ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ5པའི་ཚེས9ཉིན་འབྱོར་བའི་གཏམ་གསར། ཟླ་བ5པའི་ཚེས9ཉིན་ཨུ་རུ་སུ་དང་ཅེ་ཨའེ་ཅེ་སི་ཐན་སོགས་རྒྱལ་ཁབ་ཀྱིས་དགའ་སྟོན་རྟེན་འབྲེལ་གྱི་བྱེད་སྒོ་གཟབ་རྒྱས་སྤེལ་ནས་ཧྥ་ཤི་སིའི་དམག་འཐབ་ལ་ངོ་རྒོལ་ནས་རྒྱལ་ཁ་ཐོབ་ནས་ལོ70འཁོར་བར་དྲན་གསོ་ཞུས། ཀྲུང་གོ་མི་དམངས་བཅིངས་འགྲོལ་དམག་གི་སྐམ་མཚོ་མཁའ་གསུམ་གྱི་གཟབ་སྦྲེང་རུ་ཁག་དེ་ཨུ་རུ་སུར་འཚོགས་པའི་རྒྱལ་སྲུང་དམག་འཐབ་རྒྱལ་ཁ་ཐོབ་ནས་ལོ70འཁོར་བར་དྲན་གསོ་ཞུས་པའི་བྱེད་སྒོར་ཞུགས། དཔྱིད་དཔལ་གྱི་ཉི་འོད་ཁྲོད་དུ་མི102ལས་གྲུབ་པའི་ཀྲུང་གོའི་མི་དམངས་བཅིངས་འགྲོལ་དམག་མི་གཟབ་སྦྲེང་རུ་ཁག་གྲུ་བཞི་མས་ཁ་ཆིའུ་ཧྲ་ཞེས་པའི་དབྱངས་རྟ་དང་བསྟུན་ནས་སྤོབས་པ་ཆེར་བསྐྱེད་ཀྱིས་མོ་སུ་ཁོའི་ཐང་ཆེན་དམར་པོར་བསྐྱོད་དེ་དམག་གི་རྫིག་ཉམས་སྟོན་ཞིང་རྒྱལ་ཁབ་ཀྱི་གཟི་བརྗིད་ངོམས། ཀྲུང་གོ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་གཟིགས་ཞིབ་སྟེགས་བུའི་ཐོག་ནས་ཁོང་ཚོ་ལ་ཕྱག་བརྡ་མཛད་དེ་གུས་ལན་གནང་བ་རེད།

　མོ་སུ་ཁོའི་ཐང་ཆེན་དམར་པོ་རུ་གཟིགས་ཞིབ་ལ་དང་ལེན་ཞུས་པའི་ཀྲུང་གོའི་དམག་མིར་མི་ཁྲི་སྟོང་གིས་དོ་སྣང་བྱས། ཀྲུང་གོའི་དམག་དཔུང་གི་རྣམ་པ་དང་སྙིང་སྟོབས། དངོས་ཤུགས་མཚོན་པའི་གཟབ་སྦྲེང་རུ་ཁག་གྲུ་བཞི་མ་མཐོང་དུས་ཀྲུང་གོ་དང་ཨུ་རུ་སུ་རྒྱལ་ཁབ་དང་རྒྱལ་ཁབ་གཉིས་ཀྱི་དམག་མིས་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་པར་ཕུལ་བའི་རང་སྲོག་བློས་བཏང་དང་བྱས་རྗེས་རྗེས་སུ་དྲན་པར་བྱས་ལ་ཀྲུང་གོ་དང་ཨུ་རུ་སུ་རྒྱལ་ཁབ་གཉིས་དང་རྒྱལ་ཁབ་གཉིས་ཀྱི་དམག་མིས་ཕྱོགས་ཡོངས་ཀྱི་འཐབ་ཇུས་མཐུན་སྦྱོར་གྱི་འབྲེལ་བ་མངོན་ཞིང་། རྒྱལ་ཁབ་གཉིས་ཀྱིས་ཐུན་མོང་ཐོག་འཛམ་གླིང་ཞི་བདེ་དང་འཕེལ་རྒྱས་ལ་སྲུང་སྐྱོང་བྱ་རྒྱུའི་ལས་འགན་ཁུར་དུ་འདེགས་པ་རེད།

　དམག་འཁྲུག་གང་སར་ཁྱབ་པའི་ལོ་དུས་ནང་ཀྲུང་གོ་དང་ཨུ་རུ་སུའི་མི་དམངས་ཀྱིས་ཕན་ཚུན་ལ་རྒྱབ་སྐྱོར་དང་རོགས་རེས། ལག་གདང་སྦྲེལ་ནས་འཐབ་འཛིང་བྱས་ཡོད། 

 ཚེས8ཉིན་མོ་སུ་ཁོར་ཀྲུང་གོ་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨུ་རུ་སུའི་འཐབ་འཛིང་པ་རྒས་གྲས་ཀྱི་འཐུས་མི18ལ་མཇལ་འཕྲད་གནང་སྟེ། ཁོ་ཚོ་ལ་དྲན་རྟེན་གྱི་བྱ་དགའ་གནང་བར་མ་ཟད་ཟོལ་མེད་ཀྱིས་འཚམས་འདྲི་དང་བླ་མེད་ཀྱིས་གུས་འདུད་ཞུས་པ་རེད།

　　དམག་འཁྲུག་ལ་དྲན་རྟེན་བྱས་པ་ནི་དམག་འཁྲུག་མི་ཡོང་བའི་ཆེད་དུ་ཡིན་ཞིང་། ལོ70ཡི་སྔོན་དུ་ཀྲུང་གོ་དང་ཨུ་རུ་སུ་རྒྱལ་ཁབ་གཉིས་ཀྱིས་འཛམ་གླིང་གི་ཧྥ་ཤི་སིར་ངོ་རྒོལ་བྱས་པའི་དམག་འཁྲུག་ལ་རྒྱལ་ཁ་ཐོབ་པར་བླ་མེད་ཀྱི་བྱས་རྗེས་བཞག་ཡོད། དུས་རབས21པའི་ད་ལྟར། རྒྱལ་ཁབ་གཉིས་དེ་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་གྱི་རྒྱལ་ཁབ་ཡིན་པར་མཚོན་ན། འཛམ་གླིང་དམག་འཁྲུག་གཉིས་པའི་རྒྱལ་ཁ་གྲུབ་འབྲས་དང་རྒྱལ་སྤྱིའི་དྲང་གཞག་དྲང་བདེན་ཐུན་མོང་དུ་སྲུང་སྐྱོབ་དང་། རྒྱལ་སྤྱིའི་སྒྲིག་ལམ་དེ་དེ་བས་དྲང་བདེན་འོས་འཚམ་གྱི་ཕྱོགས་སུ་འཕེལ་བར་སྐུལ་འདེད་གཏོང་བ། ས་ཁུལ་དང་འཛམ་གླིང་གི་ཞི་བདེ་དང་བདེ་འཇགས། བརྟན་བརླིང་བཅས་ཡོང་བར་འགན་ཆེན་པོ་བཞེས་ཡོད་པ་རེད།

　ཀྲུང་གོའི་དམག་མི་མོ་སུ་ཁོའི་ཐང་ཆེན་དམར་པོར་བསྐྱོད་པའི་སྒྲ་གདངས་གསལ་ཞིང་ཤུགས་དང་ལྡན་པའི་གོམ་བགྲོད་ནང་ཀྲུང་གོས་འཛམ་གླིང་ཞི་བདེ་ལ་གཅེས་འཛིན་དང་སྲུང་སྐྱོང་བྱེད་ཅིང་འཛམ་གླིང་རྒྱལ་ཁབ་ཁག་དང་མཉམ་དུ་མཛེས་སྡུག་ལྡན་པའི་མ་འོངས་པ་བསྐྲུན་རྒྱུའི་སེམས་ཐག་དང་ཡིད་ཆེས་འཁོར་བཞིན་འདུག་གོ།