ཨ་མེ་རི་ཁས་སོ་ཏི་ཨ་རབ་ལ་མཚོན་ཆ་སྐྱེལ་འདྲེན་བྱས་ཏེ་ཡེ་མིན་གྱི་དམག་དོན་འགུལ་སྐྱོད་ལ་རྒྱབ་སྐྱོར་བྱས།
མཚོ་སྔོན་བོད་སྐད་རླུང་འཕྲིན། 2015-04-09
ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཨ་མེ་རི་ཁའི་རྒྱལ་སྲིད་སྤྱི་ཁྱབ་ཁང་གི་རྒྱལ་སྲིད་བློན་ཆེན་གཞོན་པ་པུའུ་ལིན་ཁུན་གྱིས་ཚེས་བདུན་ཉིན་སོ་ཏི་ཨ་རབ་ཀྱི་རྒྱལ་ས་ལེ་ཡཱ་ཏི་ནས་བཤད་རྒྱུར།ཨ་མེ་རི་ཁས་སོ་ཏི་ཨ་རབ་ཏུ་མཚོན་ཆ་སྐྱེལ་འདྲེན་བྱེད་པའི་གོམ་སྟབས་ཇེ་མགྱོགས་སུ་བཏང་སྟེ།ཡེ་མིན་གྱི་ཧུའུ་སེ་དྲག་ཆས་རྩ་འཛུགས་ལ་དམིགས་པའི་དམག་དོན་འགུལ་སྐྱོད་ལ་རྒྱབ་སྐྱོར་བྱེད་བཞིན་ཡོད་ཟེར། པུའུ་ལིན་ཁུན་གྱིས་སོ་ཏི་ཨ་རབ་ཀྱི་དཔོན་རིགས་ལ་ཐུག་འཕྲད་བྱས་རྗེས་གསར་འགོད་པར་བཤད་རྒྱུར།སོ་ཏི་ཨ་རབ་ཀྱིས་དམག་དོན་འགུལ་སྐྱོད་སྤེལ་བ་ནི་ཡེ་མིན་གྱི་ཧུའུ་སེ་དྲག་ཆས་རྩ་འཛུགས་དང་དེའི་རྒྱབ་སྐྱོར་མཁན་ལ་དྲག་ཤུགས་ལ་བརྟེན་ནས་ཁྲིམས་མཐུན་གྱི་སྲིད་དབང་ཞིག་རྩ་རྫོགས་བྱེད་མི་རུང་ཉེན་བརྡ་གསལ་བོ་བཏང་བ་རེད་ཟེར།པུའུ་ལིན་ཁུན་གྱིས་བཤད་རྒྱུར།སོ་ཏི་ཨ་རབ་ལ་རྒྱབ་སྐྱོར་བྱེད་ཆེད།ཨ་མེ་རི་ཁས་མཚོན་ཆ་སྐྱེལ་འདྲེན་བྱེད་པའི་གོམ་སྟབས་ཇེ་མགྱོགས་སུ་གཏོང་བཞིན་ཡོད་པ་དང་།གསང་འཕྲིན་མཉམ་སྤྱོད་བྱེད་པར་མ་ཟད་ཐུན་མོང་གི་མཐུན་སྦྱོར་ནང་རྐྱེན་འཛུགས་ཀིན་ཡོད་ཟེར།པུའུ་ལིན་ཁུན་གྱིས་ད་རུང་བཤད་རྒྱུར།ཨ་མེ་རི་ཁས་བལྟས་ན་སྐབས་ཐོག་འདིར་སོ་ཏི་ཨ་རབ་དང་བཅས་པའི་མཚོ་ཁུགས་རྒྱལ་ཁབ་བར་གྱི་མཉམ་ལས་ལ་ཤུགས་སྣོན་པ་དེ་སྔོན་ཆད་ཀྱི་དུས་གང་རུང་ལས་གལ་འགངས་ཆེ་བ་ཡིན།དམིགས་ཡུལ་ནི་ཡེ་མིན་གྱི་ཕྱོགས་སོ་སོ་དང་།ཁྱད་པར་དུ་ཧུའུ་སེ་དྲག་ཆས་རྩ་འཛུགས་དང་དེའི་རྒྱབ་སྐྱོར་མཁན་དག་གིས་དེའི་སྔོན་བཀོད་པའི་ཆབ་སྲིད་ཐག་གཅོད་ཇུས་གཞི་བརྩི་སྲུང་བྱེད་པར་སྐུལ་མ་གཏོང་བའི་ཆེད་ཡིན་ཟེར།པུའུ་ལིན་ཁུན་གྱིས་ཉིན་དེར་ད་རུང་ཡེ་མིན་གྱི་ཡཱ་ཏེན་ས་བྲོས་བྱོལ་བྱས་ཏེ་ལེ་ཡཱ་ཏི་རུ་ཡོང་བའི་ཡེ་མིན་གྱི་ཙུང་ཐུང་ཧཱ་ཏིས་དང་གྲོས་མོལ་བྱས། །