ཀྱང་གཞི་གྲངས་སྒམ་ཆུང་ད་རུང་རྙེད་མེད་ཟེར།

གཞན་ཡང་འབར་མའི་ས་གནས་གསར་འགྱུར་ལས་རིགས་ཀྱིས་བསྒྲགས་པ་ལྟར་ན། གནམ་གྲུ་གར་སོང་མ་རྙེད་པའི་གནས་དེ་ནས་སྲོག་ཉེན་ལས་ཐར་བའི་མི་གསུམ་རྙེད་ཡོད་ཟེར།

གནམ་གྲུ་ཐང་གི་འབྲེལ་ཡོད་མི་སྣས་བཤད་རྒྱུར། ང་ཚོས་བལྟས་ན་ལག་རྩལ་གྱི་གནད་དོན་ཡིན་སྲིད། ཉིན་དེར་ནམ་ཟླ་ཧ་ཅང་བཟང་ཟེར།